Un poeta, ku miedu di muri, a puntra su mes kon un hende por a biba sin "sa ku seguridat ki mainta, ki morto, ki destino tabata spera konsiensia mas ayá di graf?" El a krea un poema ku ela yama e IPMA, e Instituto di Preparashon pa e Mas Ayá. Sinembargo, kon un hende por prepará pa e mas ayá si e no ni sikiera sa kiko ta sosodé ku un persona den dje?
Afortunadamente, Beibel ta duna nos un gran vishoin den e tema di shelu, e tera nobo, i e edukashon i bida ku nos lo tin durante henter eternidat. Manera nos a mira durante henter e trimèster, e IPMA ta aki i awor, den e bida aki, i henter nos edukashon, no importá e área di estudio, mester ta preparando nos pa e "mas ayá" ei.
Despues di tur kos, kualke skol por transmití hopi bon informashon, hopi bon konosementu práktiko i útil. Pero ki bon e ta hasi si un hende mester a haña tur e konosementu ei i tòg pèrdè bida eterno? E siman akí nos ta ban wak kiko inspirashon ta bisa nos tokante e universidat final, un skol ku ta dura pa semper i kaminda nos lo ta siñando i kresiendo a lo largu di henter eternidat. Den e skol akí di e mas ayá, nos lo siña kosnan ku, den e mundu presente akí, nos no por ni sikiera kuminsá imaginá.