Hopi gran pensadó a ser inspirá pa Skritura pa eksplorá e mundu kreá di Dios; komo resultado, siensia moderno a nase. Johannes Kepler, Isaac Newton, John Ray, Robert Boyle, i otro gran sientífikonan di ántes a kere ku nan trabou tabata revelá ainda mas di e obra di man di e kreashon di Dios.
Despues di e Revolushon Franses, sinembargo, siensia di siglo 19 a kuminsá move di un filosofia teístiko pa unu basá riba naturalismo i materialismo, hopi biaha sin un lugá ètòl pa e kosnan sobrenatural. E ideanan filosófiko akí a ser popularisá dor di Charles Darwin su On the Origin of Species (1859). For di e tempu ei, siensia a distansiá su mes mas i mas for di su fundeshi bíbliko, kua a resultá den un re-interpretashon radikal di e historia di Génesis.
Beibel ta siña un bista antikuá i no-sientífiko di kosmologia? E relato bíbliko a ser simplemente fiá for di e nashonnan pagano den bisindario? Beibel a ser kondishoná kulturalmente dor di su lugá i tempu, òf su naturalesa inspirá ta elevá nos na un bista di orígennan ku ta kompleto den su kuadro divino?
Esakinan ta algun di e asuntunan ku nos lo toka den e lès di e siman akí.