Kiko ta nifiká meditá riba e Palabra – 2

Den e trayekto di awe nos ta bai siña e nifikashon di e palabra meditashon i kon meditá riba e Palabra di Dios. Meditashon ta un di e hèrmèntnan mas importante pa por konosé Dios, i e mester ta kombiná ku otro métodonan ku ta fasilitá e kresementu spiritual di e kreyente, manera: tende, lesa, studia, siña for di kabes, skirbi, kanta i papia tokante e Palabra di Dios.

Laga nos pasa awor pa studia profundamente e nifikashon di meditá riba e Palabra di Dios. Ora nos ta meditá, nos ta risibí e bèrdat den profundidat di nos ser. Pues, meditá ta:

1. Skonde e Palabra di Dios den nos paden. "Nunka mi a separá for di e mandamentu di su lepnan; mi a warda e palabranan di Su boka mas ku mi kuminda" (Job 23:12).
2. Pensa riba e palabranan di e tèkst di Beibel ku un kurason totalmente habrí pa e direkshon di Spiritu Santu, pa E guiami na tur bèrdat ku mi alma mester.
3. Permití Spiritu Santu konfrontá e kristian ku mi ta ku e kristian ku Dios ke pa mi ta den lus di Su Palabra.
4. Pone mi mes na lugá di e personahe bíbliko i bisa: “Dios, obra den mi di mes manera ku Bo a obra den dje.”
5. Asimilá e Pan bibu ku ta ser sirbí, pa bo tin un bida nobo durante transkurso di dia.

Laga nos ban praktiká meditashon

Laga nos tuma komo ehèmpel e tèkst di Beibel di Jeremias 15:16.

"Bo palabranan a ser hañá, i mi a kome nan; i Bo Palabra tabata e goso i alegria di mi kurason; pasobra Bo nòmber a ser invoká riba mi, o Señor Dios di ehérsitonan" (Jer. 15:16).

Nos por meditá riba e versíkulo akí den e siguiente términonan:

1. Bo palabranan a ser hañá ...: Kiko e palabra haña ta sugerími? Buska: Kiko mester ta e naturalesa di e búskeda ei? “I boso lo buskaMi i boso lo hañaMi, pasobra boso lo buskaMi ku henter boso kurason” (Jer. 29:13). Salmo 42:1 ta menshoná ku mi alma tin mester di Dios pa biba, i e salmista ta referí na e búskeda ei di e siguiente forma: “Manera e biná ta anhelá pa korientenan di awa, asina mi alma ta anhelá na Bo, o Dios”. Ora bo lanta mainta, kiko ta e deseo di mas grandi di bo alma? Bo ta lanta respirando e poder di Dios i di Su Palabra?
2. I mi a kome nan ...: Aki, e palabra kome lo por a ser interpretá komo purba i kou e kuminda bon, te ora e nutrientenan drenta den e fluho di sanger di e alma, i danki na e proseso ei bo por biba durante e dia ei. Mi mester ta den presensia di Dios te ora mi sinti ku mi ta nutrí spiritualmente. Mi no por bai dilanti di e Tata djis pa “snèk” òf “sena”.
3. I Bo Palabra tabata e goso i alegria di mi kurason ...: Asina un hende ku ta duna prioridat na Dios na komienso di kada dia lo sinti su mes. E resultadonan di e forma di relashon ei ta poder i felisidat. Bo ta realisá kon ta posibel pa kombertí e tèkst den algu mas bibu i atraktivo? Sigui meditá, i bèrdatnan nobo lo ser revelá na bo.

E proseso di meditá riba e Palabra ta similar na esun di kome òf alimentá bo mes. Meskos ku mi mester introdusí kuminda den mi kurpa pa risibí e nutrientenan, di mes manera mi mester risibí e Palabra bibu di Dios den e profundidat di mi ser. Sin e alimento ku ta bini di komunion diario, lo bo sinti bo mes débil i bashí, meskos ku e kurpa físiko ku no ta risibí alimento ta sinti su mes sin forsa i sin boluntat pa aktua.

Mas nos alimentá nos mes di e Palabra i mas bèrdat nos risibí, mas aklarashon nos lo haña. Hesus ta bisa: “Boso ta e lus di mundu” (Mat. 5:14). I, mas nos permití e Palabra di Dios drenta den nos kurason, mas brio nos lo radia.