Meditashon i Kresementu Spiritual – 1

Madures spiritual ta un proseso ku ta tarda algun tempu, i meditashon bíbliko ta un hèrmènt indispensabel pa internalisá e bèrdat den bo kurason.

Den e trayekto di awe nos ta bai konosé un di e dos kondishonnan básiko pa meditashon por resultá den kresementu spiritual, i ku ta hibabo dilanti di e presensia di Dios durante transkurso di dia.

Beibel ta bisa den 1 Juan 3:4 ku piká ta transgreshon di Lei..., esta, inikidat.

Realisando un estudio mas profundo di e palabra inikidat, lo bo persibí ku un hende den piká ta den un posishon kontrali na Dios. Siguramente, e serkania i amor pa piká lo interferí den su relashon íntimo i profundo ku e Tata. Piká lo stroba e persona di tin un disernimentu kla di e relashon ku Dios ke tin kuné durante e dia ei.

E orientashon divino ta kla: "No stima mundu, ni e kosnan ku tin den mundu. Si un hende ta stima mundu, e amor di e Tata no ta den dje. Pasobra tur loke ku tin den mundu, e deseo di karni i e deseo di wowo i e orguyo di bida, no ta bin di e Tata, sino di e mundu. I e mundu ta pasa bai i su deseonan tambe, ma esun ku hasi e boluntat di Dios ta permanesé pa semper” (1 Juan 2:15-17).

E kreyente ku ta buska Dios diariamente durante e promé oranan di dia, pa medio di meditashon riba e Palabra, ta kuminsá odia mundu i su atrakshonnan di forma natural.

Ora nos ta papia di mundu, nos no ke men e globo terestre òf algu paresido, sino aktonan eksterior di inmoralidat, buracheria, violensia, arogansia, orguyo òf banidat. Ta importante pa komprondé ku e bataya di e kreyente no ta kontra e kosnan di mundu: kas, outo, teknologia, trabou, estudio, investigashon, siensia, etc. “Pasobra nos lucha no ta kontra karni i sanger, sino kontra e gobernantenan, kontra e podernan, kontra e forsanan mundial di e skuridat akí, kontra e forsanan spiritual di maldat den e lugánan selestial” (Efe. 6:12).

For di loke nos ta komprondé di e versíkulo akí, e lucha di tur yu di Dios ta kontra e spiritu di mundu, ku ta identifiká su mes ku e naturalesa humano pekaminoso i no regenerá. Unda ku un spiritu asina manifestá su mes, denter òf pafó di iglesia, e mester ser rechasá pa esnan ku ta stima Dios.

Si ta asina, e término “mundu” por ser komprondé komo e loke ta interferí den nos relashon konstante ku Dios.

Kòrda: Dios ta deseá di okupá e promé lugá den bo bida.

Para ketu i reflekshoná: Ta eksistí un aspekto di mi bida den kua e spiritu di mundu ta prevalesiendo? Mi a buska Dios na promé lugá tur mainta? Òf, kisas, mi a hasi otro kosnan promé ku mi a buska Dios?
Skirbi e sita akí i pon’e un kaminda visibel den bo kas:

“Kreyentenan ku ta bisti e armadura kompleto di Dios i ku ta dediká un tempu diariamente na meditashon, orashon i estudio di e Skrituranan, lo vinkulá nan mes ku Shelu i ta ehersé un influensia salbador i transformador riba esnan rònt di nan. Di nan lo ta e gran pensamentunan, e aspirashonnan noble, i e persepshonnan kla di bèrdat i deber pa ku Dios. Nan lo anhelá puresa, lus, amor, i tur e grasianan di orígen selestial” (Testimonios para la Iglesia, tomo 5, p. 105).