Lès 16

Purifikando e Tèmpel

1. Daniel tabatin un vishon asombroso den kua el a mira un chubatu karné ku dos kachu (Daniel 8:1-4). Ken e chubatu karné akí ta representá?

Daniel 8:20. E chubatu karné ku bo a mira ku tin dos kachu ta e reinan di Media i Persia.

2. Siguientemente Daniel a mira un kabritu ku un kachu grandi meimei di su wowonan. Kiko esaki ta nifiká?

Daniel 8:21,22. E kabritu brutu ta e rei di Gresia i e kachu grandi ku ta meimei di su wowonan ta e promé rei. Awor ku esei a ser kibrá, miéntras ku kuater a sali na su lugá, kuater reino lo lanta for di e nashon.

NOTA: E kabritu machu ta representá Gresia i e kachu grandi ta un símbolo di su promé gobernante, Alexander e Grandi. E kuater kachunan ta representá e kuater generalnan ku a tuma partinan di e imperio over ora Alexander a muri.

3. Despues un kachu chikitu ta brota for di un di e kuaternan. Ki poder e “kachu chikitu” akí tabata representá?

Echonan 18:2. Claudius [Caesar] a ordená tur hudiu pa sali for di Roma.

NOTA: E “kachu chikitu” ku a persiguí e pueblo di Dios, a trapa kosnan santu, i a lanta kontra Hesus tabata representá Roma, tantu pagano komo papal. Roma ta e úniko poder ku a sigui Gresia i a bira ekstremadamente grandi.

4. Daniel a ser bisá ku e kachu chikitu akí lo a kontaminá e santuario. Kuantu tempu mas te ora e lo a ser limpiá?

Daniel 8:14. Te ku dos mil tresshen dia; e ora ei e santuario lo ser purifiká.

NOTA: E periodo di 2.300 dia akí ta e profesia di tempu di mas largu den Beibel, pero e punto di salida no ta ser duná te na e siguiente kapítulo, den Daniel 9:25.

5. Kon Daniel a reakshoná ora el a mira e poder di e kachu chikitu persiguí e pueblo di Dios i hasi e bèrdat skur?

Daniel 8:27. I ami Daniel a desmayá, i tabata malu sierto dianan; … i mi a keda babuká pa e vishon, pero ningun hende a komprond’é.

NOTA: Daniel tabata asina profundamente tristu pa loke lo a bini riba e pueblo di Dios ku el a desmayá i tabata malu pa algun tempu. Pero na prinsipio Daniel ni su amigunan a komprondé e sekshon di 2.300 dia di e vishon.

6. Den e siguiente kapítulo, e angel ta splika e profesia ku mas detaye. Kon largu e periodo di tempu, ku no a ser deskribí anteriormente den e vishon, tabata?

Daniel 9:24. Setenta siman ta determiná riba bo pueblo i riba bo stat santu, ... pa seya e vishon i profesia.

NOTA: Varios aña despues di e vishon di Daniel tokante e 2.300 dianan, un angel di shelu a bula rápidamente bini na su banda pa yud’é komprond’é. Tambe e angel a amplia e vishon pa inkluí 70 siman profétiko ku tabata “determiná riba,” òf asigná na, e hudiunan i e stat di Jerusalèm. Dios tabata dunando Su nashon skohí un otro chèns, un oportunidat di 490 aña, pa kumpli ku su propósito di presentá e Mesias na mundu (Daniel 9:23,24).

7. Kiko tabata e punto di salida pa e profesianan di 2.300 dia i 70 siman?

Daniel 9:25. Sa i komprondé antó, ku for di e salida di e mandamentu pa restourá i pa konstruí Jerusalèm te na e Mesias, e Prens, lo tin shete siman, i setentidos siman..

NOTA: E angel a bisa Daniel pa kuminsá konta e profesianan di 2.300 dia i 70 siman for di e dekreto pa restourá i rekonstruí Jerusalèm. E pueblo di Dios tabata den koutiverio den e imperio perso e tempu akí. E dekreto a ser hasí den e di shete aña di Rei Artaxerxes, ku a kuminsá reina na aña 464 B.C. (Esdras 7:7). E dekreto di Artaxerxes na 457 B.C. tabata e úniko ku a spesifiká restourá i rekonstruí Jerusalèm.

8. E angel a bisa ku si bo konta 69 siman for di 457 B.C., lo bo yega na e Mesias, e Prens. Esaki a sosodé?

Echonan 10:37,38. E palabra ei, mi ta bisa, boso sa ... despues di e boutismo ku Juan a prediká; Kon Dios a ungi Hesus di Názarèt ku Spiritu Santu i ku poder.

NOTA: Sí, el a hasié. Akí tin un milager fantástiko. Sentenáres di aña promé ku Hesus a ser ungí ku Spiritu Santu, e suseso a ser pronostiká den profesia! “Mesías” ta e palabra hebreo pa “ungí,” i e palabra “Kristu” ta e ekivalente griego. Lukas 3:21,22 ta bisa ku e unshon spesial akí dor di Spiritu Santu a tuma lugá na Su boutismo. Awor ata e yabi akí. Den profesia di Beibel, un dia profétiko ta igual na un aña literal (Numbernan 14:34; Ezekiel 4:6; Lukas 13:32). Sumando 69 siman, of 483 dia profétiko (69 x 7 = 483), na 457 B.C. ta hiba nos na aña 27 A.D.

483 aña + 457 (fecha di inisio) = 26 A.D. + 1 aña pa 1 B.C. te ku 1 A.D. (no tabatin aña sero) = 27 A.D.

Hesus a kuminsá Su ministerio komo e Mesias despues di Su boutismo na 27 A.D., eksaktamente 483 aña despues di e dekreto duná na 457 B.C.. Esaki ta e motibu pakiko Hesus a kuminsá prediká, despues di Su boutismo, ku “E tempu ta kumplí, i e reino di Dios ta serka.” Marko 1:15. E tabata papiando di e profesia di tempu den Daniel 9:25.

9. Kiko tabata bai tuma lugá despues den e profesia?

Daniel 9:26,27. Despues di setentidos siman e Mesias lo ta kòrtá kitá afó, pero no pa su mes ... I e lo konfirmá e aliansa ku hopi hende pa un siman: i meimei di siman e lo pone un fin na sakrifisio i ofrenda di maishi.

NOTA: E profesia a pronostiká despues ku Hesus lo a ser “kòrtá kitá afó,” òf krusifiká, meimei di e último siman di e profesia di 70 siman. Kontando tres aña i mei for di Su unshon den e hèrfst di 27 A.D. lo hiba nos na e primavera di 31 A.D., ku ta hustamente ora Hesus a ser krusifiká. Na momentu ku El a muri, e kortina di tèmpel a sker den dos sekshon di ariba pa abou (Mateo 27:50,51), indikando ku Hesus a pone e sistema di sakrifisio stòp dor di Su morto komo e Lamchi di Dios. Por fabor, repasá e liña di tempu aki riba.

10. Hesus a bisa Su disipelnan pa prediká promé na kua grupo di hende?

Mateo 10:5,6. No bai den e kaminda di e paganonan, ... Ma bai mas bien serka e karnénan pèrdí di e kas di Israel.

NOTA: Hesus a insistí pa Su disipelnan prediká promé na e hudiunan, pasobra ainda nan tabatin tres aña i mei ku a keda di nan oportunidat di 490 aña pa aseptá i proklamá e Mesias. E profesia den Daniel 9:27 a bisa ku Hesus lo a konfirmá e pakto, òf e gran plan di salbashon, ku hopi pa un siman profétiko (shete aña literal). Pero Hesus a ser krusifiká meimei di e último siman ei asigná na Su nashon skohí, pues kon E por a konfirmá e pakto ku nan despues di Su morto? E kontesta ta ser hañá den Hebreonan 2:3: “Kon nos lo skapa, si nos neglishá un salbashon asina grandi; ku na promé lugá a kuminsá ser papia dor di Señor, i a ser konfirmá na nos dor di esnan ku a tend’E.” E disipelnan di Hesus a prediká na e hudiunan pa e último tres añanan i mei ei, te ora ku e nashon a rechasá e mensahe di evangelio ofisialmente na 34 A.D. ora ku Esteban, un diakono hustu, a ser piedrá públikamente. (Lesa e suplemento titulá “E Siman Flotante.”)

11. Ki spièrtamentu Hesus a duna Su pueblo skohí?

Mateo 21:43. E reino di Dios lo ser kitá for di boso, i duná na un nashon ku ta produsí su frutanan.

NOTA: Hesus a mustra bon kla ku e státus spesial di e nashon hudiu lo a ser kitá si e pueblo lo a persistí den rechasá e Mesias.

12. Pues kiko ta e otro “nashon” ku Hesus a papia di dje den Mateo 21:43, ku lo a bira Su pueblo skohí?

Galationan 3:29. I si boso ta pertenesé na Kristu, anto boso ta simia di Abraham, i herederonan segun e promesa.

Romanonan 2:28,29. Pasobra no ta esun ku ta hudiu di pafó, ta un hudiu; … Ma hudiu, ta esun ku ta un di paden.

NOTA: Entrante 34 A.D. ku e piedramentu di Esteban (Echonan 7:58,59), e nashon hudiu literal no tabata e úniko nashon skohí di Dios mas. Pa motibu ku konsistentemente nan a resistí e plan di Dios pa nan, e nashon di Israel no ta e enfoke sentral mas di profesia di tempu di fin. Awor tur ku aseptá Hesus ta Su pueblo skohí, i e promesanan ku Dios a hasi na Israel literal awor ta apliká tambe na Israel spiritual (Romanonan 9:6-8).

13. Di akuerdo ku e angel ku a papia ku Daniel, kiko lo a sosodé na fin di e 2.300 añanan?

Daniel 8:14. I el a bisa mi: Te dos mil tresshen dia; e ora ei e santuario lo ser purifiká.

NOTA: Na 34 A.D., a keda 1.810 aña di e profesia di 2.300 dia. (Nota fechanan den diagrama aki riba.) Agregando 1.810 aña na 34 A.D. ta hiba nos na e hèrfst di 1844. E angel a bisa ku e tempu ei, e santuario selestial lo a ser purifiká. (E santuario terenal a ser destruí na 70 A.D..) Hesus, nos sumo saserdote den shelu (Hebreonan 4:14-16; 8:1-5), a kuminsá kita e registronan di piká for di e santuario selestial (Revelashon 20:12; Echonan 3:19-21) na 1844. E promé fase akí di e huisio ta ser yamá e huisio pre atvènt pasobra e ta tuma lugá promé ku e segundo binida di Hesus.

14. Ken su kasonan ta ser konsiderá den e huisio pre atvènt?

1 Pedro 4:17. Huisio mester kuminsá na e kas di Dios.

NOTA: E promé fase di huisio akí ta konsiderá solamente esnan ku ta afirmá di ta yunan di Dios.

15. Kiko lo ser analisá den e promé fase di huisio akí?

Revelashon 20:12. E mortonan a ser husgá for di e kosnan ei ku tabata skirbí den e bukinan.

Eklesiastés 12:14. Pasobra Dios lo trese tur obra na huisio, ku tur kos sekreto.

Santiago 2:12. Nan ... lo ser husgá pa e lei di libertat.

NOTA: E evidensia den e huisio ta bini di bukinan wardá den shelu, ku ta kontené tur e detayenan di bida di un persona. (Lesa tambe Salmonan 56:8.) E Dies Mandamentunan, e lei di Dios, ta Su norma den e huisio (Revelashon 22:14).

16. Dios ta mi akusadó den e huisio?

Revelashon 12:9,10. E kolebra bieu ei, yamá diabel … a ser tirá riba tera. … E akusadó di nos rumannan a ser tirá abou, kende a akusá nan dilanti di nos Dios di dia i anochi.

NOTA: Nò! Satanas ta bo úniko akusadó. Desafortunadamente, algun kristian ta pensa ku Hesus ta purba konvensé e Tata pa spar nos durante e huisio, pero Hesus a bisa: “E Tata mes ta stima boso.” Juan 16:27.

17. Mi mester para mi so den e huisio pre atvènt?

1 Juan 2:1. Mi yu chikitunan, mi ta skirbi boso e kosnan akí, pa boso no hasi piká. I si un hende peka, nos tin un Abogado serka e Tata, Hesu-Kristu e hustu:

1. Hesus ta nos abogado (1 Juan 2:1).
2. Hesus ta nos hues (Juan 5:22).
3. Hesus ta nos testigu fiel i berdadero (Revelashon 3:14).

NOTA: Afortunadamente, nò. Den e huisio, Hesus ta e abogado, hues i testigu di e kristian. Si bo biba pa Hesus, bo no por pèrdè (Romanonan 8:1; Kolosensenan 1:12-14)!

18. Si Hesus ta bo abogado den e huisio, E ta primintí di gana bo kaso. Lo bo entregá bo bida na djE awe?

Estudio Suplementario

Algun studiante di Beibel ta separá e último siman (òf shete aña literal) di e profesia di 490 aña duná den Daniel i ta aplik’é na e trabou di e Antikristu na fin di tempu i un tribulashon di shete aña. No tin sosten bíbliko pa e práktika akí.