Nasementu ta un suseso tan komun i normal ku no semper nos ta apresiá totalmente e maravia ku nan ta. Imaginá loke Eva mester a sinti teniendo Cain den su brasanan. E kambionan ku e a eksperensiá den su kurpa ku tabata krese durante e lunanan ei, e doló insoportabel di parto, i despues mira e yu chikitu akí, asina paresido na nan, sinembargo asina indefenso. Ki un eksperensia e mester tabata pa Sara, den su nobenta aña i ya pasa edat di haña yu, pa kontemplá kara di su propio yu hòmber, Isaac; e mester a hari kada biaha ku e a pronunsiá su nòmber. Despues di a hasi orashon pa un yu hòmber pa ken sa kuantu tempu, Hannah a karga Samuel i a bisa: “Pa e yu aki mi a hasi orashon, i Señor a duna mi mi petishon kua mi a pidiE” (1 Sam. 1:27, NKJV). E asombro den kurason di Maria, ainda un hobensita, brasando su yu, e Yu di Dios, ku un kombinashon di asombro i miedu.
Na mes momentu, no tur hende tin e privilegio, i responsabilidat, ku ta bin ku kriansa di yu. E siman aki nos lo pasa tempu eksplorando e etapa di kriansa di yu ku su desafionan, temornan, satisfakshon, i goso.