Lès 1 * 26 di desèmber – 1e di yanüari

Krísis di Identidat

Sabat Atardi

Lesa pa e siman aki:

Isa. 1:1-9; Isa. 1:10-17; Isa. 1:18; Isa. 1:19-31; Isa. 5:1-7.

Versíkulo di Memoria:

“ ‘Bin awor, i laga nos rasoná huntu,’ Señor ta bisa, ‘aunke bo pikánan ta manera skarlata, nan lo ta blanku manera sneu; aunke nan ta kòrá manera rubí, nan lo ta manera lana’ ” (Isaias 1:18, NKJV).

Pèrdí den e tera di olvido. Si bo ta kore den Irlandia kantu di un kaya smal di kunuku aliniá ku reinan di tranké, bo por haña bo mes blòkiá pa un tou di baka kanando trankil ta bai kas despues di un kuminda krugiente. Asta si no tin niun wardadó huntu ku nan, nan lo bai na e stal di nan doño. Nan lo sa na unda, i na ken, nan ta pertenesé.

Si un mucha hòmber chikitu den un tienda ser separá for di su mama i grita: “Mi a pèrdè mi mami!” kisas e no sa eksaktamente unda e ta, òf unda su mama ta, pero meimei di un laman di mamanan ku ta kanando den e pakus, e lo konosé esun mama ku, e so, ta di dje.

Tristu pa bisa, diferente for di asta e bakanan irlandes ei (muchu ménos e mucha hòmber chikitu pèrdí), e Hudeanan a lubidá ku nan tabata pertenesé na Señor, nan Señor selestial, i asina a pèrdè nan berdadero identidat komo e pueblo di pakto. “Mi a kria yunan i a lanta nan, pero nan a rebeldiá kontra Mi. E buey konosé su doño, i e buriku e pesebre di su shon; pero Israel no sa, Mi pueblo no ta komprondé (Isa. 1:2,3, NRSV).

E siman akí nos lo tira un bista riba e obra di Dios di restourá Su pueblo na Su mes.

* Studia e lès di e siman aki pa prepará pa Sabat, 2 di yanüari.

Djadumingu27 di desèmber

Tende, o Shelunan (Isa. 1:1-9)

E buki di Isaias brevemente ta introdusí su mes dor di identifiká e outor ("yu hòmber di Amos”), e Fuente di su mensahe (un “vishon”), i su tópiko (Huda i su kapital, Herusalèm, durante reinado di kuater rei). E tópiko ta identifiká tambe e oudiensia primario komo e pueblo di su propio pais durante e tempu den kua e tabata biba. E profeta a papia ku nan enkuanto di nan propio kondishon i destino.

Dor di menshoná e reinan durante ken su reinadonan e tabata aktivo, Isaias ta redusí e oudiensia i ta konektá e buki na e eventonan históriko i polítiko di un sierto periodo. E kuadro di tempu akí ta dirigí nos na e relatonan di 2 Reinan 15-20 i 2 Krónikanan 26-32.

Lesa Isaias 1:2. Kiko ta e esensia di e mensahe aki? Kiko Señor ta bisando? Kon e mesun idea akí a ser mirá a lo largu di henter historia sagrado? E por a ser bisá di e iglesia Kristian awe tambe? Splika bo kontesta.



Nota kon e mensahe di Isaias ta kuminsá ku e palabranan “Tende, o shelunan, i skucha, o tera” (NRSV; kompará Deut. 30:19, Deut. 31:28). Señor no ta implikando ku shelu i tera, nan mes, por tende i komprondé. En kambio, E ta hasié pa énfasis.

Ora un rei antiguo di Oriente Serkano, manera un emperador hitita, tabata sera un akuerdo político ku un gobernante menor, e tabata invoká su diosnan komo testigunan pa enfatisá ku kualke violashon di e akuerdo siguramente lo a ser notá i kastigá. Sinembargo, ora e Rei di reinan divino a hasi un pakto ku e israelitanan den e dianan di Moises, E no a referí na otro diosnan komo testigunan. Komo e úniko Dios berdadero, El a yama, en kambio, pa e shelunan i tera kumpli ku e ròl akí (lesa tambe Deut. 4:26).

Lesa kuidadosamente Isaias 1:1-9. Resumí riba e liñanan akibou kiko e pikánan di Huda tabata. Tuma nota spesial tambe di e resultadonan di e pikánan ei. Di kiko Huda tabata kulpabel, i kiko a sosodé pa motibu di su kulpabilidat? Na mes momentu, ki speransa ta ser presentá den versíkulo 9?



Djaluna28 di desèmber

Ritualismo Putrí (Isa. 1:10-17)

Lesa Isaias 1:10. Dikon bo ta pensa ku e tabata usando e simbolismo di Sodoma i Gomora? Kiko Señor tabata tresiendo dilanti?



Lesa Isaias 1:11-15. Kiko Señor ta bisando e hendenan ei? Dikon Señor a rechasá e adorashon ku Su pueblo tabata ofresiendo na djE?



E mesun mannan ku tabata ofresé sakrifisionan i tabata ser hisá ariba den orashon tabata “yen di sanger”; es desir, kulpabel di violensia i opreshon di otronan (Isa. 1:15; Isa. 58:3,4). Dor di maltratá otro miembronan di e komunidat di pakto, nan tabata mustrando despresio pa e Protektor di tur israelita. Pikánan kontra otro hende tabata pikánan kontra Señor.

Naturalmente, Dios Mes a instituí e Sistema di adorashon ritual (Levítiko 1-16) i a designá e tèmpel di Herusalèm komo e lugá apropiá p’e (1 Reinan 8:10,11). Pero e ritualnan tabata intenshoná pa funshoná denter di e konteksto di e pakto ku Dios a hasi ku e hendenan akí. Tabata e pakto di Dios ku Israel ku a hasi posibel pa E biba meimei di nan na e santuario/tèmpel. Asina, ritualnan i orashonnan ehekutá ei tabata bálido solamente si nan tabata ekspresá fieldat na djE i Su pakto. Hendenan ku tabata ofresé sakrifisionan sin arepentí di akshonnan inhustu pa ku otro miembronan di e komunidat di pakto tabata ehekutando mentiranan ritual. Por lo tantu, nan sakrifisionan no tabata solamente inbálido, nan tabata piká! Nan akshonnan ritual tabata bisa ku nan tabata loyal, pero nan komportashon tabata proba ku nan a kibra e pakto.

Lesa Isaias 1:16,17. Kiko Señor ta mandando Su pueblo hasi? Kon e versíkulonan akí, den e konteksto akí, ta paralelo na loke Hesus a bisa den Mateo 23:23-28? Ki mensahe nos por haña pa nos mes awe den e tekstonan akí i den e konteksto den kua nan ta ser duná?



Djamars29 di desèmber

E Argumento di Pordon (Isa. 1:18)

Lesa Isaias 1:18. Despues di pasa riba dje numeroso biaha, skirbi loke bo ta kere ku Señor ta bisando aki (lesa un par di versíkulo mas ayá di dje pa haña henter e konteksto).



Dios a deklará evidensia poderoso ku e Hudeanan, esnan akusá, ta kulpabel di kiebro di kontrato (Isa. 1:2-15), i El a apelá na nan pa reformá (Isa. 1:16,17). E apelashon akí ta sugirí ku tin speransa. Despues di tur kos, pakiko urgi un kriminal ku ta meresé ehekushon pa kambia su manera? Kon un prizonero ku sentensia di morto por a “reskatá esnan oprimí, defendé e wérfano, roga pa e biuda” (NRSV)? Pero ora Dios bisa”Bin awor, laga nos diskutié” (Isa. 1:18, NRSV), nos ta mira Señor ketu bai tratando di rasoná ku Su pueblo, ainda tratando di haña nan arepentí i bira for di nan kamindanan malu, no importá kon degenerá nan a bira.

Señor ta bisa nan ku Bo pikánan kòrá lo bira blanku. Dikon pikánan ta kòrá? Pasobra kòrá ta koló di sanger” (kulpa di sanger) ku ta kubri e mannan di e hendenan (Isa. 1:15). Blanku, en kambio, ta e koló di puresa, e ousensia di kulpa di sanger. Aki Dios ta ofresiendo pa kambia nan. Esaki ta e tipo di lenguahe ku Rei David a usa ora el a sklama na Dios pa pordon pa su pikánan di tuma Betsabé i destruí su esposo (lesa Salmo. 51:7,14). Den Isaias 1:18 e argumento di Dios ta un oferta pa pordoná Su pueblo!

Kon e oferta di pordon di Dios ta sirbi komo un argumento pa nan kambia nan manera? Kompará Isaias 1:18 ku Isaias 44:22.



Awor nos ta mira e propósito di e palabranan skèrpi di spièrtamentu di Dios kontra Su pueblo. Nan no ta pa rechasá Su pueblo sino pa trese nan bèk serka djE. Su oferta di pordon ta e argumento poderoso ku ta sostené Su apelashon pa e hendenan purifiká nan mes moralmente (Isa. 1:16,17). Su pordon ta hasi posibel pa nan ser transformá pa medio di Su poder. Aki nos ta mira e simianan di e “pakto nobo”, profetisá den Jeremias 31:31-34, den kua pordon ta e base di un relashon di kurason nobo ku Dios. Nos ta kuminsá “den kòrá”, teniendo un debe ku nos no por paga bèk nunka. For di e posishon humilde di rekonosé nos nesesidat pa pordon, nos ta kla pa aseptá tur loke Dios tin pa duna.

Djárason30 di desèmber

Kome òf Ser Komé (Isa. 1:19-31)

Lesa Isaias 1:19-31. Ki tema ta aparesé aki ku ta ser mirá a lo largu di henter Beibel?



Nota e struktura lógiko den Isaias 1:19,20: Si e pueblo skohe pa ta dispuesto i obediente na Dios, nan lo kome e bon di e tera (Isa. 1:19). Kontrali na esei, si nan rechasá Su oferta di pordon i restourashon i rebeldiá kontra djE, nan lo ser komé pa e spada (Isa. 1:20). E eskoho ta di nan. E versíkulonan akí, anto, ta kontené un bendishon i maldishon kondishonal.

Isaias ta reiterá i apliká e palabranan di Moises registrá den Deuteronomio 30:19,20 na momentu ku e pakto ku e nashon di Israel a ser establesé: “Mi ta yama shelu i tera pa testiguá kontra boso awe ku Mi a pone boso dilanti bida i morto, bendishonnan i maldishonnan” (NRSV).

Wak e palabranan ei di Moises. Nota, no tin tereno meimei. Ta sea bida òf morto, bendishonnan òf maldishonnan. Dikon bo ta pensa ku tin solamente un di dos eskoho pa nos? Dikon no por tin algun sorto di kompromiso?



E palabranan di Moises ta resumí e serinan di spièrtamentu-, bendishon-, i maldishonnan ku ta konkluí e formashon di e pakto den Deuteronomio 27-30 (kompará Levítiko 26). Elementonan di e pakto ta inkluí

  1. e kontamentu di loke Dios a hasi pa nan,
  2. kondishonnan/stipulashonnan (mandamentunan) pa ser opservá pa asina e pakto ser mantené,
  3. referensia na testigunan, i
  4. bendishon- i maldishonnan ta spièrta hende kiko lo a sosodé si nan a violá e kondishonnan di e pakto.

Eruditonan a haña ku e elementonan akí ta aparesé den e mesun órden den akuerdonan político ku ta envolví pueblonan no-israelita,manera e Hititanan. Pues, pa a establesé e pakto di Dios ku e Israelitanan, El a usa un forma ku nan lo a komprondé i lo a impreshoná riba nan mas vigorosamente ku ta posibel e naturalesa i konsekuensianan di e relashon mutuamente irevokabel den kua nan tabata skohiendo pa drenta. E potensial benefishinan di e pakto tabata aplastante, pero si Israel lo a kibra nan kompromiso, nan lo a terminá pió ku nunka.

Djaweps31 di desèmber

Kantika di Amor Menasante (Isa. 5:1-7)

Lesa e kantika den e versíkulonan akiriba. Kiko ta nifikashon di e parabel akí?



Dios ta splika e nifikashon di e parabel te na final, den versíkulo 7. Usando un parabel, E ta yuda e hendenan wak nan mes ophetivamente pa asina atmití nan berdadero kondishon. Dios, efektivamente, ta usa e aserkamentu akí ku Rei David (lesa 2 Sam. 12:1-13). Dor di yama esaki un “kantika di amor” (NRSV), Dios ta revelá na prinsipio Su motibu pa ku Su pueblo. Su relashon ku nan ta originá for di Su karakter, kua ta amor (1 Juan 4:8). E ta spera un reakshon di amor a kambio. Pero na lugá di “wendrùif” E ta haña “wendrùif shimaron”, ku ta nifiká na Hebreo “kosnan ku ta hole stinki”.

Kiko Señor ke men ora E ta bisa den Isaias 5:4: “Kiko mas tabatin di hasi pa Mi kunuku di wendrùif ku Mi no a hasi den dje?” (NRSV).



Dios ta bisa den e siguiente versíkulonan: “I awor lo Mi bisabo kiko lo Mi hasi ku Mi kunuku di wendrùif. Lo Mi kita su tranké, i e lo ser destruí; lo Mi basha su muraya abou, i e lo ser trapá. Lo mi hasié un desolashon” (Isa. 5:5,6, NRSV).

Ora nos peka, Dios no ta kòrta nos kita afó inmediatamente for di Su mes dor di kita Su protekshon i destruí nos. Ku pasenshi E ta duna nos un oportunidat pa risibí pordon (lesa 2 Pe. 3:9). E no ta kòrta niun hende kita afó ku respondé riba djE. E ta apelá tanten ku tin speransa pa un kontesta. E no ta tuma Nò inmediatamente pa kontesta, pasobra E sa ku nos ta ignorante i engañá pa piká. Pero si E no ta yega niun kaminda ku nos, finalmente E ta rekonosé nos eskoho i ta laga nos keda e manera ku nos a skohe pa ta (lesa Rev. 22:11).

Si nos rechasá e apelashonnan di Dios a traves di Su Spiritu persistentemente, finalmente nos por pasa e punto ku no por bira bèk mas (Mat. 12:31,32). Bira bai for di Kristu ta peligroso (Hebr. 6:4-6). Tin solamente asina tantu kos ku Dios por hasi, pasobra E ta respetá nos eskoho liber.

Djabièrnè1e di yanüari

Pa mas Estudio:

Den konteksto di Isaias 1:4, Ellen White a skirbi: “E pueblo profesá di Dios a separá for di Dios, i a pèrdè nan sabiduria i a pervertí nan komprondementu. Nan no por a mira riba distansia; pasobra nan a lubidá ku nan a ser limpiá di nan pikánan bieu. Nan a move sin sosiegu i insigur bou di skuridat, tratando na kita for di nan mente e memoria di e libertat, siguransa, i felisidat di nan estado anterior. Nan a kai den tur tipo di lokura presuntuoso i bobo, a pone nan mes den oposishon na e providensia di Dios, i a profundisá e kulpa ku ya tabata riba nan. Nan a skucha na e akusashonnan di Satanas kontra e karakter divino, i a representá Dios komo sin miserikòrdia i pordon.” — The SDA Bible Commentary, tomo 4, p. 1137.

Preguntanan di Diskushon:

Resúmen:

Ora e pueblo di Dios lubid’E i tuma Su bendishonnan komo normal, E ta kòrda nan ku nan ta responsabel pa nan pakto kunE. Yen di miserikòrdia E ta mustra nan nan kondishon, ta spièrta nan tokante e konsekuensianan destruktivo di bandoná Su protekshon, i ta urgi nan pa permitiE sana i purifiká nan.