Lès 9

E Muhé Montadó di Endor

1. E forma ku Saul a mira tabata realmente profeta Samuel?

1 Reinan 22:22. I el a bisa, lo mi sali, i lo mi ta un spiritu di mentira den boka di tur su profetanan.

Revelashon 16:14. Pasobra nan ta spiritunan di demoñonan ku ta hasi milagernan.

2. E mortonan ta bin bèk pa kòmbersá ku òf pa persiguí e bibunan?

Job 14:21. Su yu hòmbernan ta ser honrá, i e no sa esei; i nan ta ser humiliá, ma e no ta ripará esei di nan.

Eklesiastes 9:5,6,10. E mortonan no sa nada, ni nan no tin rekompensa mas; pasobra e memoria di nan ta ser lubidá. Tambe nan amor, i nan odio, i nan envidia, awor a peresé; ni nan no tin parti mas pa semper den nada ku ta ser hasí bou di solo [den e bida akí]. ... Pasobra no tin trabou, ni planifikashon, ni konosementu, ni sabiduria, den graf.

NOTA: Nò! Beibel ta kla. Un hende morto no ta hasi nada i no sa nada di loke ta pasando riba tera.

Salmo 115:17. E mortonan no ta alabá Señor.

Salmo 6:5. Den morto no tin rekuerdo di Bo.

Job 7:10. E lo no bolbe su kas mas.

Isaias 38:18. Morto no por alabáBo.

Salmonan 146:4. Su pensamentunan ta peresé.

3. Di akuerdo ku e buki di Revelashon, ken tin e yabinan di morto?

Revelashon 1:18. Ami ta Esun ku ta biba, i tabata morto; i, mira, mi ta bibu pa semper ...; i tin e yabinan di fièrnu i di morto.

NOTA: Beibel ta kla. Ta Hesus so tin e yabinan di morto. Nos mester bai na Su Palabra pa haña kontestanan riba nos preguntanan tokante morto.

4. Kon Dios a traha hende na prinsipio?

Génesis 2:7. I Señor Dios a forma hende for di stòf di tera, i a supla den su nanishi e rosea di bida; i hende a bira un alma bibu.

5.Kiko ta pasa ora nos muri?

Eklesiastés 12:7. E ora ei e stòf lo bolbe na e tera manera e tabata: i e spiritu bolbe na Dios kende a dun'e.

NOTA: Loke ta tuma lugá na morto ta lo kontrario di loke a pasa durante Kreashon. E kurpa ta bolbe na stòf i e spiritu, òf rosea, ta bolbe serka Dios kende a dun’e. Beibel ta siña klaramente ku e “spiritu” ku ta bolbe serka Dios ta simplemente e rosea di bida, ku Dios a supla den hende na prinsipio (Santiago 2:26, márgen; Job 27:3, márgen; Job 33:4). Salmo 104:29,30 ta deklará: “Bo ta kita nan rosea, nan ta muri i ta bolbe na nan stòf. Bo ta manda Bo spiritu [rosea], nan ta ser kreá.”

6. Na unda e mortonan ta bai ora nan muri?

Job 21:32. Sinembargo e lo ser hibá na e graf, i lo keda den e graf.

Juan 5:28,29. Tur ku ta den graf lo tende Su bos, i lo sali.

NOTA: E mortonan, tantu hustu komo inhustu, ta den nan graf i lo tende Hesus Su stèm yama nan pa sali for di graf pa rekompensa òf kastigu.

7. Beibel ta duna di konosé ku Rei David ta salbá. E ta den shelu awor?

Echonan 2:34. Pasobra David no a subi na e shelunan.

Echonan 2:29. Hòmbernan i rumannan, laga mi papia libremente ku boso di e patriarka David, ku e ta tantu morto komo derá, i su graf ta serka nos te dia djawe.

NOTA: Nò! Apòstel Pedro a deklará klaramente ku David ta morto i derá, no bibu den shelu. Ademas, Hebreonan 11:32-40 ta duna di konosé ku tur e fielnan di e siglonan no a ser rekompensá ainda, sino mas bien, tur lo ser rekompensá huntu (versíkulonan 39,40).

8. Pero no ta bèrdat ku e alma ta inmortal i ku ta solamente e kurpa ta muri?

Ezekiel 18:4. E alma ku peka, lo muri.

Job 4:17. Hende mortal lo ta mas hustu ku Dios?

1 Timoteo 6:15,16. E Rei di reinan, i Señor di señornan; Kende so tin inmortalidat.

NOTA: Nos ta almanan, i almanan ta muri. Hende ta mortal. Solamente Dios ta inmortal. E siñansa ampliamente keré di e alma inmortal, ku no ta muri, no ta ser hañá den Beibel. E siñansa ta trahá dor di hende.

9. Ki ora e hustunan lo haña inmortalidat?

1 Korintionan 15:51-53. Nos tur lo ser transformá, den un momentu, den un fregá di wowo, na e último zonidu di tròmpèt pasobra e tròmpét lo zona, i e mortonan lo ser lantá den inkorupshon, ... i loke ta mortal akí mester bisti inmortalidat.

1 Tesalonisensenan 4:16. Pasobra Señor mes lo baha for di shelu ku un gritu, ku bos di e arkangel, i ku e tròmpèt di Dios: i e mortonan den Kristu lo lanta promé.

NOTA: Sí, e hustunan lo haña inmortalidat na e resurekshon. E malbadonan nunka ta risibí esaki.

10. Kon Beibel ta referí repetidamente na morto?

Juan 11:11,14. Nos amigu Lázaro ta na soño; ... Lázaro a muri.

Mateo 27:52. I e grafnan a habri; i hopi kurpa di e santunan ku a drumi a lanta.

2 Samuel 7:12 Lo bo drumi serka bo tatanan.

1 Tesalonisensenan 4:14. Esnan ku ta drumi den Hesus tambe Dios lo trese huntu kunE.

NOTA: Hopi bes Beibel ta referí na morto komo soño. Morto ta un estado di inkonsiensia total, durante kua 15 minüt òf mil aña ta parse meskos. E mortonan simplemente ta “drumi” den nan graf te na e resurekshon, ora tur hende lo ser lantá dor di Hesus. E siñansa ku e spiritunan di e mortonan ta angelnan selestial, òf algun entidat ku parse fantasma hustu ku por ser kontaktá, ta sin fundeshi bíbliko.

11. Komo ku magonan, montadónan, i klarividentenan no por tuma kontakto ku e mortonan, ku ken nan ta tumando kontakto?

Revelashon 16:14. Nan ta e spiritunan di demoñonan, obrando milagernan.

NOTA: Angelnan di shelu ta ser yamá “spiritunan ku ta sirbi” (Hebreonan 1:14) ku ta yuda hende riba tera. E angelnan ku a ser saká for di shelu huntu ku Satanas (Revelashon 12:7-9) tambe ta spiritunan, spiritunan malu ku ta gaña hende dor di obra milager (Revelashon 16:13,14). Nan ta usa “tur poder i señalnan i maravianan falsu” (2 Tesalonisensenan 2:9), i por asta hasi “kandela baha for di shelu riba tera den bista di hende” (Revelashon 13:13). Ora klarividentenan ta pretendé di ta den kontakto ku spiritunan di e mortonan, nan ta realmente den kontakto ku e angelnan kaí di Satanas (Isaias 8:19,20).

12. Dikon Satanas ke pa nos kere ku e spiritunan di e mortonan ta realmente bibu?

Mateo 24:24,25. Pasobra lo lanta kristunan falsu i profetanan falsu, i lo hasi señalnan i maravianan grandi; di tal manera ku, si tabata posibel, nan lo a gaña e skohínan mes. Mira, Mi a bisa boso di antemano.

13. Kon efektivo Satanas su uso di e spiritunan malu akí lo ta den e último dianan?

Revelashon 18:23. Dor di bo bruheria tur e nashonnan a ser engañá.

Revelashon 18:2. E gran Babilonia a kai, ... i a bira e lugá di biba di demoñonan i e prizòn di tur spiritu impuru.

Revelashon 12:9. E kolebra bieu ei, yamá Diabel, i Satanas, ku ta gaña henter mundu.

NOTA: Pa medio di Satanas su milagernan (bruherianan) atraves di su angelnan malbado, e lo gaña práktikamente henter mundu.

14. Kon Dios ta konsiderá e milagernan akí ku angelnan malbado ta hasi?

Levítiko 20:27. Un hòmber òf muhé ... ku ta un montadó, siguramente lo ser matá.

1 Timoteo 4:1. Algun hende lo bandoná e fe, i paga atenshon na spiritunan engañoso i doktrinanan di demoñonan.

Efesionan 5:11. No tin kompañerismo ku e obranan infruktífero di skuridat.

Galationan 5:19-21. E obranan di karni ta evidente, kualnan ta esakinan: Adulterio, fornikashon, impuresa, sensualidat, idolatria, bruheria, odio, bringamentu, yalursheit, rabia, pleitu, desakuèrdo, dòktrina falsu, envidia, asesinato, buracheria, parandiamentu, i kosnan asina.

Revelashon 21:8. Hasidónan di brua ... lo haña nan parti den e lago ku ta kima ku kandela i suafel: kua ta e di dos morto.

NOTA: Den tempu di Moises, Dios a ordená pa tur klarividente ser matá. Awe E ta insistí ku bruheria ta un obra di karni, pa kua hende lo ser destruí. E ta atvertí ku ora bo ta hunga ku klarividentenan bo ta bandoná e fe, i E ta bisa nos ku tur hasidó di brua lo muri e di dos morto den e lago di kandela.

15. Ki poder glorioso Dios ta ofresé Su pueblo?

Filipensenan 3:10. Pa mi por konos’E, i e poder di su resurekshon.

NOTA: Hesus ta ofresé nos e mesun poder pa biba korekto ku a lant’E for di morto. Fantástiko! Kon nos por faya ku un poder asina inkreibel duná na nos, i esei sin niun kosto pa nos? Hesus, pasobra E ta stima nos, ta spièrta nos solemnemente pa alehá for di e poder i milagernan di angelnan malbado i ta ofresé pa obra e milagernan divino nesesario pa prepará nos pa Su reino (Filipensenan 1:6).

16. Lo bo ke aseptá e oferta di Hesus pa dunabo e poder di resurekshon den bo bida?

Estudio Suplementario

E Ladron riba Krus

Hesus a primintí e ladron riba krus akseso inmediato na shelu ora El a bisa: “Awe lo bo ta ku Mi den paraiso”? E nifikashon di e deklarashon di Kristu den Lukas 23:43 ta ser determiná dor di un kontesta bíbliko riba un pregunta masha importante: Hesus Mes a bai shelu riba e dia ei?

No di akuerdo ku Skritura. Riba e dia di resurekshon, ora El a topa Maria na e graf den hòfi, Su palabranan tabata: “No mishi ku Mi pasobra mi no a subi serka mi Tata ainda.” Juan 20:17. Hesus no por a bai paraiso riba djabièrnè si E no a subi serka e Tata ainda pa djadumingu!

Dikon antó Hesus a bisa: “Awe lo bo ta ku mi den paraiso”? E aparente problema ta disparsé ora bo konsiderá ku e manuskritonan griego original no tabatin puntuashon. E kòma i puntonan a ser introdusí den e teksto di Skritura dor di traduktornan, kendenan a hinka nan kaminda nan a pensa ku nan mester ta. I kere òf nò, un solo kòma por kambia e nifikashon di henter un frase! E deklarashon di Señor den Lukas 23:43 mester bisa: “Di bèrdat Mi ta bisa bo awe, lo bo ta ku mi den paraiso.” Esaki ta loke Hesus tabata bisando realmente. “Awe, ora tur kos ta parse pèrdí awe, ora Mi no ta parse un Señor òf Rei, i despues ku asta Mi disipelnan a hui awe, aunke Mi mannan ta klabá na un krus, Mi por salbabo ainda!”

Algun dia e ladron ei, huntu ku tur otro ku a aseptá Kristu, lo reklamá e promesa di resurekshon i ta huntu ku Hesus den paraiso.

Kiko e Palabranan “Spiritu” i “Rosea” Ta Nifiká den Beibel?

Job 27:3 ta señalá ku un persona su “spiritu” i “rosea” ta meskos. Job ta deklará mas aleu ku e spiritu akí, òf rosea, ta den su nanishi. Por fabor, kòrda ku Dios a pone e “rosea” den e burakunan di nanishi di Adam na Kreashon (Génesis 2:7). Pues, e spiritu, ku ta bolbe na Dios ora un persona muri, ta e rosea di bida, no un alma sin kurpa. Nunka den Beibel ta bisa ku un alma sin kurpa ta bolbe serka Dios ora e muri.

Na unda e “Alma” Ta Bai Ora un Persona Muri?

Na Kreashon, dos kos ta kombiná pa traha un alma, kurpa i rosea. Te ora ku e dos kosnan akí kombiná, un alma no ta eksistí. Na morto, e dos komponentenan akí ta separá. E kurpa ta bolbe na stòf, i e rosea ta bolbe na Dios. E alma no ta bai niun kaminda, e ta simplemente stòp di eksistí.