Lès 10

Statnan di Shinishi

1. Kua dos stat ta ser menshoná komo ehèmpel pa destrukshon di e malbadonan?

2 Pedro 2:6. I kombertiendo e statnan di Sodoma i Gomora den shinishi a kondená nan ku un destrukshon, hasiendo nan un ehèmpel pa esnan ku despues mester biba den impiedat.

NOTA: Dios a destruí e dos statnan ei ku kandela eterno, e mesun tipo di kandela ku lo destruí e malbadonan den fièrnu.

2. Ki ora e malbadonan lo ser destruí den kandela di fièrnu?

Juan 12:48. E palabra ku Mi a papia, e mes lo husg’é den e último dia.

2 Pedro 2:9. Señor sa kon pa ... reservá e inhustunan te na e dia di huisio pa ser kastigá.

Mateo 13:40-42. Asina lo ta na fin di e mundu akí. E Yu di hende lo manda su angelnan, i nan lo reuní ... esnan ku ta hasi inikidat; i lo tira nan den un fòrnu di kandela.

NOTA: Den e tekstonan aki riba, Beibel ta deklará klaramente ku e malbadonan lo ser tirá den kandela riba e dia di huisio na fin di mundu, no ora nan muri. Esaki opviamente ta nifiká ku niun hende ta den fièrnu awor. Ta hustu ku niun hende no mester ser kastigá te ora ku su kaso a ser disidí den e huisio. Hende ta ser rekompensá òf kastigá na e segundo binida, i no promé (Revelashon 22:12).

3. Si e malbadonan ku a muri no ta den fièrnu ainda, unda nan ta?

Juan 5:28,29. E ora ta yega, den kua tur esnan ku ta den graf lo tende su bos, i lo sali; ... esnan ku a hasi malu, pa e resurekshon di kondenashon.

Job 21:30,32. E malbado ta reservá pa e dia di destrukshon. ... Tòg e lo ser hibá na e graf, i lo keda den e graf.

NOTA: Beibel ta sigurá nos ku e malbadonan ku a muri ta reservá den graf te na e resurekshon na fin di mundu. Nan lo tende Hesus su stèm ta yama nan i lo sali for di e graf, no for di kandela di fièrnu.

4. Kiko ta e rekompensa, òf kastigu, di piká?

Romanonan 6:23. E pago di piká ta morto; ma e don di Dios ta bida eterno pa medio di Hesu-Kristu nos Señor.

NOTA: E kastigu pa piká no ta bida eterno den kandela di fièrnu, sino nèt lo kontrario: morto. Nos tur ta muri e promé morto (Hebreonan 9:27), pero Beibel ta bisa ku e morto ku e malbadonan lo muri den fièrnu ta e di dos morto (Revelashon 21:8). For di e promé morto, tur ta ser lantá pa kastigu òf rekompensa; pero no tin resurekshon for di e di dos morto. E ta definitivo. Ademas, si e kastigu pa piká ta tormento eterno den kandela di fièrnu, e ora ei Hesus no a paga e kastigu.

5. Kua ta e úniko dos eskohonan pa tur hende?

Juan 3:16. Pa ken ku kere den djE no peresé, ma haña bida eterno.

NOTA: E konseptonan di limbo i purgatorio no ta ser hañá den Skritura. Beibel ta siña solamente dos eskoho: bida eterno òf morto eterno (Deuteronomio 30:15).

6. Kiko lo pasa ku e malbadonan den kandela di fièrnu?

Salmo 37:10,20. Pasobra aki un poko tempo e malbado lo no tei mas. ... Ma e malbadonan lo peresé, ... den huma nan lo disparsé.

Malakias 4:1,3. E dia ta yega, ku lo kima manera un fòrnu; ... i tur esnan ku ta hasi maldat, lo bira bagas: i e dia ku ta bini lo kima nan. ... I boso lo trapa riba e malbadonan; pasobra nan lo ta shinishi bou di boso plant’i pia.

NOTA: E malbadonan den fièrnu lo disparsé den huma. Solamente shinishi lo keda.

7. Unda fièrnu di kandela lo ta situá?

Revelashon 20:9. Nan a subi riba e hanchura di e tera, i a rondoná e kampamentu di e santunan, ... i kandela a baha for di shelu for di Dios, i a devorá nan.

2 Pedro 3:10 E elementonan lo smelt ku kalor ferviente, e tera tambe i e obranan ku tin aden lo ser kimá.

NOTA: Kandela di fièrnu lo ta aki riba tera, pasobra e lo ta e tera na kandela.

8. Diabel lo ta na enkargo di kandela di fièrnu?

Revelashon 20:10. I e diabel ku a gaña nan a ser tirá den e lago di kandela i suafel.

NOTA: Nò! Leu di ta enkargá ku kandela di fièrnu, diabel lo ser tirá den kandela. E lo kombertié finalmente den “shinishi riba tera,” i Dios ta bisa di Satanas: “Nunka lo bo no t’ei mas.” Ezekiel 28:18,19.

9. E kandela di fièrnu lo paga un dia?

Isaias 47:14. Lo no tin karbon pa keinta kurpa, ni kandela pa sinta su dilanti.

NOTA: Despues ku piká, pekadornan, i tur kos riba tera ta destruí, e kandela lo paga. E lo no kima a lo largu di siglonan. Un fièrnu eterno di tormento lo a hasié imposibel pa hamas deshasí di piká. E plan di Dios ta pa isolá piká i destruyé, no perpetu’é. Revelashon 21:5 ta bisa: “Mira, Mi ta hasi tur kos nobo.”

10. Tantu alma komo kurpa ta ser destruí den fièrnu?

Mateo 10:28. No tene miedu di esnan ku ta mata e kurpa, ma no por mata e alma: ma mas bien tene miedu di Esun ku por destruí tantu alma komo kurpa den fièrnu.

NOTA: Hopi hende ta kere ku e alma nunka ta muri, pero dos biaha Dios ta bisa: “E alma ku peka, lo muri.” Ezekiel 18:4,20. Pues, di akuerdo ku Skritura, e malbadonan lo ser destruí den kandela di fièrnu, tantu alma komo kurpa.

11. Pa ken kandela di fièrnu lo ser sendé?

Mateo 25:41. Apartá for di mi, boso maldishonánan, den kandela eterno, prepará pa diabel i su angelnan.

NOTA: E propósito di e kandela ta pa destruí Satanas, su angelnan malbado, i piká. Si mi nenga di laga e plaga di piká lòs, lo mi mester ser destruí huntu kuné, pasobra si piká no ser destruí, e lo bolbe kontaminá e universo.

12. Kon Beibel ta referí na Dios su destrukshon di e malbadonan?

Isaias 28:21. Señor … lo ta rabiá … pa e por hasi su trabou, su trabou asombroso; i realisá akto, su akto ekstraordinario.

NOTA: Dios no por soportá e pensamentu di destruí esnan ku E ta stima. “Señor no ... ke pa ningun hende peresé, ma pa tur yega na arepentimentu.” 2 Pedro 3:9. E ta bisando nan konstantemente: “Bira for di boso mal kamindanan; pasobra pakiko boso ke muri?” Ezekiel 33:11. Destruí hende ta asina straño pa e kamindanan di Dios ku kandela di fièrnu ta ser yamá Su “akto straño.” Dios no ta laga nada afó den Su deseo pa salba hende. Promé ku nan ser destruí, kada persona malbado lo atmití ku Dios tabata hustu (Romanonan 14:11).

13. E frase bíbliko “kandela ku no ta paga nunka” no ta indiká ku e kandela no ta paga nunka?

Mateo 3:12. E lo limpia su plenchi rigorosamente, i rekohé su trigo pone den e mangasina; pero e lo kima e bagas kompletamente ku kandela ku no ta paga nunka.

NOTA: Nò! Kandela ku ta paga nunka no por ser pagá. Sinembargo, ora el a kima tur kos kompletamente, e ta paga. Por ehèmpel, Jeremias 17:27 ta spièrta ku si e pueblo di Dios no tabata fiel, E lo a sende un kandela den Jerusalem ku “lo no ser pagá.” I Skrituranan ta deklará ku e profesia akí a kumpli kaba. “Nan a kima e kas di Dios, i a basha e muraya di Jerusalem abou, i a kima tur su palasionan ku kandela. ... Pa kumpli ku e palabra di Señor pa medio di boka di Jeremias.” 2 Krónikanan 36:19,21. E kandela ei no por a ser pagá te ora el a konsumí tur kos; e ora ei el a paga. E no ta kimando awe, maske Beibel ta yam’é “impagabel.”

14. E frase “kandela eterno” no ta nifiká “sin fin”?

Judas 1:7. Meskos ku Sodoma i Gomora, ... ta ser poné komo ehèmpel, dor di sufri e vengansa di kandela eterno.

NOTA: Nos mester laga Beibel splika su mes. Nos por mira den e versíkulo akí ku Sodoma i Gomora a ser destruí ku kandela eterno komo un ehèmpel di fièrnu, pero e statnan ei no ta kimando ainda. Nan a ser kombertí den shinishi (2 Pedro 2:6), ku ta loke kandela eterno ta hasi. E ta eterno den su konsekuensianan. (Lesa e suplemento titulá “E hòmber Riku i Lázaro.”)

15. Ora Revelashon 20:10 ta deklará ku e malbadonan lo ser tormentá “pa semper i semper,” esei no ta indiká un tempu sin fin?

Jonas 2:6. E tera ku su tralinan tabata rònt mi pa semper.

NOTA: Nò. Jonas tabata den barika di e piská grandi pa tres dia i tres anochi (Jonas 1:17), sinembargo el a bisa “pa semper.” Mi ta sigur ku e tabata sinti manera pa semper! E palabra griego tradusí “pa semper” den Revelashon 20:10 ta “aion,” for di kua nos ta haña nos palabra “eon.” Hopi bes e ta representá un periodo di tempu no spesifiká, limitá òf ilimitá. E palabranan “pa semper” ta ser usá 56 biaha den Beibel, refiriendo na algu ku a terminá kaba. Den un kaso, “pa semper” ta deskribí e bida di un esklabo fiel (Eksodo 21:6), i na un otro kaminda “pa semper” ta nifiká 10 generashon (Deuteronomio 23:3). Serka hende, “pa semper” hopi bes ta nifiká “tanten ku e ta na bida” (1 Samuel 1:22,28).

16. Despues ku piká i pekadónan ta destruí, kiko Hesus lo hasi pa Su pueblo?

2 Pedro 3:13. Sinembargo, nos, segun su promesa, ta spera shelunan nobo i un tera nobo, den kua hustisia ta biba.

Revelashon 21:4. I Dios lo seka tur lágrima for di nan wowo; i lo no tin morto mas, ni tristesa, ni yoramentu, ni lo no tin mas doló, pasobra e promé kosnan a pasa bai.

NOTA: Riba e shinishinan di e mundu purifiká akí, Dios lo krea shelunan nobo i un tera nobo. E ta primintí goso, pas, i felisidat indeskriptibel pa tur kriatura bibu pa tur eternidat.

17. E problema di piká lo lanta un dia atrobe?

Nahum 1:9. Aflikshon lo no lanta di dos biaha.

NOTA: Nò! E promesa ta spesífiko. Piká lo no lanta nunka mas.
Isaías 65:17. Pasobra mira, Mi ta krea shelunan nobo i un tera nobo: i e kosnan di ántes lo no ser rekordá, ni bini na mente.

18. Ki pregunta penetrante Job ta hasi?

Job 4:17. Hende mortal lo ta mas hustu ku Dios?

NOTA: Si bo yu a bira un asesino enduresé, lo bo a sinti ku e mester ser kastigá? Probablemente ku sí. Pero lo bo tabata ke pa e kima bibu den un kandela, den agonia teribel, pa sikiera un dia? Naturalmente ku nò. Lo bo no por a soportá esei. Tampoko e Señor amoroso por a soportá pa mira Su yiunan asina torturá. Esei lo tabata pió ku e pió di tur atrosidat di guera. Dios ta asina? Realmente nò! Un fièrnu eterno di tormento lo tabata insoportabel pa Dios i diametralmente kontra Su karakter di amor i hustisia.

19. Mas ku kualke kos, Hesus ke pa bo biba den Su reino nobo glorioso. E ta anhelá pa bo okupá e manshon ku El a prepará pa bo. Lo bo disidí awor pa aseptá Su oferta?

Estudio Suplementario

E hòmber Riku i Lázaro

Hopi hende a usa e parabel di e hòmber riku i Lázaro pa purba proba ku hende ta bai stret shelu òf fièrnu ora nan muri. Esaki nunka tabata Hesus su intenshon ora El a usa e storia akí. E palabra ku Hesus a usa pa “fièrnu” tabata “Hades,” un lugá di tormento den mitologia griego.

Tur e hudiunan ku tabata skucha e diskurso akí lo a komprondé ku Hesus tabata usando un mito bon konosí pa ilustrá un punto. Si nos wak Lukas 16:19-31 mas djaserka, nos lo mira rápidamente ku e parabel aki ta yená ku símbolonan ku Hesus nunka tabatin intenshon pa nos tuma literalmente.

Por ehèmpel, tur esnan salbá ta bai na pechu di Abraham? Nò.

E hendenan den shelu i den fièrnu lo papia ku otro? Nò.

Un gota di awa lo a fria lenga di un hende ku ta kima den fièrnu? Nò.

Abraham ta disidí ken ta bai salbá i ken ta pèrdí? Nò.

Di mes manera, e parabel akí no por ser usá pa siña ku hende ku muri promé ku e último dia di huisio na fin di mundu lo bai stret shelu òf fièrnu ora nan muri. Juan 12:48 ta deklará, “E palabra ku Mi a papia, esei lo huzg’é den e último dia.”

Pues, kiko e parabel akí ta nifiká? E hòmber riku tabata un símbolo di e nashon hudiu, ku ta tene fiesta riba e Skrituranan miéntras ku e pididó di limosna na e porta, e paganonan, tabata muriendo di hamber pa e Palabra. Hesus a konkluí e parabel ku e opservashon ku “Si nan no skucha Moises i e profetanan, nan lo no ser konvensí tampoko, maske un hende lanta for di morto.” Lukas 16:31. En bèrdat, Hesus a lanta un hòmber ku yama Lázaro for di morto despues, i mayoria di e lidernan hudiu tòg no a kere (Juan 12:9-11).