Kon relashoná mi mes ku Dios

Ya nos ta na e di 4 dia di nos evento. Pabien, bo ta riba bon kaminda. Te aki nos a siña ku nos no por ta kristiannan bibu a ménos ku nos ta buska Dios tur dia. Niun hende ta un kristian bibu a ménos ku e tin un relashon diario ku Dios.

Awe nos lo siña mas tokante e estudio akí:

For di un punto di bista spiritual, kiko ta nifiká kome e karni i bebe e sanger di Kristu? Juan 6:53.

E ta nifiká: tin un eksperensia personal ku Hesus, komo base un kontakto diario kunE. Aseptá e Palabra, e Pan di shelu, ta nifiká aseptá Kristu mes. Ora e Palabra di Dios ta ser risibí den e alma, nos ta partisipá di e karni i e sanger di e Yu di Dios.

Meskos ku e sanger ta ser formá den e kurpa pa medio di e kuminda ku nos ta kome, asina Kristu ta ser formá internamente dor di apsorshon di e Palabra di Dios, ku ta Su karni i e sanger di e Yu di Dios; i, pa medio di obediensia na e Palabra akí, e ta bira partisipante di e naturalesa divino.

Meskos ku e nesesidat di alimento temporal no por ser suplí dor di partisipá di dje solamente un biaha, asina e Palabra di Dios mester ser komé diariamente pa supli e nesesidatnan spiritual.

Debí na desgaste i pèrdida, e kurpa mester ser renobá ku sanger, suministrá dor di alimento diario. Pues, nos mester alimentá nos mes konstantemente ku e Palabra, di kua su konosementu ta bida eterno. E Palabra akí mester ta nos sustento i bibida. Solamente den esaki e alma lo haña su nutrishon i vitalidat. P'esei, mi ta mantené mi eksperensia kristian pasando un tempu mi so tur dia pa relashoná mi mes ku Dios. Mi ta biba pa medio di fe den Kristu, i ta permanesé den djE pa medio di Su Palabra i di orashon. "Bon," un hende lo por a puntra, "kon mi por relashoná mi mes ku Dios si mi no por mir’É?" Nos ta familiarisá i relashoná nos mes ku un hende, inkluso ku Hesus, pa medio di tres método simpel:

1. Kòmbersando ku un hende.
2. Skuchando kiko e persona ei tin di bisa mi i…
3. Kanando, trahando òf hasiendo kos huntu.

Dios a duna nos e mesun kamindanan ei atraves di kua nos ta drenta den un relashon personal kunE. Mi ta bai familiarisá mi mes kunE solamente:

1. Kòmbersando kunE (orashon).
2. Skuchando loke E tin di bisa (studiando Su Palabra).
3. Pues, asina nos lo hasi kosnan huntu (testimonio kristian).

Apesar ku e esensia di bida kristian ta familiaridat òf relashon diario ku Hesus, hopi bia nos no ta kere ku esei ta asina fásil. Satanas ta purba hiba nos na operá nos hustisia i nos fe, i despues di a usa nos tempu bringando kontra e enemigu, nos no tin niun tempu pa familiarisá nos mes ku Hesus. Nos sa ku henter e armadura di Dios ta nesesario pa ta viktorioso (Efe. 6:11–17), sinembargo, nos no ta ripará ku usa e armadura ta realmente bisti nos mes ku Kristu Hesus (Rom. 13:14).

P’esei, nos ta sigui ku nos eksperensia i nos bida kristian sabiendo loke ta nifiká hinka rudia tur dia dilanti di e Palabra di Dios. No ta eksistí niun otro manera pa konosé Dios, eksepto atraves di un bida di komunion partikular i personal.

Ken ku bo por ta, mi pregunta awe ta esaki: "Kiko ta nifiká un bida di deboshon? Kiko ta nifiká pasa tempu bo so ku Dios?"

Den e evento di mañan nos lo kontestá e preguntanan akí. No pèrdè e dia, purba sosegá trempan pa bo por lanta ku entusiasmo i pasa tempu bo so ku Hesus.