Kreashon: Génesis komo Fundeshi, Parti 2

Frekuentemente hende ta kere ku hopi den e mundu antiguo tabata kere ku tera tabata plat. Mayoria hende, sinembargo, pa un variedat di bon motibunan, a komprondé ku e tera tabata rondó. Asta te ku awe, sinembargo, algun ta bisa ku Beibel mes ta bisa ku e tera ta plat.

Lesa Revelashon 7:1 i 20:7,8. Kiko ta e konteksto di e versíkulonan akí? Mas importante ainda, nan ta siña un tera plat?

Juan, e outor di e tèkstnan akí, ta skirbiendo profesia di tempu di fin deskribiendo e kuater angelnan di shelu "pará na e kuater skinanan di tera, wantando e kuater bientunan" (Rev. 7:1, NASB). El a ripití e palabra "kuater" tres biaha pa mara e angelnan na e kuater puntonan di kompas.

Den un palabra, e ta djis usando lenguahe figurativo, manera nos ta hasi awe ora nos bisa, por ehèmpel, ku "solo ta bahando" òf ku e bientu "a lanta for di ost". Pa insistí riba un interpretashon literal di e tekstonan profétiko akí ora e konteksto ta indiká un idea figurativo di nort, zùit, ost i wèst, ta saka e pasashinan akí for di konteksto i pone nan siña algu ku nan no ta siñando. Despues di tur kos, ora Hesus a bisa, “Pasobra for di e kurason ta prosedé pensamentunan malu, matamentu, adulterio, fornikashon, ladronisia, testimonio falsu, blasfemia" (Mat. 15:19, NKJV), E no tabata papiando tokante di fisiologia humano, òf e kurason humano literal. E tabata usando un lenguahe figurativo pa trese un punto moral dilanti.

Lesa Job 26:7-10; i Isaias 40:21,22. Kiko nan ta siña nos tokante e naturalesa di e tera?

Den Job 26:7 e tera ta ser deskribí komo ta kologá den espasio: "E ta ekstendé e parti nort riba espasio bashí i ta kologá tera riba nada" (NASB). E mundu ta un "sírkulo" òf esfera (Job 26:10, NASB). Isaias 40:22 ta deklará: "Ta E ta sinta ariba di e sírkulo di tera, i su abitantenan ta manera tirakochi, ku ta ekstendé e shelunan manera un kortina" (NKJV).

Arkeólogonan a deskubrí tekstonan di Egipto antiguo i Serkano Oriente ku ta kontené historianan primitivo di e kreashon i e diluvio. Esaki a pone ku algun ta puntra nan mes si e relato di Génesis a ser fiá for di e kulturanan akí òf tabata dependiente di un manera òf otro riba nan. Pero algu asina ta e kaso realmente?

Lesa Génesis 1-2:4, i despues lesa e sekshonnan akí for di e Epiko Atra-Hasi: "Ora e diosnan na lugá di hende/ A hasi e trabou, a karga e karganan,/ E karga di e diosnan tabata muchu pisá,/ E trabou muchu duru, e molèster demasiado/.... 'Laga e diosa-di-matris krea desendiente,/ I laga hende karga e karga di e diosnan!' ... Geshtu-e, un dios ku tabatin inteligensia,/ Nan tabata mata den nan asamblea./ Nintu a meskla klei/ Ku su karni i sanger ... " — Stephanie Dalley, Myths from Mesopotamia: Creation, the Flood, Gilgamesh, and Others (New York: Oxford University Press, 1989), pg. 9, 14, 15.? Kua diferensianan bo por mira?

Aunke tin similaridatnan entre e historianan (por ehèmpel, e promé hendenan a ser trahá di klei), e diferensianan ta muchu mas spesífiko.

1. Den Atra-Hasis hende ta traha pa e diosnan pa asina e diosnan por sosegá. Den Génesis, Dios ta krea e tera i tur kos den dje pa hende komo e korona di Kreashon, i despues E ta sosegá huntu ku nan. Den Génesis, hende a ser poné tambe den un hòfi i a ser invitá pa tin komunion ku Dios i kuida pa Su kreashon − un konsepto ku no ta ser hañá den Atra-Hasis.
2. Den Atra-Hasis, un dios menor ta ser matá i su sanger ta ser mesklá ku klei pa forma shete hòmber i muhé. Den Génesis, promé Adam ta ser "formá" íntimamente pa Dios, kende ta supla bida den dje, i muhé ta ser "trahá" despues pa ta su “yudadó" (NKJV). Dios no a krea Adam i Eva for di e sanger di un dios ku a ser matá.
3. No tin señal di konflikto òf violensia den e relato di Génesis, manera ta ser hañá den e storia di Atra-Hasis.

E relato den Beibel ta sublime ora e ta deskribí un Dios omnipotente ku ta proveé humanidat ku propósito nobel den un mundu perfekto. E diferensia radikal akí a pone eruditonan konkluí ku, finalmente, esakinan ta relatonan di kreashon hopi diferente.

Leu for di ta dependiente riba mitonan antiguo di kreashon pagano, ta parse ku Genesis a ser skirbí di un manera ku ta refutá e mitonan ei i ta distansiá Dios komo Kreador for di nan.

Lesa Génesis 1:14-19. Kon e entidatnan ku ta aparesé riba e di kuater dia ta ser deskribí, i kiko ta nan funshonnan?

E palabranan "solo" i "luna" siguramente a ser evitá pasobra nan nòmbernan na hebreo tabata e nòmbernan di (òf nan tabata relashoná djaserka ku e nòmbernan) e diosnan di solo i luna di e antiguo Serkano Oriente i Egipto. E uso di e palabranan "lus mayó" i "lus menor" tabata mustra ku nan a ser kreá pa funshonnan spesífiko, "pa señalnan i temporadanan, i pa dianan i añanan" i pa "duna lus riba tera" (Gen. 1:14,15, NKJV). Es desir, e tèkst ta mustra klaramente ku e solo i luna no tabata diosnan sino ophetonan kreá ku funshonnan natural spesífiko, manera nos ta komprondé nan awe.

Lesa Génesis 2:7,18-24. Kon Dios ta enbolbí íntimamente den e kreashon di Adam i Eva?

E mitonan antiguo di Serkano Oriente unánimamente ta deskribí e kreashon di hende komo un idea di último momentu, ku ta resultá for di un intento pa aliviá e diosnan di trabou duru. E idea mítiko akí ta ser kontradesí dor di e idea bíbliko ku hende mester goberná e mundu komo Dios Su vise gobernador. Nada den e kreashon di hende tabata un idea di último momentu. Al kontrario, e tèkst ta indiká nan komo e klímaks di e relato di kreashon, mustrando ainda mas kla kon diferente e relatonan pagano i bíbliko ta realmente.

Génesis, pues, ta presentá un korekshon kontra e mitonan di e mundu antiguo. Moisés a usa sierto palabranan i ideanan inkompatibel ku konseptonan pagano. I el a hasi esaki dor di simplemente ekspresá e komprondementu bíbliko di realidat, i di e ròl i propósito di Dios den Kreashon.

Lesa Génesis 5 i 11. Kon Beibel ta marka e historia di humanidat for di Adam te na Noe, i for di Noe te na Abraham?

Tin un elemento ku ta hasi e genealogianan akí úniko den Beibel: nan ta kontené e elemento di tempu, poniendo ku algun erudito yama nan korektamente "kronogenealogia". Nan ta kontené un mekanismo interkonektá di informashon desendiente huntu ku periodonan di tempu, di manera ku "ora Persona Un a biba X aña, el a engendrá Persona Dos. I Persona Un, despues ku el a engendrá Persona Dos, a biba Y aña, i el a engendrá otro yunan hòmber i yunan muhé." Génesis 5 ta agregá e frase di fórmula: "I tur e dianan di Persona Un tabata Z aña". E sistema interkonektá akí lo a evitá ku lo a impedí di eliminá sierto generashonnan òf añadí nan. Génesis 5 i 11 ta kontené un liña kontinuo di desendensia, manera ta ser konfirmá dor di 1 Krónikanan 1:18-27, den kua no tin generashon agregá òf ousente. Di e manera akí Beibel ta interpretá su mes.

Pa kasi 2.000 aña, intérpretenan hudiu i kristian a interpretá ku e tèkstnan akí ta representá historia i un manera presis pa determiná e fecha di e diluvio i e edat di tera, a lo ménos for di e shete dianan di kreashon manera ta ser deskribí den Génesis 1-2.

Den dékadanan resien, tabatin intentonan pa reinterpretá Génesis 5 i 11 pa akomodá eranan mas largu, manera algun datonan arkeológiko i históriko ta ser interpretá (dor di sernan humano falibel) pa sugerí. Esaki ta lanta preguntanan serio tokante e konfiabilidat di e registro bíbliko.

Pero si nos mester komprondé e konsepto di tempu di Dios i su progreso a traves di historia, nos mester rekonosé ku e dos kapítulonan akí ta "tantu históriko komo teológiko, konektando Adam ku restu di humanidat i Dios ku hende den e ámbito di e alkansenan di espasio i tempu. Génesis 5 i 11:10-26 ta proveé e kuadro di tempu i kadena humano ku ta konektá e pueblo di Dios ku e hòmber ku Dios a krea komo e klímaks di e evento di kreashon di seis dia di e planeta akí”. — Gerhard F. Hasel, “The Meaning of the Chronogenealogies of Genesis 5 and 11”, Origins 7/2 [1980], p. 69.

Lesa e siguiente pasashinan skritural i skirbi kon kada un di e eskritornan akí a hasi referensia na Génesis 1-11:

Mat. 19:4, 5

Marko 10:6-9

Lukas 11:50, 51

Juan 1:1-3

Echonan 14:15

Rom. 1:20

2 Kor. 4:6

Efe. 3:9

1 Tim. 2:12-15

Santiago 3:9

1 Pe. 3:20

Judas 11, 14

Rev. 2:7; 3:14; 22:2,3

Hesus i tur e eskritornan di Tèstamènt Nobo ta referí na Génesis 1-11 komo historia konfiabel. Hesus ta referí na e eskritonan di Moisés i e kreashon di hòmber i muhé (Mat. 19:4). Repetidamente Pablo ta usa e relato di kreashon pa supstansiá e puntonan teológiko ku e ta plantia den su epístolanan. El a deklará na e hòmbernan sabí di Atenas: "E Dios ku a traha mundu i tur kos den dje, ya ku E ta Señor di shelu i tera, no ta biba den tèmpelnan trahá ku man" (Ech. 17:24, NASB). Di e formanan akí, e eskritornan di Tèstamènt Nobo ta konstruí riba e naturalesa fundamental di Génesis pa mustra e lesadó moderno e nifikashon di e evento literal akí.

Lesa, por ehèmpel, Romanonan 5. Mas ku mei dozein biaha, Pablo ta hasi un konekshon direkto for di Adam te na Hesus (lesa Romanonan 5:12,14-19). Es desir, e ta asumí e eksistensia literal di un Adam históriko, un posishon ku ta bira fatalmente komprometé ora un modelo evolushonista di orígennan remplasá un lesamentu literal di e tèkstnan.