Deskubrí e plan di Dios pa bo bida

Papia ku Dios i tende Su bos mester ta nos promé tarea durante e promé oranan di kada dia. E mandamentu di Señor, pa tur esnan ku ta deseá di konsiderá seriamente e proseso di madures spiritual, ta:

"Konsagrá bo mes na Dios tur mainta; hasi esaki bo promé trabou. Laga bo orashon ta: 'Tumami, o Señor, komo kompletamente di Bo. Mi ta pone tur mi plannan na Bo pia. Usami awe den Bo servisio. Keda ku mi i ku tur mi trabou sea hasí den Bo.’ Esaki ta un asuntu diario. Konsagrá bo mes kada mainta na Dios pa e dia ei”. ( El Camino a Cristo, p. 69,70)

Lesa e tèkstnan di Beibel akí: Hosue 22:5; Deuteronomio 30:20; Juan 8:43.

Dios tin un programa pa kada dia di mi bida. Na komienso di dia mi mester sa pa mi mes kiko ta e boluntat di Dios, den Su Palabra, pa mi bida. Kon deskubrí e boluntat pa kada dia? Nos ta bai analisá algun manera pa medio di kua nos por deskubrí e plan di Dios pa kada dia atraves di: orashon, lesamentu di e Palabra, tende i skucha.

Orashon

Nos ta kòmbersá ku Dios pa medio di orashon i ta respondé òf reakshoná riba loke E ta papia ku nos pa medio di Beibel. Orashon i estudio di e Palabra ta dos elemento inseparabel i, ora mi lanta, e deseo di mas grandi di mi alma mester ta pa bai dilanti di e presensia di Dios i sa kiko e programa pa e dia ta.

Den e enkuentro akí, kada kreyente ta liber pa kòmbersá loke e ke ku Dios. Nos tur tin diferente nesesidat, i nos mester pone nan dilanti di e Tata ku libertat i un sentido di nesesidat profundo. Inkluí e sinku pasonan akí di e “plan di orashon diario” den bo orashon personal.

• Gradisí Dios (4 minüt).
• Konfesá bo pikánan (4 minüt).
• Intersedé pa otronan, miembronan di famia i amigunan no-kreyente (5 minüt).
• Hasi orashon pa bo pedidonan personal (4 minüt).
• Pidi pa direkshon di Spiritu Santu den bo bida (3 minüt).

Si bo kuminsá praktiká e plan di orashon diario akí tur dia, den un periodo mínimo di 20 minüt, lo bo tin resultadonan ekstraordinario den bo komunion ku Dios. Mi ta animábo pa kuminsá praktik’é. Bo por bai subiendo bo minütnan di orashon progresivamente. E idea ta ku desde awor bo ta sigui e pasonan akí den bo orashon bo so ku Hesus.

Lesamentu di e Palabra di Dios

E medionan di komunikashon ta ofresé nos korant i transmishonnan di notisia ku e informashon di dia i, pa ta aktualisá, nos mester para ketu pa lesa òf skucha. Di mes manera, Dios ta ofresé nos Su Palabra, ku ta presentá e skema diario pa kada un di Su yunan. Den dje tin e guia di e Tata pa neutralisá e programa ku Satanas tin pa bida di e kreyente riba e dia ei.

Komprondé e boluntat di Dios na komienso di kada dia ta vital pa viktoria òf derota, sea ta riba tereno spiritual òf material. Ta e grado di informashon i kompromiso ku e plan diario ei ta loke ta bai determiná éksitonan i erornan den bida den tur sentido. Papiando en relashon ku e nesesidat ei, Kristu a afirmá: “Boso ta frakasá, ignorando e Skrituranan i e poder di Dios” (Mat. 22:29). E falta di un relashon diario ku Dios, durante e promé oranan di dia, ta afektá nos disernimentu den tur aspekto di bida. Nos mester lesa e teksto bíbliko kuantu biaha ku ta nesesario. Nos mester komprondé korektamente loke Dios ke bisa nos; na final, ei tin e sekreto di éksito pa e dia ei.

E hende natural no ta komprondé e kosnan di Spiritu. P’esei, laga nos ta atento, pa nos no gaña nos mes. Tokante esaki, Hesus a spièrta e disipelnan kaba: “Teniendo wowo, boso no ta mira, i teniendo orea, boso no ta tende?” (Marko 8:18).

Nos ta terminá e dia di awe ku e siguiente pensamentu spiritual. "Konsagrá bo mes na Dios tur mainta; hasi esaki bo promé trabou" ( El Camino a Cristo, p. 69).