Lès 1

E Hòmber Milenario

1. Dikon Dios a duna e rei di Babilonia e soño akí?

Daniel 2:28 Pero tin un Dios den shelu ku ta revelá misterio, i ta hasi konosí na rei Nabukodonosor kiko lo pasa den e último dianan.

Nota: Den e soño akí di e imágen multi-mineral, Dios a delineá pa tur futuro milenionan e subida i kaida di e imperionan ku lo tabatin un influensia direkto riba Su pueblo.

2. Ora e konseheronan di rei no a logra revelá i interpretá e soño, kiko tabata Nabukodonosor su òrdu?

Daniel 2:12. E rei a ordená pa destruí tur e hòmbernan sabí di Babilonia.

Nota: E astrólogonan i magonan di Babilonia a pretendé di tin poder sobrenatural, pero ora nan no por a revelá e soño na e rei, nan a keda demostrá di ta impostornan impotente. Si e rei a kòrda e soño, nan lo a simplemente fabriká un interpretashon falsu. Den su rabia, Nabukodonosor a ordená pa mata tur e hòmbernan sabí, asta esnan ku no tabata presente. Entre esnan ousente na e promé enkuentro ku e rei tabatin un prezu temeroso di Dios ku yama Daniel, kende a kaba di ser entrená pa e sirbishi di rei.

3. Ora Daniel a haña sa tokante e dekreto di morto, kiko el a pidi rei i kiko el a bisa su amigunan?

Daniel 2:16 . Daniel a drenta i a pidi rei pa e dun'é tempu, pa e por a duna rei e interpretashon.

Daniel 2:17,18. E ora ei Daniel a bai su kas, i a pone Ananias, Misael i Azarias, su kompañeronan, na altura: pa nan lo a pidi mizerikòrdia di e Dios di shelu tokante e sekreto akí.

Nota: Daniel a pidi un poko tempu di Nabukodonosor i a primintí ku e lo a revelá e soño i su nifikashon. E rei, kende ainda tabata desesperá pa sa e nifikashon di su vishon, a otorgá Daniel su petishon. Despues e i su amigunan a apelá na e úniko Fuente ku por a revelá e soño di e rei. Nan a hasi orashon na e Dios di shelu.

4. Ora Señor a revelá e soño na Daniel, na ken el a duna alabansa i krédito?

Daniel 2:23,28 . Mi ta gradisíBo, i alabáBo, O abo, Dios di mi tatanan... Tin un Dios den shelu ku ta revelá sekretonan.

Nota: E subida i kaida di imperionan por parse komo si fuera ta sosodé pa boluntat di hende, pero Daniel su orashon di alabansa ta revelá klaramente e esensia di intervenshon divino. Nada ta sosodé ku Dios no ta na altura di dje kaba i no a permití. Tin biaha nos no por komprondé kiko ta pasando den nos mundu awe òf dikon, pero ta un konsuelo pa sa ku Dios ta soberano ainda. Ta Daniel so por a revelá e soño na rei, sinembargo, e ta duna e mérito klaramente na Esun ku a revelá e soño na dje, e Dios di shelu.

5. Kua dos opheto Daniel a bisa ku rei a mira den su soño?

Daniel 2:31. Abo, O rei, a mira, i ata, un estatua grandi.

Daniel 2:34. Bo a mira ... ku un piedra a ser kòrtá sin man.

Daniel a relatá e soño presis manera Dios a dun’é. Awor e rei tabata warda ansiosamente, puntrando su mes kiko e soño tabata nifiká.

Daniel a sigui splika e interpretashon manera Señor a revel’é na dje, i nos lo a hasi bon di tum’é presis manera El a dun’é. E úniko manera sigur pa interpretá Beibel i profesia ta pa pèrmití Beibel splika su mes.

6. Kiko e kabes di oro ta representá?

Daniel 2:38 . Abo ta e kabes di oro akí.

Nota: E rei tabata ser konsiderá komo e kabes di estado. Ta p’esei Nabukodonosor a representá Babilonia, e imperio ku a kuminsá e profesia. Neo-Babilonia a goberná mundu for di 612-539 B.C. komo un di e imperionan mas poderoso di antigwedat, unu ku por a ser deskribí apropiadamente komo e kabes di oro. Tuma nota ku e profesia ta kuminsá ku e tempu di Daniel.

7. E reino babilóniko lo a dura pa semper?

Daniel 2:39. Despues di bo lo lanta un otro reino inferior na bo.

Nota: Babilonia su supremasia lo no a dura pa semper. Reinonan siguiente, inferior na Babilonia, lo a goberná na nan turno. Meskos ku plata ta inferior na oro, asina e reino ku a sigui Babilonia a disfrutá di ménos gloria. Liderá pa Siro na 539 B.C., e imperio Medo-Persia a konkistá Babilonia i a redusié na ruina. E medonan i persianan tabata e poder mundial gobernante for di 539-331 B.C. Durante nan reinado, tur impuesto mester a ser pagá na plata.

8. Ki metal lo a representá e reino ku a sigui Medo-Persia?

Daniel 2:39. Un otro di tres reino di bròns lo goberná riba henter tera.

Nota: E reino di bròns di Gresia a bin na poder ora Alexander e Grandi a konkistá e medonan i personan na e bataya di Arbela na 331 B.C., i Gresia a keda na poder te masoménos 168 B.C. Sòldánan griego tabata ser yamá “kubrí ku bròns” pasobra nan armadura tabata kompletu di bròns. Tuma nota kon kada mineral ku ta sigui, ku ta ser deskribí den e imágen, ta ménos balioso, sinembargo mas duradero ku esun promé kuné.

9. Kua metal ta representá e di kuater reino?

Daniel 2:40. E di kuater reino lo ta fuerte manera heru.

Nota: E monarkia di heru di Roma a konkistá e griegonan na 168 B.C. i a disfrutá di supremasia mundial te ora ku Roma a ser kapturá dor di e ostrogodonan na A.D. 476. Roma ta e reino ku a dominá mundu ora Hesu-Kristu a nase. Tuma nota kon Daniel a profetisá mil aña di historia di mundu ku eksaktitut infalibel. E subida i kaida di e kuater imperionan mundial akí: Babilonia, Medo-Persia, Gresia i Roma, ta ser profetisá klaramente den Beibel i probá pa e bukinan di historia.

10. Kiko lo a sosodé despues di kaida di e Imperio Romano?

Daniel 2:41,42 . E reino lo ta dividí. ... Manera e dedenan di pia tabata parti di heru, i parti di klei, asina e reino lo ta parsialmente fuerte, i parsialmente kibrá.

Nota: Ora e Imperio Romano a kuminsá basha abou na A.D. 476, e no a ser dominá dor di un otro poder mundial. En bes di esei, tribunan bárbaro a konkistá e Imperio Romano i a dividié nèt manera Daniel a profetisá. Dies di e tribunan akí a evolushoná den Oropa moderno. Nan tabata e ostrogodonan, visigodonan, frankonan, vandalnan, alemanianan, sueves, anglosaksonnan, herulnan, lombardonan i borgoñonan. Shete di nan ta eksistí ainda awe na Europa. Por ehèmpel, e anglosaksonnan a bira e inglesnan, e frankonan a bira e fransesnan, e alemanianan a bira e alemannan, i e lombardonan a bira e italianonan.

11. E 10 reinonan akí lo a logra uni un dia?

Daniel 2:43. Nan lo meskla nan mes ku e simia di hende: pero nan lo no pega un na otro, meskos ku heru no ta meskla ku klei.

Nota: Pa medio di matrimonio, aliansa, i tratado, hende a purba enbano pa reuní e kontinente Oropeo. Atraves di historia, lidernan manera Carlomagno, Napoleon, Kaiser Wilhelm, Mussolini, i Hitler a bringa pa konstruí un imperio oropeo nobo pero e palabranan akí di Skritura a stòp kada un futuro gobernante mundial. Revelashon 13 ta bisa nos ku lo tin un otro intento pa establesé un religion universal, pero e profesia di Daniel ta deklará klaramente ku e mundu lo keda polítikamente dividí pa restu di historia di Tera.

12. Ken lo establesé e reino final?

Daniel 2:44. I den e dianan di e reinan akí e Dios di shelu lo establesé un reino, ku nunka lo ser destruí.

Nota: E siguiente gran reino universal lo ta e reino di shelu, ku ta ser deskribí den Mateo 25:31–34.

13. Kiko e piedra ta hasi ku e otro reinonan mundial?

Daniel 2:34,35. Un piedra a ser kòrtá afó sin man, ku a dal e imágen riba su pianan ku tabata di heru i klei, i a kibra nan na pida pida. ... I e piedra ku a dal e imágen a bira un seru grandi, i a yena henter tera.

Nota: E piedra ku a ser kòrtá sin man di hende ta representá e reino di Dios. E lo no ta un konglomerashon di reinonan terenal, sino un remplaso total (Revelashon 21:1). Skrituranan ta deklará ku ora Hesu-Kristu regresá na tera, E lo konsumí tur e reinonan di tera kompletamente i establesé un reino eterno (Daniel 2:44). Ki un notisia eksitante! Hesu-Kristu ta bini atrobe! Henter historia ta moviendo den direkshon di e konklushon klimátiko akí, ora e Yu di Dios lo regresá den mahestat pa trese e reino di hustisia eterno.

Rei Nabukodonosor por a pensa ku el a derotá e Dios berdadero ora el a sitia Jerusalèm i sakia e tèmpel Daniel 1:1,2, pero el a ser mustrá masha lihé ku Dios ta gobernante riba tur kos. Eventonan humano ta bou di Su kontrol, i finalmente E lo gana e konflikto. Babilonia, Medo-Persia, Gresia, Roma, i e 10 divishonnan di e Imperio Romano por a trata na usurpá outoridat divino i destruí e pueblo di Dios, pero tur reino terenal finalmente lo ser aplastá dor di e binida di Kristu. Danki Dios, E lo gana e gran konflikto!

14. Despues di a tende Daniel su interpretashon kla di e soño, kiko Nabukodonosor a bisa tokante Señor?

Daniel 2:47. E rei a kontestá Daniel, i a bisa: “Ta bèrdat, ku bo Dios ta un Dios di diosnan, i un Señor di reinan, i un reveladó di sekretonan.

Nota: Despues di a mira ku Dios tin kontrol kompletu riba susesonan mundial, asta Nabukodonosor a rekonosé mesora ku e Dios ku Daniel tabata sirbi tabata riba tur e diosnan pagano di Babilonia. Kon lihé e kuadro a kambia! Daniel i su amigunan, pa motibu di nan fieldat na Dios, a ser elevá for di nan koutiverio inisial na Babilonia na posishonnan di liderazgo prominente pa e reino (Daniel 2:48,49). Dios semper ta honra esnan ku ta honr'E (1 Samuel 2:30).

15. Rekonosiendo ku Dios tin pleno kontrol di susesonan terenal, bo ta dispuesto pa lag’E tin pleno kontròl di bo bida?

Suplemento:

E sekshon akí ta proveé informashon adishonal pa mas estudio.