Lès 13

Bùig pa Babilonia

1. Kon nos storia den Daniel 3 ta relashoná ku Revelashon?

Revelashon 13:15. Tantu ku no ke adorá e imágen di e bestia mester ser matá.

NOTA: Den e último dianan, e pueblo di Dios lo ser fòrsá un biaha mas pa adorá kontrali na konsenshi òf ser matá. Nan lo tin ku skohe entre obedesé e lei di Dios òf e leinan di hende.

2. Kua ta e mensahe di e tres angelnan di Revelashon 14?

Revelashon 14:7. Teme Dios i dun'E gloria; pasobra e ora di su huisio a yega i adorá Esun ku a traha shelu i tera, i laman i e fuentenan di awa.

Revelashon 14:8. I un otro angel a sigui bisando: "Babilonia a kai, a kai, e stat grandi ei, pasobra el a hasi tur nashon bebe di e biña di e rabia di su fornikashon."

Revelashon 14:9,10. Si un hende adorá e bestia i su imágen i risibí su marka riba su frenta òf den su man, e tambe lo bebe di e biña di e rabia di Dios.

NOTA: Beibel ta bisa nos den Revelashon 14:6-14 ku den e último dianan, e tremendo mensahe akí di tres punto di speransa i spièrtamentu lo bai na henter mundu pa prepará hende pa e regreso di Hesus. Un di e mensahenan akí ta spièrta kontra di adorá e bestia i risibí su marka. Den e lès aki, nos lo identifiká e bestia. Den Lès 14, nos lo identifiká e marka. Bida eterno mes por ta den wega, pues hasi orashon sinseramente pa Dios su guia i komprondementu segun ku bo ta studia.

3. Kiko un bestia ta representá den profesianan di Beibel?

Daniel 7:23. E di kuater bestia lo ta e di kuater reino riba tera.

Daniel 7:17. E bestianan grandi akí, ku ta kuater, ta kuater rei.

Daniel 8:21. I e chubatu karné ta e rei di Gresia.

NOTA: Den profesia di Beibel, un bestia ta representá un gobièrnu, reino òf poder polítiko. Dios ta usa bestia pa simbolisá gobièrnunan, manera nos ta hasi awe: un águila (Estádos Unídos di Amérika), un ber (Rusia), etc. Den Beibel, “bestia” no ta un término irrespetuoso. E no ta sugerí karakterístikanan di bestia. E bestia ku tin e marka ta ser representá den Revelashon 13:1-10,15-18. Por fabor, tuma tempu pa lesa e versíkulonan akí promé ku sigui ku pregunta 4.

4. Kon Beibel ta identifiká e bestia?

Revelashon 13:1. I mi a para riba e santu di laman, i a mira un bestia ta subi sali for di laman, i e tabatin shete kabes i dies kachu, i riba su kachunan dies korona, i riba su kabesnan e nòmber di blasfemia.

NOTA: Den Revelashon 13:1-10,15-18, Dios ta duna 10 pista pa yuda nos identifiká e bestia. E ta duna nos un lista largu di karakterístika pa nos por ta apsolutamente sigur di e identidat di e bestia.

5. E bestia akí ta sali for di laman. Kiko laman, òf awa, ta simbolisá?

Revelashon 17:15. E awanan ku bo a mira ... ta pueblonan, i multitutnan, i nashonnan, i lenganan.

NOTA: Den profesia, awa ta representá multitutnan grandi di hende, òf áreanan densamente poblá. Profesia a pronostiká ku e bestia lo a sali for di meimei di e nashonnan establesí di e mundu konosí e tempu ei. E papado a surgi den Europa oksidental, pues e ta kuadra ku Punto 1. Pero ke tal di e otro nuebe puntonan di identifikashon?

6. Ken ta duna e bestia su poder i posishon?

Revelashon 13:2. I e dragon a dun’é su poder, i su trono, i gran outoridat.

NOTA: E bestia, ku tin un marka ku nos mester evitá, a optené su poder, outoridat i stat kapital for di e dragon. Segun Revelashon 12:3-5, e dragon ta e poder ku a buska pa destruí e yu Hesus na momentu di Su nasementu. Tabata Satanas ku a inspirá Herodes, un rei di e imperio romano pagano, pa mata tur e bebinan maskulino na Bethlehem (Mateo 2:13,16). Na ken Roma pagano a duna su outoridat i siudat kapital? Historia ta mustra kla ku Roma pagano a entregá su poder i siudat kapital na e iglesia di Roma. E siguiente sita históriko ta típiko: “E iglesia romano ... a pusha su mes den e lugá di e Imperio-Mundial Romano, di kua e ta e kontinuashon aktual. ... E Papa, ku ta yama su mes ‘Rei’ i ‘Pontifex Maximus,’ ta e susesor di Cesar.”* Pues Punto 2 ta kuadra ku e papado tambe.

*Adolph Harnack, What Is Christianity? [Kiko Ta Kristianismo?] (New York: Putnam, di dos edishon, revisá, 1901), p. 270.

7. Kon trasendente e influensia di e bestia ta?

Revelashon 13:3. I henter tera a keda asombrá i a sigui tras di di e bestia.

NOTA: Niun hende lo a kuestioná ku durante Edat Medio, e papado enbèrdat tabata un poder mundial. De echo, e palabra “katóliko” ta nifiká “universal.” Nos por mira ku Punto 3 tambe ta kuadra ku e papado.

8. Kiko ta sali for di boka di e bestia?

Revelashon 13:6. I el a habri su boka den blasfemia kontra Dios, pa blasfemá su nòmber.

NOTA: Beibel ta definí blasfemia komo hende ku ta pretendé di ta pordoná piká (Lukas 5:21) i ku ta pretendé di ta Dios (Juan 10:33). E papado ta reklamá ku kurashi e poder pa pordoná piká. Tuma nota di e siguiente sekshon for di un katekismo katóliko: "E Saserdote ta pordoná e pikánan berdaderamente, òf e ta deklará solamente ku nan ta ser transferí? E Saserdote ta pordoná e pikánan realmente i berdaderamente den birtut di e poder duná na dje dor di Kristu."¹ E papado ta pretendé tambe ku e papa ta igual ku Dios. Papa Leo XIII a bisa: “Nos [e papanan] tin riba e tera akí e lugá di Dios Todopoderoso.”² At’akí un otro deklarashon asombroso tokante e papa: “Bo ta un otro Dios riba tera.”³ Pues Punto 4 tambe ta kuadra ku e papado.

¹Deharbe, S.J., A Complete Catechism of the Catholic Religion [Un Katekismo Kompleto di Religion Katóliko] (New York: Schwartz, Kirwin & Fauss, 1924), p. 279.
²Christopher Marcellus, Oration in the Fifth Lateran Council [Orashon den e di Sinku Konsilio Laterano], Seshon IV (1512), manuskrito SC, tomo 32, kol. 761 (Latin).
³Papa Leo XIII, Karta Ensíkliko “The Reunion of Christendom,” [E Reunion di Kristianismo], fechá 20 di yúni 1894, trans. den The Great Encyclical letters of Pope Leo XIII [E Gran kartanan Ensíkliko di Papa Leo XIII] (New York: Benziger, 1903), p. 304.

9. Kuantu tempu e promé bestia akí lo a goberná?

Revelashon 13:5. I poder a ser duná na dje pa sigui kuarentidos luna.

NOTA: Kòrda ku den profesia, un dia profétiko ta igualá un aña literal (Ezekiel 4:6). E periodo di tempu akí ta ser referí na dje bes tras bes den profesia komo tres aña i mei, 42 luna, òf 1.260 dia. Basá riba e kalènder di 30 dia ku e hudiunan tabata usa, tur tres periodo di tempu ta totalisá e mesun 1.260 dianan profétiko, òf 1.260 aña literal. E poder mundial di Roma papal a bira ofisial na A.D. 538, ora ku e dekreto di Emperador Justiniano ku a hasi e papado supremo no a ser oponé mas. E papado a haña loke a parse di ta un sla mortal na 1798 ora e papa a ser kapturá dor di e general di Napoleon, Alexander Berthier. Lo bo nota ku e periodo di tempu entre A.D. 538 i 1798 ta eksaktamente 1.260 aña. Punto 5 tambe ta kuadra ku e papado.

10. Kiko a pasa ku e bestia despues di e 42 lunanan?

Revelashon 13:3. I mi a mira un di su kabesnan komo si fuera e tabata heridá pa muri; i su herida mortal a ser kurá i henter mundu a keda asombrá i a sigui tras di e bestia.

NOTA: Manera ya menshoná, e papado a risibí loke a parse di ta un herida mortal na 1798 ora General Berthier a hiba e papa prezu na Fransia, kaminda el a muri den eksilio.¹ Mitar di Europa a pensa ku e suseso akí a señalá fin di e papado, ma Dios a bisa ku e herida lo a kura i ku e poder i influensia di e papado lo a ser restourá te ora ku henter mundu lo a sigui su liderazgo. Malachi Martin, konosedó perfekto di Vatikano, ta revelá lo siguiente den su buki The Keys of This Blood: “E papa ta e persona mihó konosí di siglo 20 (p. 123), a forma relashonnan personal ku e lidernan di 91 pais (p. 490), i ta prepará pa gobernashon mundial awor” (p. 143).² Asta un nobato lo a rekonosé ku awendia e papado ta, den hopi forma, e poder ku mas influensia riba tera. I ku kada biahe ku e papa hasi, su poder i influensia ta krese. Un multiple di miónes rònt mundu ta wak e papado komo e úniko speransa pa unidat mundial, pas i desensia, eksaktamente manera Dios a pronostiká. E papado ta kuadra klaramente ku Punto 6.

¹Joseph Rickaby, "The Modern Papacy," “[E Papado Moderno]” Charlanan riba e Historia di Religion, (London: Sosiedat di Bèrdat Katóliko, 1910), Tomo 3, Charla 24, p. 1.
²Malachi Martin, The Keys of This Blood [E Yabinan di E Sanger Akí] (New York: Simon & Schuster, 1990).

11. E bestia ta un poder religioso?

Revelashon 13:15. I ta pone ku tur hende ku no ke adorá e imágen di e bestia mester ser matá.

NOTA: Ta opvio ku e entidat akí lo tabata enbolbí den asuntunan spiritual. E palabranan “adorá” òf “a adorá” ta ser usá sinku biaha den Revelashon 13 ora ta referí na e poder akí. Siguramente ningun hende ta duda ku e papado ta kuadra ku Punto 7.

12. Kiko e bestia ta hasi ku e santunan?

Revelashon 13:7. I a ser permití na dje pa hasi guera ku e santunan i pa vense nan.

NOTA: Ta konosementu komun ku e papado sí a persiguí i destruí kristiannan ku konsenshi, spesialmente durante Edat Media, e periodo kulminante di su kontrol. Hopi historiadó ta bisa ku mas ku 50 mion hende a muri pa nan fe durante e periodo akí di gran tribulashon. Aparentemente e iglesia a sinti ku e tabata hasiendo Dios un fabor dor di eliminá “herehia.” E papa a pidi pa e iglesia ser pordoná pa su atrosidatnan, pero e echo ta keda ku el a persiguí i destruí sí. E papado ta kuadra ku Punto 8 tambe.

13. Kua ta e number misterioso ku ta identifiká e bestia?

Revelashon 13:18. Su number ta seisshentisesentiseis.

NOTA: Den Revelashon 13:18, Dios ta bisa pa konta e number di e bestia su nòmber i ku e ta e number di un hende. Ora nos pensa riba e papado, e hòmber ku nos ta pensa riba dje naturalmente ta e papa. Kon ta su nòmber? Un di e títulonan ofisial di papa ta “Vikario di e Yu di Dios,” ku ta “Vicarius Filii Dei” na latin (e idioma ofisial di iglesia). Artíkulonan di korant, ora ta referí na e papa komo “Vikario di Kristu,” hopi bes lo enserá e palabranan den komiya pa mustra ku nan ta un tradukshon di su título, òf nòmber. E buki di Revelashon ta bisando ku e balor di sifra romano di e lèternan di su nòmber lo ta igual na 666. Laga nos wak si Punto 9 ta kuadra ku e papado òf nò:

No mester keda niun duda. Nos a mustra ku tur 10 karakterístika deskribí den Revelashon 13:1-8, 15-18 ta kuadra ku e papado. I e poder akí tin un marka spesífiko ku nos no ta riska risibí.

Awor, por fabor, tene kuenta ku tin hopi kristian katóliko romano piadoso i amoroso ku Dios ta konta komo Su yunan. Tambe tabatin hopi papa mizerikòrdioso i balente ku a stima Dios. E lès akí no ta un atake riba nos amigunan katóliko. E ta un atake riba diabel, ku ta atraé iglesianan for di bèrdat bíbliko. Sinembargo, Dios Mes a bisa nos ku e institushon akí tin un marka ku nos no ta riska risibí. Protestantnan, katólikonan, hudiunan i no-kristiannan sinsero tur lo ta ansioso pa deskubrí kiko e marka akí ta pa asina nan por evitá di risibí esaki. Laga nos gradisí Dios ku den Su palabra El a eksponé e plannan mahos di satanas pa destruí nos tur.

Den nos siguiente lès, nos lo identifiká klaramente e “marka” di e bestia. Si bo risibí e marka di e bestia, lo bo bai pèrdí. Hopi hende lo deskubrí ku evitá e marka lo enbolbí un lucha tremendo. Pero Dios por duna nos e fe di Shadrach, Meshach, i Abednego, ku tabata dispuesto pa enfrentá morto pa asina honra Dios.

14. Bo ta dispuesto pa sigui Hesus unda ku E hiba bo, aunke bo por pèrdè bo amigunan?