Lès 18

Bentananan di Shelu

1. Unda Jacob a siña e konsepto di debolbé un désimo na Dios?

Génesis 14:18,20. I Melkisedek ... tabata e saserdote di e Dios Haltísimo. … I e [Abraham] a dun’é un diesmo di tur kos.

NOTA: Diesmo ta un désimo parti di e entrada di un persona. De echo, e palabra “diesmo” ta nifiká simplemente “un désimo parti.” Jacob su tawela, Abraham, a establesé un ehèmpel hopi aña promé dor di duna un diesmo na e saserdote di Dios, Melchizedek.

2. Ki porshon di nos entrada ta pertenesé na Dios?

Levítiko 27:30. Henter e diesmo … ta di Señor: e ta santu pa Señor.

NOTA: Téknikamente, 100 porshento di tur loke nos tin ta pertenesé na Dios.

Salmo 24:1. Tera ta di Señor, i tur loke e ta kontené; mundu, i esnan ku ta biba den dje.

Pero Dios ta pidi nos pa rekonosé ku nos ta kere ku tur kos ta pertenesé na djE, dor di debolbé un diesmo na djE, òf 10 porshento di nos oumento.

3. Kiko Dios ta hasi ku nos diesmo?

Numbernan 18:21,24. Mi a duna e yunan di Israel tur e désimo parti na Israel komo herensia, pa nan sirbishi ku nan ta sirbi. … E diesmo di e yunan di Israel, … Mi a duna e levitanan pa heredá.

1 Korintionan 9:13,14. Boso no sa ku esnan ku ta ministrá tokante kosnan santu ta biba di e kosnan di tèmpel? i esnan ku ta sirbi na e altar ta partísipe ku e altar? Asina tambe Señor a ordená ku esnan ku ta prediká e evangelio mester biba di e evangelio.

NOTA: Den Tèstamènt Bieu, Dios a ordená pa e diesmo ser usá pa sostené e levitanan, ku tabata Su ministernan. Den 1 Korintionan 9:13, Dios ta bisa ku meskos ku e saserdotenan di antaño tabata ser pagá for di e diesmo di e tèmpel, asina e ministernan di evangelio awendia mester ser pagá for di e diesmo duná atraves di e iglesia.

4. E sistema di diesmo ta parti di e lei bieu di Moises, ku a kaba na krus?

Génesis 28:20,22. I Jacob a hasi un huramentu, bisando: ... di tur loke Bo dunami, siguramente lo mi dunaBo un désimo parti.

NOTA: Nò! Tantu Abraham komo Jacob a duna un désimo parti di nan entrada na Dios, hopi tempu promé ku e lei di Moises a ser duná. Pasobra e tabata promé ku Sinai, nos sa ku e no tabata parti di e lei seremonial ku a kaba na krus. E lei di diesma ta e plan di Dios pa sostené e ministerio, i e ta keda na vigor te awe.

5. Pero Hesus no a kondená e plan di diesma?

Mateo 23:23. Ai di boso, eskribanan i fariseonan, hipókritanan! pasobra boso ta paga diesmo di menta i anis i komino, i a neglishá e asuntunan mas importante di e lei, hustisia, mizerikòrdia, i fe: e kosnan akí boso mester a hasi, i no laga e otro sin hasi.

NOTA: Nò. Hesus a mira ku e fariseonan pichiri tabata konta blachinan individual i simianan chikitu pa diesmo en bes di hib’é tèmpel na kantidad grandi. P’esei El a reprendé nan pa ta asina eksakto den diesmo miéntras nan tabata faya den huisio, mizerikòrdia i fe. E no a kondená nan pa diesma, sino pa ignorá e otro gran prinsipionan di kristianismo. Ta p’esei Hesus a bisa: “Esakinan boso mester a hasi [papiando di diesma], i no laga e otro sin hasi.”

6. Ki promesa asombroso Dios ta hasi tokante diesma?

Malakias 3:10. Trese tur e diesmonan den e mangasina, ... i purbaMi awor ku esaki, e Señor di ehérsitonan ta bisa, si lo Mi no habri e bentananan di shelu pa boso, i basha un bendishon riba boso, ku lo no tin sufisiente espasio pa risibié.

NOTA: Dios ta bisando: “Si bo ta dudoso, purba debolbé diesmo komo un eksperimento. PurbaMi, i wak si Mi no ta debolbé na bo un bendishon muchu grandi pa bo risibí.” Sentenáres di míles di pagadónan di diesmo lo bisabo ku e ta bèrdat. Bo no por surpasá Dios den duna!

7. Dios ta bisa Su pueblo pa trese tur e diesmo den e mangasina. Kiko esei ta nifiká?

Nehemias 13:12. Despues henter Juda a trese e diesmo di e maishi i e biña nobo i e zeta den e depósitonan.

NOTA: E depósito ta e tesoreria di e iglesia di Dios. (E márgen di Beibel ta igualá “tesorerianan” ku “depósitonan”.) Den Malakias 3:10, Dios ta referí na e depósito komo “Mi kas,” ku ta nifiká Su iglesia, òf tèmpel. Otro tekstonan ku ta referí na e depósito komo e tèmpel, òf tesoreria di tèmpel, ta 1 Krónikanan 9:26 (lesa e márgen); 2 Krónikanan 31:11,12 (lesa e márgen); i Nehemias 10:37,38. Pues, ta opvio ku e depósito ta e tesoreria di e iglesia di Dios.

8. Ora nos debolbé diesmo, ken realmente ta risibí nos plaka?

Kolosensenan 3:23. I tur loke boso hasi, hasié di kurason, komo pa Señor, i no pa hende.

Hebreonan 7:8. I aki hende ku ta muri ta risibí diesmonan; pero einan E [Hesus] ta risibí nan.

NOTA: Nos mester kòrda semper ku nos no ta debolbiendo nos diesmo na hende, sino na Dios. E ta pertenesé na djE. Nos no mester preokupá tokante kon e diesmo ta ser usá si nos ta dun’é na Dios. E ta sufisiente grandi pa kuida Su mes plaka i pa manehá korektamente kualke hende ku por ta iresponsabel den manehá Su fondonan.

9. Ademas di mi diesmo, ku ta pertenesé na Dios, kiko mas E ta pidi di Su pueblo?

Salmo 96:8. Trese un ofrenda, i bin den Su plenchinan.

Malakias 3:8. Un hende lo hòrta Dios? Tòg boso a hòrtáMi. Ma boso ta puntra: Den kiko nos a hòrtaBo? Den diesmo i ofrenda.

NOTA: Señor ta pidi nos pa duna ofrendanan boluntario komo un ekspreshon di nos amor p’E i nos gradisimentu pa Su bendishonnan.

10. Kuantu nos mester duna komo ofrenda?

2 Korintionan 9:7. Kada hende di akuerdo ku loke e ta proponé den su kurason, asina lag’é duna; no di mal gana, òf pa motibu di nesesidat: pasobra Dios ta stima un dunadó alegre.

NOTA: Beibel no ta establesé un kantidat spesífiko. Kada persona ta disidí kuantu e ta duna pa ofrendanan boluntario, manera Dios ta impreshoná.

11. Ki prueba Adam ku Eva a faya, ku nos tin ku pasa, si nos ta spera di heredá e reino di Dios?

Génesis 3:3. Pero di e fruta di e palu ku ta meimei di e hòfi, Dios a bisa: Boso no mester kome di dje, ni mishi kuné, pa boso no muri.

NOTA: Dios a bisa Adam i Eva ku nan por a kome e fruta di tur e palunan di e hòfi ku eksepshon di un: e palu di konosementu di bon i malu. Nan no mester a kome di e palu ei ni sikiera mishi kuné, sino nan lo a muri. Dios no a pone un tranké di koriente rònt di e palu. Mas bien, El a manten’e kaminda nan por a rèk man i kohe e fruta. I nan a hasié, pasobra nan no a konfia Dios. Awe, Dios ta duna nos tur e mesun prueba. E ta bisa: “Bo por keda ku tur e plaka ku yega serka bo, ku eksepshon di un désimo parti. E plaka ei ta di Mi. No koh’é.” Sinembargo, E ta lag’é kaminda nos por rèk man i koh’e, si nos ta deseá esei. Pero ora nos hasié, nos ta ripití e piká di Adam i Eva.

Dios no tabatin mester di e fruta di e palu spesial. E tabata un prueba di nan lealtat. Tampoko E tin mester di nos diesmo. E ta doño di tur kos! E ta un prueba di nos amor, lealtat i konfiansa.

12. Kua mandamentu nos ta kibrando ora nos nenga di debolbé diesmo i ofrenda na Dios?

Eksodo 20:15. Lo bo no hòrta.

Malakias 3:8. Un hende lo hòrta Dios? Tòg boso a hòrtaMi. Ma boso ta puntra: Den kiko nos a hòrtaBo? Den diesmo i ofrenda.

NOTA: Dios ta bisa ku esnan ku konsientemente ta infiel den diesmo i ofrenda, ta ladron. Ta sufisiente malu ora hende ta hòrta for di otro, pero e ta un pensamentu spantoso ku hende lo riska di hòrta for di Dios! Tambe ta difísil pa kere ku hende lo a baha asina abou pa hòrta plaka ku Dios a destiná pa plama e evangelio na esnan pèrdí.

13. Kiko Dios ta bisa ku lo pasa ku esnan ku konsientemente ta hòrta diesmo i ofrenda for di djE?

Malakias 3:9. Boso ta maldishoná ku un maldishon pasobra boso a hòrtaMi, asta henter e nashon akí.

1 Korintionan 6:10. Ni ladronnan, ni esnan kudishi, ni burachénan, ni blasfemadónan, ni estafadónan lo heredé e reino di Dios.

NOTA: Esnan ku no ta fiel den diesmo i ofrenda ta maldishoná, i a ménos ku nan kambia, nan lo ser ekskluí for di e reino di Dios komo ladron.

14. Dikon kudishi ta asina peligroso?

Lukas 12:34. Pasobra kaminda boso tesoro ta, einan bo kurason tambe lo ta.

NOTA: Kudishi ta fatal pasobra nos kurason ta sigui nos invershonnan. Si mi enfoke ta riba akumulá mas i mas plaka, mi kurason ta bira kudishi, goloso, i orguyoso. Pero si mi enfoke ta riba avansá e obra di Dios, mi kurason ta bira kariñoso, amoroso, liberal i humilde. Nos kurason inevitablemente ta sigui nos tesoro. Nos no mester lubidá nunka ku tabata Judas su kudishi i amor pa plaka a hib’é na traishoná Hesus pa 30 pida plata (Mateo 26:14-16).

15. Kon bo ta suponé ku Hesus ta sinti ora nos hòrta diesmo i ofrenda for di djE?

Hebreonan 3:10. P’esei mi tabata rabiá ku e generashon ei, i a bisa: Nan ta desviá semper den nan kurason.

NOTA: Probablemente Hesus ta sinti meskos ku un mayor ku su yu ta hòrta plaka for di su pòtmòni. Pèrdè e sèn no ta e kos grandi. Mas bien, ta e mucha su falta di integridat, amor i konfiansa ta loke ta profundamente desepshonante. Siguramente ningun di nos no ke hasi kurason di nos Salbador tristu.

16. Kua otro prinsipionan bíbliko Dios ta kompartí relashoná ku dunamentu?

2 Korintionan 8:5. … promé nan a duna nan mes na Señor.

Proverbionan 3:9. Honra Señor ku bo rikesa, i ku e promé frutanan di tur bo produktonan.

Proverbionan 11:24,25. Tin ku ta plamá, i tòg ta oumentá; i tin ku ta retené mas ku tin mester, ma e tin tendensia na pobresa. E alma generoso lo ser hasí gordo, i esun ku muha lo ser muhá e mes tambe.

Echonan 20:35. Ta mas bendishoná pa duna ku pa risibí.

Lukas 12:21. Esun ku ta akumuná tesoro pa su mes ... no ta riku pa ku Dios.

Lukas 6:38. Duna, i lo ser duná na boso; bon midí, primí, i sakudí huntu, i ku ta basha over, hende lo duna den boso skochi.

1 Korintionan 16:2. Laga kada un di boso pone algu un banda, segun ku Dios a prosper’é.

Deuteronomio 16:17. Kada hende mester duna manera e por, di akuerdo ku e bendishon di SEÑOR bo Dios ku El a dunabo.

NOTA: Nuebe-désimo parti di mi entrada ku bendishon di Dios lo bai muchu mas leu ku dies-désimo parti sin esaki. Ademas, ora Dios habri e bentananan di shelu, Su bendishonnan no ta semper finansiero. Nan por inkluí kosnan manera bon salú, pas mental, orashonnan kontestá, protekshon, un famia estrecho i amoroso, forsa físiko, abilidat pa tuma desishonnan sabí, un kaminata mas serkano ku Hesus, éksito den ganamentu di alma, un outo bieu ku ta keda kore, etc. Si nos ta stima Hesus berdaderamente, dunando sakrifisialmente pa Su obra nunka lo ta un karga. Mas bien, e ta un bendishon, un privilegio glorioso ku nos lo realisá ku gran goso i satisfakshon.

17. Kiko e trapi, ku Jacob a mira den su soño, tabata representá?

Juan 1:51. Despues di awor boso lo mira shelu habrí, i e angelnan di Dios ta subi i baha riba e Yu di hende.

NOTA: Jacob a mira un trapi ku tabata konektá shelu ku tera, ku a simbolisá e Yu di hende. Den Malakias 3:10, Dios ta bisa ku si nos trese tur e diesmonan den e mangasina, E lo habri pa nos e bentananan di shelu i basha un bendishon ku apénas nos por risibí! Hesus ta e bendishon ei.

18. Kua ta e regalo di mas grandi ku nos por duna Hesus?

Proverbionan 23:26. Mi yu, dunaMi bo kurason, i laga bo wowonan opservá Mi kamindanan.

Marko 7:6. E pueblo akí ta honraMi ku nan lepnan, ma nan kurason ta leu for di Mi.

NOTA: Ora Hesus tin nos kurason, E tin tur otro kos tambe.

19. Ora nos ta fiel den diesmo i ofrenda, Hesus ta bira nos sosio den tur loke nos ta purba den bida. Bo ta dispuesto pa invit’E pa ta bo sosio dor di debolbé diesmo i duna ofrenda?