E Prens Rebelde

1. Kon tabata nòmber di e prens rebelde den shelu, i dikon el a rebeldiá?

Isaias 14:12. "Kon bo a kai for di shelu, O strea di mardugá, yu hòmber di mainta!"

Isaías 14:13,14. "Pasobra bo a bisa den bo kurason: ... Lo mi ta meskos ku e Haltísimo."

Ezekiel 28:17. "Bo kurason a ser halsá pa motibu di bo bunitesa, bo a korumpí bo sabiduria pa motibu di bo brio."

NOTA:Lucifer tabata esun di mas poderoso i bunita di e kriaturanan di Dios. E tabata esun di mas haltu di e angelnan i probablemente tabata dirigí e koro selestial. Pero el a permití su bunitesa yen’é ku orguyo. (Lesa e suplemento titulá “Satanas Simbolisá dor di e Reinan di Tiro i Babilonia.”)

2. Dios a traha un diabel ora El a krea Lucifer?

Ezekiel 28:15. “Bo tabata perfekto den bo kamindanan for di dia ku bo a ser kreá, te ora ku inikidat a ser hañá den bo.”

NOTA: Dios a traha un angel perfekto ku, di su mes boluntat, a skohe pa ta un diabel. E por ta difísil pa imaginá, pero si nos tabata konosé Lucifer promé ku su kaida, nos lo a stim’é. Nos no sa eksaktamente kuantu tempu, pero Lucifer por a sirbi Dios ku alegria pa siglonan promé ku el a kuminsá kultivá simianan di orguyo i resentimentu den su kurason. Señor por a traha tur Su kriaturanan manera robòt, pero un robòt no por stima. Amor berdadero mester ta dispuesto pa tuma riesgo. Esaki ta e motibu pakiko mayornan ta disidí di haña yu, sabiendo ku na sierto momentu nan por skohe pa desobedesé.

Dios a permití Lucifer pa hiba su rebelion pa vários motibu. Promé, pa regla pa semper kualke pregunta di ku si Dios ta traha Su kriaturanan ku libertat di eskoho òf nò. Di dos, si Dios a destruí Lucifer asina ku el a kuminsá plama dudanan tokante e amor i gobernashon di Dios, e otro kriaturanan inteligente lo tabatin preguntanan persistente pa semper. Nan lo por a pensa: “Kisas Lucifer tabatin rason.” P’esei, Lucifer a ser permití pa demostrá e resultadonan horibel di piká. Finalmente, Dios no ke pa Su kriaturanan obedes’E meramente pasobra E lo kastigá nan si nan no hasié. E ke pa nos obedesé pa prinsipionan di amor mas bien ku pa miedu.

3. Kiko a pasa finalmente?

Revelashon 12:7. “I tabatin guera den shelu: Miguel i su angelnan tabata bringa kontra e dragon; i e dragon i su angelnan tabata bringa.”

NOTA: Finalmente Lucifer i e angelnan ku tabata na su banda a ser ekspulsá for di shelu.

4. Kua sernan poderoso ta traha bou di òrdu di diabel?

Revelashon 12:9. “El a ser tirá riba tera, i su angelnan a ser tirá huntu kuné.”

Revelashon 12:4. “I su rabu a hala un tersera parti di e streanan di shelu, i a tira nan riba tera.”

NOTA: Satanas ta asina astuto ku e por a gaña un tersera parti di e angelnan di shelu pa siguié den su rebelion kontra Dios. Awor yamá “diabelnan” i “demoñonan,” e angelnan kaí akí ta realisá e plannan di Satanas. Den nos storia di Absalon, nos ta nota ku, di mes manera, el a hasi masha tiki di su mes trabou sushi. Absalon a ordená su sirbidónan pa ehekutá su deseonan.

2 Samuel 13:28. “Awor Absalon a ordená su sirbidónan, bisando: ‘Mira, ora ku Amnon su kurason ta kontentu di biña, ... e ora ei mat'é. No tene miedu. No ta mi mes a ordená boso?’ "

2 Samuel 14:30. “P’esei el a bisa su sirbidónan: ‘Mira, Joab su kunuku ta keda pegá ku esun di mi, ... bai send'é na kandela.’ "

5. Ki métodonan Satanas ta usa den su trabou?

Revelashon 12:9. “Satanas, ku ta gaña henter mundu.”
Marko 1:13. “I El a keda einan den desierto kuarenta dia, tentá pa Satanas.”
Revelashon 16:14. “Pasobra nan ta spiritunan di diabel, ku ta hasi milager.”
Revelashon 12:10. “Pasobra e akusadó di nos rumannan a ser tirá abou, kende tabata akusá nan dilanti di nos Dios di dia i anochi.”
Juan 8:44. “E tabata un asesino for di prinsipio. ... Pasobra e ta un mentiroso, i tata di esaki.”

NOTA: Den un aspekto, Satanas tin un bentaha riba Dios den e bataya entre bon i malu. Dios ta usa solamente bèrdat, pero Satanas por usa bèrdat òf mentira den kualke kombinashon, pa sirbi su propósitonan mihó. (Lesa e suplemento titulá “Spera Lo Inesperá.)

6. Ki ora diabel ta mas peligroso?

2 Korintionan 11:14,15. “I no ta nada straño; pasobra Satanas mes ta transformá den un angel di lus.”

NOTA: Meskos ku diabel a hasi, Absalon a pretendé di ta stima e pueblo i a desplegá un interes den nan bienestar pa asina gaña nan.

2 Samuel 15:5,6. “I tabata asina ku ora kualke hende a yega serka dje pa dun’é homenahe, e tabata saka su man, koh'é tene, i sunch'é. I di e manera akí Absalon tabata hasi ku henter Israel ku tabata bin serka rei pa huisio; asina Absalon a hòrta kurason di e hòmbernan di Israel.”

Satanas ta mas peligroso ora e laga su mes pasa komo un ser spiritual ku ta traha den e iglesia. (Lesa e suplemento titulá “Un Angel Briante.)

7. Satanas konosé Beibel?

Mateo 4:5,6. “E ora ei diabel ... a bis'é: Si bo ta e Yu di Dios, tira bo kurpa abou, pasobra ta pará skibí: E lo duna su angelnan enkargo tokante Bo.”

NOTA: Diabel ta un eksperto den sita Beibel i sita Beibel robes, ku e propósito di gaña hende. P’esei ta esensial pa e pueblo di Dios konosé e Skrituranan pa nan mes pa evitá di ser engañá.

8. Ken riba mundu diabel ta odia mas?

Revelashon 12:17. “I e dragon a bira furioso riba e muhé, i a bai hasi guera ku e restu di su simia, ku ta warda e mandamentunan di Dios, i tin e testimonio di Hesu-Kristu.”

9. Kua dos animal mortal Beibel ta usa pa deskribí Satanas?

1 Pedro 5:8. “Sea sobrio, sea alerta; pasobra boso atversario e diabel, manera un leon ku ta gruña, ta kana rònt, buskando ken e por devorá.”

Revelashon 12:9. “I e dragon grandi a ser tirá afó, e kolebra bieu, yamá Diabel i Satanas.”

NOTA: Tantu leon komo kolebra ta usa koutela i distraishon pa kapturá nan presa. Meskos ku diabel, nan ta bula diripiente riba nan víktimanan i ta sin mizerikòrdia i indiferente na sufrimentu.

10. Kua ta e úniko manera ku nos por resistí Satanas?

Santiago 4:7,8. “Someté boso mes na Dios.”

“Resistí diabel, i e lo hui for di boso. Hala serka Dios, i E lo hala serka boso.”

NOTA: E mihó maneranan pa hala serka Dios ta atraves di orashon i buska pa konosE pa medio di Su Palabra.

11. Kon Hesus a bringa e atakenan di diabel?

Mateo 4:10. “E ora ei Hesus a bis’é: ‘Bai for di akinan, Satanas, pasobra ta pará skibí.’ ”

Efesionan 6:17. “E spada di Spiritu, ku ta e palabra di Dios.”

Hebreonan 4:12. “Pasobra e palabra di Dios ta bibu i poderoso i mas skèrpi ku kualke spada di dos filo.”

NOTA: Nos úniko seguridat for di e engañonan astuto di Satanas ta den warda e Palabra di Dios den nos mente pa tene nos for di piká. E mesun hèrmèntnan ku Hesus a usa pa bringa diabel ta nesesario i disponibel pa nos awe.

Salmo 119:11. “Bo palabra mi a skonde den mi kurason, pa mi no peka kontra Bo.”

Efesionan 6:11. “Bisti henter e armadura di Dios, pa boso por para kontra e trampanan di diabel.”

12. Kon e destino final di Satanas lo parse esun di Absalon?

2 Samuel 18:17. “I nan a kohe Absalon i a tir'é den un pos hundu den mondi.”

Isaias 14:15. “Tòg lo bo ser hibá abou na fièrnu, na banda di e pos.”

13. Satanas lo bolbe aparesé pa tenta e pueblo di Dios?

Ezekiel 28:19. “I lo bo no t’ei mas."

Nahum 1:9. “Aflikshon lo no lanta di dos biaha.”

14. Kon Dios ta sinti su mes tokante destrukshon di e malbadonan?

Ezekiel 33:11. Bisa nan: Manera Mi ta biba, Señor Dios ta bisa: Mi no tin plaser den morto di e malbado; sino ku e malbado bira for di su kaminda i biba: Bira boso, bira boso for di boso mal kamindanan; pasobra pakiko boso ke muri?

NOTA: Ta duel Dios di tin ku destruí e malbadonan. De echo, Beibel ta yama e destrukshon di e malbadonan Su “echo straño” pasobra e ta straño na Su naturalesa amoroso. (lesa Isaías 28:21)

15. Kon David a reakshoná ora el a haña sa ku su yu rebelde Absalon a ser matá?

2 Samuel 18:33. “I rei tabata hopi konmoví, i a subi bai na e kamber riba e porta, i a yora: i segun ku e tabata bai, asina el a bisa: O mi yu Absalon, mi yu, mi yu Absalon! Mihó ta ami a muri na bo lugá, o Absalon, mi yu, mi yu!”

16. Lo bo skohe awor pa stim’E i sirbiE?

E kuadro konmovedor akí ta desplegá kon nos Tata selestial ta sinti tokante Su yunan pèrdí. No solamente E tabata dispuesto pa muri na nos lugá; El a bai un paso mas leu, El a duna Su regalo di mas grandi, Su Yu! Dios no ke pa ningun hende peresé. E ta desesperá pa bo ser salbá. Esaki ta e motibu pakiko Hesus a muri na bo lugá. Mayoria parti di mundu a uni ku Satanas den rebelion kontra e Tata selestial.

Estudio Suplementario

Satanas Simbolisá pa e Reinan di Tiro i Babilonia

Den Isaias 14:4-15, Beibel ta usa e rei di Babilonia komo un símbolo di Satanas, i den Ezekiel 28:11-19, Satanas ta ser simbolisá dor di e rei di Tiro. Den tur dos kaso nos sa ku e simbolismo ta bai mas ayá di reinan terenal pasobra e deskripshon di Dios di e ser no por a apliká na ningun hende mortal. Tuma nota di e maneranan ku Lucifer (awor yamá Satanas) ta ser deskribí den e pasashinan akí di Skritura:

a kai for di shelu (Isaias 14:12)
tabata yen di sabiduria i perfekto den bunitesa (Ezekiel 28:12)
tabata den Eden (versíkulo 13)
tabata dòrná ku tur sorto di piedra presioso (versíkulo 13)
tabata ungí komo e kerubin kubridor (versíkulo 14)
tabata riba e seru santu di Dios (versíkulo 14)
tabata perfekto den su kamindanan (versíkulo 15)

Komo ku e reinan di Babilonia i Tiro a eksponé e mesun maneho i a sufri e mesun destrukshon kompleto ku e reino di Satanas lo sufri, Dios a usa nan pa representá Satanas mes. Práktikamente tur outoridat bíbliko ta di akuerdo ku e simbolismo. Pa kasualidat, Beibel ta registrá hopi otro referensia na Lucifer (lesa Lukas 4:5,6; Lukas 10:18; Juan 8:44; 2 Pedro 2:4; 1 Juan 3:8; Judas 6; Revelashon 12:7-9), pero sin Ezekiel 28 i Isaias 14, nos lo no tabatin e historia kompleto.

Spera lo inesperá

Hopi hende ta spera ku Satanas lo aparesé abiertamente komo e enemigu di Dios den e tempu di fin, pero esaki no ta asina. Satanas enbèrdat ta e enemigu di mas grandi di Dios, pero su aserkamentu lo ta pa fingi hustisia (Mateo 24:24). E por aparesé komo un ser angelikal i glorioso (2 Korintionan 11:13-15) i lo buska e adorashon di hende (Revelashon 13:12). Skritura ta mustra kla ku su frente divino lo ta asina konvinsente ku “henter mundu” lo sigui tras di e bestia (Revelashon 13:3). Papia di un tragedia! Satanas lo ta asina efikas den laga su mes pasa komo Kristu ku práktikamente henter mundu lo siguié, pensando tur e ora ku nan ta siguiendo Hesus. Lo bo ser engañá? No si bo pone atenshon na e spièrtamentunan bíbliko presentá den e seri akí.

Un Angel Briante

Satanas ta keda enkantá ora hende ta pint’é komo un kriatura mahos, kòrá, ku ala di raton djanochi, ku hufnan dividí i un rabu largu i ku punta, òf ku ta karga un forki i ta sende e kandelanan di fièrnu. Nada por tabata mas leu di e bèrdat. Konseptonan asina ta bini di mitologia griego. Ningun disparate asina por ser hañá den Skritura. Beibel ta deskribí Satanas komo un angel briante i sumamente atraktivo ku un abilidat asombroso di komuniká. Tambe e ta bon konosí ku e Skritura (Mateo 4:5,6). Diabel a proklamá su mes enemigu di Dios, kende su meta ta pa difamá Su karakter i kapturá Su reino. Tambe Satanas ta menospresiá abo i bo sernan kerí i tin plan pa destruíbo. E seri akí lo yudabo komprondé su plannan i siña kon dòbelkròs nan. Djis pone bo bida den e kuido protektivo di bo Salbador poderoso, i resa sinseramente pa Su guia.

Lès 4