Lès 8 * 15 – 21 di ougùstùs

Ministrá Manera Hesus

Sabat Atardi

Lesa pa e siman aki:

Mat. 5:13,14; Fil. 2:15; Marko 12:34; Efe. 4:15; Mat. 4:23-25; Mat. 25:31-46.

Versíkulo di Memoria:

“Ma ora El a mira e multitutnan, E tabata konmoví ku kompashon pa nan, pasobra nan tabata kansá i plamá, manera karnénan ku no tin wardadó” (Mateo 9:36, NKJV).

Hesus realmente tabata preokupá pa hende. E tabata mas interesá den nan preokupashon- i nesesidatnan ku den esnan di djE mes. Su bida tabata totalmente sentrá riba otro hende. Esun di dje tabata un ministerio di kompashon amoroso. E tabata supli e nesesidatnan físiko, mental, i emoshonal di e hendenan rònt di dje, i asina, nan kurason tabata ser habrí pa e bèrdatnan spiritual ku E tabata siña. Ora E tabata kura leprosonan, habri wowonan siegu, habri oreanan surdu, liberá e demoniakonan, alimentá esnan ku hamber, i kuida esnan den nesesidat, kurasonnan tabata ser toká i bidanan kambiá.

Esei ta pasobra ora e hendenan tabata mira Su preokupashon outéntiko, nan tabata habrí pa e bèrdatnan spiritual ku E tabata siña. "E método di Kristu so lo duna éksito berdadero pa alkansá e hendenan. E Salbador tabata meskla ku hende manera un ku tabata deseá nan bon. E tabata mustra simpatia pa nan, E tabata ministrá na nan nesesidatnan, i tabata gana nan konfiansa. Despues E tabata pidi nan: 'Sigui Mi’ " — Ellen G. White, The Ministry of Healing, p. 143. Hesus a rekonosé ku mundu tabatin mester di un demostrashon di e evangelio mes tantu ku e tabatin mester di su proklamashon. E testimonio bibu di un bida manera esun di Kristu, komprometé na ministrá na otronan ta un testimonio poderoso di e palabranan ku nos ta papia i ta duna kredibilidat na nos testimonio.

* Studia e lès di e siman aki pa prepará pa Sabat, 22 di ougùstùs.

Djadumingu16 di ougùstùs

E Aktitut di Hesus Pa ku Hende

Hesus semper tabata buska e bon den otronan. E tabata saka lo mihó den nan. Un di e krítikanan ku e lidernan religioso di Su tempu tabatin di Hesus tabata ku E "ta risibí pekadornan i ta kome huntu ku nan" (Lukas 15:2, NKJV). Nan tabata preokupá pasobra E tabatin kompañerismo ku “esnan impio”. Nan vishon di religion tabata un di distansiamentu mas bien ku envolvimentu. Nan a keda sorprendí ora Hesus a bisa di Su mes: “Pasobra Mi no a bin pa yama esnan hustu, sino pekadornan, na repentimentu” (Mat. 9:13, NKJV). E religion di e eskriba-, Fariseo- i Saduseonan tabata un di evitá. Nan tabata pensa: “Hasi tur loke bo por pa evitá di ser kontaminá ku piká”. Aunke no kontaminá pa piká, Hesus a bula den e pos di kolebra akí di un mundu pa redimié, no pa evit'é. E ta “e lus di mundu" (Juan 8:12).

Lesa Mateo 5:13,14. Ki dos ilustrashon Hesus a usa pa deskribí Su siguidónan? Pakiko bo ta kere El a usa e ilustrashonnan spesífiko ei? Lesa tambe Juan 1:9; Juan 12:46; Fil. 2:15.



Salu tabata un di e rekursonan di mas importante den e mundu antiguo. E tabata ekstremadamente balioso, i tin biaha e legionnan romano tabata us’é komo moneda. Salu tabata un símbolo di gran rikesa. E tabata ser usá tambe pa preservá i duna sabor na kuminda. Ora Hesus a usa e ilustrashon di salu pa simbolisá Su siguidónan, E tabata bisa realmente ku e rikesa berdadero di mundu no ta e hendenan di mas poderoso i mas riku. E rikesa berdadero di mundu ta e Kristiannan dediká, ku ta hasiendo un diferensia pa e reino di Dios. Nan aktonan di amor i servisio desinteresá ta preservá e bondat den mundu i ta duna sabor na su atmósfera.

E di dos ilustrashon ku Hesus a usa (den Mateo 5:14) tabata esun di "e lus di mundu". Lus no ta evitá skuridat. E ta bria den skuridat. E no ta separá for di skuridat. E ta penetrá e skuridat, ta hasi skuridat lus. E siguidónan di Hesus mester penetrá e skuridat di e mundu akí den nan besindario-, pueblo-, stat-, i siudatnan grandi pa iluminá nan ku e gloria di Dios.

Djaluna 17 di ougùstùs

E Trato di Hesus ku Hende

E meta di Hesus tabata pa saka lo mihó for di hende. Hasta ora e sirkunstansianan tabata ekstraordinariamente desafiante, E tabata respondé ku grasia. E evangelio di Lukas ta registrá ku e multitutnan "tabata asombrá di e palabranan di grasia ku tabata sali for di Su boka" (Lukas 4:22, NKJV), i e evangelio di Juan ta agregá ku "grasia i bèrdat a bin pa medio di Hesukristu" (Juan 1:17, NKJV). Su aserkamentu na e hendenan tabata enkantador. Su palabranan amabel tabata toka un akort sensibel den nan kurasonnan.

Lesa Mateo 8:5-10 i Marko 12:34. Ki palabranan yená di speransa Hesus a papia na dos persona inesperá: un senturion romano i na un eskriba hudiu?



Hesus Su deklarashon na un komandante militar romano tabata revolushonario. Pensa riba kon e ofisial di ehérsito akí mester a sinti ora Hesus a afirmá ku E no a topa e grado di fe akí sikiera den Israel. Pensa tambe riba e pensamentunan di e eskriba hudiu ora Hesus a bisa: "Bo no ta leu for di e reino di Dios". Hesus tabatin e abilidat di saka lo mihó for di hende. Tin poko kos ku ta mas efikas ku un kòmplimènt pa habri kurasonnan pa e evangelio. Buska e bon den hende ku ta rònt di bo, i laga nan sa ku bo ta apresiá nan.

Kompará Isaias 42:3, Kolosensenan 4:5,6, i Efesionan 4:15. Ki prinsipionan vital e tekstonan aki ta siña nos tokante kompartí nos fe ku otronan i tokante nos relashon ku nan?



Ora nos palabranan ta alentador i yená ku grasia, nan tin un influensia positivo riba bida di otronan. E palabranan profétiko di Isaias ta revelá ku Hesus lo no “kibra e kaña kaská" òf "paga un mecha ku ta huma". Den otro palabra, Hesus tabatin asina tantu kompashon ku E tabata kuidadoso pa no heridá innesesariamente un hende ku a kaba di yega na fe, òf pa paga e vlamnan di fe di mas chikí den nan kurason.

Djamars 18 di ougùstùs

E Ministerio di Kurashon di Hesus: Parti 1

E método di evangelismo di nos Señor ta bai mas ayá di diskursonan memorisá i presentashonnan prepará delantá; e ta mes riku i dinámiko ku bida mes. Tur dia nos ta bin den kontakto ku hendenan ku tin tur tipo di nesesidat: físiko, mental, emoshonal, i spiritual. Kristu ta ansioso pa supli e nesesidatnan ei a traves di nos ora nos ta mustra preokupashon pa e soledat, fèdrit, i doló di kurason di hende, i ora nos mustra interes den nan goso-, speransa-, i soñonan.

Hesus tabata ministrá na e nesesidatnan manifestá di e hendenan pa asina finalmente E por a satisfasé nan nesesidat di mas profundo. Un nesesidat manifestá ta un área di bida kaminda hende ya ta sinti ku nan no por resolvé un problema riba nan mes. E por ta un nesesidat di stòp di huma, baha di peso, sigui un dieta mihó, òf redusí strès.E por ta un nesesidat di kuminda, bibienda, òf kuido médiko. E por ta e nesesidat pa konseho pa e matrimonio òf famia.

Un nesesidat fundamental, sinembargo, ta loke sernan humano tin mas mester di dje, e nesesidat di un relashon personal ku Dios i e realisashon ku nan bida tin nifikashon eterno. Rekonsiliashon ku Dios den un mundu kibrá ta nos nesesidat di mas grandi.

Lesa e storianan di e paralítiko den Mateo 9:1-7 i e muhé ku e problema di sanger den Marko 5:25-34. Ki indikashonnan nos tin den tur dos e storianan akí ku Hesus a konektá kurashon físiko ku supli e nesesidat prinsipal di rekonsiliashon ku Dios?



E ministerio di kurashon di Kristu tabata inkluí muchu mas ku kurashon físiko i emoshonal. Hesus tabata anhelá pa hende eksperensiá e integridat ku piká a destrosá. Pa Kristu, kurashon físiko sin kurashon spiritual tabata inkompleto. Si e amor di Dios ta motivá nos pa deseá e bienestar físiko i emoshonal di un individuo, e lo motivá nos muchu mas tambe pa deseá e bienestar spiritual di e persona ei, pa asina e por biba un bida a lo máksimo aki i pa tur eternidat. Despues di tur kos, kada persona ku Hesus a kura, finalmente a muri. Por lo tantu, nan nesesidat real, riba tur otro kos, tabata spiritual, no ta asina?

Djárason19 di ougùstùs

E Ministerio di Kurashon di Hesus: Parti 2

Lesa Mateo 4:23-25 i Mateo 9:35. Ki tripel aserkamentu tabata forma e base pa e ministerio di Kristu? Kon E tabata supli e nesesidatnan di hende, i ki impakto e tabatin riba nan bida?



Hesus a kombiná e tripel ministerio di siñansa, predikamentu, i kurashon. E tabata kompartí prinsipionan eterno pa asina nos tur por a biba bidanan di nifikashon i propósito. El a bisa: "Mi a bini pa nan por tin bida, i pa nan por tin e mas abundantemente" (Juan 10:10, NKJV). Su ministerio a revelá un super abundansia di grasia. I Hesus a bini pa kapasitá nos pa biba bidanan di "super abundansia" awor i pa semper.

Lesa Marko 1:32-39. Hesus a pasa henter dia kurando e enfermonan i sakando demoñonan afó. Despues di pasa tempu den orashon, e siguiente mainta, ora mas multitutnan tabata probablemente buska mas kurashon, El a sali pa un otro stat. Dikon E no a kura nan? Nota Su propio rason den Marko 1:38,39.



E storia aki ta perseptivo. Despues di kura multitutnan e dia promé, e siguiente dia Hesus ta bai laga e multitutnan ku ta busk'E i ainda ta den nesesidat di kurashon. Su splikashon ta ku e propósito pa kua El a bin na mundu tabata pa prediká e evangelio. Hesus no tabata simplemente un hasidó di milager espektakular. E tabata e Yu divino di Dios ku a bin riba un mishon redentor. E no tabata kontentu simplemente pa kura enfermedatnan físiko. E tabata anhelá pa hende risibí e don di bida eterno ku E tabatin pa ofresé. El a deklará klaramente e propósito di Su binida na tera den e palabranan akí: "Pasobra e Yu di Hende a bin pa buska i salba e loke tabata pèrdí" (Lukas 19:10, NKJV). Kada akto di kurashon tabata un oportunidat pa revelá e karakter di Dios, aliviá sufrimentu, i proveé un oportunidat pa bida eterno.

Djaweps20 di ougùstùs

Loke ta Importá pa Hesus

E mensahe di Hesus na Su disipelnan den Mateo 24 ku ta kombiná eventonan relashoná ku e destrukshon di Yerusalèm i e dianan promé ku Su regreso, ta ser siguí pa tres parabel di e tempu di fin den Mateo 25. E parabelnan akí ta resumí e kualidatnan di karakter ku realmente ta importá pa Hesus, pa un pueblo ku ta spera riba Su segundo binida. E parabel di e dies bírgennan ta enfatisá e importansia di un bida outéntiko, outéntiko, yená ku e Spiritu. E parabel di e dies talentonan ta suprayá e importansia di usa fielmente e donnan ku Dios a duna na kada un di nos. E parabel di e karné- i kabritunan ta revelá ku kristianismo outéntiko realmente ta ministrá na e nesesidatnan di esnan ku Dios ta trese kada dia den nos bida.

Lesa Mateo 25:31-46. Kon Hesus ta deskribí kristianismo outéntiko? Menshoná e áreanan di ministerio ku e pasashi akí ta papia di dje.



Aunke e parabel akí ta papia di satisfasé e nesesidatnan físiko outéntiko di hende, un aspekto di e storia ku nos no mester neglishá, ta posibel ku tin algu mas aki? Tin un hamber i set pa Hesus skondí den e almanan di sernan humano ku ta anhelá pa ser satisfasé (Juan 6:35; Juan 4:13,14). Nos tur ta estranheronan ku ta anhelá un hogar, te ora nos deskubrí nos identidat berdadero den Kristu (Efe. 2:12,13,19). Nos ta sunú spiritualmente te ora ku nos ser bistí ku Su hustisia (Rev. 3:18; Rev. 19:7,8).

E profetanan di Tèstamènt Bieu hopi biaha tabata deskribí e kondishon humano komo un ku tabata desesperadamente malu (Isa. 1:5; Jer. 30:12-15). E malesa di piká ta fatal, pero e profeta ta indiká nos e remedi. " 'Ma lo mi restourá salú na bo i lo Mi kura bo di bo heridanan’, Señor ta bisa” (Jer. 30:17, NKJV). Hesus ta e remedi pa e enfermedat mortal di nos alma.

E parabel di e karné- i kabritunan ta spièrta nos pa supli nesesidatnan físiko di esnan rònt di nos, pero e ta hasi muchu mas. E ta e storia di un Kristu ku ta supli e nesesidatnan di mas profundo di e alma, i ta Su invitashon pa asosiá kunE den ministrá na esnan rònt di nos. Pa biba bidanan egoséntriko i neglishá e nesesidatnan físiko, mental, emoshonal, i spiritual di otronan ta pa riska pèrdida eterno. Den e parabel, esnan ku duna nan bida pa algu mas ku nan mes ta ser elogiá pa Señor i ta risibí bonbiní den eternidat, miéntras esnan ku egoistamente tabata persiguí nan mes agènda i neglishá e nesesidatnan di otronan ta ser kondená pa nan Señor.

Djabièrnè21 di ougùstùs

Pa mas Estudio:

"Hopi no tin fe den Dios i a pèrdè konfiansa den hende. Pero nan ta apresiá aktonan di simpatia i yudansa. Ora nan mira un hende sin insentivo di alabansa terenal òf kompensashon bin na nan kas, ministrá na esnan ku ta malu, alimentá esnan ku tin hamber, bisti esnan ku ta sunú, konsolá esnan ku ta tristu, i tiernamente mustra tur na Esun di ken e obrero humano ta nada mas sino e mensahero, ora nan mira esaki, nan kurason ta ser toká. Gratitut ta surgi. Fe ta rebibá. Nan ta mira ku Dios ta preokupá pa nan, i nan ta prepará pa skucha ora Su Palabra ta ser habrí”. — Ellen G. White, The Ministry of Healing, p. 145.

E ministerio desinteresá di Hesus ta habri kurasonnan, kibra prehuisio, i ta krea un reseptividat pa e evangelio. Iglesia ta e kurpa di Kristu, ku ta satisfasé nesesidatnan den amor tur kaminda. Hesus ta manda nos bai den nos komunidatnan pa hasi un diferensia den Su nòmber. Aunke siguramente nos mester ta kuidadoso pa no ser kontaminá dor di mundu (i esei ta un menasa hopi real i peligroso pa nos iglesia), ainda nos tin ku siña pa alkansá e hendenan kaminda nan ta i ser usá pa Dios, kende ke saka nan for di kaminda nan ta i hiba nan kaminda nan mester ta.

Preguntanan di Diskushon: