E Sosiegu Supremo

E disipel sobrebibiente di mas edat ku realmente tabata ku Hesus tabata sinta riba un isla prizòn yen di baranka, leu for di tur kos ku tabata serka i stimá p'e. Kiko lo mester tabata pasando den mente di Juan ora el a hañá su mes pegá riba e isla desolá akí? Kon el a resultá aki, i asin’aki, tambe? Despues di tur kos, el a mira Hesus bai, i a mira e dos angelnan para einan, bisando: "Hòmbernan di Galilea, pa kiko boso ta para wak na shelu? E mesun Hesus akí, Kende a ser tumá for di boso na shelu, lo bolbe di e mesun manera ku boso a mir'E bai shelu" (Echonan 1:11, NKJV).

Esei, sinembargo, tabata hopi aña pasá, i Hesus no a regresá ainda. Mientrastantu, e otro apòstelnan ku tabata presente riba e dia ei a muri kaba, mayoria di nan martirisá pa nan testimonio tokante Hesus. E iglesia hóben a pasa dor di un kambio di generashon i awor tabata enfrentando persekushon horibel di pafó i movementunan herétiko straño di paden. Juan mester a sintié solitario, kansá, i inkietu. I despues, di ripiente, el a hañá un vishon.

Ki konsuelo bo por imaginá ku Juan a hañá di e vishon akí? Lesa Revelashon 1:9-19.

Hesus a bisa Su siguidónan: "I mira, Mi ta ku boso semper, te na fin di mundu" (Mat. 28:20, NKJV), palabranan ku, sin duda, mester a enkurashá Juan miéntras e tabata enfrentá su eksilio solitario. Siguramente e vishon akí, e "revelashon" akí di Hesus, mester tabata un gran konsuelo p'e, sabiendo ku Hesus, "e Alfa i e Omega, e Promé i e Último", awor tabata manifestando Su mes den un forma speshal na e apòstel eksiliá.

Loke a sigui desde e versíkulonan akí ta vishonnan tokante e futuro di e mundu akí. Un bista panorámiko impreshonante di historia lo a ser presentá su dilanti, básikamente loke pa nos ta e historia di e iglesia kristian pero p'e tabata su futuro. I tòg, meimei di e pruebanan i tribulashonnan ku lo a bini, Juan a ser mustrá kon tur kos lo a terminá. "Awor mi a mira un shelu nobo i un tera nobo, pasobra e promé shelu i e promé tera a pasa bai. Tambe no tabatin mas laman. Despues ami, Juan, a mira e stat santu, Herusalèm Nobo, bahando for di shelu for di Dios, prepará manera un brùit dòrná pa su esposo" (Rev. 21:1, 2, NKJV).

E gran vishon apokalíptiko ku Juan a registrá den Revelashon a yuda Juan pa sosegá ku konfiansa den e provishonnan i promesanan di Dios.

Riba Seru di Oleifi, Hesus a pinta historia den rasgonan grandi segun ku E tabata kontestá e preguntanan di e disipelnan: "Bisa nos, ki ora e kosnan akí lo sosodé? I kiko lo ta e señal di Bo binida, i di e fin di e siglo?" (Mat. 24:3, NKJV).

E famoso sermon di Hesus, registrá den Mateo 24, ta kubri e liña di tempu históriko sin interupshon, for di Su dianan te na e Segundo Binida i mas ayá.

Hesus ker a duna Su pueblo a lo largu di siglonan un deskripshon skemátiko di e plan divino pa profesianan di tempu di fin, asina ku esnan ku ta biba na fin di tempu por ta prepará pa e evento final. E tabata ke pa nos ta kapas pa sosegá ku konfiansa den Su amor, asta ora ku tur kos rònt di nos tabata kai den otro.

Atventistanan konosé bon e deskripshon di Daniel di "un tempu di angustia manera nunka tabatin for di tempu ku tabata eksistí un nashon" (Dan. 12:1). Hesus ke pa nos ta prepará pa e evento akí, kua ta presedé Su Segundo Binida.

Kon Su binida lo ta? Kon nos por evitá pa ser engañá? Lesa Mateo 24:4-8 , 23-31.

E binida di Hesus lo ta un evento literal na e tempu di fin. Konsiderando e espasio duná den profesia na Su regreso, i asta den e sermonnan di Hesus, esaki ta algu sumamente importante.

E último biaha ku tabatin un evento klimátiko mundial, solamente ocho hende den henter mundu tabata prepará p'e. Hesus ta kompará e inesperá di e Segundo Binida ku e evento ei, e Diluvio (Mat. 24:37-39). Pero ounke niun hende sa e dia òf ora di e Segundo Binida (Mat. 24:36), Dios a duna nos un konteo regresivo profétiko ku nos por mira ta sosodiendo den e mundu rònt di nos.

Nos a ser duná un ròl pa yena den e drama profétiko akí. Kiko ta nos parti? Focus riba Mateo 24:9-14.

Den e konflikto kósmiko akí, nos ta mas ku djis opservadónan. Nos mester ta partisipantenan aktivo den plama e evangelio te na e finnan di mundu, kua ta nifiká ku nos tambe lo enfrentá persekushon.

E kuadro grandi profétiko di historia no solamente ta permití nos sinta i no hasi nada segun ku e eventonan ta desaroyá, eventonan ku realmente nos no por kontrolá. Asina tantu biaha e aktitut por ta: "Bon, eventonan final ta bai sosodé manera nan a ser pronostiká, asina, kiko nos por a hasi al respekto ku simplemente aseptá nan? Despues di tur kos, kiko mi so por hasi?"

Pero esei no ta e manera ku kristiannan mester relashoná ku e mundu rònt di nan i, spesialmente, ku eventonan final. Revelashon 14 ta bisa nos ku nos propósito na e momentu akí den historia ta pa konta otronan tokante e huisio di Dios i yuda nan prepará pa e segundo binida di Hesus.

Lesa Revelashon 14:6-12. Kiko ta ser siñá aki, i kiko nos mester proklamá na e mundu? Dikon e mensahe akí ta di tantu urgensia?

Komo Atventistanan, nos ta kere ku e "bèrdat presente" (2 Pe. 1:12) ta ser hañá, spesífikamente, den e versíkulonan akí ku nos ta referí na dje komo "E Mensahenan di e Tres Angelnan". Aki nos ta hañá e esensia di loke nos yamada ta na e momento aki den historia di tera.

Nota, e ta kuminsá ku e "evangelio eterno", e notisia maravioso di e morto i resurekshon di Kristu, riba kua nos úniko speransa di salbashon ta deskansá. Tambe tin e mensahe ku "e ora di Su huisio a yega" (Rev. 14:7, NKJV), un señal poderoso ku ta mustra na e fin di tempu. Despues, tambe, tin e yamada pa adorá esun "ku a traha shelu i tera", den kontraste ku e spièrtamentu teribel tokante esnan ku, kedando den Babilonia, ta adorá "e bestia i su imágen". Finalmente tin e deskripshon di e pueblo di Dios di e tempu di fin: "Ata aki e pasenshi di e santunan; ata aki esnan ku ta warda e mandamentunan di Dios i e fe di Hesus" (NKJV).

Lesa Revelashon 14:11. Kiko e ta bisa tokante e falta di sosiegu pa esnan ku ta adorá e bestia i su imágen?

No tin sosiegu, di dia òf anochi, pa esnan ku ta adorá e bestia i su imágen? Ounke ta eksistí vários idea tokante kiko eksaktamente esaki ta nifiká, tur lo ta di akuerdo ku e hendenan akí no ta eksperensiá e tipo di sosiegu ku Dios ta ofresé na esnan ku ta fiel na djE.

Pa hopi siglo awor, kristiannan a bin ta spera e regreso di Kristu. E ta, berdaderamente, e kulminashon di tur nos speransanan, i no solamente di nos, sino e speransanan di tur e fielnan di Dios a lo largu di henter historia.

Lesa Hebreonan 11:13-16. Ki gran promesa tin aki, no solamente pa e hendenan di antaño sino pa nos mes, tambe?

Den hopi forma, e versíkulonan akí no tin sentido si e vershon komun i popular di morto tabata bèrdat. Di kiko e pasashi ta papiando, e hendenan akí "no a risibí e promesanan"? Nan ta morto, supuestamente awor ariba den shelu huntu ku Hesus gosando di nan gran rekompensa. Ora, por ehèmpel, Billy Graham a muri, bes tras bes nos ta tende kon e ta awor den shelu huntu ku Hesus.

Tambe tin un ironia den e enfoke akí, pasobra hopi biaha ora un hende muri, nos ta tende: "Ku e por sosegá na pas". Pero kiko ta pasando aki? Hendenan asina ta sosegando na pas, òf nan ta ariba den shelu hasiendo loke sea ku nan ta suponé di ta hasiendo (manera wak riba tur e "dibershon" aki bou)?

Kon Hesus ta deskribí morto? Lesa Juan 11:11.

De echo, e idea ku nan ta sosegá "na pas" ta, naturalmente, e bèrdat tokante loke ta sosodé na morto, no t’asina? E mortonan, berdaderamente, ta sosegando. "Pa e kreyente, morto ta djis un asuntu chikitu. Kristu ta papia komo si fuera e ta di poko importansia. ‘Si un hende warda Mi palabra, e lo no mira morto nunka', ‘lo e no eksperensiá morto nunka'. Pa e kristian, morto ta solamente un soño, un momento di silensio i skuridat. E bida ta skondé ku Kristu den Dios, i 'ora Kristu, Kende ta nos bida, ser revelá, e ora ei boso tambe lo ser revelá huntu kunE den gloria'. Juan 8:51, 52; Kol. 3:4.” — Ellen G. White, The Desire of Ages, p. 787.

Hesus ta kompará e kondishon di un persona entre morto i e mainta di resurekshon ku un soño inkonsiente (Juan 11:11,14), pero tambe E ta enfatisá ku tantu esnan salbá komo esnan pèrdí lo risibí nan rekompensa despues di resurekshon (Juan 5:28,29). El a enfatisá e nesesidat di ta prepará pa morto, ki ora ku e bini.

Un di e aplikashonnan mas usá riba nos telefònnan inteligente ta Google Maps. Mayoria di nos no por kòrdá kiko nos tabata hasi promé ku e mapanan GPS tabata eksistí riba nos telefònnan. Nos por ta nèrvioso ora nos ta dirigiendo nos mes pa un lugá ku nunka nos no a bai promé, pero ku Google Maps riba nos telefònnan, nos por bai den un aventura ku konfiansa i haña nos kaminda den kualke siudat estranhero. E konfiansa akí lo por tabata un ilustrashon di e tipo di sosiegu ku Dios ke duna nos ku Su kalendario profétiko?

Tin biaha, sinembargo, nos por hinka e adrès robes den nos app, òf nos por disidí simplemente pa no sigui e direkshonnan pasobra nos ta kere ku nos konosé un kaminda mas kòrtiku. Den kualke kaso, nos por resultá un kaminda ku nos no tabata ke ta, i definitivamente no den un estado di ánimo trankil tampoko.

Lesa Filipensenan 4:4-6. Kiko Pablo ta bisando nos aki tokante e manera pa nos tin berdadero deskanso, berdadero pas, asta meimei di un mundu tormentá i doloroso?

Den e pasashi akí, Pablo no ta bisando pa regosihá, semper, den tur e pruebanan ku bo ta enfrentá. En kambio, e ta bisando: "Regosihá den Señor semper". No importá nos situashon presente, no importá ki pruebanan nos ta enfrentando, si nos meditá riba Dios, riba Su bondat, Su amor, i riba Su sakrifisio riba e krus pa nos, nos por regosihá den djE i tin pas pa nos almanan kansá.

Djis e tono mes di e tekstonan ta impliká sosiegu, pas, i un speransa trasendente di algu mas ayá di e mundu akí.

Imaginá bo, tambe, e tipo di sosiegu pa nos almanan ku nos lo tin si, enbèrdat, nos por tabata "preokupá pa nada". Esaki apénas ta parse realístiko pa kualke hende den e mundu akí (asta Pablo tabatin un kantidat di preokupashon), pero atrobe, sabiendo ku un Dios amoroso ta finalmente den kontròl i lo salba nos den Su reino, siguramente por yuda nos pone e kosnan ku nos ta preokupá p' e den e perspektiva adekuá.

"Señor ta serka"? Es desir, E ta semper serka di nos, i ku asina nos sera nos wowonan i sosegá den e soño di morto, e siguiente kos ku nos sa ta e regreso di Kristu.

Sin duda, bida ta yen di tenshon, prueba, i lucha. Niun di nos ta skapa di nan; siguramente apòstel Pablo tampoko no a skapa di nan (lesa 2 Korintionan 11). No opstante, su punto ta pa bisa nos ku asta ku tur loke nos ta soportá aworakí, nos por regosihá den loke a ser duná na nos den Kristu i, enbèrdat, nos por hañá sosiegu pa nos almanan, asta awor.