Lès 23

Un Bòter di Zeta
i e Spiritu di Mas Poderoso
na mundu

1. Den Beibel, kiko ta ser simbolisá pa un butishi i zeta?

Echonan 9:15. Pero Señor a bis’é: “Bai bo kaminda, pasobra e ta un instrumènt skohí pa mi.

1 Samuel 16:13. E ora ei Samuel a kohe e kachu di zeta, i a ungié meimei di su rumannan, i e spiritu di SEÑOR a baha riba David.

NOTA: Beibel ta siña ku Dios ta e alfarero i nos ta e pòchinan di klei (Jeremias 18:1-6; Romanonan 9:20,21). Tur hende ta kreá ku un propósito. Zeta ta ser usá den henter Beibel komo un símbolo di e Spiritu di Dios. Zeta di oleifi puru tabata ser usá pa tene e lampi sendé kla den e tèmpel hebreo komo un ilustrashon di kon Su Spiritu Santu ta iluminá nos mente. Ta e deseo di Dios pa yena tur Su pueblo ku Su Spiritu (Joel 2:28).

2. Spiritu Santu ta un forsa impersonal, òf E ta Dios?

Echonan 5:3,4. Ma Pedro a bisa: Ananias, pakiko Satanas a yena bo kurason pa gaña Spiritu Santu? … bo no a gaña hende, sino Dios.

Efesionan 4:30. I no hasi Spiritu Santu di Dios tristu, pa medio di Ken boso a ser seyá te na e dia di redenshon.

NOTA: Apòstel Pedro a deklará ku gaña Spiritu Santu ta nifiká gaña Dios. Ademas, Hesus a bisa nos pa batisá den nòmber di Tata, Yu i Spiritu Santu (Mateo 28:19,20), indikando asina ku Spiritu Santu ta e di tres persona di e Divinidat, poné den pleno igualdat ku e Tata i e Yu.

Beibel ta deklará tambe ku nos por hasi e Spiritu tristu, loke ta nifiká ku E tin emoshonnan. E no ta simplemente un forsa impersonal. Den Skritura Spiritu Santu ta ser referí na dje komo Konsoladó, Spiritu Santu, Spiritu di bèrdat, Spiritu di Señor, e shete Spiritunan di Dios, i simplemente e Spiritu. Tur e títulonan akí ta indiká personalidat.

3. Kiko ta e obra prinsipal di Spiritu Santu?

Juan 16:13. Ora e, e Spiritu di bèrdat, bini, E lo konvensé boso den tur bèrdat ... i E lo mustra boso kosnan ku ta bini.

Juan 14:26. E lo siña boso tur kos, i trese tur kos na boso memoria, tur loke Mi a bisa boso.

NOTA: Hesus a primintí di ta ku nos semper, i ta pa medio di e persona di Spiritu Santu E ta ku nos i den nos (Juan 14:17).

4. Kua ta esun piká ku no por ser pordoná?

Mateo 12:32. Ma ken ku papia blasfemia kontra Spiritu Santu, lo no ser pordoná.

NOTA: Blasfemia kontra Spiritu Santu no ta un solo ofensa, sino un resistensia progresivo na bèrdat ku ta resultá den un rechaso final di e boluntat di Dios (Hebreonan 10:26,27). E konsenshi ta bira insensibel ora un persona ta oponé i neglishá e impreshonnan di Spiritu Santu repetidamente te ora e no tende Su bos mas. P’esei, un persona ku tin un miedu inkietante ku el a kometé e “piká imperdonabel” muy probablemente no a hasié.

5. Kua ta algun di e donnan di Spiritu ku un persona lo por risibí?

1 Korintionan 12:8-10. Pasobra na un ta ser duná dor di e Spiritu e palabra di sabiduria; na un otro e palabra di konosementu …; Na un otro fe …; na otro e donnan di sanashon dor di e mesun Spiritu; na un otro obramentu di milager; na un otro profesia; na un otro disernimentu di spiritu; na un otro vários tipo di lenga; na un otro interpretashon di lenga.

NOTA: Ora Spiritu Santu bin den nos bida, E ta trese diferente donnan. No ta tur hende ta risibí e mesun donnan (1 Korintionan 12:29-31). Skritura hopi biaha ta enfatisá e importansia di ta yená ku e Spiritu. Hesus a siña den Juan 3:5 ku “Si un hende no nase di awa i di Spiritu, e no por drenta e reino di Dios.” Lamentablemente, Spiritu Santu i Su obra hopi biaha ta ser mal komprondé. Algun hende ta ser siñá ku Spiritu Santu ta un forsa impersonal; otronan ta nenga Su influensia den asuntunan diario di hende; i otronan ainda ta ser siñá ku tur hende ku ta yená ku Spiritu Santu mester papia den lenga.

6. Kua don spiritual a bira un tema di kontroversia den e iglesia di Korinto?

1 Korintionan 14:1,2. Deseá donnan spiritual, ma mas bien pa boso por profetisá. Pasobra esun ku ta papia den un lenga deskonosí no ta papia ku hende, sino ku Dios.

NOTA: Meskos ku den e dianan di e iglesia kristian primitivo, e don di lenga a bolbe bira un tema di konfushon i kontroversia. P’esei nos a dediká un porshon grandi di e lès akí na splika kiko Beibel ta siña tokante e don spiritual akí.

7. Kon Hesus a primintí di yuda Su disipelnan prediká e evangelio na henter mundu?

Marko 16:17. Nan lo papia den lenga nobo.

NOTA: Den Beibel, e palabra “lenga” ta nifiká simplemente “idioma.” E disipelnan di Hesus tabata hòmbernan briante, pero mayoria no tabata eduká. Pa yuda nan hiba e evangelio na mundu, Hesus a primintí di duna nan un don sobrenatural pa papia idiomanan strañero ku nan no a studia òf a konosé anteriormente.

8. Kiko a pasa ora e disipelnan a risibí e dramamentu di Spiritu Santu?

Echonan 2:1,4. I ora e dia di Pentekòster a yega kompletamente, ... nan tur a ser yená ku Spiritu Santu, i a kuminsá papia ku otro lenganan, manera e Spiritu a duna nan pa nan papia.

NOTA: Pentekòster tabata un dia santu hudiu ku tabata ser selebrá 50 dia despues di Pasku. Hudiunan deboto di tur parti di mundu tabata bin Jerusalèm pa adorá. Pa medio di Su Spiritu, Dios a duna e don di lenga na e tempu akí pa empoderá e disipelnan pa kompartí e evangelio ku e hendenan akí den nan idiomanan nativo. Esnan ku a kere e ora ei tabata hiba e bon notisia bèk na nan respektivo paisnan.

9. Kiko e hudiunan strañero akí a eksperensiá ora Spiritu Santu a ser dramá?

Echonan 2:11. Nos ta tende nan papia den nos lenga e obranan maravioso di Dios.

NOTA: Tin biaha ta ser sugerí ku e don di lenga ta un “idioma selestial” komprondé solamente dor di Dios òf dor di esnan ku tin e don di interpretashon. Beibel ta mustra klaramente ku tantu e disipelnan komo esnan ku tabata skucha tabata komprondé loke tabata ser prediká: “e obranan maravioso di Dios.” Tin solamente tres ehèmpel di papiamentu den lenga duná den Skritura. Nos a wak e promé; awor laga nos analisá e último dos pa un bista mas kla di e don akí.

10. Kiko a pasa ora Pedro a prediká na Cornelio i e hendenan di su kas?

Echonan 10:44,46. Miéntras Pedro tabata papia e palabranan akí ainda, Spiritu Santu a kai riba tur esnan ku tabata tende e palabra. … Pasobra nan a tende nan papia den lenga, i a glorifiká Dios.

NOTA: Cornelio tabata di e batayon italiano (Echonan 10:1), miéntras ku Pedro tabata un hudiu i tabata papia arameo. Historia ta bisa nos tambe ku e sirbidónan den un kas romano por tabata di kualke parti di mundu. Konsekuentemente, tabatin bareranan di idioma na e reunion akí. Sinembargo, ora Spiritu Santu a kai riba Cornelio i e hendenan di su kas, e hòmbernan ku tabata kompañá Pedro por a komprondé ora nan tabata papia den otro idiomanan fuera di nan idiomanan nativo. Nan a tende nan “magnifiká Dios” den e idiomanan akí. Ora ku despues el a informá e eksperensia akí na lidernan di iglesia na Jerusalèm, Pedro a bisa: “Spiritu Santu a baha riba nan, meskos ku El a baha riba nos na prinsipio.” Echonan 11:15, (énfasis agregá). Cornelio i su kas a risibí e mesun don di lenga ku e disipelnan a risibí riba dia di Pentekòster. Nan tabata papia idiomanan ku por a ser komprondé.

11. Kiko a pasa ora Pablo a prediká na 12 disipel di Efeso?

Echonan 19:6. Spiritu Santu a bini riba nan; i nan a papia den lenga, i tabata profetisá.

NOTA: Pablo, kende tabata esun di mas eduká i ku a biaha mas di e apòstelnan, tabata papia hopi idioma (1 Korintionan 14:18). Ora Spiritu Santu a baha riba e 12 hòmbernan akí di Efeso, Pablo i Lukas por a komprondé ora nan tabata profetisá den idiomanan ku nan no tabata konosé anteriormente.

12. Kiko Beibel ta bisa tokante papia den un lenga ku no ta ser komprondé?

1 Korintionan 14:9. Si boso no pronunsiá pa medio di lenga palabranan fásil pa ser komprondé, kon hende lo por sa kiko ta ser papiá?

1 Korintionan 14:19. Mi ta preferá di papia sinku palabra ku mi komprondementu, ku pa medio di mi bos lo mi por siña otronan tambe, ku dies mil palabra den un lenga deskonosí.

NOTA: Repetidamente Pablo ta splika ku e propósito di un lenga (idioma) ta pa komuniká òf pa siña bèrdat. Un palabra griego pa “deskonosí” no ta ser hañá den ningun manuskrito original di Beibel, pero a ser suministrá dor di traduktornan pa indiká ku e idioma tabata straño pa e mayoria presente. E iglesia na Korinto tabata un krisol di hopi diferente nashonalidat, i tin biaha e sirbishinan tabata bira konfuso ora miembronan tabata hasi orashon, duna testimonio, òf prediká den idiomanan deskonosí pa e otronan presente.

Esaki ta e motibu pakiko Pablo a ordená nan pa keda ketu, si nan tabata papia den un lenga deskonosí pa e mayoria, a ménos ku tabatin un hende einan pa interpretá (1 Korintionan 14:28). E lès pa nos ta ku nos no mester papia òf hasi orashon den un lenga ku otronan presente no por komprondé.

13. Kiko tabata un di e karakterístikanan prinsipal di Babilonia antiguo?

Génesis 11:7,9. Laga nos baha bai, i einan konfundí nan idioma, pa nan no komprondé otro su abla. … P’esei su nòmber ta ser yamá Babel.

NOTA: E toren di Babel ta e lugá kaminda e idiomanan di mundu a ser konfundí pa promé biaha. E palabra hebreo pa tantu Babel komo Babilonia ta “babel,” ku ta nifiká “konfushon.” Den Revelashon 18, Dios ta yama Su pueblo pa sali for di Babilonia spiritual. Un di e karakterístikanan di Babilonia spiritual ta un konfushon di lenga.

14. E Spiritu ta yena esnan ku deliberadamente ta kibra e mandamentunan di Dios?

Juan 14:15-17. Si boso ta stimaMi, warda Mi mandamentunan. I lo Mi pidi e Tata, i e lo duna boso un otro Konsolador, … esta e Spiritu di bèrdat.

Echonan 5:32. Spiritu Santu, Kende Dios a duna na esnan ku ta obedes'E.

NOTA: E poder tremendo di Spiritu Santu no por biba den esnan ku ta nenga di obedesé e mandamentunan di Dios.

15. Pablo a enfatisá ku nos mester deseá kua don spiritual?

1 Korintionan 14:4,5. Esun ku papia den un lenga deskonosí ta edifiká su mes; ma esun ku ta profetisá ta edifiká e iglesia. … Mas grandi ta esun ku ta profetisá ku esun ku ta papia den lenga.

1 Korintionan 14:12. Komo ku boso ta diligente den donnan spiritual, trata pa boso por sobresalí pa edifikashon di iglesia.

NOTA: Apesar di e echo ku Pablo a duna mas importansia na e don di profesia ku na e don di lenga, algun ta siña awor ku tur persona ku ta yená ku Spiritu Santu lo papia den lenga.

For di mas ku 25 ehèmpel bíbliko di Dios yenando Su pueblo ku e Spiritu, solamente tres biaha e don di lenga tabata konektá kuné. Di e 14 bukinan di Tèstamènt Nobo skirbí dor di apòstel Pablo, e ta menshoná lenga den solamente un: 1 Korintionan. Di e 27 bukinan den Tèstamènt Nobo, solamente tres, bon mirá, ta hasi kualke referensia na papiamentu den lenga.

16. Kua ta e motibu prinsipal pakiko Dios ta yena hende ku Su Spiritu?

Echonan 1:8. Ma boso lo risibí poder, despues ku Spiritu Santu bini riba boso: i boso lo ta testigunan di Mi.

Echonan 4:31. Nan tur a ser yená ku Spiritu Santu, i nan a papia e palabra di Dios ku kurashi.

NOTA: Dios ta yena nos ku Su Spiritu pa duna nos poder pa testifiká!

17. Ta posibel pa bisa si un persona a ser yená ku Spiritu Santu òf nò?

Mateo 7:20. P’esei pa medio di nan fruta boso lo konosé nan.

NOTA: Nos ta determiná ku un persona a risibí e boutismo di Spiritu Santu no pa medio di e donnan di e Spiritu, sino pa medio di e frutanan di e Spiritu, ku ta amor, goso, pas, pasenshi, suavedat, bondat, fe, mansedumbre, i temperansia (Galationan 5:22,23).

18. Kon mi por risibí e boutismo di Spiritu Santu?

Lukas 11:13. Si boso anto, siendo malbado, sa kon pa duna bon regalonan na boso yunan, kuantu mas boso Tata selestial lo duna e Spiritu Santu na esnan ku ta pidiE?

NOTA: Meskos ku Hesus tabatin e Spiritu sin midí, nos por pidi Dios pa yena nos kopanan te ora nan basha over, pero nos mester ta dispuesto promé pa hasi nos mes bashí dor di someté nos kurason.

19. Hesus ta sperando i ta anhelando pa basha e zeta presioso di Spiritu Santu den bo bida. Lo bo ke pidiE awor pa tuma poseshon di bo mente i kurason?