Beibel, un Karta di Amor

Pa konkluí e parti akí di e trayekto, nos ta invitá pastor Alejandro Bullón pa ta e portador di e mensahe ku Dios tin pa bo bida. E lo traha un resúmen awe i mañan di tur loke a ser siñá te na e punto akí. Dios bendishonábo den e trayekto di awe.

Inmediatamente despues di Su boutismo, Kristu a ser hibá dor di e Spiritu den desierto. Den e lugánan solitario ei, Hesus a pronunsiá palabranan ku lo permanesé pa semper komo klave pa un bida poderoso i felis: “No ta di pan so hende lo biba, sino di tur palabra ku ta sali di boka di Dios”. “Pastor”, bo mester ta pensando, “mi sa kaba, bo ta bai papia tokante estudio di Beibel. Mi sa kaba ku mi mester studi’é, pero mi no tin gana; mi no ta sinti plaser den les’é.”

Na promé lugá, mi amigu, bo no mester enfrentá lesamentu di Beibel komo un deber; bo mester mira e Palabra di Dios komo un karta di amor. Kiko un hóben ta hasi ora e risibí un karta di su komprometida? E ta pensa: “Ai, ki fastidio, mi no tin gana di lesa e karta akí, mi ta kansá, pero mi ta bai tira un bista riba dje pa motibu di disiplina”? Nò, naturalmente ku nò. Ta al kontrario. E hóben ta risibí e karta ku ekspektativa, e ta habrié lihé i ku entusiasmo e ta devorá kada un di e palabranan. I kiko mas e ta hasi? E ta tir'é den ko’i shushi? Nò. E ta ward’é den su saku. Dos minüt despues e ta saka e karta, bolbe les’é i ta ward’é atrobe. Promé ku sinku minüt pasa, e ta busk’é atrobe i ta les’é ku e mesun ansiedat ku e promé biaha. Atrobe, atrobe i mil biaha. Diripiente, e no mester les’é mas; el a memoris’é kompletamente, ku punto i kòma. Pero tòg, e ta sigui les’é.

Unda e sekreto ta? Dikon asina tantu ansiedat pa lesa un karta? Dikon e no ta kansa di hasié? E palabra klave ta AMOR. E hóben ta stima e persona ku a skirbi e karta ei. Beibel, mi ruman stimá, no ta un kódigo di regla i prohibishon. E no ta un kolekshon di e historia di un pueblo vagabundo. E no ta un buki di animalnan straño i simbolismonan profétiko. Beibel, aunke e ta kontené un tiki di tur esei, ta e karta di amor di mas bunita ku a yega di ser skirbí. E ta e storia di un amor loko i mal komprondé. E ta e storia di un amor ku no ta kansa di warda. E ta un deklarashon di amor skirbí ku e enk kòrá di e sanger di e Lamchi. Tin un hilu kòrá ku ta kore atraves di kada un di su páginanan, for di Génesis te na Revelashon. E ta e sanger di e Lamchi ku ta grita for di Kalvario: “Yu, Mi ta stimabo, bo ta e kos di mas bunita ku Mi tin.”

Den Beibel bo por haña tambe e storia di bida di otro hòmbernan similar na bo. Hòmbernan ku a sufri konfliktonan i tentashonnan. Hòmbernan ku tin biaha tabata slep i kai. Hòmber- i muhénan ku a lucha kontra nan temperamentonan, komplehonan i pashonnan, pero ku a vense pa medio di e sanger di e Lamchi. Atraves di e storianan akí, Dios lo ta bisando bo: “Yu, bo tambe lo hañ’é. No desanimá; wak padilanti i sigui”.

Lesamentu di Beibel mester bira un momentu di kompañerismo i diálogo ku Su outor. Lesa un versíkulo i meditá riba dje. Purba apliká e mensahe di e tèkst ei na bo bida. Puntra bo mes: “Kiko e versíkulo akí ta purba bisami?” Despues di esei, bo ta kontestá. Bisa Dios kiko bo ta pensa. Kont’é kon ta bai ku bo bida relashoná ku e mensahe ku bo a kaba di lesa. No hasi purá. Purba “saboriá” kada minüt di bo diálogo ku Hesus. No interpretá esei komo un deber òf komo un karga pisá ku bo tin ku karga, sino komo e enkuentro ku e promesanan maravioso di Dios pa bo.

Un otro idea interesante pa siña gusta estudio di Beibel ta pa les’é den promé persona singular. Kada bes ku bo topa ku e palabra “nos”, òf e verbo den terser persona plural, remplas’é pa bo mes. Pone bo bida den e páginanan di Beibel. Hasi komo si fuera Dios ta papiando ku bo en partikular, no ku humanidat en general.

Por ehèmpel, den e versíkulo di Romanonan 8:31, ku ta bisa: “Kiko nos lo bisa di e kosnan akí anto? Si Abo, o Tata stimá, ta ku mi, ken por ta kontra nos?” Bo por les'é asin’akí: "Kiko lo mi bisa di esaki? Si Abo, o Tata stimá, ta ku mi, ken por ta kontra di mi?" E ora ei bo por konta Dios kiko òf ken bo ta kere ta kontra di bo, bo por papia kunE di bo miedunan, bo dudanan, bo insertidumbrenan i terminá bisand’E ku, apesar di tur esei, bo ta kere ku si Dios ta ku bo nada lo por spantabo.