Ofrendanan, un akto di adorashon

For di komienso di historia di e mundu akí, e ofrendanan di Kain i Abel ta siña nos ku dunamentu ta vital pa adorashon. Tambe nan ta mustra ku e estado spiritual di e dunadó ta esensial pa e ofrenda ta aseptabel (Génesis 4:1–7). E ofrenda tabata un parti indispensabel di adorashon públiko durante e fiestanan grandi di Israel, kaminda un hende no mester a presentá su mes dilanti di Dios “man bashí” (Deuteronomio 16:16). Ku otro palabra, e ofrenda tabata un rekonosementu di e bendishonnan di Dios i no un medio pa atkerí nan; un ekspreshon di gratitut, no di salbashon pa medio di obranan.

Den e trayekto di awe nos lo papia tokante e ofrendanan komo un akto di adorashon na Dios komo kontesta riba bendishonnan divino, ya ku esakinan ta un indikadó di e bida spiritual di e kreyente i su kompromiso ku e mishon di iglesia.

Kiko e ofrenda ta? E ta un akto di adorashon, gratitut i honor na Dios (Salmo 96:8,9, Mateo 2:11). E adoradó ta disidí e balor di e ofrendanan (di kurason). (Eks. 25:2)
E ofrenda mester ta:

1. Di akuerdo ku mi relashon ku mi tin ku Dios (2 Korintionan 9:7). Mas bo konosé Dios, mas bo kurason lo ta kontentu kunE.
2. Den proporshon di e bendishonnan risibí. (Deuteronomio 16:17)
3. Bou di e base di generosidat. (Nehemias 7:70–72; 10:32,33; 1 Krónikanan 29:1–18). Pablo ta agregá ku nan mester...
4. Ser planiá (1 Korintionan 16:2). Meskos ku David a hasi ora el a duna e ofrendanan pa e tèmpel (1 Krónikanan 29:2).

Pues, laga nos tene na kuenta: e proporshon di tur entrada ta determiná e frekuensha di e ofrendanan, “konforme e bendishon di Señor” (Deut. 16:17). P’esei, e frekuensha tin un impakto positivo riba e eksperensia kristian, ya ku e ta indiká un kompromiso personal sistemátiko ku e adorashon i mishon di e iglesia.

E mester ta un ofrenda sin defekto (Levítiko 22:21). E ofrendanan tabata produktonan agríkola i animalnan; pero ora e dunadó no por a trese e produktonan, e tabata tres’é den forma di plaka (Deuteronomio 14:24,25), i e kalidat di e ofrenda tabata e kalidat di e animal òf produkto ofresé. Beibel ta siña tambe ku e spiritu ku kua e adoradó ta duna, lo determiná si e ofrenda lo ta “e mihó” i “sin defekto” òf si e lo ta resultado di un kurason miskiña ku ta trese na e altar loke ta desechabel òf ménos balioso (Malakías 1). Ademas, nos ofrenda ta simbolisá Hesus, un ofrenda sin defekto (Efe. 5:2).

Ta importante pa kòrda un biaha mas ku e proporshonalidat i generosidat di e ofrendanan ta ser motivá pa nos amor pa Dios i e mishon di hiba e evangelio na henter mundu. At’akí algun ehèmpel:

1. E ofrendanan pa e tèmpel tabata nifiká ku, atraves di e santuario, e nòmber di Dios lo a yega na tur nashon (1 Reinan 8:60).
2. Dor di risibí e diesmo di Abraham, Melkisedek a mantené su ministerio na e krusada di e nashonnan i a kombertí su mes den un ehèmpel di Kristu, e Saserdote ku ta intersedé pa tur hende (Hebreonan 7:1–8).
3. Jerusalèm, kaminda tur e diesmo- i ofrendanan tabata ser mandá na e mangasina (Malakías 3:8–10), tabatin e tarea di reuní tur e pueblonan den nòmber di Señor (Isaías 2:1–4; Jeremias 3:17).

Awendia e diesmo- i ofrendanan ta sigui ta parti di e plan di Dios pa mobilisá e iglesia i hasi tur nashon, tribu, lenga i pueblo disipel (Mateo 28:19).

Duna ta: adorá, meskos ku hasi orashon. Den orashon e kurason ta elevá su mes na Dios, i ta bis’E loke E sa kaba. Den e ofrenda nos ta duna di nos mes, debolbiendo loke ta di djE kaba, segun Su boluntat.

Finalmente, pa duna e ofrendanan di forma proporshonal, segun e bendishonnan risibí, nos mester definí un porsentahe (%) di kuantu nos ofrenda na Señor lo ta. Nos mester sera e pakto akí ku Dios anualmente. Disidí di ta un adoradó fiel; primintí awe pa kuminsá duna un ofrenda boluntario i generoso, segun e bendishonnan risibí pa Dios. Primintí di duna un porsentahe di bo entrada komo ofrenda na Señor.
Adaptá for di un artíkulo skirbí pa Demóstenes Neves da Silva, Master den Teologia (UNASP).