Lès 11

Un Riu di Bida

1. Kua profeta di Tèstamènt Nobo a usa Riu Jordan pa batisá, òf limpia?

Mateo 3:1,5,6. Den e dianan ei Juan Boutista a bin, predikando den desierto di Judea ... E ora ei Jerusalèm, i henter Judea, i henter e region rònt di Jordan tabata sali bai serka djE, i nan a ser batisá den Jordan.

NOTA: E storianan di Evangelio ta kuminsá i kaba ku e tema di boutismo. Opviamente esaki ta un siñansa masha importante pa Hesus (Mateo 28:18,19).

2. Kua seremonia bíbliko glorioso ta simbolisá un “labamentu” for di lepra di piká?

Echonan 22:16. Lanta, i sea batisá, i laba kita bo pikánan, invokando e nòmber di Señor.

NOTA: E ordenansa bíbliko di boutismo ta simbolisá tantu e labamentu di piká for di bida di un persona, komo tambe e nasementu nobo.

3. Segun Beibel, kuantu diferente tipo di boutismo ta aseptabel?

Efesionan 4:5. Un Señor, un fe, un boutismo.

NOTA: Por lo ménos 15 diferente seremonia ta ser yamá boutismo awe, pero segun Beibel, tin solamente un berdadero boutismo.

4. Kiko e palabra “batisá” ta nifiká?

Kolosensenan 2:12. Derá huntu kuné den boutismo, den kua tambe boso a lanta huntu kuné pa medio di e fe den e poder di Dios, kende a lant’E for di morto.

NOTA: E palabra griego “baptizo” ta nifiká “sumergí,” “baha abou,” òf “dòp.” Un persona no a batisá a ménos ku el a ser sumergí kompletamente, òf derá, den awa. E palabra “baptizo” akí semper ta ser usá den Beibel den referensia na e ordenansa sagrado di boutismo. E palabranan griego pa “sprengu” òf “basha” nunka ta ser usá.

5. Hesus ta nos ehèmpel. Kon El a ser batisá?

Marko 1:9,10. Hesus a bini ... i a ser batisá dor di Juan den Jordan. I mesora ora El a sali for di awa, El a mira e shelunan habrí.

NOTA: Juan a batisá Hesus dor di sumersion den e mesun riu kaminda Naaman a ser limpiá di lepra. Tuma nota ku nan tabata “den” Jordan (no na kantu di riu) i ku Hesus a sali “for di” awa. Esaki ta e motibu pakiko Juan tabata batisá den “Aenon serka di Salim, pasobra tabatin hopi awa ayanan” Juan 3:23. Kristiannan mester sigui e ehèmpel di Hesus (1 Pedro 2:21), kende a ser batisá atraves di inmershon “pa kumpli ku tur hustisia.” Mateo 3:15.

6. Kon Felipe a batisá e tesorero di Etiopia?

Echonan 8:38,39. Nan tur dos a baha den awa, tantu Felipe komo e eunuko; i el a batis'é. I ora nan a sali for di awa, e Spiritu di Señor a kohe Felipe bai kuné.

7. Ki otro bèrdatnan ta ser simbolisá pa boutismo?

Romanonan 6:4. P’esei nos ta derá huntu kuné pa medio di boutismo den morto: pa meskos ku Kristu a ser lantá for di morto pa medio di e gloria di e Tata, asina nos tambe mester kana den nobedat di bida.

NOTA: Boutismo ta simbolisá e morto, entiero, i resurekshon di Kristu. Promé tin morto pa piká, despues entiero di e bida bieu di piká den awa, i finalmente resurekshon for di awa pa un bida nobo. Boutismo pa medio di inmershon ta kuadra perfektamente ku e simbolismo. E bida di piká ta muri, despues tin un suspenshon di rosea breve miéntras ku e persona ku ta ser batisá ta ser inkliná patras den e awa te ora e kurpa ta kompletamente kubrí, òf derá, den awa. Despues e persona ta lanta for di awa, i ta hala un rosea fresku manera un bebi resien nasí, pa biba un bida kompletamente nobo, loke ta simbolisá e resurekshon. Ningun otro forma di boutismo ta kuadra ku e simbolismo bíbliko akí. Algun hende ta bisa ku nan ta warda djadumingu santu na honor di e resurekshon, pero e práktika akí nunka ta ser menshoná den Beibel.

8. Kon importante boutismo ta?

Marko 16:16. Esun ku kere i ser boutisá lo ser salbá; ma esun ku no kere lo ta kondená [pèrdí].

Juan 3:5. Si un hende no nase di awa i di Spiritu, e no por drenta e reino di Dios.

NOTA: Boutismo ta klaramente obligá pa Skritura komo esensial. Sinembargo, ora boutismo ta imposibel, manera tabata pa e ladron na krus, Hesus ta duna e persona ei krédito pa Su boutismo (Mateo 3:15).

9. Ki seremonia bendishoná por ser kompará ku boutismo?

Galationan 3:27. Pasobra boso tur ku a ser batisá den Kristu a bisti Kristu.

NOTA: Boutismo ta manera e seremonia di matrimonio. Beibel ta bisa: “Pasobra bo Kreador ta bo esposo; Señor di ehérsitonan ta su nòmber.” Isaias 54:5. Manera un muhé ta tuma e nòmber di su esposo den matrimonio, asina kristiannan ta tuma e nòmber di Kristu, pa despues di esei ser yamá kristian. Tur dos seremonia mester ta basá riba amor i kompromiso si nan ke ta signifikante. Boutismo ta mes esensial pa e bida kristian ku un kasamentu ta pa un matrimonio.

10. Ki mandamentu Hesus a duna Su pueblo djis promé ku Su asenshon?

Mateo 28:19. Bai anto, i siña tur nashon, batisá nan den nòmber di e Tata, i di e Yu, i di Spiritu Santu.

NOTA: Pedro a sigui e mandato akí ora, riba e dia di Pentekòster, el a bisa e hendenan penitente: “Arepentí i ser batisá kada un di boso den nòmber di Hesu-Kristu.” Echonan 2:38.

11. Ki rekisitonan bíbliko mester presedé boutismo?

Echonan 2:38. E ora ei Pedro a bisa nan: arepentí, i laga kada un di boso ser batisá den nòmber di Hesu-Kristu pa pordon di piká, i boso lo risibí e don di Spiritu Santu.

1. Komprondé e siñansanan di Hesus (Mateo 28:19,20)
2. Kere tur e siñansanan di Hesus (Marko 16:16)
3. Arepentí di pikánan di pasado (Echonan 2:38)
4. Kere ku henter bo kurason (Echonan 8:37)
5. Bai di akuerdo pa bira for di piká (Lukas 3:7,8; Romanonan 6:5,6)
6. Aseptá Kristu komo bo Salbador personal i eksperensiá e nasementu nobo (2 Korintionan 5:17; Juan 3:3,5)

NOTA: Komo ku un bebi no por kumpli ku ningun di e pasonan ariba menshoná, opviamente no ta bíbliko pa batisá un mucha te ora e ta sufisiente grandi pa komprondé e evangelio.

12. Unda tur e formanan falsifiká di boutismo a originá?

Marko 7:8. Pasobra poniendo e mandamentu di Dios un banda, boso ta tene e tradishon di hende.

NOTA: Boutismo pa medio di inmershon tabata e úniko forma di boutismo praktiká durante tempu bíbliko i pa siglonan despues di e krus. Pero despues, hòmbernan mal dirigí a introdusí otro formanan di boutismo pa motibu di komodidat. Asina, Dios Su ordenansa sagrado di boutismo a ser trosé i su nifikashon simbóliko riku hasí skur.

13. Kiko Beibel ta bisa tokante esnan ku ta pone e siñansanan di hende promé ku e bèrdat di Dios?

Mateo 15:9. Pero en bano nan ta adoráMi, siñando komo doktrina e mandamentunan di hende.

Galationan 1:8. Ma maske nos, òf un angel for di shelu, prediká na boso un otro evangelio for di esun ku nos a prediká na boso, laga e ta maldishoná.

14. Pero e boutismo di Spiritu Santu no ta remplasá boutismo pa inmershon?

Echonan 2:38. E ora ei Pedro a bisa nan: Arepentí, i sea batisá kada un di boso den nòmber di Hesu-Kristu pa pordon di piká, i boso lo risibí e don di Spiritu Santu.

NOTA: Nò! Tuma nota ku miéntras Pedro tabata prediká (Echonan 10:44-48), Spiritu Santu a kai riba tur ku tabata skucha, di ken hopi di nan no a ser boutisá. Pero aunke nan a risibí e boutismo di Spiritu Santu kaba, Pedro a insistí pa nan ser batisá den awa tambe.

15. Reboutismo ta apropiá algun biaha?

Echonan 19:2-5. Nan a bis’é: “Nos no tin a sikiera tende si tin Spiritu Santu.” I el a puntra nan: “Den kiko antó boso a ser batisá?” I nan a kontestá: “Den e boutismo di Juan”. E ora ei Pablo a bisa: “Juan tabata batisá ku e boutismo di arepentimentu, bisando e pueblo ku nan mester kere den Esun ku lo a bini despues di djE, esta, den Kristu Hesus”. Ora nan tende esaki, nan a ser batisá den nòmber di Señor Hesus.

NOTA: Un dia ora Pablo tabata prediká na Efeso, el a haña 12 hòmber ku a ser batisá dor di Juan Boutista, pero ku nunka a tende di Spiritu Santu. Asina, ora nan a risibí e lus nobo supstansial akí, nan a ser rebatisá. Di mes manera, si un persona a pèrdè su eksperensia kristian kompletamente, e mester ser rebatisá ora e regresá na Señor. Reboutismo ta apropiá tambe si un persona no a batisá den e método bíbliko.

16. Boutismo ta konektá ku uni ku un iglesia?

Echonan 2:41. E ora ei esnan ku a risibí su palabra ku alegria a ser batisá: i e mesun dia ei a ser añadí na nan masoménos tres mil alma.

Echonan 2:47. Alabando Dios, i tabata bon mirá serka henter e pueblo. I Señor tabata agregá na e iglesia tur dia esnan ku mester ser salbá.

Kolosensenan 3:15. Boso a ser yamá den un kurpa.

Kolosensenan 1:18. E ta kabes di e kurpa, e iglesia...

1 Korintionan 12:13. Pasobra pa medio di un Spiritu nos tur a ser batisá den un kurpa.

NOTA: E Skrituranan ta inkonfundibel. Henter e pueblo di Dios ta yamá den un kurpa, ku ta e iglesia, i nos ta drenta den dje pa medio di boutismo. Despues di nasementu, un bebi mester ser poné den un famia pa kuido, protekshon i kresementu.

17. Si mi nenga boutismo, ken su konseho mi ta nenga?

Lukas 7:30. Ma e fariseonan i e ekspertonan di lei a rechasá e konseho di Dios kontra nan mes, pasobra nan no a ser batisá dor di dje.

18. Ora Hesus a ser batisá, kiko Su Tata a bisa?

Marko 1:9,11. I a sosodé den e dianan ei, ku Jesus a bini for di Názarèt di Galilea, i a ser batisá dor di Juan den Jordan. ... I a sali un stèm for di shelu, bisando: “Abo ta mi Yu stimá, den kende mi tin plaser”.

NOTA: Ora kualke un di e yunan di Dios arepentí di nan pikánan i ser batisá, E ta keda masha kontentu.

19. Lo bo ke kuminsá prepará pa e rito sagrado di boutismo pa asina Dios por bisa di bo: “Bo ta mi yu stimá, den ken mi tin plaser”?

Estudio Suplementario

E Boutismo Modelo

Hesus no a ser batisá pasobra E tabatin mester di limpiesa di piká, pasobra E tabata sin piká (1 Pedro 2:22). Esaki ta e motibu pakiko Juan Boutista tabata asina konfundí ora Hesus a bin na Riu Jordan, pidiendo pa ser batisá dor di dje. Juan a bisa: “Ami mester ser batisá dor di Bo, i Abo ta bini serka mi?” Mateo 3:14.

Pues, dikon Hesus a ser batisá? Tin tres motibu prinsipal. Di promé, El a ser batisá na fabor di esnan ku no por ser batisá nan mes. Tin biaha ora hende aseptá Señor den prizòn òf den un hòspital, sirkunstansianan no ta pèrmití pa nan ser batisá. Hesus ta duna nan krédito pa Su boutismo. E ladron na krus tabata un ehèmpel (Lukas 23:43). Di dos, Hesus a ser batisá komo un ehèmpel, ku nos mester sigui den Su pasonan (1 Pedro 2:21). I di tres, Hesus a ser batisá pa nos por, dor di studia Su eksperensia, sa kiko spera pa medio di fe.

Pa ilustrá, laga nos tuma e siguiente versíkulonan palabra pa palabra i wak kiko nos por spera di nos boutismo. Mateo 3:16 i 17 ta bisa: “I Hesus, ora El a ser batisá, a subi mesora for di awa: i mira, e shelunan a ser habrí p’E, i El a mira e Spiritu di Dios baha manera un palomba, i a baha riba djE: I mira, un bos for di shelu, bisando: ‘Esaki ta mi Yu stimá, den kende Mi tin plaser.’ ”

“E shelunan a ser habrí” = Nos ta risibí akseso na Dios.

“El a mira” = Nos wowonan spiritual awor ta habrí, dunando nos komprondementu i persepshon nobo.

“E Spiritu di Dios” = Nos ta rekonosé Su guia.

“Bahando manera un palomba” = Pas ta drenta suavemente den nos kurason.

“Un bos for di shelu” = Nos lo kuminsá tende e bos chikitu i ketu ei.

“Mi yu stimá” = Nos ta ser adoptá den Su famia real i ta bira siudadanonan di un pais diferente.

“Mi tin plaser” = Dios ta duna nos aseptashon i pordon kompleto.