Lès 22

Probando e Profetanan

1. Na ken Señor ta revelá Su último plannan?

Amos 3:7. Siguramente Señor lo no hasi nada, sin ku E revelá Su sekreto na Su sirbidónan, e profetanan.

2. Lo tin profetanan tantu berdadero komo falsu den e último dianan?

Mateo 24:11. I hopi profeta falsu lo lanta, i lo gaña hopi hende.

Echonan 2:17 I lo sosodé den e úlitmo dianan, Dios ta bisa, ku lo Mi basha Mi spiritu riba tur karni: i boso yu hòmbernan i boso yu muhénan lo profetisá.

NOTA: Sí, lo tin profetanan tantu berdadero komo falsu den e tempu di fin. Skrituranan ta siña tambe ku profetanan por ta tantu hòmber komo muhé.

3. Ki tiponan di profetanan falsu ta ser spesífikamente kondená den Beibel?

Deuteronomio 18:10. “Un ... ku ta usa adivinashon [miradó di destino].” Deuteronomio 18:10.

“Un opservadó di tempu [astrólogo].” Deuteronomio 18:10.

“Un enkantadó [mago].” Deuteronomio 18:10.

“Un hasidó di brua [síkiko femenino].” Deuteronomio 18:10.

“Un enkantante [persona ku ta lansa hechiso òf enkanto].” Deuteronomio 18:11.

“Un konsultor ku spiritunan konosí [medium spiritual].” Deuteronomio 18:11.

“Un montadó [síkiko maskulino].” Deuteronomio 18:11.

“Un nekromante [persona ku ta pretendé di ta konsultá ku e mortonan].” Deuteronomio 18:11.

NOTA: Deuteronomio 18:9-12 ta bisa ku tur ku ta hasi e kosnan akí ta un “abominashon” pa Señor. Pa e motibu akí, kristiannan no mester tin nada di hasi ku nan.

4. Dios su iglesia di tempu di fin lo tin e don di profesia?

Revelashon 12:17. I e dragon tabata rabiá ku e muhé, i a bai pa hasi guera ku e restu di su desendientenan, ku ta warda e mandamentunan di Dios, i ku tin e testimonio di Hesu-Kristu.

Revelashon 19:10. Mi ta bo ko-sirbidó i di bo rumannan ku tin e testimonio di Hesus: adorá Dios, pasobra e testimonio di Hesus ta e spiritu di profesia.

NOTA: Manera nos a siña den Lès 17, Dios su iglesia di tempu di fin tin “e testimonio di Hesus,” ku ta “e spiritu di profesia.” Dor di kompará Revelashon 19:10 i 22:9, nos ta mira ku e angel ta definí Juan su “rumannan” ku tin e spiritu di profesia komo “e profetanan” i “esnan ku ta warda e palabranan di e buki akí.” Den 1 Korintionan 1:5-8, Pablo ta skirbi ku e iglesia lo tin “e testimonio di Kristu” i lo “no keda atras den ningun don” te na e segundo binida di Hesus. Pues Dios su iglesia di último dia enbèrdat lo tin e don di profesia ainda.

5. Den ki formanan Dios ta papia ku un berdadero profeta?

Numbernan 12:6,8. Si tin un profeta meimei di boso, Ami, Señor, lo hasi Mi mes konosí na dje den un vishon, i lo papia kuné den un soño. … Kuné lo Mi papia kara kara.

Zakarias 4:1. I e angel ku tabata papia ku mi a bolbe bini, i a spièrtámi, manera un hende ta ser spièrtá for di soño.

NOTA: Señor ta papia ku Su profetanan pa medio di vishonnan, den soñonan, kara kara, i pa medio di angelnan. Bolanan di kristal, lesamentu di plant’i man, desifrá blachi di te, wak strea, i pretendé di ta papia ku e mortonan no ta e métodonan di Dios pa komuniká ku un profeta.

6. Milagernan ta evidensia definitivo di un berdadero profeta?

Revelashon 16:14. Pasobra nan ta e spiritunan di demoñonan, ku ta obra milager, ku ta bai serka e reinan di tera i di henter mundu.

NOTA: Nò, milager no ta prueba ku un hende ta un berdadero profeta. Nan ta proba solamente un kos: poder sobrenatural. Pero poder sobrenatural por bini sea di Dios òf di Satanas. Ta p’esei Señor ta bisa nos: “No kere tur spiritu, ma purba e spiritunan si nan ta di Dios: pasobra hopi profeta falsu a sali bai den mundu.” 1 Juan 4:1.

7. Kua ta e prueba di mas importante di un profeta?

Isaias 8:20. Na e lei i na e testimonio: si nan no ta papia segun e palabra akí, ta pasobra no tin lus den nan.

NOTA: E “lei i e testimonio” tabata un ekspreshon di Tèstamènt Bieu pa “Beibel.” Ku otro palabra, un mensahe di un hende ku ta pretendé di tin un deklarashon profétiko di Dios mester ser kompará ku Beibel. Nos mester tèst e profeta pa medio di Beibel, i no Beibel pa medio di e profeta. Kualke berdadero profeta di Dios semper lo ta di akuerdo 100 porshento ku Skritura. Esaki ta e berdadero prueba.

8. Kua ta e di dos prueba di un profeta?

1 Juan 4:2. Pa medio di esaki boso konosé e Spiritu di Dios: Tur spiritu ku ta konfesá ku Hesu-Kristu a bini den karni, ta di Dios.

NOTA: Un profeta di Dios mester rekonosé i siña e bèrdat tokante Hesu-kristu, ku E tabata Dios den forma humano. Profetanan berdadero mester halsa Hesus tambe, no nan mes. Mayoria profeta falsu ta buska pa kita atenshon for di e Palabra di Dios i hala esaki na nan propio ideanan.

9. Kua ta e di tres prueba di un profeta?

Mateo 7:16. Boso lo konosé nan na nan fruta.

NOTA: Esaki no ta nifiká ku e profeta lo ta perfekto. E profetanan di Dios semper tabatin fayonan. Sinembargo, mester tin konsistensia entre loke profetanan berdadero ta siña i e bida ku nan ta biba.

10. Kua ta e di kuater prueba di un profeta?

Jeremias 28:9. Ora e palabra di e profeta yega na kumplimentu, e ora ei e profeta lo ta konosí, ku Señor a mand’é di bèrdat.

NOTA: Un berdadero profeta lo no hasi pronóstikonan falsu. Si un profeta ta di Dios, e kosnan ku e ta bisa lo kumpli. Sinembargo, eksaktitut so no ta kalifiká un persona outomátikamente komo un berdadero profeta. Deuteronomio 13:1-3 ta atvertí ku profetanan falsu por duna señalnan ku lo sosodé i despues usa nan influensia pa hiba hende na sigui otro diosnan. Un berdadero profeta mester hiba hende na adorá Dios di akuerdo ku Beibel.

11. Kua tres kosnan Pablo ta ordená relashoná ku profesia?

1 Tesalonisensenan 5:20,21. No despresiá profesia. Saminá tur kos; tene duru na loke ta bon.

NOTA: Pablo ta bisa ku nos no mester despresiá, òf rechasá, e don di profesia. Mas bien, nos mester tèst e mensahenan di un profeta pa medio di Skritura i sigui loke ta bon i bèrdat.

12. Konseho di ken nos ta rechasá ora nos rechasá e palabranan di un berdadero profeta?

Lukas 7:28-30. No tin un profeta mas grandi ku Juan Boutista: ... I henter e pueblo ku a tend’é, i e publikanonan, a hustifiká Dios. … Pero e fariseonan i abogadonan a rechasá e konseho di Dios kontra nan mes.

NOTA: Ora nos rechasá e palabranan di un berdadero profeta, nos ta rechasá e konseho di Dios. Un pensamentu solèm! Beibel ta bisa nos pa skucha e profetanan di Dios i ta primintí ku tur hende, ku ta sigui e konseho di un berdadero profeta, lo prosperá.

2 Krónikanan 20:20. Kere den Señor boso Dios, asina boso lo keda establesí; kere Su profetanan, asina boso lo prosperá.

13. Komo ku Dios ta papia ainda pa medio di profetanan, i komo ku e palabranan di un profeta berdadero ta e “testimonio di Hesus” personal pa bo, bo ta dispuesto pa tèst profetanan moderno pa medio di Beibel i sigui e konseho di esnan ku ta di akuerdo ku Skritura?

Estudio Suplementario


Profeta di Tempu Moderno

Na desèmber di 1844, un grupo di damanan hóben metodista tabata na rudia den orashon na Portland, Maine, ora ku Ellen Harmon, un mucha muhé di 17 aña di edat den salú frágil, a risibí su promé vishon. Segun ku Ellen (ku a bira Ellen White despues di su matrimonio ku un minister hóben yamá James White) a relatá kiko Dios a revelá na dje, el a sigui risibí vishon- i soñonan pa mas o ménos 70 aña te na su morto na 1915.

Manera a sosodé ku e profetanan bíbliko, sierto fenómenonan físiko sobrenatural a kompañá Ellen White durante su vishonnan. Meskos ku profeta Daniel, e no tabata hala rosea miéntras e tabata den vishon, i hopi biaha na promé instante e tabata pèrdè forsa físiko (Daniel 10:8,17). Algun di su vishonnan a dura te ku kuater ora, pero e no a hala rosea henter e tempu. Dòkternan ku a samin’é miéntras e tabata den vishon a testifiká di e echo akí.

Na otro momentonan, el a ser duná forsa sobrenatural tambe (Daniel 10:18,19). Aunke Ellen tabata pisa solamente 95 liber, testigunan a mir’é tene un Beibel di famia di 17 liber den su man ekstendé pa 30 minüt miéntras e tabata den vishon. Esakinan i otro fenómenonan físiko ta indiká ku tin algu sobrenatural tokante e eksperensia di un profeta. Sinembargo, nan no ta bisa nos si e profeta ta di Dios òf di Satanas. Ora nan ta ser konfrontá ku un pretenshon sobrenatural di e don profétiko, kristiannan mester tèst e pretenshon pa medio di Beibel pa mira si e ta bèrdat.

Aplikando e Kuater Pruebanan Bíbliko

Laga nos wak huntu pa mira si e bida i ministerio di Ellen White ta kumpli ku e kuater pruebanan bíbliko di un berdadero profeta, òf nò.

  1. Promé Prueba – Armonia ku Skritura
    Lesa kualke un di e bukinan di Ellen White, i lo bo deskubrí ku e ta hibabo konsistentemente na Beibel i ta di total akuerdo ku Skritura. Sinembargo, e no a konsiderá su eskritonan komo un adishon na Skritura. Nan propósito tabata pa yama atenshon di e pueblo di Dios na Beibel i trese nan bèk na Beibel komo e úniko fuente di bèrdat. Tuma nota di e deklarashon enfátiko di Ellen White ku Beibel ta e úniko regla di fe: “Den nos tempu tin un desviashon amplio for di nan doktrina- i preseptonan, i tin nesesidat di un regreso na e gran prinsipio protestant: Beibel, i Beibel solamente, komo e regla di fe i deber.”1 Tambe el a skirbi: “E testimonionan skirbí no ta pa duna lus nobo, sino pa impreshoná klaramente riba kurason e bèrdatnan di inspirashon revelá kaba. E deber di hende pa ku Dios i pa ku su próhimo a ser spesifiká klaramente den e palabra di Dios, ma poko di boso ta obediente na e lus duná. Bèrdat adishonal no ta ser saká pero Dios, pa medio di e Testimonionan, a simplifiká e gran bèrdatnan ya duná i, na Su mes manera skohí, a trese nan dilanti di e pueblo pa spièrta i impreshoná e mente ku nan, pa tur por keda sin èksküs.”2 Aunke Ellen White a enfatisá enfátikamente ku su eskritonan nunka mester a ser konsiderá parti di Beibel, sinembargo nan ta inspirá. Hopi di e profetanan di mas grandi di Dios manera Elias, Eliseo, i Juan Boutista a ser inspirá, sinembargo nan no a skirbi ningun buki di Beibel. E eskritonan di Ellen White por ser deskribí komo un lus menor pa hiba na e lus mas grandi, Beibel. Nan ta fungi komo un komentario inspirá riba Skritura, pero Beibel ta sigui ta e outoridat supremo.
  2. Di dos Prueba – Siña e Bèrdat Tokante Hesus
    E bukinan di Ellen White manera The Desire of Ages, Christ’s Object Lessons, Steps to Christ, i Thoughts from the Mount of Blessing, tur ta testifiká di su kumplimentu di e prueba akí. E no ta bisa nada di su mes den e tomonan akí, sino konstantemente e ta mustra otronan riba Hesus.
  3. Di tres Prueba – Un Bida Piadoso
    Prensa, komentando riba e morto di Ellen White, a bisa: “E bida di Sra. White ta un ehèmpel digno di imitashon dor di tur hende. ... E tabata un disipel humilde i deboto di Kristu, i semper a bai rònt hasiendo bon. ... E tabata ser onrá i respetá pa tur ku ta apresiá e feminidat noble konsagrá na trabou apnegá pa elevashon i mehorashon di humanidat. Su morto ta marka e yamada di un otro lider konosí di pensamentu religioso i un ku su kasi nobenta añanan tabata yen te abundante ku bon obranan, palabranan amabel, i orashonnan sinsero pa henter humanidat.”3
  4. Di kuater Prueba – Profesianan Eksakto
    E poko profesianan di futuro hasí pa Ellen White por ser validá fásilmente. E siguiente pronóstiko ta zona manera e korant di awe mainta, pero a ser skirbí promé ku mayoria di e medionan moderno di biahe a ser inventá. “Desasternan ku trein lo bira mas i mas frekuente: konfushon, choke, i morto sin aviso previo lo sosodé riba e rutanan grandi di biahe.”4

Ellen White a biba durante un tempu ku dòkternan tabata defendé humamentu pa benefisiá e pulmonnan. Tabata eksistí opinion médiko variante, pero no tabatin prueba sientífiko real disponibel. Nutrishon tabata un siensia deskonosí. Sinembargo den e ambiente akí, Ellen White a skirbi tomonan riba tereno di salú i nutrishon. Dr. Clive McCay, eksprofesor di nutrishon na Cornell University, a konfirmá e eksaktitut di e eskritonan di Ellen White riba tereno di nutrishon: “Apesar di e echo ku e obranan di Sra. White a ser skirbí hopi tempu promé ku e binida di nutrishon sientífiko moderno, no tin un mihó guia general disponibel awe.”5

Beibel a pronostiká ku den e último dianan e don profétiko lo a aparesé. Evidensia ta deklará ku Ellen White a kumpli ku tur spesifikashon di Beibel pa un berdadero profeta. Nos lo ke enkurashábo pa optené i lesa algun di su eskritonan i sigui e instrukshon bíbliko pa “no despresiá profesia. Saminá tur kos, tene duru na loke ta bon.” 1 Tesalonisensenan 5:20,21.

1 The Great Controversy (Mountain View, CA: Pacific Press, 1950), p. 204, 205.
2 Testimonies for the Church (Mountain View, CA: Pacific Press, 1949), Tomo 2, p. 605.
3 Star (St. Helena, California), 23 di yüli 1915.
4 Messages to Young People (Washington, DC: Review and Herald, 1930), p. 90 (tumá over for di artíkulo den Signs of the Times, 21 di aprel 1890).
5 Clive M. McCay, “A Nutritional Authority Discusses Mrs. E.G. White,” Review and Herald, 26 di febrüari 1959, p. 10.