Lès 5

E Sakrifisio Supremo

Shelu tabata skur ainda ora e patriarka bieu klaramente a tende Dios papia. “Abraham, ... Tuma bo yu hòmber awor, bo úniko yu hòmber Isaac, kende bo ta stima, i bai na e tera di Moriah i ofres’é aya komo un ofrenda kimá riba un di e serunan ku lo Mi bisabo di dje.” Génesis 22:1,2

Abraham a kuminsá tembla ora el a konsiderá e konsekuensianan asombroso di e mandato akí. Dios a primintí ku pa medio di Isaac e lo a bira tata di un nashon poderoso. Tur e speransanan i soñonan di Abraham tabata fihá riba e yu hòmber milagroso akí, duná na dje i Sara den nan behes. E no tabata komprondé dikon Dios tabata pidié hasi e akto straño akí, pero el a siña konfia i obedesé su Tata selestial, asta ora e tabata babuká.

Asina Abraham a lanta e hóben Isaac suavemente i dos sirbidó di konfiansa, i e kompania chikitu a kuminsá e biahe di tres dia pa Moriah. Segun ku nan tabata aserkando e seru di sakrifisio, Abraham a instruí su sirbidónan pa warda e ku Isaac regresá. Despues el a pone e palu riba lomba di su yu hòmber, i huntu nan a kuminsá subi e seru.

Sintiendo ku algu no tabata bon, Isaac a bisa: “Tata, nos tin loke nos mester pa sende un kandela i e palu: pero unda e lamchi pa un ofrenda kimá ta?” Abraham a kontestá: “Mi yu, Dios lo proveé Su mes un lamchi pa un ofrenda kimá.”

Ora nan a yega na e tòp, Abraham a splika, ku lágrima, e motibu di nan mishon. Boluntariamente Isaac a someté su mes na e mandato di Dios. Despues di e último brasa, e tata a mara su yu hòmber tiernamente i a pon’é riba e altar di piedra. Abraham a hisa e kuchú, pero diripiente el a ser pará dor di un angel i dirigí pa, en kambio, sakrifiká un chubatu karné ku tabata pegá pa medio di su kachunan den un mata di sumpiña den serkania.

E storia konmovedor akí no tabata e úniko biaha ku un tata mester a tuma un desishon doloroso pa sakrifiká su yu hòmber stimá.