Lès 21

Bos den Desierto

1. Kiko tabata un sekreto di e bida yená ku Spiritu di Juan?

Lukas 3:16. Juan a kontestá, … Mi ta batisá boso enbèrdat ku awa; pero un mas poderoso ku mi ta bini, kende su strèp di sapatu mi no ta digno pa lòs.

Juan 3:30. E mester oumentá, ma ami mester bira ménos.

NOTA: E bida yená ku Spiritu di Juan Boutista tabata marká pa humildat inusual. Tabatin un konekshon direkto entre e ministerio poderoso di Juan i e sumishon kompletu ku el a hasi na Señor. Tabata Juan su goso di mas haltu pa mustra otronan na Hesus mas bien ku na su mes. Tur loke el a hasi tabata destiná pa trese gloria na e nòmber di Dios.

2. Juan Boutista a lesa e Skrituranan?

Juan 1:23. El a bisa, Ami ta e bos di un ku ta grita den desierto: Hasi e kaminda di Señor stret, manera profeta Isaias a bisa.

NOTA: Sí! Juan a sita for di Tèstamènt Bieu komo evidensia ku e tabatin un komprondementu sólido di e Skrituranan. Beibel ta bisa nos tambe ku Juan a siña su disipelnan pa yuna i hasi orashon hopi bes (Mateo 9:14). Esaki ta un otro testimonio di su amor profundo pa Señor. Di mes manera, pa medio di nos deboshonnan personal i estudio di Beibel, nos por yega na konosé i stima Dios i risibí di Su Spiritu.

3. Juan Boutista tabata dispuesto pa testifiká pa Hesus?

Juan 1:29. E siguiente dia Juan a mira Hesus ta bin serka dje, i a bisa: “Ata e Lamchi di Dios, ku ta kita piká di mundu.”

NOTA: Pa naturalesa, Juan tabata un alma solitario (Lukas 1:80). Tòg e tabata dispuesto pa riska pa ser ridikulisá i asta pa pone su bida na peliger pa asina mustra hende riba Hesus komo Salbador di mundu. Di mes manera, esnan ku berdaderamente ta stima Señor awe, lo ta dispuesto pa pone miedu i komodidat un banda pa testifiká pa Hesus.

4. E predikashon stret di Juan tabata popular bou di e lidernan polítiko i religioso?

Lukas 7:30. E fariseonan i abogadonan a rechasá e konseho di Dios kontra nan mes, siendo ku nan no a ser batisá dor di dje.

Lukas 3:19,20. Ma Herodes e tetrarka, siendo reprendé dor di dje ... pa tur e maldatnan ku Herodes a hasi, ... a sera Juan den prizòn.

NOTA: Ku kurashi Juan a papia kontra e pikánan popular di e tempu ei ku tabata ser kometé asta dor e lidernan religioso. Dios su mensahe di arepentimentu i santidat di último dia tambe lo ta impopular bou di mayoria di e lidernan polítiko i di iglesia respetá, pero e lo ta bíbliko.

5. Beibel ta deskurashá bistimentu di hoya i paña luhoso?

1 Timoteo 2:9. Di mes manera tambe, ku hende muhé [i, naturalmente, hende hòmber] ta dòrna nan mes ku bistí apropiá, ... no ku kabei na flèktu, òf oro, òf pèrla òf bistí kostoso.

1 Pedro 3:3. No laga boso adorno ta e adorno di pafó di flèktumentu di kabei, i di bistimentu di oro, òf di bistimentu di paña; sino lag’é ta e hende skondí di e kurason, ... asta e adorno di un spiritu mansu i ketu, ku den bista di Dios ta di gran preis.

Isaias 3:18-21. Riba e dia ei Señor lo kita e balentia di nan adòrnonan ku ta zona tur rònt di nan pianan, ... E kadenanan, i e armbantnan, i e velonan, E pañanan di mara kabes, i e adòrnonan di e pianan, i e banchinan di kabes, i e bòternan di perfume, i e renchinan di orea, e renchinan di dede i hoyanan di nanishi.

NOTA: Sí! Juan Boutista tabata bisti paña simpel i modesto, un bon patronchi pa kristiannan sigui. E modanan i tendensianan popular i seksualmente sugerente di awendia ta enkurashá un gran kantidat di tentashon i debe. Dios no tin intenshon pa nos bisti na paña di saku; sinembargo, paña eksesivamente karu, ekstrabagante òf yamativo no mester ta parti di un kristian su kashi di paña. Ounke bistimentu di hoya ta ampliamente aseptá den mundu, e tin un imágen negativo den e Skrituranan. Kisas bo no ta rekonosé tur e artíkulonan menshoná den Isaías 3:18-23, pero hendenan na otro partinan di mundu sí. Hopi di e adòrnonan pagano akí ta aparesiendo awor den kultura oksidental tambe.

6. Tabatin un konekshon entre e bida yená ku Spiritu di Juan i su dieta simpel?

Lukas 1:15. Pasobra e … lo no bebe ni biña ni bebida stèrki; i e lo ser yená ku Spiritu Santu.

NOTA: Kristiannan mester apstené kompletamente di tur bibida fermentá pa asina tene nan mente kla i pa tende e Spiritu di Dios (Proverbionan 23:31,32; Habakuk 2:15; 1 Pedro 5:8).

7. Dikon Dios ta preokupá tokante kiko nos ta kome i bebe?

Huesnan 13:7. Mira, lo bo konsebí, i duna lus na un yu hòmber; i awor no bebe biña ni bibida stèrki, ni kome nada impuru pasobra e yu lo ta un nazareo pa Dios for di den barika te na e dia di su morto.

1 Korintionan 6:19. Boso no sa ku boso kurpa ta tèmpel di Spiritu Santu ku ta den boso, ku boso tin di Dios?

NOTA: Tin un konekshon direkto entre loke nos ta kome òf bebe i nos klaridat mental, abilidat pa resistí tentashon, i kapasidat pa distinguí entre bon i malu. Tur loke un kristian hasi, inkluyendo loke e ta kome i bebe, mester ser hasí na gloria di Dios (1 Korintionan 10:31).

8. Kiko Beibel ta bisa tokante komportashon mundano?

Santiago 4:4. P’esei, ken ku ke ta amigu di mundu ta enemigu di Dios.

2 Korintionan 6:17. Sali for di meimei di nan, i separá boso mes, Señor ta bisa, i no mishi ku loke ta impuru; i lo Mi risibí boso.

1 Juan 2:15. Si un hende ta stima mundu, e amor di e Tata no ta den dje.

Romanonan 12:2. No sea konformá ku e mundu akí, ma sea transformá pa medio di renobamentu di boso mente, pa boso por proba kiko ta e bon, i aseptabel, i perfekto boluntat di Dios.

NOTA: Señor a yama Su pueblo awe pa biba bidanan ehemplar segun ku nan ta yuda otronan prepará pa e segundo binida di Hesus.

9. Riba kiko un kristian mester skohe pa pensa?

Filipensenan 4:8. Tur loke ta berdadero, tur loke ta honesto, tur loke ta hustu, tur loke ta puru, tur loke ta bunita, tur loke ta di bon fama; si tin kualke birtut, i si tin kualke alabansa, pensa riba e kosnan akí.

Salmo 101:3. Lo mi no ta pone nada malu dilanti di mi wowo.

NOTA: Juan Boutista a ordená e pueblo pa apstené di tur violensia (Lukas 3:14). Pa nos, esaki lo a inkluí wak violensia komo un forma di entretenimentu. Hesus a siña ku pikánan di sèks i violensia ta originá den e pensamentunan i aktitutnan (Mateo 5:22,28). P’esei, un kristian mester evitá kualke programa di televishon, vidio, òf material di lesa ku lo por enkurashá pensamentunan impuru.

10. Ki tipo di músika un kristian berdadero lo disfrutá di dje?

Salmo 40:3. El a pone un kantika nobo den mi boka, esta alabansa na nos Dios.

1 Samuel 16:23. I a sosodé ku ora e spiritu malu for di Dios tabata riba Saul, David tabata kohe un arpa, i tabata toka ku su man. Asina Saul tabata ser refreská, i tabata bon, i e spiritu malu tabata bai for di dje.

NOTA: Ta opvio ku un gran mayoria di e músika popular na mundu no ta yuda nos spiritualmente. En kambio, e ta destruí nos deseo pa kosnan selestial i hopi bes ta fortalesé e naturalesa mas abou. Sinembargo, músika por ta un poder tremendo pa bon. Ora Rei Saul tabata ser tormentá pa un spiritu malu, e músika trankilisante for di David su arpa tabata refresk’é i tabata kore ku e mal influensia.

11. Bailamentu ta un bon rekreashon pa un kristian?

1 Juan 2:6. Esun ku bisa ku e ta keda den djE mester kana tambe, meskos ku E a kana.

Tito 2:12. Siñando nos ku, nengando impiedat i deseonan mundano, nos mester biba di forma sobrio, hustu i deboto den e mundu presente akí.

NOTA: Mayoria di e bailamentu kontemporáneo popular ta asosiá ku músika mundano i tin un énfasis seksual masha fuerte. Den kasi tur situashon nos mester puntra: “Kiko Hesus lo a hasi?” Mi ta kere ku nos tur ta di akuerdo ku nos Salbador lo no bandoná Su rason pa zoya kurpa i man i pia riba e ritmo di algun ritmo sinkopá.

12. Un kristian lo hunga loteria òf hunga wega di plaka?

1 Timoteo 6:10. Pasobra amor pa plaka ta rais di tur maldat: ku miéntras algun tabata deseá esaki, nan a desviá for di e fe, i a traspasá nan mes ku hopi doló.

2 Tesalonisensenan 3:10. Esaki nos a ordená boso, ku si un hende no ke traha, e no mester kome tampoko.

Proverbionan 28:20. Esun ku ta purá pa bira riku lo no ta inosente.

NOTA: Wega di plaka por ta mes adiktivo ku hopi droga. Algun hende a malgastá henter e plaka di spar di famia na kasinonan òf riba biyèchi. Mayoria di e plannan di “bira riku lihé” ta asosiá ku riesgo indebido, preisnan inhustu, i étika kuestionabel.

13. Kiko mester ta e meta di e pueblo di Dios awe?

1 Juan 3:22. Nos ta warda Su mandamentunan, i ta hasi e kosnan ku ta agradabel den Su bista.

Eklesiástes 12:13. Teme Dios i warda Su mandamentunan, pasobra esaki ta henter e deber di hende.

NOTA: Un hende no por biba manera e ke i finalmente ser salbá den e reino di Dios. Esaki ta un motibu pakiko Hesus a bini na tera, pa duna nos un ehèmpel di biba santu (1 Pedro 2:21).

14. Kiko ta hasié fásil pa obedesé Dios den e asuntunan di estilo di bida ku a diskutí den e lès akí?

Juan 14:15. Si boso ta stimaMi, warda Mi mandamentunan.

1 Juan 5:3. Pasobra esaki ta e amor di Dios, ku nos ta warda Su mandamentunan; i Su mandamentunan no ta pisá.

Salmo 40:8. Mi tin delisia pa hasi Bo boluntat, o mi Dios; sí, Bo lei ta den mi kurason.

15. Dikon e bida kristian ta un yamada asina haltu?

1 Pedro 2:9. Ma boso ta un generashon skohí, un saserdosio real, un nashon santu, un pueblo pekuliar; pa boso proklamá e alabansanan di Esun ku a yama boso for di skuridat den Su lus maravioso.

NOTA: Komo embahadornan pa Hesus, kristiannan enbèrdat tin un yamada haltu! Juan Boutista a yuda prepará hende pa e promé binida di Hesus, i Dios a yama Su pueblo awe pa biba bidanan santu segun ku nan ta yuda otronan prepará pa e segundo binida di Hesus.

16. Bo ta dispuesto pa ta un “bos den desierto” úniko i duna testimonio atraves di un estilo di bida piadoso pa prepará otronan pa e segundo binida di Hesus?

Estudio Suplementario

Embahadornan pa Kristu

Ora un persona bira kristian, e ta ser enlistá komo un embahador di un mihó reino. Beibel ta bisa: “Awor anto nos ta embahadornan pa Kristu.” 2 Korintionan 5:20.

E dikshonario ta definí un embahador komo “un funshonario diplomátiko di e rango di mas haltu nombrá i akreditá komo representante den residensia dor di un gobièrnu òf soberano na un otro, generalmente pa un durashon di tempu limitá.”

Embahadornan ta mes importante den e reino spiritual ku nan ta den e reino polítiko. Siudadanonan di e reino di shelu no ta manera e siudadanonan di e mundu akí. Nos a ser mandá den mundu pa demostrá ken Hesus ta i kon E ta. Pa medio di Spiritu Santu, nos ta bira Su representantenan pa reflehá Su imágen den tur kos, for di e manera ku nos ta papia i traha te na e manera ku nos ta kome i bisti. Ku otro palabra, ora nos bira parti di e reino spiritual di Dios, nos mester ta demostrashonnan bibu di e gobièrnu ku nos ta representá. Den 2 Korintionan 3:18, e Skrituranan ta bisa ku “nos tur ... ta kambiá den e mesun imágen di gloria pa gloria, manera dor di e Spiritu di Señor.”

Nos, e Iglesia, ta e mannan i pianan, e wowonan i boka, i sí, asta e oreanan di Hesus den e mundu di awendia. Nos ta e kurpa di Kristu (Efesionan 1:22,23; 5:29,30; Kolosensenan 1:18). Promé ku El a subi na shelu, Hesus a bisa nos: “Manera mi Tata a mandaMi, asina Ami ta manda boso.” Juan 20:21.

Kada faseta di nos bida mester ta un refleho di e bida i persona di Hesus. “Laga boso lus bria asina dilanti di hende, pa nan por mira boso bon obranan, i glorifiká boso Tata ku ta den shelu.” Mateo 5:16.