Les 11

* 5-11 di mart

Hesus, Outor i Kumplidó di Nos Fe

Sabat Atardi

Lesa pa e siman aki:

Hebr. 10:35–39; Rom. 1:17; Hebreonan 11; Hos.2:9–11; Hebr. 12:1–3.

Versíkulo di Memoria:

“Mirando riba Hesus, e outor i kumplidó di nos fe, Kende, pa e goso ku a ser poné Su dilanti, a soportá e krus, menospresiando e bèrgwensa, i a sinta na man drechi di e trono di Dios” (Hebreonan 12:2, NKJV).

Hebreonan 11 i 12 ta probablemente e kapítulonan di mas stimá di e buki. Nan ta deskribí e bida kristian komo un kareda den kua nos tur ta partisipá i den kua tur ku keda fiel lo risibí e rekompensa. Tambe nan ta deskribí e drama di redenshon komo un kareda den kua hendenan di fe di pasado a perseverá, apesar di sufrimentunan, pero ainda no a risibí e rekompensa.

I esei ta pasobra e storia ta terminá ku nos tambe, no solamente nan. Nos ta e akto final. E drama ta kulminá ku nos drentando i koriendo e último parti di e kareda, i ku Hesus sintá na e liña di meta na man drechi di Dios. E ta proveé inspirashon i tambe e ehèmpel prinsipal di kon mester kore e kareda. E ta e testigu supremo ku e rekompensa ta berdadero i ku E ta e prekursor ku ta habri e kaminda pa nos (Hebr. 6:19,20; Hebr. 10:19–23).

Hebreonan 11 ta splika ku fe ta konfiansa den e promesanan di Dios, asta si nos no por mira nan ainda. E lès akí lo eksplorá kiko fe ta i kon e ta ser optené a traves di e ehèmpelnan di pasado pero, spesialmente i sentral, a traves di e ehèmpel di Hesus, "e outor i kumplidó di nos fe" (Hebr. 12:2, ESV).

* Studia e lès di e siman aki pa prepará pa Sabat, 12 di mart.

Djadumingu

6 di mart

E Hustu Lo Biba Pa Fe

Lesa Hebreonan 10:35-39. Kiko Dios ta bisando nos den e versíkulonan akí?



Perseveransia ta un karakterístika di e pueblo di Dios di e tempu di fin, sin kua nan lo no ta kapas di risibí e promesanan (Rev. 13:10, Rev. 14:12). Pa perseverá, sinembargo, kreyentenan mester "tene duru" na nan fe (Hebr. 10:23, Hebr. 4:14). Pablo a mustra ku e generashon di desierto no tabata kapas di a risibí e promesa pasobra nan tabata falta fe (Hebr. 3:19). Hebreonan ta deskribí kreyentenan tambe komo na e drèmpel di kumplimentu di e promesanan (Hebr. 9:28; Hebr. 10:25,36-38) i ku mester ehersé fe si nan ke risibí e promesanan (Hebr. 10:39).

Pablo ta introdusí su eksposishon riba fe ku un sita for di Habakuk 2:2-4. Habakuk a puntra Dios dikon E tabata tolerá e hendenan traishonero ku tabata oprimí esnan hustu (Hab. 1:12-17). E profeta i su pueblo tabata sufriendo; pues, nan tabata ke pa Dios aktua. Dios a kontestá, sinembargo, ku tabatin un tempu señalá pa kumplimentu di Su promesa, i nan mester a warda (Hab. 2:2-4). Habakuk i su pueblo tabata biba, meskos ku nos, entre e tempu di e promesa i e tempu di su kumplimentu. E mensahe di Dios a sigui den Hebreonan: "Esun ku ta biniendo lo bin i lo no tarda" (Hebr. 10:37, NIV; lesa tambe Hab. 2:3).

E mensahe ta referí na Hesus. E ta Esun hustu, e personifikashon di fe ku ta agradá Dios i ta proveé bida (Hebr. 10:5-10).

Dikon, anto, E lo a "tarda"? E lo no tarda. El a bin kaba pa muri pa nos (Hebr. 9:15-26), i siguramente E lo bin atrobe na e tempu señalá (Hebr. 9:27,28; Hebr. 10:25).

E mensahe di Dios a sigui: "mi hustu lo biba pa fe" (Hebr. 10:38, ESV). Pablo ta deklará e mesun kos den Romanonan 1:17 i Galationan 3:11. Romanonan 1:16,17 ta spesialmente aklaratorio pasobra e ta splika ku e hustisia di Dios ta "ser revelá di fe pa fe." Loke Pablo ke men ta ku e fieldat di Dios na Su promesanan ta bin promé, i Su fieldat ta produsí, komo su resultado, nos fe i/òf fieldat.

Por lo tantu, pasobra Dios ta permanesé fiel na Su promesanan (2 Tim. 2:13), e hustunan, den kontesta na e fieldat di Dios, tambe lo permanesé fiel.

Djaluna

7 di mart

Pa Medio di Fe Abraham

Hebreonan ta definí fe komo "siguransa den loke nos ta spera p’e i siguransa tokante loke nos no ta mira" (Hebr. 11:1, NIV). Despues e ta proveé un lista di hende fiel for di historia di Israel ku ta un ehèmpel di kiko fe ta, i e ta mustra kon nan a manifestá e fe ei pa medio di nan obranan.

Lesa Hebreonan 11:1-19. Kiko e "héroenan" di fe akí ta hasi ku a hasi nan fe un ehèmpel? Kon nan akshonnan ta relashoná ku speransa di kosnan ku no ta mira?



Probablemente Abraham ta e personahe di mas importante den e kapítulo akí. E último akto di fe di Abraham ta spesialmente instruktivo respekto e berdadero naturalesa di fe.

Hebreonan ta mustra ku e instrukshon di Dios na Abraham pa e ofresé Isaac komo un sakrifisio tabata parse di ta impliká un kontradikshon di Dios Su parti (Hebr. 11:17,18). Isaac no tabata e úniko yu hòmber di Abraham. Ismael tabata e primogénito di Abraham, pero Dios a bisa Abraham ku tabata bon pa e aseptá e petishon di Sara pa saka Ismael i su mama pafó pasobra Dios lo a kuida pa nan, i tambe pasobra e desendensia di Abraham lo ser kontá a traves di Isaac (Gen. 21:12,13). Den e siguiente kapítulo, sinembargo, Dios ta pidi Abraham pa ofresé Isaac komo un ofrenda kimá. E instrukshon di Dios den Génesis 22 tabata parse di ta kontradesí rotundamente e promesanan di Dios den Génesis 12-21.

Hebreonan ta konkluí ku Abraham, di forma asombroso, a resolvé e enigma dor di yega na e konklushon di ku Dios lo a resusitá Isaac despues ku el a ofres'é. Esaki ta asombroso pasobra niun hende a ser resusitá ainda. Ta parse, sinembargo,ku e eksperensia previo di Abraham ku Dios a hib’é na e konklushon ei. Hebreonan 11:12 ta bisa ku Isaac a ser konsebí pa medio di e poder di Dios for di unu ku tabata "kasi morto". Pablo tambe a señalá ku, apesar di ku Abraham tabata "kasi morto" i Sara steril, Abraham a kere "den speransa ... kontra speransa, ku e lo mester a bira tata di hopi nashon" pasobra el a kere ku Dios "ta duna bida na e mortonan i ta yama na eksistensia e kosnan ku no ta eksistí" (Rom. 4:17-20, ESV). Por lo tantu, Abraham mester a asumí ku si Dios, den algun sentido ya a duna bida na Isaac for di e mortonan, E por bolbe hasié. Den e guiansa di Dios den pasado, Abiaham a mira un impreshon di loke E por a hasi den futuro.



Djamars

8 di mart

Moises: Keriendo den loke ta Invisibel

Lesa Hebreonan 11:20-28. Kiko e hòmbernan di fe akí a hasi? Kon nan akshonnan ta relashoná ku speransa i ku kosnan invisibel?



Moises ta e di dos gran ehèmpel den e kapítulo di fe akí. E bida di Moises ta ser introdusí i konkluí pa dos akto di desafio na e rei. Su mayornan a skonde Moises ora el a nase, pasobra "nan no a tene miedu di e dekreto di rei" (Hebr. 11:23, ESV), i Moises a sali for di Egipto, "sin tin miedu di e rabi di rei" (Hebr. 11:27, ESV). E akto di mas signifikante di Moises tabata, sinembargo, ku el "a nenga di ser yamá yu di Fárao su yu muhé" (Hebr. 11:24). E referensia na e mama adoptivo di Moises komo " yu muhé di Fárao" ta sugerí ku e tabata planiá pa ta e siguiente Fárao. Moises, sinembargo, tabata dispuesto pa laga e prospekto di bira e gobernante di e nashon di mas poderoso e momento ei atras i pa bira, en kambio, e lider di katibunan, refugiadonan resien librá, en realidat.

Kompará Hebreonan 11:24-27 i Hebreonan 10:32-35. Kiko tabata e similaridatnan entre e situashon di e resipientenan original di Hebreonan i e eksperensia di Moises?



E grandesa di Moises tabata ku e tabata kapas di mira mas ayá di e promesanan di e rei di Egipto i tabata mira padilanti na loke ta invisibel, es desir, e promesanan di Dios. Hebreonan ta bisa ku e klave tabata ku bista di Moises tabata fihá riba "e rekompensa", no riba e rikesanan di Egipto. E rekompensa akí ta e mesun rekompensa menshoná den Hebreonan 10:35, kua Dios a primintí na tur ku kere den djE.

E palabranan di Pablo tokante e desishon di Moises mester a eko poderosamente den kurason di su lesadónan original. Nan a bin ta soportá reprochenan i insultonan pa motibu di nan fe den Kristu. Tambe nan a ser aflihí i a pèrdè nan poseshonnan (Hebr. 10:32–34). Algun tabata den prizòn (Hebr. 13:3). Den paralelo, Moises a skohe pa ser maltratá huntu ku e pueblo di Dios, kambiando e rikesa di Egipto pa karga e insultonan asosiá ku Kristu pasobra e tabata kere ku e rekompensa di Kristu tabata mas grandi ku kualke kos ku Egipto por a ofresé.

Djárason

9 di mart

Pa Medio di Fe Rahab i e Sobrá

Lesa Hebreonan 11:31 i Hosue 2:9-11. Dikon Rahab, un prostituta pagano, a ser inkluí den e teksto akí di personahenan bíbliko sagrado?



Rahab ta probablemente e personahe mas inesperá ku nos ta haña den Hebreonan 11. Rahab ta un di e dos muhénan menshoná pa nòmber. E ta e di dies riba e lista, e proménan siendo antepasadonan i patriarkanan di Israel, i kada un tabata ser konsiderá hustu. Ora nos yega na dje, nos ta haña ku e no ta solamente un muhé sino tambe un prostituta pagano.

E kos di mas sorprendente ta ku e ta tambe e sentro temátiko i klímaks di e kapítulo. E lista ta organisá di un manera úniko. Kada entrada ta kuminsá ku e uso repititivo di e frase "pa medio di fe". E patronchi básiko ta "Pa medio di fe Fulano a hasi esaki i esaya" òf "Pa medio di fe esaki i esaya a sosodé ku Fulano". E patronchi repititivo akí ta oumentá e espektativa di e lesadó pa tende e afirmashon kulminante ku "pa medio di fe Hosue a guia e pueblo den e tera primintí".

Pero esei no ta loke e teksto ta bisa. En kambio, e ta salta Hosue, i e prostituta ta tuma su lugá. Despues di menshon di Rahab, e patronchi repititivo ta kaba di forma abrupto ku "i kiko mas lo mi bisa?" (Hebr. 11:32, NKJV). Despues, Pablo ta menshoná rápidamente algun nòmber i evento ku e no ta splika den detaye.

E akto di fe di Rahab tabata ku el a tende, a kere, i a obedesé, maske e no a mira. E no a mira e plaganan di Egipto, òf e liberashon den Laman Kòrá, òf awa kore for di baranka, òf pan baha for di shelu; sinembargo, el a kere. E tabata un bon ehèmpel pa e oudiensia di Hebreonan, ku no a tende Hesus prediká òf mir'E hasi un milager, i pa nos tambe, ku tampoko no a mira ningun di e kosnan akí.

"Rahab tabata un prostituta ku tabata biba riba e muraya di Jeriko. El a skonde e dos spionnan israelita mandá pa kontrolá e defensanan di e siudat ei. Pa motibu di su amabilidat pa ku nan, i su deklarashon di ta kere den Dios, e spionnan a primintí ku bida di Rahab i su famia lo a ser di spar ora e atake a bini riba Jeriko.” — Introduction to Rahab hañá den Daughters of God, p. 35.

Pablo despues ta kontinuá (Hebr. 11:35-38) ku un lista di e difikultatnan ku hopi a enfrentá. E frase "a rechasá di aseptá liberashon" (Hebr. 11:35, ESV) ta impliká ku nan tabatin e posibilidat di skapa pero a skohe pa no hasi esei, pasobra nan bista tabata riba e rekompensa di Dios.

Djaweps

10 di mart

Hesus, Outor i Kumplidó di Nos Fe

Lesa Hebreonan 12:1-3. Kiko e versíkulonan akí ta pidi nos hasi?



E klímaks di e eksposishon riba fe realmente ta yega ku Hesus den Hebreonan 12. Pablo a kuminsá e karta ku Hesus, Kende ta "Esun ku ta pa bin" i ken "lo no tarda" (Hebr. 10:37, ESV), i Pablo ta konkluyé ku Hesus komo e "kumplidó" di nos fe. (Hebr. 12:2, ESV). Hesus ta e "outor i kumplidó di fe" (NASB). Esaki ta nifiká ku Hesus ta Esun ku ta hasi fe posibel i ta e ehèmpel ku ta personifiká perfektamente di kiko un bida di fe ta trata. Ku Hesus, fe a alkansá su ekspreshon perfekto.

Hesus ta e "fundadó" (òf "outor", òf "pionero") di nos fe den a lo ménos tres sentido.

Na promé lugá, E ta e úniko ku a terminá e kareda den su sentido di mas kompleto. E otronan ku ta ser papiá di dje den e kapítulo anterior no a alkansá nan meta ainda (Hebr. 11:39,40). Hesus, sinembargo, a drenta den e sosiegu di Dios den shelu i ta sintá na man drechi di e Tata. Nos, huntu ku e otronan akí, lo reina ku Hesus den shelu (Rev. 20:4).

Na di dos lugá, tabata realmente e bida perfekto di Hesus ku a hasi posibel pa e otronan akí por kore nan kareda (Hebr. 10:5-14). Si Hesus no a bini, e kareda di tur otro hende lo tabata inútil.

Finalmente, Hesus ta e motibu ku nos tin fe. Komo unu ku Dios, El a ekspresá e fieldat di Dios pa ku nos. Dios nunka a rindi den Su esfuersonan pa salba nos, i ta p'esei nos lo alkansá e rekompensa na final si nos no entregá. Hesus a kore ku pasenshi i a permanesé fiel, asta ora nos no tabatin fe (2 Tim. 2:13). Nos fe ta solamente un kontesta riba Su fieldat.

Finalmente, Hesus ta e "kumplidó" di fe pasobra E ta e ehèmpel perfekto di kon ta kore e kareda di fe. Kon El a kore? El a pone tur karga un banda dor di entregá tur kos pa nos (Fil. 2:5-8). Nunka El a peka, hamas. Hesus a tene Su bista firmemente riba e rekompensa, kua tabata e goso poné Su dilanti, esun di mira e rasa humano redimí pa medio di Su grasia. Asina, El a soportá mal komprondementu i abuzu; El a karga e bèrgwensa di e krus (Hebr. 12:2,3).

Awor ta nos bùrt pa kore. Aunke nunka nos por alkansá loke Hesus a alkansá den nos propio forsa, nos tin Su ehèmpel perfekto nos dilanti, i asina pa medio di fe den djE, i manteniendo nos bista riba djE (manera e otronan promé ku nos a hasi), nos ta sigui padilanti ku fe, konfiando den Su promesanan di un gran rekompensa.

Djabièrnè

11 di mart

Pa mas Estudio:

"Pa medio di fe bo a bira di Kristu, i pa medio di fe bo mester krese den djE, dor di duna i tuma. Bo mester duna tur, bo kurason, bo boluntat, bo servisio, duna bo mes na djE pa obedesé tur Su rekerimentunan; i bo mester tuma tur, Kristu, e plenitut di tur bendishon, pa biba den bo kurason, pa ta bo fortalesa, bo hustisia, bo yudadó eterno, pa duna bo poder pa obedesé.” — Ellen G. White, Steps to Christ, p. 70.

"Dios nunka ta pidi nos pa kere, sin duna sufisiente evidensia riba kua nos por basa nos fe. Su eksistensia, Su karakter, verasidat di Su palabra, tur ta establesé pa medio di testimonio ku ta apelá na nos rason; i e testimonio akí ta abundante. Sinembargo, Dios nunka a kita e posibilidat di duda. Nos fe mester basa riba evidensia, no demonstrashon. Esnan ku ta deseá di duda lo tin oportunidat; miéntras esnan ku realmente ta deseá di konosé e bèrdat lo haña hopi evidensia riba kua basa nan fe.

"Ta imposibel pa mentenan finito komprondé plenamente e karakter òf e obranan di Esun Infinito. Na e intelekto di mas apto, e mente di mas altamente eduká, e Ser santu ei semper lo keda bistí den misterio. 'Bo por deskubrí e profundidatnan di Dios? Bo por deskubrí e límitenan di e Todopoderoso? Nan ta mes haltu ku e shelunan, kiko bo por hasi? Mas profundo ku Seol, kiko bo por sa?' Job 11:7,8.” — Ellen G. White, Steps to Christ, p. 105.

Preguntanan di Diskushon: