Lès 24

Riba e Multitut

1. Kon Dios ta determiná si nos ta na Su banda òf nò?

Mateo 7:21. No ta tur hende ku bisa Mi: Señor, Señor, lo drenta e reino di shelu; ma esun ku hasi e boluntat di Mi Tata ku ta den shelu.

Romanonan 6:16. Boso no sa ku, na ken boso entregá boso mes komo sirbidó pa obedesé, boso ta sirbidó di esun ku boso ta obedesé? Sea di piká na morto, òf di obediensia na hustisia?

NOTA: Ta un prinsipio simpel ku nos lealtat ta ser determiná dor di esun ku nos ta skucha. Si nos bisa ku nos ta sirbidónan di Dios pero ta tuma nos instrukshonnan for di diabel òf mundu, nos ta gañando nos mes.

2. Ora e mandamentunan di Dios i di hende ta den konflikto, ken Pedro a bisa ku nos mester obedesé?

Echonan 5:29. E ora ei Pedro i e otro apòstelnan a kontestá i a bisa: Nos mester obedesé Dios mas bien ku hende.

NOTA: Despues ku Pedro a kombertí i a namorá di Hesus, el a bisa e konseho hudiu ku su promé lealtat tabata na Dios. Nos a siña ku den e último dianan, e leinan di e bestia i mundu lo ta den konflikto ku e leinan di Dios. Nos mester skohe awor pa obedesé e leinan di Dios, sin importá e konsekuensianan.

3. Kon nos por demostrá nos amor pa Dios mihó?

Juan 8:31. Si boso keda den Mi Palabra, e ora ei boso ta Mi disipelnan di bèrdat.

Juan 14:15. Si boso ta stimaMi, warda Mi mandamentunan.

1 Juan 2:4. Esun ku bisa: Mi konos'E, ma no ta warda Su mandamentunan, ta un gañadó, i bèrdat no ta den dje.

NOTA: E mihó demostrashon di un persona su amor pa Hesus ta pa hasi Su boluntat, i e lei di Dios ta e ekspreshon di mas perfekto di Su boluntat (Salmo 40:8).

4. Segun Hesus, dikon e hipókritanan a aktua religioso?

Mateo 6:2. Ku nan por tin honor di hende.

Mateo 6:5. Pa nan por ser mirá dor di hende.

NOTA: Beibel ta bisa nos ku “hende ta wak e aparensia di pafó, ma Señor ta wak e kurason.” 1 Samuel 16:7. Un kristian genuino lo ta muchu mas preokupá ku loke Dios ta pensa di dje ku loke mundu ta pensa.

5. Ta safe generalmente pa sigui e multitut?

Eksodo 23:2. Bo no mester sigui un multitut pa hasi maldat.

Mateo 7:13,14. Drenta dor di e porta smal, pasobra hanchu ta e porta i espasioso ta e kaminda ku ta hiba na destrukshon, i hopi ta esnan ku ta drenta dor di dje: pasobra smal ta e porta i smal ta e kaminda ku ta hiba na bida, i tiki ta esnan ku ta hañ'e.

1 Pedro 3:20. Den e dianan di Noe, miéntras ku e arka tabata den preparashon, den kua poko, esta, ocho alma a ser salbá dor di awa.

NOTA: Historia ta parse di ta indiká ku e multitut kasi semper ta tuma e desishonnan robes. Tabata e multitut ku ker a piedra Moises i bai bèk na e sklabitut di Egipto (Numbernan 14:4-10). Tabata e multitut ku a grita: “Krusifik’E, krusifik’E.” Lukas 23:21. I lo ta e mayoria, no e minoria, ku ta risibí e marka di e bestia den e último dianan (Revelashon 13:16).

6. Kon Hesus ta sinti ora nos pone e tradishonnan di hende promé ku e mandamentunan di Dios?

Marko 7:7,9. Sinembargo, en bano nan ta adoráMi, siñando pa doktrina e mandamentunan di hende. … I El a bisa nan: Totalmente bon boso ta rechasá e mandamentu di Dios, pa boso por warda boso mes tradishon.

7. Berdadero kristianismo lo ta popular den e último dianan?

Mateo 24:9. Boso lo ta odiá dor di tur nashon pa motibu di Mi nòmber.

2 Timoteo 3:12. Si, i tur esnan ku ke biba deboto den Kristu Hesus lo sufri persekushon.

Revelashon 12:17. I e dragon tabata furioso riba e muhé, i a bai pa hasi guera ku e restu di su desendientenan.

Revelashon 13:15. I pone ku tur esnan ku no ke adorá e imágen di e bestia ta ser matá.

NOTA: Den e último dianan, Satanas i su siguidónan lo hiba un guera total kontra e yunan genuino di Dios ku ta kere den Beibel.

8. Ta posibel pa sirbi tantu Dios komo e multitut?

Mateo 6:24. Niun hende por sirbi dos doño: pasobra sea e lo odia esun, i stima e otro; òf e lo tene na esun, i despresiá e otro.

Mateo 12:30. Esun ku no ta ku Mi ta kontra Mi.

NOTA: Den e bataya akí entre Kristu i Satanas, no tin teritorio neutral. Ta imposibel pa ta neutral komo un ekspektador. Si nos no ta koperá ku Hesus, de echo nos ta yudando diabel.

9. Ta safe pa stima un amigu òf miembro di famia mas ku Hesus?

Mateo 10:37. Esun ku stima su tata òf mama mas ku Mi no ta digno di Mi, i esun ku stima yu hòmber òf yu muhé mas ku Mi no ta digno di Mi.

Lukas 14:26. Si un hende bin serka Mi, i no ta odia [stima ménos íntimamente] su tata, i mama, i esposa, i yunan, i ruman hòmbernan, i ruman muhénan, i su mes bida tambe, e no por ta Mi disipel.

Mateo 12:50. Pasobra ken ku hasi e boluntat di Mi Tata ku ta den shelu, esei ta Mi ruman hòmber, i ruman muhé, i mama.

NOTA: Hesus ta indiká aki ku e mihó manera pa yuda alkansá i salba nos sernan kerí ta pa pone E na promé lugá den nos bida. Semper ta un eror trágiko pa pone nos afektonan natural pa famia òf amigunan promé ku nos promé obligashon na nos Salbador i Kreador.

10. Ta sabí pa pone un karera próspero òf tesoronan terenal promé ku Hesus?

Mateo 16:26. Pasobra ki probecho un hende tin si e gana henter mundu, i pèrdè su mes alma? òf kiko un hende por duna a kambio di su alma?

Lukas 12:15. Bida di un hende no ta konsistí di e abundansia di e kosnan ku e ta poseé.

NOTA: E kreensia ku felisidat i seguridat ta bini di un bon trabou i kosnan bunita ta un engaño mortal. Al kontrario, Hesus a bisa: “Ta mas fásil pa un kamel pasa dor di wowo di un angua, ku pa un hende riku drenta e reino di Dios.” Marko 10:25.

11. Ta safe pa sigui desobedesé e boluntat di Dios despues ku El a mustra nos e bèrdat?

Oseas 4:6. Mi pueblo ta ser destruí pa falta di konosementu: pasobra bo a rechasá konosementu, lo Mi rechasá bo tambe. … Mirando ku bo a lubidá e lei di bo Dios, lo Mi lubidá bo yunan tambe.

Hebreonan 10:26. Pasobra si nos peka boluntariamente despues ku nos a risibí konosementu di e bèrdat, no ta keda mas sakrifisio pa piká.

12. Kiko lo pasa ku esnan ku ta persistí den rechasá e bèrdat?

2 Tesalonisensenan 2:10-12. I ku tur engaño di inhustisia den esnan ku ta peresé; pasobra nan no a risibí e amor di e bèrdat, pa nan por ser salbá. I pa e motibu akí Dios lo manda nan engaño fuerte, pa nan kere un mentira: pa nan tur por ser kondená ku no a kere e bèrdat, ma tabatin plaser den inhustisia.

Juan 3:19 I esaki ta e kondenashon, ku lus a bini den mundu, i hende a stima skuridat mas bien ku lus, pasobra nan echonan tabata malu.

NOTA: Skrituranan ta siña ku Hesus ta e bèrdat (Juan 14:6). Aseptá òf rechasá e bèrdat den kualke grado ta nifiká aseptá òf rechasá Hesus.

13. Esnan ku ta persiguí e pueblo di Dios den e último dianan lo kere ku nan ta hasiendo loke ta korekto?

Juan 16:2. Sí, e tempu ta yega, ku ken ku mata boso lo pensa ku e ta hasi Dios un fabor.

14. Kon Pedro a deskribí esnan ku a siña e bèrdat, ma ta nenga di siguié?

2 Pedro 2:21,22. Pasobra lo tabata mihó pa nan, si nan no a konosé e kaminda di hustisia, ku, despues ku nan a konos'e, a bira for di e mandamentu santu entregá na nan. Ma a sosodé ku nan konforme e proverbio berdadero: E kachó ta bolbe na su mes saká; i e porko ku a ser bañá na su loramentu den e lodo.

15. Sigui Hesus ta envolví algun lucha i nengamentu propio?

Lukas 9:23. Si un hende ke siguiMi, lag’é nenga su mes, i karga su krus tur dia, i siguiMi.

16. Ta safe pa suspendé òf posponé un desishon pa sigui Hesus?

Hebreonan 4:7. Awe si boso tende Su bos, no hasi boso kurason duru.

Hebreonan 2:3. Kon nos lo skapa, si nos neglishá un salbashon asina grandi?

2 Korintionan 6:2. Mira, awor ta e tempu aseptabel; mira, awor ta e dia di salbashon.

NOTA: E mihó tempu pa skucha e bos di Dios ta ora bo ta tende esaki, i e mihó tempu pa hasi e boluntat di Dios ta ora E ta mustrabo Su boluntat. E trampa favorito di Satanas ta pa gaña hende pa pensa ku nan tin hopi tempu pa tuma e desishon akí. Diabel sa ku e bos konvinsente di e Spiritu di Dios lo bira ketu si e ser ignorá. Inkontabel miónes di hende lo bai pèrdí ku tabata planiando sinseramente pa sigui Hesus un dia den futuro, pero “algun dia” nunka a yega.

17. Ki benefisio ta bini komo resultado di aseptá i sigui e bèrdat?

Salmo 119:165. Gran pas esnan, ku ta stima Bo lei, tin: i nada lo ofendé nan.

Juan 8:32. I boso lo konosé e bèrdat, i e bèrdat lo hasi boso liber.

1 Pedro 1:22. Mirando ku boso a purifiká boso alma dor di obedesé e bèrdat pa medio di Spiritu.

NOTA: Tremendo pas, siguridat, i libertat ta bini den kurason i bida di esnan ku ta risibí i obedesé e bèrdat.

18. Ki pregunta Hesus a hasi Pedro tres biaha?

Juan 21:17. El a bis’é pa di tres biaha: “Simon, yu di Jonas, bo ta stimaMi?”

NOTA: Esaki ta e pregunta di mas importante ora ta trata di un entrega total i kompletu na e boluntat di Dios. Bo ta stim’E?

19. E bèrdat nunka lo ta popular den e mundu pekaminoso akí, i kasi semper e multitut lo kohe e kaminda fásil. Pero Hesus a mustra Su amor inkreibel pa bo dor di duna Su bida pa paga e preis pa tur bo pikánan. Señor tin un gran plan pa bo bida. Esaki ta e motibu pakiko El a revelá Su bèrdat na bo. Lo bo debolbé e amor ei awor dor di dun’E henter bo kurason, dor di skohe pa asept’E komo bo Señor, i dor di sigui kaminda E ta guia?