Lès 6

E Lei di e Rei

1. E lei moral di Dios por ser kambia òf revoká?

Lukas 16:17. I ta mas fásil pa shelu i tera pasa, ku un tilde di lei faya.

Salmo 89:34. Mi aliansa lo Mi no kibra, ni kambia loke a sali for di Mi lepnan.

Salmo 111:7,8. Tur su mandamentunan ta sigur. Nan ta para firme pa semper i semper.

Malakias 3:6. Pasobra Ami ta Señor, Mi no ta kambia.

NOTA: Bou di ningun sirkunstansia e lei di Dies Mandamentu di Dios por ser kambia òf revoká. E ta mes permanente ku Dios Mes. Tres biaha den Beibel, reinan terenal (Herodes, Asuero, i Dario) a traha leinan ku despues nan ker a kambia pero no tabata por. Si e leinan di reinan débil i basilante tabata inkambiabel, kon un hende por a pensa ku e lei eterno di Dios, skirbí den piedra pa medio di Su dede, por a ser kambiá? Wak e komparashon akí entre Dios i Su lei.

E lei di Dios no por ser kambiá, pasobra e ta un transkripshon di Su karakter. E palabranan glorioso den Skritura ku ta deskribí Dios ta deskribí Su lei tambe. E lei di Dios ta Su karakter skirbí. No ta mas posibel pa kambia e lei di Dios ku kambia Dios mes.

2. Di akuerdo ku Beibel, kiko ta piká?

1 Juan 3:4. Piká ta kibramentu di lei.

Romanonan 3:20. Pa medio di lei tin konosementu di piká.

NOTA: Diabel ta odia e lei pasobra e ta hasi nos konsiente ku nos tin mester di un Salbador for di piká. Romanonan 4:15 ta deklará: “Pasobra kaminda no tin lei, no tin transgreshon.” E lei no por salba niun hende, sino e ta mustra nos e perfekshon di Dios i nos imperfekshon.

3. Na ki lei 1 Juan 3:4 ta referí?

Romanonan 7:7. Mi no a konosé piká, si no ta pa medio di lei: pasobra mi no tabata sa kiko ta kudishi, si lei no a bisa: “No kudishá.”

NOTA: Ta e lei di Dies Mandamentu di Dios ta bisa: “Lo bo no kudishá.” Pues, kibra e lei di Dies Mandamentu di Dios, ku El a skirbi ku Su mes dede (Eksodo 31:18; 32:16), ta piká. Tur piká ku kualke persona por a yega di kometé ta ser kondená pa por lo ménos un di e Dies Mandamentunan. Ta p’esei e lei di Dios ta ser yamá “amplio” (Salmo 119:96) i “perfekto” (Salmo 19:7). E ta kubri “henter e deber di hende.” Eklesiastés 12:13. Ora nos ta konsiente di nos piká, nos ta buska un Salbador. Pues, diabel ta odia e lei spesialmente, pasobra e ta manda nos buska Hesus pa salba i pordoná.

4. Hesus a warda e Dies Mandamentunan?

Juan 15:10. Mi a warda e mandamentunan di mi Tata.

NOTA: Hesus enbèrdat a warda e Dies Mandamentunan komo un ehèmpel pa nos (1 Pedro 2:21).

5. Kuantu hende a peka?

Romanonan 3:23. Pasobra tur a peka, i ta falta e gloria di Dios.

6. Kiko ta e kastigu pa biba un bida di piká?

Romanonan 6:23. Pago di piká ta morto.

NOTA: Si e lei di Dios por a ser kambiá, lo no tabata nesesario pa Hesus muri na krus. E echo ku Hesus a paga e kastigu pa piká i a muri ta un prueba ku e lei ta inkambiabel.

7. Algun hende ta bisa ku e Dies Mandamentunan no ta obligatorio pa kristiannan di Tèstamènt Nobo. Kiko Hesus ta bisa tokante esaki?

Mateo 19:17. Si bo ke drenta den bida, warda e mandamentunan.

Juan 14:15. Si boso ta stima Mi, warda Mi mandamentunan.

Revelashon 22:14. Felis ta esnan ku ta warda Su mandamentunan.

Revelashon 14:12. At’aki e pasenshi di e santunan: at’aki esnan ku ta warda e mandamentunan di Dios.

NOTA: Tèstamènt Nobo ta siña klaramente ku e pueblo di Dios lo warda Su mandamentunan. Nos tur sa ku mundu ta den problema grandi awe pasobra asina tantu hende no ta sinti mas ku ta importante pa obedesé e lei di Dios. Beibel ta papia di nos tempu, bisando: “Ta tempu pa Bo aktua, Señor, pasobra nan a anulá bo lei.” Salmo 119:126.

8. Kon ta posibel pa warda e mandamentunan?

Filipensenan 4:13. Mi por hasi tur kos pa medio di Kristu ku ta fortalesé mi.

Romanonan 8:3,4. Dios mandando su mes Yu ... a kondená piká den karni: Pa e hustisia di lei por ser kumpli den nos.

Filipensenan 1:6. Esun ku a kuminsá un bon obra den boso lo perfekshon’e te na e dia di Hesu-Kristu.

NOTA: Ora un persona nase di nobo, Hesu-Kristu, atraves di Su Spiritu Santu, ta move den bida di e persona ei i milagrosamente ta hasi obediensia posibel.

9. Kiko ta e pakto bieu, i dikon el a frakasá?

Hebreonan 8:8-9; Deuteronomio 4:13. I El a deklará na boso Su aliansa ku El a ordená boso pa kumpli kuné, esta, e dies mandamentunan; i El a skirbi nan riba dos tabla di piedra.

Hebreonan 8:8,9. Pasobra hañando fayo den nan, E ta bisa: ... Lo Mi sera un aliansa nobo ku e kas di Israel i ku e kas di Huda. No manera e aliansa ku Mi a sera ku nan tatanan riba e dia ku Mi a kohe nan na man pa saka nan for di e tera di Egipto; pasobra nan no a sigui den Mi aliansa, i mi no a hasi kaso di nan, Señor ta bisa.

NOTA: E fayo ku e aliansa bieu tabata ku e pueblo, no ku Dios òf Su lei.

Salmo 19:7. E lei di SEÑOR ta perfekto, e ta kombertí alma, e testimonio di SEÑOR ta sigur, e ta hasi hende simpel bira sabí.

10. Riba kua lei e aliansa nobo ta basá?

Hebreonan 8:10. Pasobra esaki ta e aliansa ku lo Mi sera … Señor ta bisa; Lo Mi hinka Mi leinan den nan mente, i skirbi nan riba nan kurason.

NOTA: E dos aliansanan tabata akuerdonan entre Dios i Su pueblo. E aliansa bieu a frakasá pasobra e tabata basá riba e promesanan i obranan defektuoso di e pueblo.

Eksodo 24:7. Tur loke Señor a bisa, nos lo hasi, i ta obedesido.

E aliansa nobo ta logra pasobra e ta e lei di Dios skirbí den kurason i ta basá riba e promesanan di Hesus i Su poder pa obra milager.

Hebreonan 8:10. Lo Mi pone Mi leinan den nan mente, i skibi nan riba nan kurason.

Henter e naturalesa di un hende ta kambia, pues e ta haña hasi e boluntat di Dios un plaser. Tuma nota ku e pakto nobo ta basá riba e mesun lei, pero e ta skirbí na un lugá diferente (e kurason) i basá riba mihó promesanan (esnan di Dios).

11. Biba bou di grasia, pa medio di fe, no ta hasi wardamentu di e lei di Dios no esensial?

Romanonan 6:15. Kiko anto? Nos lo peka [kibra e lei di Dios], pasobra nos no ta bou di lei, ma bou di grasia? Di ningun manera!

Romanonan 3:31. Nos ta anulá lei pa medio di fe? Di ningun manera! Al kontrario, nos ta establesé e lei.

NOTA: Esnan ku a ser pordoná dor di Hesus pa a kibra Su lei tin dòbel deber di obedesé Su lei. I sintiendo Su pordon bendishoná, nan ta mas deseoso ku otronan pa sigui Hesus felismente.

12. Hende ta ser salbá dor di warda e lei?

Efesionan 2:8,9. Pasobra pa medio di grasia boso ta salbá pa medio di fe; i esei no di boso mes: e ta e don di Dios: No di obranan, pa ningun hende no gaba.

NOTA: Niun hende ta ser salbá dor di warda e lei di Dios. Tur ta ser salbá pa medio di e grasia di Dios ku ta obra milager. Pero esnan ku ta ser salbá, òf transformá, pa e grasia di Hesus, lo ke obedesé Su lei komo un ekspreshon di nan amor i gradisimentu na djE.

Juan 14:15. Si boso ta stimaMi, warda Mi mandamentunan.

13. Kiko ta motivá un persona pa obedesé e lei di Dios?

Romanonan 13:10. P’esei amor ta kumplimentu di e lei.

Mateo 22:37-39. Bo mester stima Señor bo Dios ku henter bo kurason, i ku henter bo alma, i ku henter bo mente. Esaki ta e gran mandamento i e di promé. I e di dos ta meskos ku esaki: Lo bo stima bo próhimo manera bo mes.

1 Juan 5:3. Esaki ta e amor di Dios, ku nos ta warda su mandamentunan.

NOTA: Amor ta e motivador magnífiko. E promé kuater mandamentunan tin di haber ku mi deber na Dios. Ora mi ta stim’É, obedesé e mandamentunan ei ta un plaser. E último seis mandamentunan ta abarká mi deber na hende. Si berdaderamente mi ta stima hende, lo mi no ke hasi nada ku lo hasi nan doló.

14. Mi por ta un berdadero kristian sin ta warda Su mandamentunan?

1 Juan 2:3,4. I pa medio di esaki nos sa ku nos konos'E, si nos ta warda Su mandamentunan. Esun ku bisa: Mi konos'E, i no ta warda Su mandamentunan, ta un gañadó, i e bèrdat no ta den dje.

15. Algun lei di Tèstamènt Bieu no ta obligatorio mas pa kristiannan?

Efesionan 2:15. Dor di abolí ... e lei di mandamentunan kontené den e ordenansanan.

NOTA: Sí, e ordenansanan ku a regulá e saserdosio i e sistema di sakrifisio a ser abolí pasobra nan a prefigurá Kristu (Kolosensenan 2:13-17). El a kumpli ku nan komo e berdadero Lamchi di Dios.

16. Ken diabel ta odia spesialmente?

Revelashon 12:17. I e dragon [diabel] tabata furioso riba e muhé [e iglesia], i a bai hasi guera ku e restu di su simia [fielnan durante e tempu di fin], ku ta warda e mandamentunan di Dios, i tin e testimonio di Hesu-Kristu.

NOTA: Satanas ta odia i ta furioso ku e iglesia di tempu di fin di Dios, ku ta obedesé e mandamentunan di Hesus i ta siña hende ku tin poder divino pa kambia un pekador den un santu.

17. Kua ta algun di e rekompensanan glorioso di kumpli ku e lei di Dios?

Juan 15:11. Mi a bisa boso e kosnan akí, pa Mi goso por keda den boso, i pa boso goso por ta kompleto.

Proverbionan 29:18. Esun ku warda lei, felis e ta.

Salmonan 119:165. Esnan ku ta stima Bo lei tin gran pas, i nada lo no ofendé nan.

NOTA: Felisidat, goso, pas, i bida mas abundante ta bini pa esnan ku ta obedesé e lei di Dios. No ta straño ku David a bisa ku e mandamentunan di Dios ta mas deseabel ku oro (Salmo 19:10).

18. Bo ta deseá di tin un relashon di amor ku Hesus ku lo hiba bo na ta un di Su yunan gososo i obedesido?

Estudio Suplementario

Paralelonan Entre Personahenan Bíbliko i Hesus

Hopi di e héroenan di Beibel ta tipo i patronchi di Hesus. Moises, José, David, i Salomon, tur tabata hendenan ku, na sierto momentu den nan bida, a prefigurá e bida i ministerio di Kristu. E similaridatnan entre nan eksperensianan tabata destiná pa yuda mundu rekonosé Hesus komo e Yu di Dios.

Daniel su eksperensia ku e lei i e leonnan ta un ehèmpel di un paralelo spiritual asina. Tuma nota di e siguiente similaridatnan:

• E lidernan na Medo-Persia ker a kita Daniel for di su puesto haltu pasobra nan tabata yalurs riba su relashon será ku e rei. Daniel 6:3 ta bisa: “E rei tabatin pensá di nombr’é riba henter e reino.” Di mes manera, e lidernan na Jerusalèm ker a deshasí di Hesus pasobra nan tabata yalurs riba Su relashon será ku e Rei di universo (Juan 5:18-20).
• E ofisialnan medopersa a sigui Daniel tur kaminda den un intento pa gar’é ta hasi òf bisa algu robes (Daniel 6:4). E lidernan religioso di tempu di Hesus a manda spion pa sigui Hesus, sperando di gar’E ta hasi òf bisa algu robes ( Lukas 20:19,20 ).
• E enemigunan di Daniel no por a haña ningun fayo serka dje, pues nan a traha un trampa pa kumpli ku nan propósitonan (Daniel 6:5-9). Di mes manera e saserdotenan prinsipal i eskribanan a konspirá ku Hudas Iskariot pa traha un trampa pa Hesus (Lukas 22:2-6). Sinembargo, Pilato a deklará ku e no a haña ningun falta den Hesus (Juan 19:4).
• Despues ku Daniel a ser tirá den e kueba di leon, nan a pone un piedra riba e entrada i a sey’e ku e seyo di gobièrnu (Daniel 6:16,17). Hesus tambe a ser poné den un graf ku tabatin un piedra grandi na porta i ku a ser seyá dor di gobièrnu (Mateo 27:58-60,65,66).
• Tantu Daniel komo Hesus tabata inosente i a sali na bida for di nan prizònnan di tera (Daniel 6:23 Marko 16:5,6).

Wak si bo por haña otro paralelonan entre e bida di personahenan bíbliko i e bida di Hesus!