Un Modelo Selestial

1. Kiko Dios a pidi Moises konstruí, i dikon?

Eksodo 25:8. I laga nan traha un santuario pa Mi; pa mi por biba meimei di nan.

2. Kiko Dios a spera pa Su pueblo siña for di e santuario i su sirbishinan?

Salmo 77:13. Bo kaminda, O Dios, ta den e santuario.

NOTA: Dios Su kaminda, òf plan, di salbashon a ser revelá den e santuario terenal. Tur kos den e santuario, òf konektá ku su servisionan, tabata un símbolo di algu ku Hesus lo a hasi pa salba nos. Nos no por komprondé kompletamente e plan di salbashon te ora nos komprondé e santuario i su servisionan. E tabata un enorme lès ophetivo den 3D ku ta splika e proseso di salbashon.

3. Unda Moises a haña e plannan pa e santuario?

Eksodo 25:40. I mira pa bo traha nan segun nan diseño, ku a ser mustrá na bo riba e seru.

NOTA: E plannan di santuario, ku spesifikashonnan kompletu pa su konstrukshon, a ser duná na Moises dor di Dios riba Seru Sinai (Hebreonan 8:5). Esaki mester tabata un mikrokòsmòs di e santuario genuino di Dios den shelu.

E promé santuario, òf tabernakel, tabata un struktura elegante, tipo tènt (4.57 meter pa 13.72 meter, basá riba un el di 0.45 meter). Einan e presensia sobrenatural di Dios tabata biba i sirbishinan spesial tabata ser kondusí. E murayanan tabata trahá di tablanan di palu di akasia pará règt poné den pedestalnan di plata i furá ku oro (Eksodo 26:15-19,29). E dak tabata trahá di kuater kapa di kubierto, lino, lana di kabritu, kueru di chubatu karné tiñá kòrá, i kueru di dòlfein (versíkulonan 1,7,14). E tabatin dos kamber: e lugá santu (4.57 meter pa 9.14 meter), i e lugá santísimo (4.57 meter pa 4.57 meter). Referí frekuentemente na e diagram aki riba segun ku bo ta repasá e lès akí.

4. Ki mobilario tabatin den e plenchi?

Eksodo 29:18. I bo mester kima henter e karné chubatu riba e altar e ta un ofrenda kimá na SEÑOR.

Eksodo 30:18. Tambe bo mester traha un baki pa laba di bròns, ... i pone awa aden.

NOTA: E altar di ofrenda kimá (Eksodo 27:1-8) ta kaminda animalnan tabata ser sakrifiká. E tabata situá den e plenchi djis pafó di entrada di e santuario. E altar akí tabata representá e krus di Kristu. E animal di sakrifisio tabata representá Hesus, e sakrifisio supremo (Juan 1:29). E baki pa laba (Eksodo 30:17-21; 38:8) tabata un baki grandi di bròns situá entre e entrada di e santuario i e altar di ofrenda kimá. Einan saserdotenan tabata laba nan man i pia promé ku nan drenta den e santuario òf ofresé un sakrifisio. E awa tabata representá boutismo, limpiesa di piká, i nasementu nobo.

5. Kua tres artíkulo di mobilario tabatin den e lugá santu?

Numbernan 4:7. I riba e mesa di e pan di e Presensia nan mester habri un paña blou, ... i e pan kontinuo mester ta riba dje.

Numbernan 8:2. Ora Bo sende e lampinan, e shete lampinan mester lusa dilanti di e kandelar.

Eksodo 30:1. Traha un altar pa kima sensia riba dje: di palu di akasia bo mester trah'é.

NOTA: E mesa di pan di e Presensia (Eksodo 25:23-30) tabata representá Hesus, e pan bibu (Juan 6:51). E kandelar di shete brasa (Eksodo 25:31-40) tabata representá Hesus, e lus di mundu (Juan 9:5; 1:9). E lampinan di zeta tabata simbolisá Spiritu Santu (Zakarias 4:1-6; Revelashon 4:5). E altar di sensia (Eksodo 30:1-8) tabata representá e orashonnan di e pueblo di Dios (Hebreonan 5:7).

6. Ki artíkulo spesial tabatin den e lugá santísimo?

Eksodo 26:34. I bo mester pone e tapa di miserikòrdia riba e arka di testimonio den e lugá santísimo.

NOTA: E úniko opheto den e lugá santísimo (Eksodo 25:10-22) tabata e arka di testimonio, un kaha di palu di akasia kubrí ku oro. Ariba di e kaha tabatin dos angel trahá di oro sólido. E tapa di e arka tabata ser yamá e propisiatorio (Eksodo 25:17-22), kaminda e presensia di Dios tabata biba. E lugá akí a simbolisá e trono di Dios den shelu, ku meskos ta situá meimei di dos angel (Salmo 80:1, Isaias 6:1,2).

7. Kiko tabatin den e arka?

Eksodo 25:21. I bo mester pone e propisiatorio riba e arka; i den e arka bo mester pone e testimonio ku lo Mi dunabo.

Deuteronomio 10:4,5 I E [Dios] a skirbi riba e tablanan, di akuerdo ku e promé skirbimentu, e dies mandamentunan. ... I mi a bira i a baha for di e seru, i a pone e tablanan den e arka ku mi a traha; i einan nan ta, manera Señor a ordenámi.

NOTA: Dios a skirbi Su aliansa ku Su mes dede riba dos tabla di piedra, i nan a ser poné den e arka. E propisiatorio tabata riba nan, loke tabata nifiká ku tanten ku e pueblo di Dios a konfesá i bandoná nan pikánan (Proverbionan 28:13), mizerikòrdia lo a ser ekstendé na nan pa medio di e sanger ku a ser isprengu riba e propisiatorio dor di e saserdote (Levítiko 16:15,16). E sanger ei tabata representá e sanger drama dor di Hesus pa trese pa tur hende pordon i purifikashon (Mateo 26:28; Hebreonan 9:22).

8. Dikon animalnan mester a ser sakrifiká den e sirbishinan di santuario di Tèstamènt Bieu?

Hebreonan 9:22. Sin dramamentu di sanger no tin remishon [pordon].

Mateo 26:28. Pasobra esaki ta Mi sanger di e aliansa nobo, ku ta ser dramá pa hopi pa pordon di piká.

NOTA: Sakrifiká bestia tabata nesesario pa yuda hende komprondé ku sin e sanger di Hesus dramá riba krus, no por tabatin pordon di piká. E bèrdat spantoso ta ku e kastigu pa piká ta morto. Ya ku nos tur a peka, nos tur mester muri, i nos lo a muri, eksepto ku Hesus a duna Su bida perfekto dor di muri na nos fabor pa paga pa nos pikánan. E pekadó a trese su mes animal di sakrifisio i a mat’e ku su mes man (Levítiko 1:4,5). E tabata sangriento i spantoso, impreshonando hende ku e bèrdat solèm ku piká a kousa e morto di Hesus. Pues, nan a wak padilanti na e krus pa salbashon, miéntras ku nos ta wak bèk na e krus pa salbashon. No tin otro fuente di salbashon.

9. Ora animalnan a ser sakrifiká pa piká, kiko a pasa ku e piká?

Levítiko 1:4,5. E mester pone su man riba kabes di e ofrenda kimá; i lo ser aseptá p’é pa hasi ekspiashon p'é. I e mester mata e bisé machu dilanti di SEÑOR.

NOTA: Ora e pekador tabata pone su mannan riba kabes di e animal i konfesá su pikánan, e pikánan tabata ser transferí simbólikamente for di e pekador na esaki. Pues, e animal tabata bira kulpabel i mester a paga e kastigu di morto. Esaki tabata representá Hesus kargando nos pikánan.

10. Ora animal di sakrifisio tabata ser ofresé pa henter e kongregashon, kiko tabata pasa ku e piká?

Levítiko 4:17. E saserdote mester a dòp su dede den un tiki di e sanger, i sprengu esaki shete biaha dilanti di Señor, asta dilanti di e velo.

NOTA: E saserdote tabata sprengu un tiki di e sanger dilanti di e velo paden di e santuario, transferiendo asina simbólikamente e piká for di e pueblo pa e santuario. Ora Hesus a subi na shelu despues di Su morto, El a ofresé Su sanger (manera e sumo saserdote di ántes tabata hasi) pa mustra ku nos pikánan ta ser pordoná ora nan ser konfesá den nòmber di Hesus (1 Juan 1:9).

11. Kua dos símbolo di santuario Hesus ta kumpli kuné pa nos?

1 Korintionan 5:7. Kristu nos Pasku a ser sakrifiká pa nos.

Hebreonan 4:14. Nos tin un sumo saserdote grandi, ku a pasa den e shelunan, Hesus, Yu di Dios.

NOTA: Hesus ta sirbi komo e sakrifisio pa nos pikánan i komo nos sumo sacerdote selestial, kumpliendo asina dos kos milagroso pa nos. E di promé ta un kambio di bida kompletu yamá e nasementu nobo, ku tur e pikánan di pasado pordoná (Juan 3:3-6; Romanonan 3:25). E di dos ta poder pa biba korekto den presente i futuro (Tito 2:14; Filipensenan 2:13). E dos kosnan akí ta hasi un persona hustu, loke ta nifiká ku un relashon korekto ta eksistí entre e persona ei i Dios. No tin manera pa un hende bira hustu pa medio di obranan (su mes esfuersonan), pasobra hustisia ta bini di grasia ku solamente Hesus por supli (Echonan 4:12). Esaki ta hustisia pa medio di fe, ku ta e úniko berdadero forma di hustisia.

12. Kua seis promesanan maravioso Beibel ta duna nos tokante e hustisia ofresé na nos dor di Hesus?

1 Huan 1:9. Si nos konfesá nos pikánan, e ta fiel i hustu pa pordoná nos nos pikánan, i pa limpia nos di tur inhustisia.

E lo tapa nos pikánan di pasado i konta nos komo sin kulpa (Isaias 44:22; 1 Juan 1:9).
Hesus ta primintí di restourá nos na e imágen di Dios (Romanonan 8:29).
Hesus ta duna nos e deseo i poder pa hasi e boluntat di Dios. (Filipensenan 2:13).
Hesus lo yuda nos hasi solamente e kosnan ku ta agradá Dios (Hebreonan 13:20,21; 1 Juan 3:22).
E ta kita nos sentensia di morto dor di duna nos krédito pa Su bida sin piká i morto ekspiatorio (2 Korintionan 5:21).
Hesus ta asumí responsabilidat pa yuda tene nos fiel te ora E regresá (Filipensenan 1:6; Hudas 24).

NOTA: Hesus ta kla pa kumpli ku tur e promesanan glorioso akí den bo bida. Bo ta kla? Hinka rudia awor i pidiE pa tuma kontrol di bo bida. E lo no fayabo.

13. Un hende tin kualke ròl pa hunga pa bira hustu?

Mateo 7:21. No ta tur hende ku bisa Mi: Señor, Señor, lo drenta e reino di shelu; sino esun ku hasi e boluntat di mi Tata ku ta den shelu.

NOTA: Sí, nos ròl ta pa entregá nos kurason i boluntat na Hesus i permitiE goberná. Nos mester konfi'E ku kontrol kompletu di nos bida. Hopi hende ta kere ku Hesus lo hiba tur ku simplemente profesá Su nòmber na shelu, sin importá nan kondukta. Pero e kreensia mortal akí no ta bèrdat (Mateo 7:14).

14. Kiko a pasa riba e dia di ekspiashon?

Levítiko 16:30. Pasobra riba e dia ei e saserdote mester hasi ekspiashon pa boso, pa limpia boso, pa boso por ta limpi di tur boso pikánan dilanti di Señor.

NOTA: E dia di ekspiashon tabata un dia solèm di huisio ku tabata tuma lugá na Israel un biaha pa aña (Levítiko 23:27). Tur piká mester a ser konfesá i bandoná. Esnan ku a nenga tabata ser kòrtá afó riba e mesun dia ei pa semper for di e kampamentu di Israel (versíkulo 29). Riba e dia ei, dos kabritu tabata ser selektá. Un tabata e kabritu di Señor i e otro tabata e kabritu di skapatorio, ku tabata representá Satanas (Levítiko 16:7,8). E kabritu di Señor tabata ser matá i ofresé pa e pikánan di e pueblo (versíkulo 9). Su sanger tabata ser hibá den e lugá santísimo i isprengu riba i dilanti di e propisiatorio (versíkulo 14).

Solamente riba e dia di huisio spesial akí e sumo saserdote tabata drenta e lugá santísimo. E sanger isprengu (ku ta representá e sakrifisio di Hesus) tabata ser aseptá pa Dios, i e pikánan konfesá di e pueblo tabata ser transferí for di e santuario pa e sumo saserdote.

Despues e tabata transferí e pikánan konfesá akí pa e kabritu di skapatorio, ku tabata ser hibá den desierto i bandoná (versíkulonan 16,20,22). Di e manera akí, e santuario tabata ser purifiká simbólikamente di e pikánan di e pueblo, ku tabata ser transferí einan pa medio di e sanger isprengu durante henter e aña anterior.

15. E dia di ekspiashon bieu tabata prefigurá un purifikashon di e santuario selestial?

Hebreonan 9:23. P’esei tabata nesesario pa e patronchinan di kosnan den shelu ser purifiká ku esakinan; pero e kosnan selestial mes ku mihó sakrifisionan ku esakinan.

NOTA: Sí! E sirbishinan di e dia ei tabata mustra riba e eliminashon di piká dor di Hesus, nos sumo saserdote den e santuario selestial. E ta einan pa intermediá pa Su pueblo i ta para kla pa kita e pikánan di tur ku lo ehersé fe den Su sanger dramá. E dia antiguo di ekspiashon, meskos ku Yom Kippur di Israel moderno, tabata prefigurá e ekspiashon final ku lo ser hasí pa planeta Tera. E ekspiashon final ta hiba na e huisio final, ku lo resolvé pa semper e kuestion di piká den bida di kada individuo. Nos siguiente lès ta mustra kon Dios a fiha e fecha pa e huisio selestial kuminsá. Eksitante!

Lès 15