Sea un vensedor spiritual – 1

Hendenan ku tin éksito den nan áreanan òf aktividatnan ku nan ta desaroyá, generalmente ta ser aserká ku un pregunta: Kiko ta e sekreto di bo éksito?

Gana plaka i tin poseshonnan ta sinónimo di éksito òf un ilushon temporal di stabilidat? Sin komunion diario ku Dios, tur éksito lo ta simplemente un ilushon.

Den nos trayekto di awe nos ta bai deskubrí e kousa prinsipal di berdadero éksito den bida. Nos lo mira kon algun hende a vense spiritualmente i a glorifiká Dios ku nan estilo di bida. Nos lo siña di e testimonio ku nan a laga pa nos.

Segun ku bo ta studia bida di algun gigante spiritual, nos ta deseá ku Spiritu Santu ta animábo pa ta un vensedor spiritual ku ta buska viktoria den Dios tur e dianan di bo eksistensia.

Awe i mañan nos lo mira e testimonio di algun hende ku tabatin éksito danki na nan komunion diario ku Dios.

DAVID

Esaki ta e promé personahe den e galeria di vensedornan spiritual. Papiando di dje, Beibel ta bisa: “Mi a haña David, yu di Isaí, un hòmber konforme mi kurason, ku lo hasi tur loke Mi ke” (Echonan 13:22).

Kiko ta e sekreto pa un hende alkansá un nivel asina haltu di spiritualidat? David mes a revelá e sekreto: “O, kuantu mi ta stima Bo lei! Henter dia e ta mi meditashon” (Salmo 119:97).

Kuminsá i terminá e dia den meditashon dilanti di e presensia di Dios, tabata e gran sekreto di David, i e mester ta esun di bo tambe.

Den mayoria di e salmonan ku el a skirbi, David a hasi su pashon evidente pa meditá riba e Palabra di Dios. Ora David ta referí su mes na e lei, e ta referí na e sèt di e promé sinku bukinan di Beibel, e Pentateuko, ku a ser skirbí dor di Moises. Imaginábo si David a biba den nos tempu i a haña su mes ku asina tantu Beibel, ku e formato- i tradukshonnan di mas variá, ku tantu buki basá riba e Palabra di Dios! Sigur e lo a bisa ku nos ta privilegiá di tin tantu alimentashon spiritual na nos disposishon.

E kristian mester studia i buska pa krese intelektualmente, pero na promé lugá e mester buska kresementu spiritual. Ora nos ta meditá riba e Palabra, nos mente ta ser poné den kontakto ku e mente di e Dios infinito. Di e manera akí e poder di Beibel ta kombertí su mes den esun di mas grandi di tur e podernan ku ta aktua den desaroyo di e naturalesa spiritual.

Tabata bibando denter di e realidat ei di komunion i búskeda ku David a habri su kurason na Dios i a eksperensiá un nivel asina haltu di spiritualidat. Beibel ta referí na dje komo un hòmber di éksito den tur loke el a hasi (2 Sam. 23:1; Echonan 7:46; 13:22; 4:25).

E tabata viktorioso komo wardadó di karné, komo sòldá, komo rei i kompositor di himno. El a biba praktikando loke el a skirbi den Salmo 1, relashoná ku e persona ku ta konsiderá su komunion seriamente dor di meditá riba e Palabra di Dios: “I tur loke e hasi lo prosperá” (versíkulo 3).

Akaso esaki no ta e proposishon di e Seminario di Reavivamentu Spiritual akí? Sí, nos ke pa bo desaroyá diariamente na promé lugá e kustumber di buska Dios.

Dios tin un programa diario pa bo bida, skirbí den Su Beibel Santu. Bai dilanti di e presensia di Dios meskos ku bo ta lanta mainta. E deseo di mas grandi di bo alma, ora bo lanta, mester ta di buska pa konosé e programa ei. Meskos ku David, bo ta bai eksperensiá e poder di Spiritu Santu ku ta obra milagrosamente den bo bida kada dia.

"Den e palabra di Dios tin e energia kreador ku a yama e mundunan na eksistensia. E palabra akí ta duna poder, ta engendrá bida. Kada òrdu ta un promesa; aseptá pa e boluntat, risibí den e alma, e ta trese kuné e bida di e Ser infinito. E ta transformá naturalesa i ta bolbe krea e alma den e imágen di Dios” (La Educación, p. 126).