E Práktika di Meditashon – 2

Den nos trayekto di awe nos lo mira e di dos i di tres aspekto práktiko di meditashon bíbliko.

Di Dos Aspekto:

Tende e bos di Dios. Nos a siña kaba ku meditá ta nifiká tende e bos di Dios pa medio di Su Palabra i papia kunE pa medio di orashon. Pa por tende Su bos bon kla, ta indispensabel pa konsiderá lo siguiente:

• E supremasia di Kristu ta un realidat den mi bida? Un pregunta klave lo tabata: Ta eksistí un área di mi bida ku ta fuera di kontrol di Spiritu Santu? E kurason dividí lo strobami di tin un komprondementu profundo di e Palabra di Dios.
• Piká no konfesá ta strobami di rekonosé e bos di Señor kompletamente.
• Lo mi no sintimi kómodo den e presensia di Hesus ora mi ta tesorá pikánan den mi bida. Desobedensia habrí i spesífiko na e orientashonnan di Beibel lo interferí direktamente ku e kalidat di mi relashon ku Dios.

Di Tres Aspekto:

Den Beibel, Hesus ta presentá su mes komo Esun ku ta e Pan i komo Esun ku ta ofresé e Pan. Na okashon di e multiplikashon di e pannan, El a duna e pan pa ser repartí, i den e tèkst ku nos ta lesa tokante e disipelnan di Emaus nos ta mira ku Hesus a sinta na mesa ku nan, i “a kohe e pan”. Semper ku nos bai na Beibel pa konosé Dios, nos ta deskubrí ku Esun ku ta duna e pan semper lo ta banda di nos.

Pa medio di Spiritu Santu, E lo hasi nos konosí ku tur e boluntat di e Tata. Ora nos disidí di risibí e pan ei, preferiblemente durante e promé oranan di dia, nos lo ta totalmente sasiá. E eksperensia di e disipelnan di Emaus ta konfirmá e echo di ku, sintá na mesa ku Señor, nos lo ser alimentá abundantemente ku Su palabra. E ta deleitá den alimentá nos. Den e tèkst ku nos a lesa, nos ta nota ku ora e disipelnan tabata sintá na mesa, El a kohe e pan, a bendishon’é, a kibr’é i El a dun’é na nan.

Mesun kos lo pasa ku nos durante henter e trayekto akí i kada dia di nos bida. Den presensia di Señor, i buskando humildemente pa konosé Su boluntat, nos lo risibí komprondementu. Pa medio di komunion, Dios lo revelá su mes na kada yu.

No ta esei ta loke a sosodé ku e disipelnan di Emaus? Beibel ta bisa: “… nan wowo a habri, i nan a rekonos’E.” Nos konosé e mensahe ku, pa medio di kontemplashon, nos ta ser transformá; i nos ta kere ku, ora nos bai dilanti di e presensia di Dios den e promé oranan di dia, nos ta risibí no solamente e revelashon di bèrdat, sino tambe e revelashon di Kristu mes.

Apesar di ku Hesus a disparsé for di bista di su disipelnan na e momentu ei, un kos ta ser mustrá klaramente den e teksto: e goso, felisidat i brio di Su presensia a keda ku nan. I, na e momentu ei, nan a sali kore bai pa anunsiá esei na e disipelnan ku tabata na Jerusalèm.

Ora na kuminsamentu di kada dia nos ta meditá dilanti di e presensia di Señor, e resultadonan ta ser mirá klaramente den nos bida: nos ta biba ku goso den e presensia di Dios, nos ta testigu- i mensaheronan di Kristu, i nos ta obedesé e plan ku E ta presentá pa nos bida riba e dia ei.

Promé ku nos kaba, laga nos konsiderá tres otro hoya di Shelu ku ta destiná pa nos:

• Eksodo 33:15: “Si Bo presensia no ta bai ku mi, no saka nos for di aki.”
• "No tin nada aparentemente asina débil, i no opstante asina invensibel, manera e alma ku ta sinti su insignifikansia i ta konfia kompletamente den e méritonan di e Salbador. Pa medio di orashon, estudio di Su Palabra, i kere ku Su presensia ta biba den e kurason, e ser humano mas débil por vinkulá su mes ku e Kristu bibu, kende lo tene su man i nunka lo lag’é bai” (El Ministerio de Curación, p. 136,137).
• "Hasi nos Salbador bo kompañero diario i bo amigu di famia. Dediká algu di tempu na estudio di e Palabra di Dios" (El Hogar Cristiano, p. 95).