Lès 8

E Reino Glorioso

1. Kiko Hesus a primintí Su pueblo?

Juan 14:2. Den kas di mi Tata tin hopi lugá: ... Mi ta bai pa prepará un lugá pa boso.

2. Kiko nos sa tokante e lugá akí ku Hesus ta preparando?

Isaias 65:17. Pasobra, mira, Mi ta krea shelunan nobo i un tera nobo.

Hebreonan 11:16. Pasobra El a prepará un stat pa nan.

Mateo 5:5. Bendishoná ta esnan humilde, pasobra nan lo heredá e tera.

Isaias 65:21. I nan lo traha kas i biba den nan.

NOTA: Papiando di asombroso! Dios a prepará pa Su pueblo shelunan nobo, un tera nobo, i un stat santu nobo. E hustunan lo heredá un manshon glorioso den e stat konstruí pa Hesus (Juan 14:2), plùs un kas di kunuku fabuloso riba e tera nobo ku nan mes lo konstruí (Isaias 65:21).

3. Kiko mas nos sa tokante e stat santu?

Revelashon 21:16. I e stat tabata firkant, ... i el a midi e stat ku e bara, diesdos mil furlong [2.400 kilometer]. E largura i e hanchura i e haltura di dje ta igual.

Revelashon 21:2. I ami, Juan, a mira e stat santu, Jerusalèm nobo, ta baha for di Dios for di shelu.

Revelashon 21:10,12. E Jerusalèm santu, bahando for di shelu for di Dios, ... tabatin un muraya grandi i haltu, i tabatin diesdos porta.

Revelashon 21:18. I e konstrukshon di e muraya tabata di yaspe.

Revelashon 21:21. E kaya di e stat tabata di oro puru.

NOTA: E stat santu ta firkant, i e distansia rònt di dje ta 12.000 furlong, òf 2.400 kilometer (un furlong ta 0,2 kilometer). E ta baha for di shelu pa e tera nobo i lo baha kaminda e Seru di Oleifi ta para awor (Zakarias 14:4). Kada un di su 12 portanan ta trahá di un solo pèrla (Revelashon 21:21), i e murayanan di yaspe di e stat ta 144 kodo (Revelashon 21:17) òf 65,8 meter hanchu (un kodo ta 0,5 meter).

4. Kiko Beibel ta bisa tokante e suministro di awa i kuminda di e stat?

Revelashon 22:1. El a mustra mi un riu puru di awa di bida.

Revelashon 22:2. Na kada banda di e riu tabatin e palu di bida, ku tabata pari diesdos tipo di fruta, i tabata duna su fruta tur luna: i e blachinan di e palu tabata pa sanashon di e nashonnan.

NOTA: Un riu di awa puru i inagotabel ta kore for di e trono di Dios, i e palu di bida ta duna un kosecha di fruta diferente kada luna. E fruta fabuloso akí i su blachinan ta proveé e antídoto di morto i ta sòru pa bida eterno. Ademas, e santunan di Dios lo planta nan mes kuminda na nan kasnan di kunuku (Isaias 65:21). E dieta di e pueblo di Dios lo ta loke e tabata promé ku piká a drenta mundu: fruta, grano i nechi (Génesis 1:29, 31). E smak lo ta indeskriptiblemente delisioso, i e balor nutritivo lo ta perfekto.

5. Kon biba den shelu lo ta diferente for di biba aki riba tera?

Isaias 35:5. E wowonan di e siegunan lo ser habrí.

Isaías 35:5. E oreanan di e surdunan lo ser habrí.

Isaías 35:6. E ora ei e lamnan lo bula manera biná, i lenga di e mudanan lo kanta.

Isaias 65:25. Nan [e bestianan] lo no hasi daño ni destruí.

Isaías 11:6. E lobo tambe lo biba huntu ku e lamchi, ... i un mucha chikitu lo guia nan.

Isaias 35:1. Desierto lo ... floria manera rosa.

Isaías 33:24. E habitante lo no bisa: "Mi ta malu.”

Revelashon 21:4. Lo no tin morto mas, ni tristesa ni yoramentu.

6. Ki tipo di kurpa e santunan lo tin?

Filipensenan 3:20, 21. Señor Hesu-Kristu, Kende lo kambia nos kurpa despresiabel, pa e por ser formá manera su kurpa glorioso.

7. Hesus Su kurpa ta real, òf E ta un spiritu?

Lukas 24:39. Mira Mi mannan i Mi pianan, ku ta Ami mes: mishi ku Mi i mira; pasobra un spiritu no tin karni i wesu, manera boso ta mira ku Ami tin.

NOTA: E kurpa di Hesus, despues di Su resurekshon, tabata real, ku karni i wesu ku bo por a mishi kuné i sinti. E disipelnan, na promé instante, a pensa ku E tabata un spiritu ora El a aparesé diripiente na nan, pero despues ku nan a sintiE i a wak E kome (Lukas 24:40-43), nan tabata sa ku E tabata real. Kuarenta dia despues, Hesus a hiba nan Betania i a subi na shelu (Lukas 24:50,51). E angelnan ku a aparesé na e disipelnan a bisa nan: “E mesun Hesus akí [di karni i wesu] ... lo bini di e mesun manera ku boso a mir’E bai shelu.” Echonan 1:11. Desde Su enkarnashon, Hesus ta ligá pa semper ku e rasa humano, ademas di ta divino.

8. Ki otro promesa alentador ta ser hañá?

Echonan 3:20,21. I lo e manda Hesu-Kristu, ... Kende shelu mester risibí te na e tempunan di restourashon di tur kos.

NOTA: Alabá sea Dios, tur kos glorioso ku a bai pèrdí dor di entrada di piká lo ser restourá den e reino nobo di Dios. Tur hende lo stima, konfia i sostené otro berdaderamente. Komo resultado, lo no tin mas violensia (Isaias 60:18), i no mas traishon, abuzu, deslealtat, deshonestidat, kalumnia, inseguridat, depreshon, peliger, desepshon òf doló di kurason. Lo ta alegre, felis, kontentu, bida abundante pa eternidat.

9. Rekuerdonan tristu òf doloroso di e bida akí lo molestiá hende den shelu?

Isaias 65:17. E kosnan di ántes lo no ser rekordá, ni bini den mente.

NOTA: E palabranan “bin den mente” ta mihó tradusí “move riba e kurason.” Señor ta primintí aki ku e tristesanan di tera lo no trese tristesa pa Su santunan den shelu.

10. Hende for di tera lo rekonosé otro den e reino nobo di Dios?

1 Korintionan 13:12. E ora ei lo mi konosé meskos ku mi ta ser konosí.

NOTA: Nos lo rekonosé otro en efekto atraves di nos apariensia, kaná, manera, papiá, etc. Nos abilidatnan pa diserní otro lo ser mehorá den shelu. Shelu lo ta un reunion di famia totalmente fantástiko.

11. Ki otro promesanan emoshonante Dios ta duna nos relashoná ku Su reino benidero?

Isaias 35:10. Esnan reskatá di Señor lo ... bin Sion ku kantikanan i goso eterno.

Salmo 16:11. Tin plasernan pa semper.

Zakarias 8:5. E kayanan di e stat lo ta yen di mucha hòmber i mucha muhé ku ta hunga den su kayanan.

Isaías 40:31. Nan lo kore, i no ta bira kansá; i nan lo kana, i no desmayá.

Isaías 40:31. Nan lo bula bai ariba ku alanan manera águila.

NOTA: E santunan lo por bula manera angelnan na velosidatnan mas rápido ku lus. Komo ku nan ta heredá tur kos (Revelashon 21:7), nan por bishitá otro mundunan, i tuma solamente algun momentu pa yega einan. Di akuerdo ku Skritura, Dios a traha otro mundunan ku no a kai (Job 1:6; Hebreonan 1:2; 11:3).

12. Nos por deskribí e reino nobo di Dios na un manera adekuá ku palabra?

1 Korintionan 2:9. Wowo no a mira, ni orea a tende, ni drenta den e kurason di hende, e kosnan ku Dios a prepará pa esnan ku ta stim’E.

NOTA: Abo i ami, den nos estado presente, no ta kapas pa ni imaginá e kosnan maravioso ku Dios a prepará pa Su yunan. Ningun palabra, pensamentu, òf asta soño por reprodusí di bèrdat e gosonan i felisidat fantástiko di shelu. No importá kiko nos por sufri riba tera, ta den shelu lo surpasá tur e pruebanan di tera (Romanonan 8:18).

13. Kua ta e rekompensa di mas haltu di e reino nobo di Dios?

Revelashon 21:3. Dios mes lo ta meimei di nan.

NOTA: Ker’é, i keda asombrá! Dios realmente lo biba den e tera nobo huntu ku Su pueblo. Nada por kompará ku esaki pa puro delisia i gloria.

14. Kiko lo ekskluí hende for di e reino selestial di Dios?

Revelashon 21:27. Di ningun manera lo no drenta den dje nada ku ta impuru.

Revelashon 21:7. Esun ku vense heredá tur kos.

NOTA: Piká ta kontaminá i no por ser permití pa drenta shelu, sino rebelion lo por kuminsá di nobo. (Wak Suplemento titulá “E Reino di Dios.”)

15.Kiko mi por hasi tokante piká?

1 Juan 1:9. Si nos konfesá nos pikánan, e ta fiel i hustu pa pordoná nos nos pikánan, i pa limpia nos di tur inhustisia.

NOTA: Si mi pidi Hesus pordoná mi pikánan, E ta pordonámi i ta limpiami di piká i ta hasimi Su yu.

16. Kiko Hesus a bisa ta e fórmula pa éksito den e bida akí i den e siguiente?

Mateo 6:33. Ma buska promé e reino di Dios, i su hustisia; i tur e kosnan akí lo ser añadí na boso.

NOTA: Esaki ta eksaktamente loke Rei Salomon a hasi ora Dios a puntra: “Kiko bo ke?” Su promé pensamentu tabata pa e reino di Dios i Su hustisia. A kambio, e bendishonnan di un reino glorioso a sigui. Esaki lo sosodé pa nos tambe ora nos buska e reino di Dios promé.

17. Rekonosiendo ku Dios tin pleno kontrol di susesonan terenal, bo ta dispuesto pa lag’E tin pleno kontrol di bo bida?

Estudio Suplementario

E Reino di Dios

Beibel ta un registro di dos reino den konstante konflikto, e reino di Dios i e reino di Satanas. Hesus a hasi e reino di Dios sentral den Su predikashon. Tin mas ku 100 referensia na e reino di Dios den Tèstamènt Nobo so, i hopi ta inkorporá den e parabelnan di Hesus. For di Su siñansanan nos ta siña ku e reino divino di Dios ta dividí den dos diferente kategoria, esun spiritual i esun literal.

Suidadanonan di e reino spiritual di shelu tin Dios kende ta goberná i reina den nan kurason. Promé ku kombershon, e trono den nos kurason ta okupá dor di Satanas, piká i nos mes. Pero despues ku nos aseptá e pordon i poder di Hesus, e kadena ei ta kibra. Ta p’esei Pablo ta bisa: “P’esei, no laga piká reina den boso kurpa mortal, pa boso obedes’é den su deseonan. ... Pasobra piká lo no tin dominio riba boso.” Romanonan 6:12,14. “Ma si Ami ta saka demoño ku e dede di Dios, sin duda e reino di Dios a yega serka boso.” Lukas 11:20.

Asina ku un hende aseptá Kristu, instantáneamente e ta bira un siudadano di e reino spiritual di Dios. Esaki ta e motibu pakiko tantu Hesus komo Juan Boutista a kuminsá nan ministerionan dor di urgi hende pa arepentí, “pasobra e reino di shelu ta serka.” Mateo 3:2 4:17. “Serka” ta nifiká disponibel òf aksesibel awor. Ta p’esei Hesus a bisa: “E reino di Dios no ta bini ku opservashon; tampoko hende lo no bisa: ‘Mira, at’é aki! òf, at’é aya!’ pasobra, ata, e reino di Dios ta denter di boso.” Lukas 17:20,21. Asina ku un hende batisá, e ta bandoná e reino di skuridat di Satanas i ta uni ku e reino di lus di Dios.

Kada berdadero siguidó di Kristu ta un embahador pa e mundu akí di e reino spiritual di Dios. Hopi bes embahadornan di otro paisnan ta papia un idioma diferente, ta bisti pañanan diferente, ta kome kuminda diferente, ta usa monedanan diferente i tin kustumbernan diferente. Di e mesun manera, komo embahadornan kristian nos mester ta masha kuidadoso pa representá e reino di nos Señor korektamente atraves di e manera ku nos ta kome, papia, bisti i gasta nos tempu i plaka.

Algun dia e pueblo di Dios lo heredá e reino físiko i literal di Dios ku ta ser diskutí den e lès akí. Ta pa e reino akí nos ta anhelando ora nos ta hasi orashon den e orashon di Señor: “Bo reino bini.” Mateo 6:10. E reino literal di Dios lo ser establesé plenamente i finalmente despues di e huisio i bataya despues di e milenio, deskribí den Revelashon 20 .