Lès 14

E Marka di Cain

1. Ken lo ser protehá atraves di e shete último plaganan?

Revelashon 7:3. Bisando: No hasi daño na tera, ni laman, ni e palunan, te ora nos kaba di seya e sirbidónan di nos Dios na nan frenta.

NOTA: Esnan ku risibí e seyo di Dios riba nan frenta lo ser protehá durante e plaganan (Salmo 91:7-11)

2. Kiko ta e “seyo” akí ku e hustunan tin riba nan frenta?

Isaias 8:16. Mara e testimonio; seya e lei entre mi disipelnan.

NOTA: E seyo di Dios ta ser hañá den Su lei. Un seyo ta loke ta hasi un dokumento ofisial, i normalmente e ta kontené tres karakterístika: Nòmber, Funshon, i Teritorio. Un ehèmpel lo ta “Siro rei di Persia” den Esdras 1:1.

3. Kua di e Dies Mandamentunan ta kontené tur e elementonan di un seyo?

Eksodo 20:11. Pasobra den seis dia Señor a traha shelu i tera, laman, i tur loke tin den nan.

NOTA: E di kuater mandamentu ta e úniko ku ta kontené tur tres elemento di un seyo:
  1. “Señor”: Su nòmber,
  2. “a traha”: Su funshon komo Kreador,
  3. “shelu i tera, laman, i tur loke tin den nan”: Su teritorio

4. Kiko Dios a duna komo un señal spesial di Su poder?

Ezekiel 20:12. Mi a duna nan mi sabatnan, pa ta un señal entre Ami i nan, pa nan por sa ku Ami ta Señor ku ta santifiká nan.

Ezekiel 20:20. Konsagrá mi sabatnan; i nan lo ta un señal entre Ami i boso, pa boso por sa ku Ami ta SEÑOR boso Dios.

Eksodo 31:13. Siguramente boso mester warda mi sabatnan, pasobra e ta un señal entre Ami i boso durante tur boso generashonnan; pa boso por sa ku Ami ta e Señor ku ta santifiká boso.

NOTA: Dios ta deklará klaramente ku El a duna e Sabat komo un señal di Su poder pa krea i santifiká. E ta Su seyo, òf marka di outoridat. E palabranan “seyo,” “señal,” “marka” i “símbolo” ta ser usá interkambiablemente den henter Beibel (kompará Génesis 17:11 ku Romanonan 4:11 i Revelashon 7:3 ku Ezekiel 9:4).

5. Kiko e di dos bestia di Revelashon 13 ta fòrsa tur hende pa risibí?

Revelashon 13:16. I e ta pone tur, tantu chikitu komo grandi, riku komo pober, liber i katibu, risibí un marka na nan man drechi, òf na nan frenta.





6. Kiko ta e marka di e bestia?

Echonan 5:29. E ora ei Pedro i e otro apòstelnan a kontestá i a bisa: Nos mester obedesé Dios mas bien ku hende.

Skohe pa obedesé e leinan di e papado (djadumingu) mas bien ku e leinan di Dios (Sabat) lo lagabo ku e marka di bestia.

Romanonan 6:16. Boso no sa ku, na esun ku boso entregá boso mes pa obedesé komo katibu, boso ta katibu di esun ku boso ta obedesé, sea di piká pa morto òf di obediensia pa hustisia?

Kiko piká ta?

1 Juan 3:4. Ken ku kometé piká ta kibra lei tambe, pasobra piká ta kibramentu di lei.

NOTA: Nos a identifiká e promé bestia di Revelashon 13 den Lès 13. Kiko ta su marka di poder i outoridat? E mihó manera pa deskubrí su marka di outoridat ta pa puntra e papado direktamente. Tuma nota di e siguiente sekshon for di un katekismo katóliko:

Pregunta Kontesta
Kua ta e dia di Sabat? Diasabra ta e dia di Sabat.
Dikon nos ta warda djadumingu na lugá di djasabra? Nos ta warda diadomingo na lugá di diasabra pasobra Iglesia Katóliko a transferí e solemnidat di djasabra pa djadumingu."1

At’akí un otro deklarashon for di un katekismo:

Pregunta Kontesta
Bo tin kualke otro manera pa proba ku Iglesia tin poder pa instituí fiestanan di presepto? Si e no tabatin un poder asina, e lo no por a hasi esei den kua tur religionista moderno ta di akuerdo kuné, e lo no por a sustituí e opservansia di djadumingu e promé dia di siman, pa e opservansia di djasabra e di shete dia, un kambio pa kua no tin outoridat bíbliko.”2

Pues e papado ta bisando ku su marka di poder i outoridat ta hasiendo djadumingu un dia santu, un kambio ku práktikamente henter e mundu kristian ta aseptá. (Lesa e suplemento titulá “Ki Pregunta Importante Papado Ta Hasi Protestantnan?”)

1Peter Geiermann, E Katekismo di Doktrina Katóliko di e Konverso (St. Louis: B. Herder Book Co., edishon di 1957), p 50.

2Stephen Keenan, Un Katekismo Doktrinal (New York: P.J. Kenedy & Sons, di tres edishon merikano, revisá, n.d.), p. 174.

7. Sea e marka di e bestia òf e seyo di Dios ta visibel?

Hebreonan 10:16. Señor ta bisa, lo Mi pone Mi leinan den nan kurason, i den nan mente lo Mi skirbi nan.

Eklesiástes 9:10. Kiko ku bo man haña pa hasi, hasié ku bo forsa.

Eksodo 13:9. I esaki lo ta un señal pa bo riba bo man, un rekordatorio meimei di bo wowonan, pa e lei di SEÑOR por ta den bo boka.

Isaías 59:6,7. Nan obranan ta obranan di inikidat, i e echo di violensia ta den nan man. ... Nan pensamentunan ta pensamentunan di inikidat; ruina i destrukshon ta den nan kamindanan.

NOTA: E marka di e bestia ni e seyo di Dios ta visibel di pafó. E frenta ta representá e mente, i e man ta un símbolo di trabou. “Riba man” i “entre wowonan” ta símbolonan konsistente den Skritura pa pensamentunan i akshonnan di un persona (Eksodo 13:16; Deuteronomio 6:8; 11:18).

Un persona lo risibí e marka di e bestia riba su frenta dor di skohe pa kere ku djadumingu ta un dia santu apesar di e bèrdat di Beibel. Un persona lo ser marká na e man drechi dor di traha riba e Sabat di Dios òf dor di eksternamente warda e leinan di djadumingu pa motibunan kumbiniente, manera un trabou, famia, etc. Aunke e señal ta invisibel pa hende, Dios lo sa ken tin kua marka (2 Timoteo 2:19). Den un sentido, kada persona lo marka su mes. Si mi respetá i konsiderá e Sabat santu di Dios, E lo marka mi komo di djE. Si mi konsiderá e Sabat falsu di e bestia, E lo marka mi komo pertenesiendo na e bestia.

8. Kon Hesus ta determiná si nos ta Su sirbidónan?

Romanonan 6:16. Boso no sa ku na esun ku boso entregá boso mes komo katibu pa obedes’é, boso ta sirbidó di ken boso ta obedesé.

Juan 14:15. Si boso ta stimaMi, warda mi mandamentunan.




9. Tin kualke hende ku tin e marka di e bestia aworakí?

Revelashon 13:17. Ningun hende por kumpra òf bende, eksepto esun ku tabatin e marka, òf e nòmber di e bestia, òf e number di su nòmber.

NOTA: Ningun persona tin e marka aworakí. Ora e bira un asuntu fòrsá, solamente esnan ku a risibí e marka di e bestia lo por kumpra òf bende. Na e momentu ei, hende ku warda e Sabat santu di Dios lo hasi esaki ku riesgo di nan bida (Revelashon 13:15), i esnan, ku skohe pa profaná Su dia santu i ofisialmente depositá nan voto dor di pone e leinan di hende riba e Lei di Dios, lo ser marká komo pertenesiendo na Antikristu. Tur esnan ku ta leal na Hesus i Su dia santu lo risibí e seyo glorioso di Hesus, hasiendo nan asina di djE pa semper. Esnan ku purba keda neutral lo ser kontá pa Antikristu (Mateo 12:30).

10. Kua dos kos e poder di Antikristu ta purba kambia?

Daniel 7:25. E lo ... pensa pa kambia tempu i lei.

NOTA: Daniel 7 ta revelá un deskripshon di Tèstamènt Bieu di e poder Antikristu. E ta pronostiká klaramente ku e bestia lo a purba kambia tantu e leinan di Dios komo tempunan. E papado a purba kambia e leinan di Dios dor di:
  1. omití e di dos mandamentu kontra venerashon di imágen,
  2. abreviá e di kuater mandamentu di 94 palabra na solamente ocho pa asina evitá di menshoná kua dia ta e Sabat, i
  3. dividí e di dies mandamentu den dos mandamentu.
E papado a purba kambia e tempunan di Dios dor di:
  1. siña hende rekonosé e promé dia di siman komo e Sabat en bes di e di shete dia, i
  2. adoptá e práktika romano pagano di kuminsá kada dia meianochi en bes di na bahada di solo.
Dios Su tempu pa e Sabat ta for di bahada di solo djabièrnè anochi te bahada di solo djasabra anochi (Levítiko 23:32). Ningun mortal hamas mester riska mishi ku e lei sagrado òf tempunan di Dios (Mateo 5:18).

11. Kiko tabata Dios su krítika kontra Su saserdotenan, òf pastornan di antiguedat?

Malakias 2:8, 9. Boso a pone hopi hende trompeká den e lei. ... Boso no a sigui Mi kamindanan, pero boso tabata parsial den e lei.

Oseas 4:6. Mi pueblo ta ser destruí pa falta di konosementu: pasobra bo a rechasá konosementu, Ami tambe lo rechasábo, pa bo no ta saserdote pa Mi: mirando ku bo a lubidá e lei di bo Dios, Ami tambe lo lubidá bo yunan.

NOTA: Dios ainda ta sinti Su mes heridá ora Su pastornan ta parsial na ocho òf nuebe mandamentu i ta kousa hopi hende pa trompeká riba Su mandamentu pa warda e Sabat santu. Práktikamente tur iglesia ta atmití den nan eskritonan ofisial ku no tin sosten di Skritura pa santidat di djadumingu. Trágikamente, tantu protestantismo komo katolisismo ta para kulpabel dilanti di e tribunal di Dios pa a saka e Sabat di Beibel afó! Dios Mes a duna e Sabat komo un señal, òf marka, di Su poder pa krea i Su poder pa santifiká i salba (Eksodo 31:17; Ezekiel 20:12). Kualke hende ta tribi di mishi ku e señal sagrado akí, ku ta representá e gran Dios di shelu i tur loke E ta para p’e?

12. Kon Dios su lidernan di antiguedat tabata konsiderá e kosnan grandi di Su lei?

Oseas 8:12. Mi a skirbi p’é e gran kosnan di mi lei, ma nan a ser konsiderá komo un kos straño.

NOTA: Tempu no a kambia. Dios a pone e Sabat, Su gran señal, meimei di Su lei i ta kuminsá e mandamentu ei ku e palabra “kòrda.” Tòg hopi hende awe ta sinti ku warda Su Sabat di e di shete dia ta un kos straño.

13. Ki reprendementu solèm i spesífiko Dios a duna lidernan religioso tokante Su Sabat santu?

Ezekiel 22:8. Bo a despresiá mi kosnan santu, i a profaná mi sabatnan.

Ezekiel 22:26. Su saserdotenan a violá Mi lei, i a profaná Mi kosnan santu: nan no a pone diferensia entre kosnan santu i kosnan profano ... i a skonde nan wowonan pa Mi sabatnan, i Mi ta ser profaná meimei di nan.

NOTA: Dios ta reprendé enfátikamente lidernan religioso ku ta bisa ku e Sabat no ta importá i ku ta afirmá “Asina Señor ta bisa” ora e no ta bèrdat.

14. Kua piká spesífiko Dios ta manda Su lidernan denunsiá?

Isaías 58:1,13,14. Grita duru, no tene aden, halsa bo bos manera un tròmpèt, i mustra Mi pueblo nan transgreshon. ... Si bo kita bo pia for di e Sabat, for di hasi bo plaser riba Mi dia santu; i yama e sabat un delisia, e dia santu di Señor onorabel; ... E ora ei lo bo tin delisia den Señor.

NOTA: Dios ta enkargá lidernan spiritual pa yama kibramentu di Sabat un piká i pa insistí pa Su pueblo warda Su dia di Sabat santu. Manera ku e disipelnan di antigwedat, nos úniko seguridat ta den obedesé Dios mas bien ku hende (Echonan 5:29).

15. Ora bo disidí di aseptá Hesus i siguiE kompletamente, kiko ta pasa?

Mateo 11:29. Tuma Mi yugo riba boso, i siña di Mi; pasobra Mi ta mansu i humilde di kurason: i boso lo haña sosiegu pa boso alma.

NOTA: Sosiegu i pas glorioso ta drenta bo kurason na momentu di kombershon. E Sabat, ku ta nifiká “sosiegu,” ta un símbolo di e sosiegu i pas ku ta bini di e nasementu nobo (Hebreonan 4:1-10). Esnan ku berdaderamente a nase di nobo lo warda e Sabat komo un señal bendishoná di e sosiegu ei (nota versíkulonan 4,9,10). No tin un goso manera e goso ku ta bini na un persona kombertí ku ta warda e Sabat di Dios santu.

16. Promé ku bo por bisa “nò” na e marka di e bestia, bo mester bisa “sí” na e seyo di Dios. Hesus ta wardando na porta di bo kurason pa un kontesta. Lo bo disidí awor pa bai para bou di Su glorioso bandera di Sabat komo evidensia ku bo a asept’E komo bo Kreador i Salbador?

Estudio Suplementario


Ki Pregunta Importante Papado ta Hasi Protestantnan?

Repetidamente protestantnan a puntra e papado: “Kon bo por a riska di kambia e lei di Dios?” Pero e pregunta hasí dor di iglesia katóliko na protestantnan ta asta mas penetrante.

At’é akí ofisialmente: "Lo bo bisami ku djasabra tabata e Sabat hudiu, pero ku e Sabat kristian a ser kambiá pa djadumingu. Kambiá! Pero dor di ken? Ken tin outoridat pa kambia un mandamentu ekspreso di Dios Todopoderoso? Ora Dios a papia i a bisa: Bo mester warda e di shete dia santu, ken lo riska bisa: Nò, bo por traha i hasi tur tipo di negoshi mundano riba e di shete dia pero lo bo warda e promé dia santu na su lugá?

"Esaki ta un pregunta di mas importante, ku mi no sa kon bo por kontestá. Bo ta un protestant, i bo ta profesá di ta tene bo mes na e Beibel i Beibel solamente, i tòg den un asuntu asina importante manera e opservansia di un dia den shete komo un dia santu, bo ta bai kontra di e lèter kla di Beibel, i ta pone un otro dia na lugá di e dia ei ku Beibel a ordená. E mandamentu pa warda e di shete dia santu ta un di e dies mandamentunan ku bo ta kere ku e otro nuebe ta obligatorio ainda, ken a dunabo outoridat pa mishi ku e di kuater? Si bo ta konsistente ku bo mes prinsipionan, si realmente bo ta sigui Beibel i Beibel solamente, bo mester por produsí algun porshon di Tèstamènt Nobo den kua e di kuater mandamentu akí ta ser eksplísitamente kambiá."1

1Biblioteka di Doktrina Kristian: Why Don't You Keep Holy the Sabbath-Day? [Dikon Bo No Ta Mantené e Dia di Sabat Santu?] (London: Burns and Oates, Ltd.), p. 3, 4.