Meditashon i Kresementu Spiritual – 2

Ayera nos a mira e promé kondishon básiko ku nos mester pa meditashon riba e Palabra resultá den kresementu spiritual, hibando bo asina dilanti di presensia di Dios durante henter dia. I e kondishon ei ta: apartá bo mes di piká (1 Juan 2:15-17). Awe nos lo mira e di dos kondishon: bai ku alegria dilanti di presensia di Dios.

Bai ku alegria dilanti di e presensia di Dios

Bai dilanti di presensia di Dios ta un kondishon básiko pa meditashon produsí un kresementu spiritual profundo durante dia. E enkuentro ku Dios mester ta esun mas antisipá i fasinante di tur nos debernan. Kada adoradó mester ta rondoná pa un sintimentu profundo di gratitut pa tur loke Dios ta i pa tur loke E ta hasiendo awor. Esaki lo produsí gran alegria i gran goso dilanti di presensia di Señor.

Apòstel Pedro ta sita David ora e ta papia di e eksperensia akí: “Bo a lagami konosé e kamindanan di bida; lo Bo yenami di goso ku Bo presensia” (Echonan 2:28).

E salmista ta papia di meditashon komo un momentu di goso i plaser. Den tur su eskritonan tin evidensia kla i irefutabel di ku e Palabra di Dios ta dun’é goso i plaser inkomparabel. Den Salmo 119 nos ta haña vários manifestashon di goso. Lesa e salmo akí poniendo bo mes na lugá di David, i sigur lo bo tin vários motibu pa eksperensiá e mesun sintimentu ku e salmista tabatin.

“I lo mi tin delisia den Bo mandamentunan ku mi ta stima” (v. 47.)

“Bo testimonionan tambe ta mi delisia i mi konseheronan” (v. 24).

“E lei di Bo boka ta mihó pa mi ku míles di pida oro i plata” (v. 72).

“Ki dushi Bo palabranan ta pa mi shel'i boka, mas dushi ku miel den mi boka!” (v. 103).

“Bo palabra ta puru, p’esei Bo sirbidó ta stim'é” (v. 140).

“Mi ta regosihá den Bo palabra, manera un hende ku ta haña gran botín” (v. 162).

Bo ta realisá kon diferente ta pa studia i meditá riba e palabra di Dios poniendo e kondishonnan ei den práktika? Dikon meditashon i lesamentu di Beibel no ta bira monótono ni agotador denter di e modelo ei? Pa tres motibu básiko:

1. Deleitá bo mes den Señor: Beibel ta e Palabra di Dios, i nos no por separá un hende for di su bos òf abla; p’esei, si nos ta deleitá nos mes den Su Palabra, nos ta deleitá nos mes tambe den Dios, kende ta Su outor. Naturalmente, David a desaroyá e sintimentu ei pa medio di e relashon diario ku e tabata mantené ku Dios.
2. Deleitá bo mes den e boluntat di Dios: E hende ku ta deleitá su mes den Dios i den Su Palabra lo trata na sa kiko ta Su boluntat pa alegrá su mes den kumpli kuné. Beibel ta menshoná klaramente kiko nos mester hasi pa agradá Dios (1 Juan 3:22; Salmo 40:8).
   Mi aktitut, komo yu di Dios, ta di buska pa konosé e boluntat di mi Tata na komienso di kada dia. Ta mihó pa sa kiko E ke di mi na komienso di kada dia, na lugá di laga esaki yega na su fin pidiendo pordon pa erornan kometé (Jer. 29:11).
3. Deleitá bo mes den e Palabra: Den e enkuentro di komunion akí, Dios ta papia ku mi pa medio di Su Palabra i ami ta papia kunE pa medio di orashon. Asina, yen di alegria, lo mi deleitá mi mes den Señor i den Su boluntat. Esaki lo dunami momentunan sumamente agradabel. Ora mi topa Señor na komienso di kada dia, i ora mi tende Su bos i kontemplá Su kara, lo mi pone e plaser, ku mi ta sinti, identifiká su mes kada bes mas. Di e manera akí, meditashon ta bira un práktika indispensabel den e proseso di nos madures spiritual, ya ku den dje nos tin un relashon di amor den kua Dios ta komuniká ku nos i nos kunE.