Lès 12

Sosegá e Tera

1. Ki susesonan ta marka e komienso di e 1.000 añanan?

1 Tesalonisensenan 4:16. Pasobra Señor mes lo baha for di shelu ku un gritu, ... i e mortonan den Kristu lo lanta promé.

Revelashon 20:4,5. I nan a biba i a reina huntu ku Kristu mil aña. Ma e restu di e mortonan no a bolbe biba te ora ku e mil añanan a kaba. Esaki ta e promé resurekshon.

NOTA: E mil añanan di Revelashon 20 hopi bes ta ser yamá e milenio. E palabra “milenio” ta simplemente un komposishon latino di dos palabra: “milli,” ku ta nifiká “mil,” i “annum,” ku ta nifiká “añanan.” E segundo binida di Hesus i e resurekshon di e hustunan ta marka e komienso di e 1.000 añanan. E santunan di tur siglo (deskribí komo “bendishoná i santu” den versíkulo 6) lo ser lantá den e promé resurekshon akí.

2. Kiko mas lo pasa na e promé resurekshon?

1 Korintionan 15:51,52. Nos tur lo no drumi, ma nos tur lo ser transformá, den un momentu, den un fregá di wowo, na e último zonidu di tròmpèt: pasobra e tròmpèt lo zona, i e mortonan lo ser lantá.

Filipensenan 3:21. Kende lo kambia nos kurpa despresiabel, pa e por bira meskos ku Su kurpa glorioso.

2 Tesalonisensenan 2:8. I e ora ei e Malbado ei lo ser revelá, kende Señor ... lo destruí ku e splendor di Su binida.

Revelashon 16:18,20,21. I tabatin un temblor grandi, manera nunka tabatin for di tempu ku hende a bini riba tera, un temblor asina fuerte, i asina grandi. ... I tur isla a hui bai, i e serunan no a ser hañá. I un hagel grandi a kai for di shelu riba hende, kada piedra tabata pisa masoménos un talento [masoménos 75 liber].

Revelashon 20:1,2. Un angel ... a gara e dragon, e kolebra bieu ei, ku ta Diabel, i Satanas, i a mar'é pa mil aña.

NOTA: Wak e diagrama di 1.000 aña na final di e lès akí pa un resúmen di e eventonan ku lo tuma lugá ora ku e 1.000 aña kuminsá.

3. Ken lo ser lantá den e di dos resurekshon, i ki ora e lo tuma lugá?

Juan 5:28,29. Tur esnan ku ta den graf lo tende su bos, i lo sali; esnan ku a hasi bon, pa e resurekshon di bida; i esnan ku a kometé maldat, pa e resurekshon di kondenashon.

Revelashon 20:5. Ma e restu di e mortonan [e malbadonan] no a bolbe biba te ora e mil añanan a terminá.

NOTA: E malbadonan ta ser lantá den e di dos resurekshon general na fin di e 1.000 añanan.

4. Kiko ta e kondishon di tera durante e 1.000 aña?

Isaias 24:1. Mira, Señor ta hasi e tera bashí, i ta hasié destruí, i ta bir’é bok’abou.

Jeremias 4:23-26. Mi a wak e tera, i ata, e tabata sin forma i bashí; i e shelunan, i nan no tabatin lus. Mi a wak e serunan, i ata, nan tabata tembla. ... No tabatin ningun hende, i tur e paranan di shelu a hui bai. ... E lugá fruktífero tabata un desierto, i tur su statnan a ser bashá abou den e presensia di Señor, i pa medio di su rabia ardiente.

Jeremias 25:33. I e dia ei e mortonan di SEÑOR lo ta for di un ekstremo di tera te na e otro ekstremo di tera: nan lo no ser lamentá, ni rekohé, ni derá.

NOTA: Tera lo ta totalmente destruí dor di e temblor i tormenta di hagel ku ta dal na e segundo binida di Hesus. E lo keda den skuridat kompletu. Hendenan morto lo drumi plamá riba superfisie di tera, sin niun hende ku ta yora, pasobra niun lo keda na bida. E hustunan tur lo ta den shelu, i e malbadonan tur lo ta morto. (Lesa e suplemento riba “E Pos Sin Fondo.”)

5. Unda e santunan lo ta durante e 1.000 añanan, i kiko nan lo ta hasiendo?

Juan 14:3. Lo Mi bin atrobe i risibí boso serka Mi mes; pa kaminda Ami ta, boso tambe por ta.

Revelashon 20:4. I mi a mira trononan, i nan a sinta riba nan, i huisio a ser duná na nan: ... i nan a biba i a reina ku Kristu mil aña.

1 Korintionan 6:2,3. Boso no sa ku e santunan lo husga mundu? ... Boso no sa ku nos lo husga angelnan?

NOTA: Durante e 1.000 añanan e santunan lo ta den shelu, partisipando den e huisio. Nan lo no disidí ken ta salbá òf pèrdí, pasobra Dios lo tin esei determiná kaba. Nan lo simplemente konfirmá e huisionan di Dios. “Pasobra bo huisionan a ser manifestá.” Revelashon 15:4. E hustisia di e kastigu di Dios pa esnan pèrdí lo ser afirmá, komo tambe e rekompensanan pa esnan hustu (Revelashon 22:11,12). E fase akí di e huisio ta na benefisio di e santunan. Por ehèmpel, suponé ku bo yega shelu i deskubrí ku bo pastor stimá no tei, sinembargo, algun kriminal di mal fama t’ei! Probablemente lo bo tin mester di un splikashon. E angelnan lo guia nos dor di e bukinan di registro pa establesé kualke duda. Na final di e fase akí di e huisio, tur hende lo ta totalmente konvensí di e hustisia i amor Dios, i Su trato imparsial ku tur. Nan lo deklará: “Pasobra Su huisionan ta berdadero i hustu.” Revelashon 19:2. (Lesa e suplemento titulá “E diagrama di 1.000 Aña.”)

6. Kiko lo pasa na fin di e 1.000 añanan?

Zakarias 14:1,4,5,9. Mira, e dia di Señor ta bini, ... I Su pianan lo para riba e dia ei riba e seru di Oleifi, ku ta dilanti di Jerusalèm, na parti ost, i e seru di Oleifi lo sples den dos. ... I Señor mi Dios lo bini, i tur e santunan huntu kunE. ... I Señor lo ta rei riba henter tera.

Revelashon 21:2. I ami, Juan, a mira e stat santu, Jerusalèm nobo, bin abou for di Dios, for di shelu, prepará manera un brùit dòrná pa su esposo.

NOTA: Na final di e 1.000 añanan, e Jerusalèm Nobo ku e santunan aden lo baha for di shelu i baha riba loke awor ta e Seru di Oleifi. Señor lo plat e seru pa traha un sabana grandi pa e sitio di aterisahe di e stat.

7. Kiko lo sosodé despues pa libra Satanas for di su prizòn?

Revelashon 20:5,7. Ma e restu di e mortonan no a bolbe biba te ora ku e mil aña a terminá. ... I ora e mil añanan pasa, Satanas lo ser saká for di su prizòn.

NOTA: Despues ku e malbadonan resusitá, Satanas lo ta liber un biaha mas pa gaña i manipulá nan.

8. Kiko Satanas lo hasi ora e malbadonan ser lantá?

Revelashon 20:8,9. I lo sali pa gaña e nashonnan ku ta den e kuater skinanan di tera, Gog i Magog, pa reuní nan pa bataya: di ken e kantidat ta manera e santu di laman. I nan a subi riba e hanchura di tera, i a rondoná e kampamentu di e santunan, i e stat stimá.

NOTA: Satanas lo gaña hende pa kere ku el a ser destituí inhustamente for di shelu i ku huntu nan por kapturá e stat i tuma kontrol. Realisando ku nan ta será pafó di e stat santu, e malbadonan lo organisá un atake pa konkistá e Jerusalèm Nobo.

9. Na e momentu krusial akí, kiko lo para tur kos?

Revelashon 20:11,12. I mi a mira un gran trono blanku, i Esun ku tabata sintá riba dje, ... i e mortonan a ser husgá for di e kosnan ku tabata skirbí den e bukinan, segun nan obranan.

NOTA: E trono di Dios lo aparesé diripiente den e shelunan riba e stat, i e fase final di e huisio ta kuminsá. E asalto riba e stat di Dios ta ser tresé asina na un paro instantáneo. E bukinan lo ser habrí, i bida di kada persona lo pasa Su dilanti. Tur kos lo ta habrí pa e malbadonan i hustunan mira (Lukas 12:2, 3).

10. Kiko lo pasa despues ku e malbadonan ser husgá?

Romanonan 14:11. Manera Mi ta biba, Señor ta bisa, tur rudia lo dobla pa mi, i tur lenga lo konfesá na Dios.

Filipensenan 2:10,11. Ku pa e nòmber di Hesus tur rudia mester dobla, di kosnan den shelu, i kosnan riba tera, i kosnan bou di tera; I ku tur lenga mester konfesá ku Hesu-Kristu ta Señor, pa e gloria di Dios Tata.

Revelashon 19:1,2. Mi a tende un bos grandi di hopi hende den shelu bisando: ... Su huisionan ta berdadero i hustu.

NOTA: E malbadonan tur lo atmití libremente ku Dios tabata honesto i hustu i ku El a purba desesperadamente pa salba nan, ma nan a skohe abiertamente pa rechas’E i pa biba un bida egoista di piká. Despues di e atmishon universal akí, e konflikto di piká lo ser resolvé pa semper i lo ta sigur pa destruí pekadornan.

11. Kiko lo pasa despues?

Revelashon 20:9. Kandela a baha for di Dios for di shelu, i a devorá nan.

Revelashon 20:15. I ken ku no a ser hañá skirbí den e buki di bida a ser tirá den e lago di kandela.

NOTA: E ora ei e kandela di Dios lo kai riba e malbadonan i forma un lago grandi di kandela tur rònt di e stat di Dios. E kandela akí finalmente lo kombertí nan tur den shinishi (Malakias 4:3). Diabel lo no tin kontrol riba e kandela akí, ku ta ser yamá fièrnu. En kambio, e i su angelnan tambe lo ser kastigá den e kandela i despues lo ser kombertí den shinishi (Revelashon 20:10; Ezekiel 28:18). No tin resurekshon for di e kandela akí, ku ta ser yamá e segundo morto (Revelashon 20:14).

12. Despues ku e kandela paga, kiko Dios lo hasi pa Su pueblo?

Isaias 65:17. Pasobra, mira, Mi ta krea shelunan nobo i un tera nobo.

2 Pedro 3:13. Nos, segun su promesa, ta spera shelunan nobo i un tera nobo den kua ta biba hustisia.

NOTA: Na final di e 70 añanan di koutiverio babilóniko, e yunan di Israel a regresá na e tera primintí i a rekonstruí e stat. Despues di e milenio, e santunan lo ta testigu di Hesus kende ta krea un shelu nobo (atmósfera) i un tera nobo perfekto, kaminda nunka mas piká lo lanta su kabes mahos (Nahum 1:9). E paradeis ku Adam ku Eva a pèrdè dor di piká lo ser restourá den tur su gloria Edéniko. Pas, goso, amor, i felisidat perfekto lo sosegá riba e pueblo di Dios pa semper!

13. Unda Dios i e hustunan lo biba finalmente?

Mateo 5:5. Felis ta esnan humilde: pasobra nan lo heredá e tera.

Revelashon 21:3. Mira, e tabernakel di Dios ta serka hende, i E lo biba huntu ku nan.

NOTA: Tantu Dios Tata komo Dios Yu lo biba huntu ku nan santunan riba e tera nobo. Djis pensa riba dje: tin Dios komo un bisiña!

14. Hesus ta bisa: “Mi ta bai prepará un lugá pa boso.” Juan 14:2. E tin un manshon pa bo den e stat santu. Lo bo aseptá awor Su oferta di bida eterno pa asina E por dunabo e nasementu nobo i preparábo pa Su reino?

Estudio Suplementario

E Diagrama di 1.000 Aña

Eventonan ku ta inisiá e 1.000 aña:

1. Hesus ta regresá PA Su santunan, i e mortonan hustu ta resusitá.
2. Malbadonan ta ser matá dor di e binida di Señor, i tambe temblor i hagel devastador.
3. Bibunan hustu ta ser kambiá, despues ta ser tumá pa topa ku Señor den laira.
4. Nubia ta hiba e hustunan shelu.

Kondishonnan i eventonan durante e 1.000 añanan:

1. Santunan den shelu ta partisipá den huisio di e malbadonan.
2. Satanas i su angelnan ta ser fòrsá pa keda riba tera den devastashon i skuridat total.
3. No tin hende na bida riba tera.

Eventonan na fin di e 1.000 añanan:

1. Hesus ta regresá HUNTU KU Su santunan, i e stat santu ta baha riba Seru di Oleifi.
2. Malbadonan ta resusitá, i Satanas ta persuadí malbadonan pa ataká e stat santu.
3. Malbadonan ta ser husgá, despues kastigá ku kandela for di shelu ku finalmente ta devorá esnan pèrdí.
4. Dios ta krea shelu nobo i un tera nobo riba shinishi di un tera purifiká.

E Abismo

E término “abismo” di Revelashon 20:1 hopi bes ta ser mal komprondé. E ta tradusí for di e palabra griego “abusos,” e rais di e palabra na Papiamentu “abismo.” Den e Tèstamènt Bieu griego, e palabra akí ta ser usá pa referí na e tera skur, sin forma, manera e tabata promé ku Kreashon. “I tera tabata sin forma i bashí i tabatin skuridat riba superfisie di e profundidat.” Génesis 1:1,2. E palabra “abusos” ta ser usá atrobe den Lukas 8:31 pa ilustrá un kondishon kaminda demoñonan no tin niun hende pa poseé òf manipulá.

Durante e 1.000 añanan, e diabel ta ser mará na kadena dor di sirkunstansianan, “pa e no gaña e nashonnan mas.” Revelashon 20:3. Un kadena literal nunka por a kadená un ser spiritual. Un kos so lo a strob’é di tenta hende, i esei ta si no tabatin hende na bida! Ora Hesus bini, tur e malbadonan ta ser matá i e hustunan hibá na shelu, asina Satanas i su angelnan ta limitá na e planeta akí sin niun hende pa tenta. Pa 1.000 aña nan lo kana rònt i mira e fruta di nan rebelion. Nunka a yega di traha un kadena di sirkunstansia mas fuerte. Ta di e manera akí Satanas i su angelnan ta ser mará. “I nan lo ser reuní huntu, manera prezunan ta ser reuní den pos, i lo ser será den prizòn, i despues di hopi dia nan lo ser bishitá.” Isaias 24:22.