Lès 2
Bèk na Jerusalèm
1. Kuantu di e Skrituranan nos ta ser mandá pa kere?
Lukas 24:25. Kere loke e profetanan a papia.
2 Timoteo 3:16 Tur skritura ta duná pa inspirashon di Dios.
NOTA: E orakelnan (bèrdat sagrado) kompleto di Dios ta kontené den e eskritonan di Tèstamèntnan Bieu i Nobo. E klavenan pa komprondé e profesianan di Revelashon ta ser hañá prinsipalmente den e storianan di Tèstamènt Bieu. Por ehèmpel, di e 404 versíkulonan, hañá den e buki di Revelashon, 278 di nan ta eko di otro storianan i profesianan den Tèstamènt Bieu.
2. Ken Hesus a bisa ku e Skrituranan i profesianan ta revelá?
Lukas 24:27. “Kuminsando for di Moises i tur e profetanan, El a eksponé na nan den tur e skrituranan e kosnan tokante Su mes."
Juan 5:39. "Skrudiñá e Skrituranan; pasobra ... nan ta esnan ku ta duna testimonio di Mi.”
Revelashon 1:1. “E Revelashon di Hesu-Kristu, ku Dios a dun'E, pa mustra su sirbidonan kosnan ku pronto mester sosode.”
NOTA: E figura sentral den henter e Skritura i profesia ta Hesus. E seri koutivante akí lo kubri hopi tema di profesia, pero tene den mente ku e enfoke prinsipal di Daniel i Revelashon ta Hesu-Kristu i Su reino.
3. Kua ta un otro nòmber usá den Beibel pa Hesus?
Juan 1:1. Na prinsipio tabata e Palabra, i e Palabra tabata ku Dios, i e Palabra tabata Dios.
Juan 1:14 I e Palabra a ser hasí karni, i a biba meimei di nos.
4. Ki tipo di hende Dios a usa pa skirbi Beibel?
2 Pedro 1:21. "Hòmbernan santu di Dios a papia segun ku nan tabata ser moví pa Spiritu Santu".
5. Bida eterno ta bini di konosé Hesus (Juan 17:3). Kon Hesus tabata konosí pa Su disipelnan?
Lukas 24:35. El a ser rekonosé dor di nan na e kibramentu di pan.
NOTA: Den Beibel, pan ta un símbolo di e Palabra di Dios. Hesus a bisa: “Ta pará skirbí: Hende lo no biba di pan so, ma di tur palabra ku ta sali for di boka di Dios.” Mateo 4:4. Segun ku nos ta lesa, digerí, i sigui e Skrituranan, nos lo haña forsa, goso, pas, i bida eterno.
6. Kon importante estudio di Beibel mester ta pa e kristian?
Job 23:12. "Mi a stima e palabranan di Su boka mas ku mi kuminda nesesario".
Salmo 119:105. "Bo palabra ta un lampi pa mi pianan, i un lus pa mi kaminda".
NOTA: Diabel ta odia Beibel i lo hasi kasi tur kos pa prevení hende di les’é. E sa ku su profesianan ta eksponé su plannan pa gaña e rasa humano. Pues, no keda sorprendí si Satanas purba distraébo for di e seri di lèsnan akí òf purba ponebo okupá ku otro kosnan. Dios lo traha un kaminda pa esnan, ku ta buska pa konosé e bèrdat, hañ’é.
7. Ken ta yuda nos komprondé Beibel?
Juan 16:13. "Ora e, e Spiritu di bèrdat, bin, e lo guia boso den tur bèrdat".
Juan 14:26. "Ma e Konsolador, ku ta Spiritu Santu, ... lo siña boso tur kos".
1 Korintionan 2:13. "Nos ta papia, no ku e palabranan ku sabiduria di hende ta siña, ma ku Spiritu Santu ta siña".
8. Kiko mi mester hasi pa ta sigur ku Spiritu Santu ta guiando mi estudio di Beibel?
Lukas 11:9. "I Mi ta bisa boso, pidi, i lo ser duná na boso".
Lukas 11:13. "Si boso anto, siendo malbado, sa kon duna bon regalo na boso yunan, kuantu mas boso Tata selestial lo duna Spiritu Santu na esnan ku ta pidiE"?
Juan 7:17. "Si un hende ke hasi Su boluntat, e lo sa di e doktrina, si e ta di Dios".
NOTA: Parti di e obra di Spiritu Santu ta pa yuda nos komprondé e bèrdat di e Skrituranan. Ta p’esei semper nos mester pidi Spiritu Santu pa guia nos promé ku nos habri e buki di Dios. Mi por ta sigur ku Spiritu Santu ta guiando mi estudio di Beibel si:
- mi pidiE guiami, i
- mi ta dispuesto pa aseptá i sigui bèrdat manera E ta revel’é na mi.
9. Kon estudio di e Palabra ku orashon ta yuda nos?
Salmo 119:11. “Bo palabra mi a skonde den mi kurason, pa mi no peka kontra Bo”.
Jeremias 33:3. "Yama na Mi, i lo Mi kontestábo, i mi mustrabo kosnan grandi i poderoso, ku bo no konosé".
Romanonan 15:4. "Tur loke a ser skirbí ántes a ser skirbí pa nos siñansa, pa nos ... por tin speransa".
Santiago 1:5 Si algun di boso falta sabiduria, lag'é pidi Dios ... i e lo ser duná na dje.
10. Ki método di estudio di Beibel e Skrituranan ta rekomendá?
Isaias 28:10. "Pasobra òrdu mester ta riba òrdu, liña riba liña, aki un poko, i aya un poko".
1 Korintionan 2:13. "Ma loke Spiritu Santu ta siña; komparando kosnan spiritual ku spiritual".
2 Pedro 1:20. "Ningun profesia di Skritura ta bini di un interpretashon privá".
NOTA:Nos mester pone nos mes ideanan un banda i studia Beibel dor di lesa tur kos den e Skrituranan riba kualke tema ("aki un poko, i aya un poko") i dor di kompará tur e versíkulonan pa haña informashon. Nos mester laga Beibel papia pa su mes. Ora ta hasi esaki, e bèrdat semper ta sali klaramente. Ta asina Hesus a konvensé e dos disipelnan riba kaminda pa Emaus ku enbèrdat E tabata e Mesias (Lukas 24:27).
11. Kiko studiando e Skrituranan lo hasi pa nos?
2 Timoteo 3:15. "Boso a konosé e skrituranan santu, ku por hasi boso sabí pa salbashon pa medio di fe ku ta den Kristu Hesus".
NOTA: E Skrituranan ta yuda nos komprondé e gran plan di salbashon di Dios, e informashon di mas importante ku a yega di ser duná na mortalnan.
12. Di akuerdo ku Hesus, unda nos ta haña e bèrdat?
Juan 17:17. "...Bo palabra ta bèrdat".
NOTA: Nos ta haña e bèrdat den e Palabra di Dios, e Beibel. Bèrdat ta un komodidat skars den e mundu di awendia, i tur e hendenan di tera ta sufri komo resultado. E bèrdat tokante tur loke realmente ta importante ta ser hañá den Skritura. Studiando i siguiendo su konseho ta hasi hende liber (Juan 8:32) i ta duna nan un bida felis i abundante (Juan 15:11).
13. Ki spièrtamentu relashoná ku estudio di Beibel ta ser duná den e Skrituranan?
2 Timoteo 2:15. "Studia pa mustra bo mes aprobá na Dios, ... korektamente partiendo e palabra di bèrdat".
2 Pedro 3:16. "Den tur su kartanan ... tin algun kos difísil pa komprondé, ku esnan, ku no ta siñá i ta instabil, ta trose, meskos ku nan ta hasi tambe ku e otro skrituranan, pa nan mes destrukshon".
NOTA: “Dividí e palabra di bèrdat korektamente” ta nifiká interpret’é korektamente i berdaderamente. Tin gran peliger den trose Skritura pa pon’é bisa loke nos ke pa e bisa. Loke ami ta bisa tokante Beibel ta importá poko. Loke ta konta ta loke Skritura ta bisa tokante e mes.
14. Kon nos mester tèst tur siñansa i doktrina religioso?
Echonan 17:11. "Nan a risibí e palabra ku tur disposishon di mente, i tabata skrudiñá e skrituranan diariamente, si e kosnan ei tabata asina".
Isaías 8:20. "Na e lei i na e testimonio: si nan no ta papia di akuerdo ku e palabra akí, ta pasobra no tin lus den nan".
NOTA: Tur siñansa religioso mester ser kontrolá pa medio di Beibel. Si kualke siñansa no ta di akuerdo klaramente ku e Skrituranan, e ta falsu i mester ser bandoná.
15. Kiko a pasa ora Hesus a splika e Skrituranan na Su dos disipelnan desanimá riba kaminda pa Emaus?
Lukas 24:32. "Nos kurason no a kima den nos, miéntras E tabata papia ku nos na kaminda, i miéntras E tabata habri e skrituranan pa nos?"
16. Despues ku e dos disipelnan akí a sa ku Hesus tabata na bida i a tend’E splika e profesianan, kiko nan a hasi?
Lukas 24:33. "Nan a lanta mesora, i a bolbe na Jerusalèm, i a haña e diesunnan reuní huntu, i esnan ku tabata huntu ku nan".
NOTA: Un di e promé reakshonnan, ku e disipelnan akí tabatin despues di a tende Hesus splika e Skrituranan, tabata un deseo ardiente pa kompartí e bon notisia ku otronan. Nos ta spera ku ta bo deseo tambe pa invitá bo amigunan pa uni ku bo den e seri dinámiko akí di estudionan di Beibel.
17. Bo ta deseá di komprondé i sigui e Skrituranan kompletamente?
Estudio Suplementario
Na kontinuashon tin un lista di términonan klave ku hopi biaha tin nifikashon simbóliko den profesia di Beibel. Kada símbolo ta den letter diki i ta ser siguí pa su nifikashon literal korespondiente.
| Símbolo | Tèkst | Símbolo | Tèkst |
|---|---|---|---|
| Angel = Mensahero | Daniel 8:16, 9:21; Lukas 1:19,26; Hebreonan 1:14 | Awa = Área habitá / hende, nashonnan | Revelashon 17:15 |
| Babilonia = Apostasia / konfushon religioso | Génesis 10:8-10; 11:6-9; Revelashon 18:2,3; 17:1-5 | Baranka = Hesus / bèrdat | 1 Korintionan 10:4; Isaias 8:13,14; Romanonan 9:33; Mateo 7:24 |
| Bestia = Reino / gobièrnu / poder polítiko | Daniel 7:17,23 | Bientu = Pleitu / konmoshon / “bientu di guera” | Jeremias 25:31-33; 49:36,37; 4:11–13; Zakarias 7:14 |
| Dia = Aña literal | Ezekiel 4:6; Numbernan 14:34 | Dragon = Satanas òf su agensia | Isaias 27:1 30:6; Salmo 74:13,14; Revelashon 12:7-9; Ezekiel 29:3; Jeremias 51:34 |
| Frenta = Mente | Romanonan 7:25; Ezekiel 3:8,9 | Hefenan = Podernan grandi / gobernantenan / gobièrnunan | Revelashon 17:3,9,10 |
| Kachu = Rei òf reino | Daniel 7:24; 8:5,21,22; Zakarias 1:18,19; Revelashon 17:12 | Kolebra = Satanas | Revelashon 12:9; 20:2 |
| Kòrá = Piká / korupshon | Isaias 1:18; Nahum 2:3; Revelashon 17:1–4 | Ladron = Pronto binida di Hesus | 1 Tesalonisensenan 5:2–4; 2 Pedro 3:10 |
| Lamchi = Hesus / sakrifisio | Juan 1:29; 1 Korintionan 5:7 | Lampi = Palabra di Dios | Salmo 119:105 |
| Leon = Hesu-Kristu | Revelashon 5:4–9 | Man = Trabou | Eklesiastes 9:10 |
| Mantel Blanku = Viktoria / hustisia | Revelashon 19:8; 3:5; 7:14 | Marka = Señal òf seyo di aprobashon òf desaprobashon | Ezekiel 9:4; Romanonan 4:11; Revelashon 13:17; 14:9–11; 7:2,3 |
| Muhé, Korupto = Iglesia apóstata | Ezekiel 16:15–58; 23:2–21; Oseas 2:5 3:1 | Muhé, Puru = Iglesia berdadero | Jeremias 6:2 2; Korintionan 11:2; Efesionan 5:23-27; Revelashon 14:4 |
| Pan = Palabra di Dios | Juan 6:35,51,52,63 | Prostituta = Iglesia / religion apóstata | Isaias 1:21–27; Jeremias 3:1–3,6–9 |
| Serunan = Podernan polítiko òf religio-polítiko | Isaias 2:2,3; Jeremias 17:3; 31:23; 51:24,25; Ezekiel 17:22,23; Daniel 2:35,44,45 | Seyo = Señal òf marka di aprobashon òf desaprobashon | Romanonan 4:11; Revelashon 7:2,3 |
| Solo = Hesus / e evangelio | Salmo 84:11; Malakias 4:2; Mateo 17:2; Juan 8:12; 9:5 | Spada = Palabra di Dios | Efesionan 6:17; Hebreonan 4:12 |
| Streanan = Angelnan / mensaheronan | Revelashon 1:16,20; 12:4,7–9; Job 38:7 | Tempu = Aña literal | Daniel 4:16,23,25,32; 7:25; Daniel 11:13 márgin |
| Zeta = Spiritu Santu | Zakarias 4:2–6; Revelashon 4:5 |