Milagernan di Fieldat

Bon biní na e trayekto di awe. Nos ta kontentu ku bo ta sigui perseverá den hasi kada mainta un kustumber di buska Dios na promé lugá. Awe nos ta bai wak un testimonio poderoso di fieldat na Dios.

Durante un bishita resien na Tanzania mi a konosé Abraham, un kriadó di bestia riku ku a kompartí su storia remarkabel ku mi. Masoménos un aña promé el a asistí na un seri di reunion evangelístiko i a disidí di ser batisá. Nunka el a siña lesa ni skirbi, pues ora el a deskubrí nos radioemisora nobo (Adventist World Radio) na Tanzania, e tabata masha kontentu i tabata skucha e programanan na su radio regularmente. Miéntras e tabata skucha, el a siña hopi kos nobo tokante di ta un fiel atventista, for di kon biba un bida mas saludabel te na e importansia di debolbé un diesmo honesto. Komo ku Abraham tabatin mas ku 1.000 kabes di baka i tounan grandi di karné i kabritu plamá atraves di Tanzania i Kenia, el a disidí ku e lo a hasi esfuerso pa ta fiel den tur su poseshonnan.

Despues, el a hinka su bestianan den kuránan grandi i a konta nan segun ku nan tabata pasa riba un rampa. El a konta e bakanan di un pa nuebe ora nan tabata pasa e rampa. Na e di dies baka, sinembargo, Abraham a dedik’é komo un diesmo na Dios. Segun tempu tabata pasa, Abraham a sigui reservá henter e di dies bestia pa e diesmo di Dios, su amigunan i konosínan a keda sorprendí. Den nan kultura, e rikesa di e hendenan ta ser midí pa e kantidat di bestia ku nan tin. Ora Abraham su amigunan repetidamente tabata mir’é ta pasa dor di e proseso di numerashon di e tou, nan a kuminsá hasi bofon di dje. Pa algun hende, Abraham a kombertí su mes den un tema di hari, ya ku hopi hende a deklar’é loko. Pero e harimentu a stòp abruptamente nuebe luna despues, ora ku 40 baka di Abraham a duna lus na oochi! Ademas, hopi di su kabritu- i karnénan a duna lus na triyiso. Dios tabata bendishonand’é manera El a bendishoná Jacob, ñetu di Abraham, den Beibel. Tabata Dios kende a bendishoná e bestianan di Jacob, motibu pa kua nan a multipliká, i tabata Dios ku awor tabata bendishonando e Abraham di tempu moderno akí.

Abraham i tur e masainan ku a hasi bofon di dje tabata siñando ku, ku Dios, nuebe diesmo ta bai muchu mas ayá di warda henter e montante pa nan mes! Awor Abraham tabata asina felis ku e forma den kua Dios tabata bendishon’é, ku el a disidí di dòbel su diesmo! (Duna otro 10% komo ofrenda di gratitut). E ora ei, kontando 10 baka, Abraham a keda ku ocho baka pa su mes. El a duna e di nuebe i di dies baka na Dios. I Dios a bendishoná Abraham mas ainda! Mi a mira hopi biaha, den términonan agrikultural, kon e skòp di Dios ta mas grandi ku esun di nos. Simplemente bo no por superá Dios! Pero tin mas den e storia akí, ya ku e bendishonnan di Dios tambe ta bini ku efektonan sekundario. Den áreanan habrí, manera esnan ku bo ta haña na Kenia i Tanzania, ladronnan hopi bes ta hòrta bestia. Pero algu interesante a kuminsá sosodé den e situashon di Abraham. Kada biaha ku nan tabata hòrta su bestianan, e bestianan akí tabata bin kas bèk. Inevitablemente nan tabata regresá na e tounan di Abraham komo si fuera mannan invisibel tabata guia nan. Awor a yega na e punto kaminda e posibel ladronnan tabata hopi nèrvioso pa hòrta e bestianan di Abraham!

E hendenan ta asina impreshoná pa e testimonio i e spiritu generoso di Abraham ku hopi a ekspresá nan deseo di pertenesé na e iglesia di Abraham. Esaki ta masha signifikante, ya ku e masainan tradishonalmente no tabata dispuesto pa kombertí na kristianismo. Pero e testimonio di Abraham ta mas poderoso ku tradishon, i hopi hende Masai tambe ta skucha programanan di Radio Mundial Atventista. Te awor, danki na e testimonio di Abraham, 35 masai a aseptá Hesus i a ser batisá. I tur ta skucha Radio Mundial Atventista!

Meskos ku Dios tabata fiel na Abraham den antigwedat, i ta fiel na Abraham, e wardadó di karné masai na Tanzania, E lo ta fiel tambe na abo i ami den proklamá e mensahe di e Evangelio. Radio Mundial Atventista a yega te kaminda Abraham tabata biba, danki na fieldat di e iglesia mundial. Ora bo debolbé diesmo i bo duna e ofrendanan ku generosidat i gratitut, bo no ta solamente adorando Dios ku bo fieldat i lealtat, sino tambe bo ta partisipando den e mishon di prediká e evangelio di reino na henter mundu (Mat. 28:19,20).

Adaptá for di un artíkulo skirbí pa Duane McKey, presidente di Adventist World Radio. E ta sirbi tambe komo asistente di Ps. Ted Wilson (presidente di e denominashon Atventista di e di Shete Dia).