Lès 19

E Baile di e Yu Muhé

1. Kua otro tim di mama i yu muhé a persiguí e pueblo di Dios den Tèstamènt Bieu?

1 Reinan 18:13. Jezabel a mata e profetanan di Señor.

2 Reinan 11:1. I ora Athaliah ... a mira ku su yu hòmber tabata morto, el a lanta i a destruí tur e desendientenan real.

NOTA: Den Tèstamènt Bieu, Jezabel i su yu muhé Athaliah tabata konosí pa kontrolá violentamente e reinonan nort i sùit di Israel i Juda, i pa fòrsa adorashon pagano riba e pueblo di Dios.

2. Kiko ta e mensahe di e di dos angel den Revelashon 14?

Revelashon 14:8. I un otro angel a sigui, bisando: Babilonia a kai, a kai, e gran stat ei, pasobra el a hasi tur nashon bebe di e biña di e furia di su fornikashon.

NOTA: Revelashon 14 ta kontené un mensahe urgente di tres punto, ku mester alkansá henter mundu promé ku e segundo binida di Hesus. Den e lès akí nos lo wak e di dos punto di e mensahe ei. Dios su akusashon di Babilonia ta ser duná pasobra el a hasi tur nashon burachi ku su biña intoksikante. E lès akí lo atendé algun mensahe masha direkto, i kisas alarmante, na tantu kreyentenan katóliko komo protestant. Kòrda ku e mensahe di e di dos angel ta di Hesus, Esun ku nos tur ta stima. Habri bo kurason pa Su bèrdat, pasobra Su úniko meta ta pa salba i pa bendishonábo.

3. Kon Dios ta simbolisá Babilonia den Revelashon 17?

Revelashon 17:18. I e muhé ku bo a mira ta e gran stat, ku ta reina riba e reinan di tera.

NOTA: Den profesia di Beibel, un hende muhé ta simbolisá un iglesia. Un muhé puru ta representá e berdadero iglesia di Dios manera deskribí den Revelashon 12. Un muhé infiel ta representá un iglesia ku a desviá for di e Skrituranan. Nos por ta sigur ken e muhé kaí akí ta, pasobra Revelashon 17:18 ta bisa ku e tabata gobernando ora Revelashon a ser skirbí. Historia ta bisa nos ku tabata Roma pagano (Lukas 2:1) ku finalmente a entregá su outoridat, stat kapital i poder na Roma papal.

4. Ki otro evidensia for di Revelashon 17 ta proba ku Babilonia ta referí na Roma papal?

Revelashon 17:3. … Mi a mira un muhé sintá riba un bestia koló skarlata, yen di nòmbernan di blasfemia.

  1. E ta kulpabel di blasfemia (versíkulo 3).
  2. E ta bistí na púrpura i skarlata (versíkulo 4).
  3. E ta ser yamá Mama (versíkulo 5).
  4. E tin yu muhénan prostituta ku tambe a kai (versíkulo 5).
  5. El a persiguí i martirisá e santunan (versíkulo 6).
  6. E ta sinta riba “shete seru” (versíkulo 9).
  7. E tabata goberná riba e “reinan di tera” (versíkulo 18).

NOTA: Roma Papal ta kuadra ku tur deskripshon. Su sede ta na Roma, “e stat di shete seru.” Skarlata ta e koló di paña di kardinalnan, i e papa hopi biaha ta bisti e koló real di púrpura na funshonnan importante. Iglesia Katóliko Romano ta atmití libremente ku durante Edat Media, el a persiguí e santunan i a goberná riba e reinan di tera. (Pa evidensia ku e papado ta kulpabel di blasfemia, repasá Lès 13.) E simbolismo di Dios ta kuadra perfektamente: un iglesia mama kaí ku su yu muhénan kaí a protestá, i asina a kuminsá ser yamá protestant. Tuma nota di e sita akí di Pader James A. O’Brien: “E opservansia ei [di djadumingu en bes di djasabra] ta keda komo un rekordatorio di e Iglesia Mama for di kua e sektanan no-katóliko a separá.”1

1The Faith of Millions [E Fe di Miónes di Hende] (Huntington, IN: Our Sunday Visitor, Inc., 1974), p. 401.

5. Kon e bestianan di Revelashon 13 i 17 ta kompará?

Revelashon 13:1. I mi tabata para riba e santu di laman, i a mira un bestia ta subi sali for di laman, ku shete kabes i dies kachu, ... i riba su kabesnan e nòmber di blasfemia.

Revelashon 17:3 Mi a mira un muhé sintá riba un bestia koló skarlata, yen di nòmbernan di blasfemia, i e tabatin shete kabes i dies kachu.

NOTA: E bestia di Revelashon 13:1-10 i e bestia di Revelashon 17 ta opviamente e mesun kos. Tur dos ta simbolisá e poder romano akí. Revelashon 17 ta indiká e koalishon iglesia-estado, ku e iglesia (e muhé kaí) ta kore i kontrolá e estado (e bestia). Revelashon 13 tambe ta ilustrá dos bestia envolví den fòrsa otronan pa adorá. E promé bestia ta e mesun poder ku e “mama di prostitutanan” deskribí den Revelashon 17. E lès akí pronto lo revelá e identidat di e di dos bestia.

6. Kiko ta e nifikashon i orígen di e palabra “Babilonia”?

Génesis 11:4,6,7,9. Laga nos traha un stat i un toren pa nos mes, ku su tòp ta yega te na shelu. … I Señor a bisa: … laga nos baha, i einan brua [konfundí] nan idioma, pa nan no komprondé otro su idioma. … P’esei su nòmber ta ser yamá Babel; pasobra einan Señor a konfundí e idioma di henter tera.

NOTA: E términonan “Babel” i “Babilonia” tur dos ta nifiká konfushon. E nòmber a originá na e Toren di Babel, konstruí dor di paganonan rebelde despues di e Diluvio. Nan a spera di a trah’e asina haltu ku ningun futuro awa di inundashon por a tap’e. Pero Señor a konfundí nan idiomanan, loke a krea asina tantu káos ku e proyekto a ser bandoná. Despues Babilonia a surgi pa ta un reino mundial idólatra ku tabata persiguí e pueblo di Dios. Den e buki di Revelashon, e término “Babilonia” ta nifiká un reino religioso falsu ku ta un enemigu di e Israel spiritual di Dios.

7. Kon Dios ta deskribí Babilonia ora E ta urgi Su pueblo pa bai?

Revelashon 18:2–4. I el a grita poderosamente ku un bos fuerte, bisando: “E gran Babilonia a kai, a kai, i a bira e lugá di biba di diabelnan, i e refugio di tur spiritu malu.” … Sali for di dje, Mi pueblo, pa bo no ta partísipe di su pikánan, i pa bo no risibí di su plaganan.

NOTA: Dios ta bisa ku Babilonia a kai i a bira e kas di diabelnan i spiritunan malu. E ta spièrta ku su pikánan ta asina ofensivo ku Babilonia mester ser destruí. E pueblo di Dios mester sali lihé, sino e lo ser destruí ku e plaganan di Babilonia.

8. Hesus ta akusá Babilonia repetidamente di a hasi mundu burachi ku su biña. Kiko e biña akí ta?

Revelashon 17:4. Teniendo un kopa di oro den su man yen di abominashon.

NOTA: Su kopa di biña ta yen di mentiranan intoksikante (Proverbionan 12:22), òf siñansanan falsu ku ta hasi hende spiritualmente burachi. Ata’kí un lista parsial di su mentiranan seduktor:

  1. E Dies Mandamentunan no ta obligatorio (wak Lès 6).
  2. Santidat di djadumingu (wak Lès 14).
  3. Rapto sekreto (wak Lès 3).
  4. Inmortalidat di e alma (wak Lès 9).
  5. Un tormento eterno den fièrnu (wak Lès 10).
  6. Konfesá bo pikánan na un saserdote (wak Lès 13).
  7. Boutismonan falsu (wak Lès 11).
  8. Un konfushon di lenganan (wak Lès 23).

E bèrdat tristu ta ku unabes ku e mensahenan di Babilonia ta ser aseptá, un persona ta bira spiritualmente burachi i práktikamente inkapas pa komprondé kiko Beibel ta bisa realmente, pasobra e doktrinanan falsu akí ta stroba e abilidat di un persona pa komprondé e bèrdat.

9. Ki poder lo apoyá e bestia den tempu final?

Revelashon 13:11,12. Mi a mira un otro bestia ta subi sali for di tera; i e tabatin dos kachu manera un lamchi, i e tabata papia manera un dragon. I e ta ehersé tur e poder di e promé bestia su dilanti, i ta kousa tera i esnan ku ta biba den dje adorá e promé bestia, kende su herida mortal a ser kurá.

NOTA: Prepara bo mes! E di dos bestia akí di Revelashon 13 ta simbolisá Estádos Unídos di Amérika. Konsiderá e evidensia:

  1. Tempu ku el a surgi.
    Dios a deskribí e poder akí komo lantando na masoménos e mesun tempu ku e promé bestia ta bai den koutiverio i ta risibí su herida mortal (Revelashon 13:10,11). Estádos Unídos di Amérika a surgi alrededor di e tempu ku e poder di e papado a ser kibrá na fin di e 1.260 añanan, ku tabata na 1798. Merka a deklará su independensia na 1776, a vota e Konstitushon na 1787, a adoptá e Deklarashon di Derechonan na 1791, i a ser rekonosé klaramente komo un poder mundial na 1798.
  2. El a surgi for di tera.
    Manera nos a studia kaba, e awanan, for di kua mayoria reino (bestia) a surgi, ta representá un área densamente poblá (Revelashon 17:15). E tera ta representá lo kontrario. Estádos Unídos ta kuadra perfektamente ku e punto akí pasobra el a ser establesé riba un kontinente poko poblá.
  3. E tabatin dos kachu manera un lamchi.
    Den profesia, un lamchi ta representá Hesus i un kachu ta representá poder. E dos kachunan grandi ta representá prinsipionan protestant riba kua Merka a ser fundá: libertat sivil i religioso. E tatanan fundadó a hui for di Europa pa skapa di persekushon religioso i polítiko. Nan a establesé un sosiedat basá riba e prinsipionan di libertat sivil i religioso: “gobièrnu sin un rei i religion sin un Papa.”

10. Di akuerdo ku e profesia, ki kambio drástiko lo tuma lugá na Merka?

Revelashon 13:11. I e ta papia manera un dragon.

NOTA: Papia manera un dragon ta nifiká ku Estádos Unídos, bou di influensia di Satanas, lo bòltu su prinsipionan protestant original di separashon di iglesia i estado. E lo pasa leinan religioso ku ta fòrsa hende pa adorá kontrali na konsenshi òf sino ser kastigá ku sanshonnan ekonómiko (versíkulonan 16,17) i finalmente morto (versíkulo 15).

11. Kua tres podernan lo uni kontra e pueblo di Dios den e tempu di fin?

Revelashon 16:13. I mi a mira tres spiritu impuru manera sapu sali for di boka di e dragon, for di boka di e bestia, i for di boka di e profeta falsu.

NOTA: E dragon ta Satanas (Revelashon 12:9), trahando atraves di religionnan pagano. E bestia di Revelashon 13:1-10 ta e papado. E profeta falsu den Revelashon 16 ta protestantismo apóstata na Merka, ku ta e mesun poder ku e bestia di Revelashon 13:11-17 ku tin dos kachu manera un lamchi pero despues lo papia manera un dragon. Esaki ta e poder ku ta hasi “maravianan grandi” i “ta gaña esnan ku ta biba riba tera pa medio di e milagernan ei ku e tabatin poder pa hasi den bista di e bestia.” Revelashon 13:13,14. (Kompará ku e deskripshon di e profeta falsu duná den Revelashon 19:20.)

12. E organisashonnan diverso akí lo yega na uni efektivamente?

Revelashon 16:14. Pasobra nan ta spiritunan di demoñonan ku ta obra milagernan, ku ta sali bai na e reinan di tera i di henter mundu, pa reuní nan pa e bataya di e gran dia ei di Dios Todopoderoso.

NOTA: Sí, Dios ta bisa ku nan lo uni. Tuma nota ku nan ta uní den nan trabou di plama engaño i konstruí un konfederashon kontra e pueblo di Dios. E “bataya di e gran dia ei di Dios Todopoderoso” ta e mesun evento ku e dragon ku ta hasi guera ku e desendientenan di e muhé (Revelashon 12:17).

13. Ki métodonan efektivo e koalishon di tempu di fin akí lo usa?

Revelashon 16:14. Pasobra nan ta e spiritunan di demoñonan, ku ta obra milagernan.

Revelashon 13:13,14. I e ta hasi gran maravianan, di manera ku e ta hasi kandela baha for di shelu riba tera den bista di hende, i ta gaña esnan ku ta biba riba tera pa medio di e milagernan ku e tabatin poder pa hasi.

NOTA: E koalishon di fin di tempu akí lo obra milagernan poderoso pa medio di e spiritunan di demoñonan, i kasi henter mundu lo ser konvensí (Revelashon 13:3) i engañá. Revelashon 18:23 ta bisa: “Dor di bo bruheria tur nashon a ser gañá.”

14. Kiko lo prevení Dios su pueblo di tempu di fin di ser engañá?

Isaias 8:20. Na e lei i na e testimonio si nan no ta papia di akuerdo ku e palabra akí, ta pasobra no tin lus den nan.

NOTA: E pueblo di Dios lo mester tèst tur kos pa medio di Beibel. Nan lo no ser gañá, pasobra nan lo tèst e milagernan i siñansanan pa determiná si nan ta bini di spiritunan di diabel òf di Señor.

15. Awe Dios ta yamando Su pueblo pa sali for di Babilonia den e siguridat di Su iglesia remanente. E ta bisa ku esnan ku keda den Babilonia lo partisipá di su pikánan i risibí su plaganan. Den tempu di Noe, solamente ocho hende a drenta e arka ku Dios a proveé pa nan salbashon. Tur otro a muri. Awe E ta proveé Su iglesia remanente komo un arka di siguridat, i miónes ta drentando. Hesus ta invitábo pa “Drenta abo i henter bo kas den e arka.” Génesis 7:1. Lo bo bisa “Sí” na Su invitashon awe?

Estudio Suplementario


Kon Poderoso Merka i Roma Ta?

Revelashon kapítulo 13 ta indiká ku den tempu di fin, e papado i Estádos Unídos lo uni pa influensiá henter mundu pa adorá e bestia. E entidatnan akí ta sufisiente poderoso pa logra esaki?

E papado ta, mas ku kualke otro, e poder religio-polítiko di mas fuerte na mundu. Kasi tur pais lider tin un embahador ofisial òf representante di estado na Vatikano. E papa ta ser venerá i yamá bon biní pa práktikamente tur pais. Eks lider di U.S.S.R. Mikhail Gorbachev a bisa: “Tur loke a tuma lugá na Ost Europa den añanan resien lo tabata imposibel sin e esfuersonan di Papa i e ròl enorme, inkluyendo e ròl polítiko, ku el a hunga den e arena mundial.”1 E papa a hasi mas ku 50 biahe mundial pa logra su meta di unifiká e mundu religioso bou di liderazgo di e papado.

Merka awor ta ser konsiderá komo e poder militar number un i sentro di influensia. “[Merka ta] e úniko superpoder di e planeta, ku a sobra.”2

“E poder di Merka awor lo determiná tur suseso mundial grandi.”3 Profesia di Beibel ta pronostiká ku klaridat ku Estádos Unídos di Amérika i e papado lo uni forsa, i susesonan mundial ta mustra klaramente ku e koalishon ta ser formá.

1Toronto Star, 9 di mart 1992, p. A-1.

2“The UN Obsession,” Time, 9 di mei 1994, p. 86.

3Jim Hoaglad, “Of Heroes …,” The Washington Post, 21 di ougùstùs 1991, p. A-23.