Sea un vensedor spiritual – 2

Den e trayekto di ayera nos a deskubrí ku e kousa prinsipal di e éksito di David tabata su komunion diario ku Dios. Awe nos lo wak algun testimonio mas. Laga nos kuminsá!!

Hosue

Hosue ta un otro lider ku a siña buska poder i kurashi pa medio di meditashon diario riba e Palabra di Dios. El a risibí e mishon di dirigí e pueblo di Israel na un momentu difísil, i el a remplasá un di e lidernan di mas grandi ku mundu a konosé.

Gigantenan i statnan rondoná pa muraya tabata nan dilanti pa ser konkistá; e momentu di bataya tabata aserká. Tur kos mester a ser planiá kuidadosamente ku strategia, sabiduria, konosementu i disernimentu. Humanamente papiá, e lo tabata un mishon imposibel.

Hosue tabata sa ku, sin Dios, e lo no a bai niun kaminda. El a busk’E, pasobra e tabata sa ku ta Señor so por a hib’é na viktoria. Beibel ta bisa ku Señor a bai topa Hosue i a bis’é: “Solamente sea fuerte i tene hopi kurashi… E buki di e lei aki nunka lo apartá su mes for di bo boka; ma di dia i anochi lo bo meditá riba dje… pasobra e ora ei lo bo hasi bo kaminda prosperá, i tur kos lo sali bon pa bo” (Hosue 1:7,8).

Meditá dia i anochi riba e Palabra: Esei tabata e determinashon divino pa Hosue.

Meskos ku Hosue a obedesé Dios i tabatin éksito segun ku e tabata guia e pueblo di Israel rumbo pa e Tera Primintí, di mes manera Dios ke guiabo den kada paso ku bo dal den bida.

Den e buki "A solas con Dios en la meditación de la Palabra", Cambell McAlpine ta sita e ehèmpel di hopi hende ku a siña vense nan krísisnan despues di a kuminsá meditá riba e Palabra di Dios tur dia. Na kontinuashon, nos ta presentá un di e storianan ei ku e buki ta relatá.

“Mi tabata asistí regularmente na mi iglesia i tabata partisipá den tur e trabounan, pero mi tabata sinti mi mes bashí paden, pasobra mi tabata sa ku mi no tabata gosa di un komunion personal ku Dios. Un biaha, pa kasualidat (òf, por lo ménos, esei tabata loke mi a pensa e tempu ei), mi esposo i ami a skucha e siñansanan di un pastor tokante meditashon. Miéntras e tabata presentá e estudio, mi a komprondé ku ei e solushon pa mi búskeda tabata, pa yega na konosé Dios mihó. El a siña nos medidanan práktiko pa meditashon, i den e siman ei mi a hasi un kompromiso ku Dios pa meditá diariamente riba Su Palabra.

“Awe, despues di algun aña di búskeda i estudio, mi no sa kon ekspresá ku palabra loke ta eksistí den mi kurason i den mi bida debí na e echo ku mi a obedesé i mantené e disiplina di pasa algun momentu meditando tur dia riba e Palabra di Dios, permitiendo Spiritu Santu revelá e kurason di Dios mes na mi. Tin dianan ku mi ta sinti tur Su grandesa i ternura, i tin otronan ku mi ta risibí promesanan di bendishonnan personal i familiar. Asta Su reprendementu ta suave i agradabel, pasobra mi sa ku E ta stima mi i ke tin komunion ku mi. Ta ku gran ekspektativa mi ta prepará diariamente pa warda riba Dios pa E revelá mas di Su mes na mi, atraves di Su Palabra, i pa alab’E. Na algun okashon mi ta sinti mi mes kla pa eksplotá, pasobra e plenitut di Su presensia ta inmenso.

“Pa kasi diessinku aña mi a biba oprimí pa motibu di tur tipo di miedu, tur apsurdo i infundá, pero pa mi nan tabata hopi real. Awe mi ta sinti ku nunka mi kurason tabata asina yen di gratitut i alabansa na Dios, na e Dios ei ku konosémi di forma asina personal i ta atendé tur e nesesidatnan di mi ser”.

Tur dia Dios tin un bendishon pa bo den Su Palabra. Solamente bo tin ku busk’é.

Probechá e trayekto akí pa siña desaroyá e kustumber di bai dilanti di presensia di Dios durante e promé oranan di kada dia. Na final di e trayekto lo bo ripará un kambio grandi den bo bida. Diariamente Spiritu Santu ta transformá inikidat den santidat, i, den e proseso akí di kontemplashon diario, bo ta bira mas i mas semehante na Kristu.

Bo ta mira kon fásil e ta? Ta sufisiente pa krea e kustumber, i fásilmente nos ta kuminsá kana ku Dios tur dia, sin esfuerso.