Pasonan pa hasi mi kulto personal

Awe nos lo sigui ku e resúmen di Ps. Alejandro Bullón di e promé etapa akí di e trayekto. “Beibel ta un karta di amor ku nos mester lesa tur dia”.

Na kontinuashon, mi ke presentá boso algun sugerensia práktiko ku Pastor Tercio Sarli ta presentá na nos pa usa den un periodo diario di meditashon, orashon i estudio di e Palabra di Dios:

1. Skohe un ora i un lugá: Meskos ku bo tin un sierto ora tur dia pa bo kuminda, skohe tambe un ora i un lugá pa bo ta bo so ku Dios. E lugá pa bo ora di komunion mester ta ketu, i kaminda otro hende no por daña bo konsentrashon i atenshon. (Por ta den sala, den kamber, den bo ofisina, òf un lugá kaminda bo ta sinti bo mes kómodo).
2. Trata na trankilisá bo mes: Lubidá, den e ora ei, bo preokupashonnan, i pasa e promé minütnan den silensio total, preparando asina bo kurason pa komunion ku Dios. Si, miéntras e ora di komunion ta pasa, algu importante di bo trabou bini na bo mente, not’é riba un pida papel, i asina e lo stòp di molestiábo.
3. Kuminsá ku un invokashon: Papia ku Dios ku naturalidat total. Invit’E pa ta huntu ku bo den e ora ei, i pidiE pa E bendishonábo den e momentunan di meditashon, lesamentu di Beibel i orashon.
4. Usa Beibel: Sigui e plan di estudio di Beibel “Reavivá pa Su Palabra”, meditando riba kada frase, riba kada punto eksponé einan, tratando di tende e bos di Dios atraves di e lesamentu ei. Spiritu Santu lo por revelábo bèrdatnan maravioso pa bo bida kristian. Tene un skref na man pa nota bo deskubrimentunan nobo di e Buki Santu.
5. Lès di Sabatskol: Ademas di Beibel, lesa bo lès i otro bukinan di Spiritu di Profesia. E kos importante no ta pa lesa hopi, sino pa lesa i meditá riba un porshon ku ta sufisiente pa bo alimentashon spiritual.
6. Momentunan di orashon: Awor bo ta prepará pa papia mas kuidadosamente ku Dios. Manera na un amigu, kont’E tur loke bo ta deseá. Presentá bo preokupashonnan na djE. Ellen White ta bisa: “Presentá na Dios bo nesesidatnan, goso-, tristesa-, preokupashon- i miedunan.” (El Camino a Cristo, p. 100). Hasi orashon mes tantu tempu ku bo ta deseá, mes tantu ku Dios ta inspirábo pa hasié.

Kuantu tempu mester ser dediká na komunion? Bo no por preskribí un tempu igual pa tur hende. Algun ta kuminsá ku binti minüt pa dia, i despues nan ta bai oumentando segun ku e kapasidat di meditashon i komunion ta krese. E goso di e ora ei ta progresivo. Ellen White ta bisa ku lo tabata bon pa nos pasa un ora, kada dia, meditando riba e bida di Hesus i su siñansanan (lesa El Deseado de todas las Gentes, p. 63).

Kòrda: No usa e tempu ei pa pensa riba programanan di iglesia, òf riba kosnan similar. Esei ta e ora dediká na komunion ku Dios, sin ningun otro kompromiso. Awor solamente ta sobrabo kuminsá i perseverá. No deskurashá si un dia surgi kualke impedimento. Bolbe kuminsá di nobo i purba hasi bo ora di komunion kada bes mas regular. Kòrda ku “e kurason ku ta sosegá mas plenamente den Kristu ta esun mas ardiente i aktivo den e trabou p’E” (El Camino a Cristo, p. 71).