Etapa di Kriansa di yu

Lesa Génesis 18:11, 30:1, 1 Samuel 1:1-8, i Lukas 1:7. Kiko e hendenan akí tin en komun? Kon Dios a kontestá nan anhelonan?

Yunan ta un bendishon. Pero pa algun rason Dios no semper ta bendishoná tur hende ku yu. Algun ta spera i hasi orashon pa un famia, i Dios pa medio di Su grasia ta konsedé nan petishon, tin biaha bastante milagrosamente, manera den kaso di Sara; otronan ta mes ferviente den nan petishonnan dilanti di e trono di Dios ta topa ku un silensio ku ta hasi surdu. Kada biaha nan ta mira nan amigunan ta alabá Dios pa nan embarasonan i ora nan ta duna bonbiní na nan beibinan, e ta intensifiká e profundidat di e herida ora nan ta kontemplá nan nèshi bashí. Asta preguntanan inosente manera “Kuantu yu bo tin?” ta sirbi komo un rekordatorio doloroso di un klup eksklusivo ku esnan sin yu ta ser ekskluí di dje, aunke nan por ke uni e.

Esnan ku a pasa dor di un eksperensia asina mester yega na aseptá ku Dios ta komprondé nan doló. E salmista ta deklará di Dios: “Bo ta tuma nota di tur mi tristesanan. Bo a kolektá tur mi lágrimanan den Bo bòter. Bo a registrá kada un den Bo buki” (Salmo 56:8, NLT). Aunke E ta parse ketu, “Señor ta manera un tata pa Su yunan, tierno i ku kompashon pa esnan ku ta tem’E” (Salmo 103:13, NLT).

Otro hendenan, mientrastantu, pa vários motibu, kisas ta skohe simplemente pa no tin yu. Bo por komprondé den un mundu manera esun di nos, asina yen di sufrimentu, doló, maldat, i potensial kalamidat, dikon algun kisas ta skohe pa no trese mas hende den dje. Den algun kaso, algun hende kisas ta skohe pa adoptá yunan na lugá di tin di nan mes; di e forma ei nan por kria yunan ku t’aki kaba, i hopi biaha ta duna nan un chèns di un bida muchu mas mihó ku loke kisas di otro forma nan lo tabatin.

Nos mundu ta un lugá kompliká, i probablemente nos ta topa tur sorto di hende den tur sorto di situashon respekto tin òf no tin yu. Den kualke situashon ku nos haña nos mes respekto e kuestion di yu, nos por biba ku e siguransa di e amor di Dios pa nos i Su deseo pa nos bon fin. Na mes momentu, tambe, laga nos kòrda semper pa ta tan sensitivo ku nos por pa ku hendenan ku, pa kualke motibu, no tin yu.

Un fenómeno ku mundu ta afrontá ta esun di mayornan soltero, hopi bia ma no semper un hende muhé komo e mayor soltero.

Tin biaha nos ta pensa riba mayornan soltero komo esnan ku a konsebí un yu pafó di matrimonio. Sinembargo, esei no semper ta e kaso. Hagar a ser preshoná pa haña un yu ku Abraham, i despues a ser fòrsá pa bai ku su yu (Gen. 16:3, 4; 21:17). Bètsabé a sali na estado komo resultado di e avanse seksual di un hòmber poderoso (2 Sam. 11:4, 5). Elias a ser mandá na un pueblo yamá Sarepta pa yuda un mama soltero ku tabata biuda (1 Reinan 17:9). Pa momentu ku Hesus a kuminsá Su ministerio, Hosé, Su tata adoptivo, a muri, lagando Maria biuda i mama soltero. “Morto a separ’é for di Hosé, ku a kompartí su konosementu di e misterio di e nasementu di Hesus. Awor no tabatin niun hende na ken e por a konfia su speransa- i temornan. E dos lunanan ku a pas tabata di hopi tristesa”. – Ellen G. White, The Desire of Ages, p. 145.

Siendo un mayor soltero ta kisas un di e trabounan di mas desafiante ku un persona por tin. Hopi ta afrontá difikultatnan, manera manehá nan finansa, trata ku e otro mayor, òf simplemente tin tempu pa nan mes òf pa pasa tempu ku Dios, i puntra nan mes si hamas nan lo ser stimá atrobe.

Ki promesanan kualke hende, inkluyendo mayornan soltero, por saka for di e siguiente versíkulonan: Jer. 31:25; Mat. 11:28; Jer. 29:11; Jer. 32:27; Prov. 3:5, 6; Isa. 43: 1, 2.

Nos, komo iglesia, tin e responsabilidat di yuda mayornan soltero. Santiago a skirbi: “Religion puru i sin mancha dilanti di Dios i e Tata ta esaki: pa bishitá huérfano- i buidanan den nan problema” (Santiago 1:27, NKJV). Bo por añadí, en prinsipio, “i mayornan soltero den nan problema, tambe”. E yudansa ku nos por ofresé no mester ta solamente finansiero. Nos lo por permití nan di tin un sosiegu dor di tuma nan yunan pa un ratu pa nan por hasi otro trabounan, sosegá, hasi orashon, i studia e Palabra di Dios. Nos por sirbi komo mentornan pa nan yunan òf yuda drecha kos rondó di kas. Nos por ta e mannan di Dios den numeroso forma pa yuda sostené mayornan soltero.

Lesa Salmo 127. Kiko ta e mensahe básiko di e salmo kòrtiku akí? Ki prinsipionan importante nos mester saka for di dje pa nos mes i kon nos ta biba?

Ora bo ke kushiná bo kuminda faborito, bo ta sigui un reseta. Si bo añadí tur e ingredientenan nesesario i sigui tur e pasonan, mayoria biaha bo ta haña e resultadonan deseá. Kria yu sinembargo, no ta manera kushiná. Niun mucha ta eksaktamente meskos ku niun otro mucha, i asta si bo hasi tur kos ku bo a hasi ku otro muchanan, nan por resultá diferente. Esaki por tin di aber ku nan género, e órden den kua nan a nase, nan temperamentu, òf un kantidat di otro motibunan. Den e plan di Dios, mayornan mester guia i siña nan yunan pa stima i obedes’E (Deut. 6:4-9, Salmo 78:5-7). E instrukshon di Dios pa mayornan ta pa “instruí un mucha den e kaminda ku e mester bai” (Prov. 22:6, NKJV), no pa ta riba e muchanan pa sigurá ku nunka nan ta tuma desishonnan robes.

Miéntras nos ke mira nos yunan pasa di hendenan chikitu, tierno i indefenso na adultonan independiente i eksitoso, nos responsabilidat final ta pa nan yega na konosé, stima i sirbi Hesukristu. Komo mayornan, nos por sigui e plan pa e desaroyo spiritual di nos yunan deskribí den Deuteronomio 6. Tin kuater rekerimentu importante: Pa nos rekonosé “Señor nos Dios” (Deut. 6:4), pa nos stim’E plenamente di kurason (Deut. 6:5), pa nos tesorá Su Palabra (Deut. 6:6), i pa nos kompartí ku nos yunan loke nos sa tokante djE (Deut. 6:20-23)

Deuteronomio 6 ta kontinuá pa proveé dos prinsipio importante. Di promé, e prinsipio di “siña-papia” (Deut. 6:7). Siña te referí na edukashon formal, miéntras papia ta referí na instrukshon informal. Den tur dos kaso, e komunikashon di bèrdat bíbliko ta tuma lugá denter di e konteksto di e relashon mayor-yu. Momentunan formal di siñamentu por sosodé durante kulto familiar segun ku nos ta studia e Palabra di Dios ku nan. Siñansa informal ta surgi di forma spontáneo den e sirkunstansianan di bida diario i ta ainda mas importante. Insidentenan diario por bira vehíkulonan efektivo pa komuniká bèrdatnan bíbliko (Gen. 18:19). E di dos ta e prinsipio di “mara-skirbi” (Deut. 6:8, 9). Bèrdat spiritual mester ser mará den nos akshonnan (“man”) i aktitutnan (“kabes”), pero e mester ser skirbí tambe den nos bida privá (“kozeinnan di porta”) i públiko (“portanan di kurá”). E mester pasa di nos kurason pa nos hogar i di nos hogar pa e mundu.

Lesa Génesis 18:18, 19 i 1 Samuel 3:10-14. Kontrastá e dos tatanan akí. Kiko tabata e resultadonan di nan estilo di kriansa?

Mayornan tin un responsabilidat di forma nan yunan komo disipelnan di Hesus, pa nan mes lo bira disipelnan di Hesus. Tin mayor ku ta kere ku e forma di siña i koregí nan yunan ta dor di apliká kastigu físiko, mas tantu, mihó (Prov. 22:15, 23:13, 29:15). Pasashinan manera esakinan a ser malusá pa abuzá di muchanan i fòrsa nan den sumishon total, pero hopi biaha esei a hiba tambe na rebeldia kontra nan mayornan i Dios.

Beibel ta siña mayornan pa goberná ku bondat (Efe. 6:4, Kol. 3:21) i pa instruí yunan den hustisia (Salmo 78:5, Prov. 22:6, Isa. 38:19, Joel 1:3). Komo mayornan nos mester proveé pa nos yunan (2 Kor. 12:14) i establesé un bon ehèmpel pa nan sigui (Gen. 18:19, Eks. 13:8, Tito 2:2). Nos ta ser bisá pa dirigí nos hogarnan bon (1 Tim. 3:4, 5, 12) i pa disipliná nos yunan (Prov. 29:15, 17) miéntras na mes momentu reflehá e amor di Dios (Isa. 66:13, Salmo 103:13, Lukas 11:11).

Lamentablemente, Beibel ta revelá storianan di kriansa ku a bai robes. Isaac i Rebeka a hunga faborito ku nan yunan, Esau i Jacob (Gen. 25:28), i despues Jacob a desplegá e mesun aktitut pa ku Hosé (Gen. 37:3). Eli, aunke e tabata un lider religioso, a faya di koregí su yunan (1 Sam. 3:10-14). Samuel, ku tambe a ser kriá dor di Eli, a resultá di ta e mes un tata hopi defisiente (1 Sam. 8:1-6). Rei David, dor di a kometé adulterio i ordená un asesinato, a siña su yunan ku a sigui su ehèmpel. Rei Manases a sakrifiká su yunan na demoñonan (2 Reinan 21:1- 9), meskos ku Rei Ahaz a hasi (2 Reinan 16:2-4).

Afortunadamente, sinembargo, den e Skrituranan nos ta haña tambe algun ehèmpel di bon kriansa di yu. Mordekai tabata un tata adoptivo maravioso pa Hadasa, Reina Ester (Esther 2:7), i Job tabata hasi orashon regularmente pa su yunan (Job 1:4, 5). Den tur e ehèmpelnan akí, bon i malu, nos por saka lèsnan riba kriansa di yu.

Lesa Proverbionan 22:6. Kiko ta bo komprondementu di e pasashi akí? Esaki ta un garantia, un promesa, òf un probabilidat?

Tin biaha, komo mayor, bo ta hasi tur loke bo mester hasi: pasa tempu siñando bo yunan e kosnan korekto, biba di akuerdo ku bo konosementu di Dios, manda nan bon skolnan, asistí na iglesia regularmente, bira enbolbí den obra mishonero ku nan, i nan ta resultá bandonando e fe den kua bo a lanta nan. E kantidat di doló ta insoportabel, i no tin niun momentu di sosiegu di bo preokupashon pa nan salbashon. E motibu no ta nesesariamente falta di e mayor. Muchanan tin mente di nan mes i ta finalmente responsabel na Dios pa nan akshonnan.

Algun a tuma e palabranan “ora e ta bieu e lo no apartá for di dje” komo un promesa, un garantia ku kriansa adekuá semper lo resultá den salbashon di nan yu. Pero Proverbionan hopi biaha ta duna nos prinsipionan i no semper promesanan inkondishonal. Loke nos por saka for di e tèkst akí ta e siguransa ku e lèsnan siñá den infansia lo dura un bida largu. Tur mucha ta alkansá un edat ora nan sea lo aseptá e herensia di nan mayornan komo di nan mes òf rechas’é. E mayornan ei ku tabata kuidadoso pa proveé nan yunan ku entrenamentu piadoso tin e siguransa ku loke nan a siña nan yunan lo keda semper ku nan, i si òf ora nan yunan apartá nan mes, e simianan ku nan a planta den nan kurason lo ta kontinuamente den nan, yamando nan pa bin kas bèk. Ser un bon mayor ta nos eskoho; kon nos yunan bira, ta nan eskoho.

Kiko un mayor mester hasi ora un yu dual? Entregá bo yunan na Dios den orashon ferviente. Si kualke hende ta komprondé bo doló, esei ta Dios, kende Su yunan, pa biónes, a bira nan lomba p’E, e mayor perfekto. Bo por sostené bo pródigonan ku amor i orashon i ta kla pa para banda di nan miéntras nan ta lucha ku Dios.

No sea muchu bergonsá pa pidi pa sosten i orashon, no kulpa bo mes, i no sea asina enfoká riba e pródigo ku bo ta lubidá sobrá di e famia. Kria un yu pródigo por dividí bo hogar; asina, konstruí un frente unifiká ku bo pareha i establesé límitenan kla pa bo yu. Kòrda ku Dios ta stima bo yu mas ku abo ta stim’é, wak na un futuro mas briante, i aseptá ku bo yu ta obra di Dios den proseso.

“Bo mester tuma tempu pa papia i hasi orashon ku bo yunan chikitu, i bo no mester laga nada interumpí e etapa ei di komunion ku Dios i ku bo yunan. Bo por bisa bo bishitantenan: ‘Dios a duna mi un trabou pa hasi, i mi no tin tempu pa hasi redu’. Bo mester sinti ku bo tin un obra pa hasi pa tempu i pa eternidat. Bo debe bo promé deber na bo yunan”. – Ellen G. White, The Adventist Home, pp. 266, 267.

“Mayornan, boso mester kuminsá boso promé lès di disiplina ora boso yunan ta beibinan den boso brasa. Siña nan pa someté nan boluntat na esun di bo. Esaki por ser hasí ku serenidat, i manifestando firmesa. Mayornan mester tin kontròl perfekto riba nan propio spiritu, i ku mansedumbre i tòg firmesa dobla e boluntat di e yu te ora e lo no deseá nada mas sino pa someté na nan deseonan. Mayornan no ta kuminsá na tempu. E promé manifestashon di genio no ta ser dominá, i e yunan ta krese tèrko, kua ta oumentá ku nan kresementu i ta fortalesé ku nan forsa”. – Ellen G. White, Testimonies for the Church, tomo 1, p. 218.