Fe di Tèstamènt Bieu

Lesa Galationan 3:1-5. Resumí akibou loke Pablo ta bisando nan. Den ki sentido nos por ta den peliger di kai den e mesun trampa spiritual, di kuminsá korekto i despues kai den legalismo?

Vários tradukshon moderno a purba kapta e sentido di e palabranan di Pablo den versíkulo 1 tokante e Galationan “bobo”. E palabra aktual ku Pablo ta uza na Griego ta ainda mas fuerte ku esei. E palabra ta anoetoi, i e ta bin for di e palabra pa mente (nous). Literalmente e ta nifiká “sin sintí”. E Galationan no tabata pensa. Pablo no ta stòp einan; e ta bisa ku, pasobra nan ta aktua asina bobo, e ta puntra su mes si algun mago a fukia nan. “Ken a brua boso kabes?” Su eskoho di palabra akinan asta por sugerí ku e fuente final tras di nan kondishon ta diabel (2 Kor. 4:4).

Loke ta konfundí Pablo asina tantu tokante e apostasia di e Galationan riba e evangelio ta ku nan tabata sa ku salbashon tabata ankrá den e Krus di Kristu. No tabata algu ku nan por a faya. E palabra tradusí “deskribí” òf “establesé” (KJV) den Galationan 3:1 literalmente ta nifiká “kubrí” òf “pintá”. E tabata ser uzá pa deskribí tur proklamashon públiko. Pablo ta bisando ku e Krus tabata un parti asina sentral di su predikamentu ku e Galationan tabatin, en efekto, mira den wowo di nan mente Kristu krusifiká (1 Kor. 1:23, 2:2). Den un sentido, e ta bisando ku, pa medio di nan akshonnan, nan ta birando bai for di e Krus.

Pablo e ora ei ta kontrastá e eksperensia aktual di e Galationan ku kon nan a yega na fe den Kristu pa promé biaha. E ta hasi esaki dor di hasi nan algun pregunta retóriko. Kon nan a risibí e Spiritu, ku ta nifiká kon nan a bira Kristian na promé lugá? I for di un perspektiva poko diferente, Dikon Dios a duna e Spiritu? Tabata pasobra nan a hasi algu pa gan’é? Siguramente nò! En kambio, tabata pasobra nan a kere e bon notisia di kiko Kristu ya a hasi pa nan. Ya ku nan a kuminsá asina bon, kiko lo a pone nan pensa ku awor nan mester a dependé riba nan propio komportashon?

Te asina leu, den su karta na e Galationan, Pablo a defendé su evangelio di hustifikashon pa fe dor di apelá na e akuerdo alkansá ku e apòstelnan na Yerusalèm (Gal. 2:1–10) i na e eksperensia personal di e Galationan mes (Gal. 3:1–5). Kuminsando den Galationan 3:6, Pablo awor ta bira na e testimonio di Skritura pa e último konfirmashon di su evangelio. De echo, Galationan 3:6-4:31 ta konsistí di argumentunan progresivo ankrá den Skritura.

Kiko Pablo ke men ora e skirbi tokante e “Skritura” den Galationan 3:6-8? Konsiderá Rom. 1:2, 4:3, 9:17.

Ta importante pa kòrda ku na momentu ku Pablo a skirbi su karta na e Galationan no tabatin “Tèstamènt Nobo”. Pablo tabata e promé eskritor di Tèstamènt Nobo. E Evangelio di Marko ta probablemente e promé di e kuater evangelionan, pero probablemente e no a ser skirbí te rònt di e tempu di morto di Pablo (A.D. 65), es desir, masoménos diesinku aña despues di e karta di Pablo na e Galationan. Asina, ora Pablo ta referí na e Skrituranan, e tabatin solamente Tèstamènt Bieu den mente.

E Skrituranan di Tèstamènt Bieu ta hunga un papel importante den e siñansanan di Pablo. E no ta wak nan komo tèkstnan morto ma komo e Palabra outoritativo i bibu di Dios. Den 2 Timoteo 3:16 e ta skirbi: “Tur Skritura ta duná pa inspirashon di Dios.” E palabra tradusí “inspirashon” ta theopneustos. E promé parti di e palabra (theo) ta nifiká “Dios”, miéntras e di dos mitar ta nifiká “respirá”. Skritura ta “respirá pa Dios”. Pablo ta uza Skritura pa demostrá ku Hesus ta e Mesias primintí (Rom. 1:2), pa duna instrukshon den bida Kristian (Rom. 13:8-10), i pa proba e balides di su siñansanan (Gal. 3:8, 9).

Ta difísil pa determiná eksaktamente kuantu shen biaha Pablo ta sita Tèstamènt Bieu, pero sitanan ta ser hañá dor di tur su kartanan, eksepto esnan di mas kòrtiku, Tito i Filemon.

Lesa Galationan 3:6-14 kuidadosamente. Identifiká e pasashinan ku Pablo ta sita for di Tèstamènt Bieu den e versíkulonan ei. Kiko esei ta bisabo tokante kon outoritativo Tèstamènt Bieu tabata?

Dikon bo ta pensa ku Pablo a apelá promé na Abraham ora e ta wak e Skrituranan pa konfirmá su mensahe di evangelio? (Gal. 3:6).

Abraham tabata un figura sentral den Hudaismo. No solamente e tabata e tata di e rasa Hudiu, ma Hudiunan den tempu di Pablo tabata wak e tambe komo e prototipo di kon un berdadero Hudiu mester tabata. Hopi no tabata kere solamente ku su karakterístika definí tabata su obediensia ma ku Dios a deklará Abraham hustu pa motibu di e obediensia ei. Despues di tur kos, Abraham a bandoná su pais i famia, e a aseptá sirkumsishon, i e tabata asta dispuesto pa sakrifiká su yu hòmber riba mandato di Dios. Esei ta obediensia! Ku nan insistensia riba sirkumsishon, e oponentenan di Pablo siguramente tabata argumentá a lo largu di e mesun liñanan.

Pablo, sinembargo, ta kambia e situashon dor di apelá na Abraham, nuebe biaha den Galationan, komo un ehèmpel di fe na lugá di wardamentu di lei.

Konsiderá Pablo su sitanan di Génesis 15:6. Kiko e ta nifiká ora e ta bisa ku Abraham su fe a ser “kontá . . . na dje pa hustisia”? (Lesa tambe Rom. 4:3–6, 8–11, 22–24.)

Miéntras hustifikashon tabata un metáfora tumá for di e mundu legal, e palabra kontá òf evaluá ta un metáfora saká for di e ámbito di negoshi. E por nifiká “akreditá” òf “pone algu riba kuenta di un hende”. No solamente e ta ser uzá di Abraham den Galationan 3:6, sino e ta aparesé un otro 11 biaha en konekshon ku e patriarka. Algun vershon di Beibel ta tradusié komo kontá, evaluá, òf imputá.

Di akuerdo ku e metáfora di Pablo, loke ta ser poné riba nos kuenta ta hustisia. E pregunta ta, sinembargo, Riba ki base Dios ta konta nos komo hustu? Siguramente no por ta a base di obediensia, apesar di loke e oponentenan di Pablo tabata pretendé. No importá kiko nan a bisa tokante e obediensia di Abraham, Skritura ta bisa ku tabata pa motibu di e fe di Abraham ku Dios a kont’é komo hustu.

Beibel ta kla: e obediensia di Abraham no tabata e base di su hustifikashon; e tabata, en kambio, e resultado. E no a hasi e kosnan ku e a hasi pa asina ser hustifiká; e a hasi nan pasobra ya e tabata hustifiká. Hustifikashon ta hiba na obediensia, no visevèrsa.

“I Skritura, mirando padilanti ku Dios lo a hustifiká e Paganonan pa fe, a prediká e evangelio ku antisipashon na Abraham, bisando: ‘Den bo tur e nashonnan lo ta bendishoná’ ” (Gal. 3:8, ESV). Pablo ta skirbi ku no solamente e evangelio a ser prediká na Abraham, ma tabata Dios kende a predik’é; asina, e mester tabata e evangelio berdadero. Pero ki ora Dios a prediká e evangelio na Abraham? E sita di Pablo di Génesis 12:3 ta indiká ku e tabatin e pakto den mente, ku Dios a hasi ku Abraham ora E a yam’é den Génesis 12:1-3.

Lesa Génesis 12:1-3. Kiko esaki ta bisa nos tokante e naturalesa di e pakto ku Dios a hasi ku Abraham?

E base di Dios Su pakto ku Abraham tabata sentrá riba e promesanan di Dios na dje. Dios ta bisa Abraham kuater biaha: “Lo Mi”. E promesanan di Dios na Abraham ta asombroso pasobra nan ta kompletamente di un banda. Dios ta hasi tur e primintimentu; Abraham no ta primintí nada. Esaki ta kontrali di kon mayoria hende ta purba relashoná ku Dios. Normalmente nos ta primintí ku nos lo sirbiE, si solamente E lo hasi algu pa nos bèk. Pero esei ta legalismo. Dios no a pidi Abraham pa primintí nada sino pa aseptá Su promesanan pa medio di fe. Naturalmente, esei no tabata un tarea fásil, pasobra Abraham mester a siña konfia kompletamente den Dios i no den su mes (lesa Génesis 22). E yamada di Abraham ta ilustrá, pa e motibu ei, e esensia di e evangelio, kua ta salbashon pa medio di fe.

Algun hende eróneamente ta konkluí ku Beibel ta siña dos forma di salbashon. Nan ta pretendé ku den tempunan di Tèstamènt Bieu salbashon tabata basá riba warda e mandamentunan; despues, pasobra esei no tabata funshoná masha bon, Dios a abolí e lei i a hasi salbashon posibel pa medio di fe. Esaki no por tabata mas leu for di e bèrdat. Manera Pablo a skirbi den Galationan 1:7, tin solamente un evangelio.

Ki otro ehèmpelnan bo por haña den Tèstamènt Bieu di salbashon pa medio di fe so? Lesa, por ehèmpel, Lev. 17:11, Salmo 32:1–5, 2 Sam. 12:1–13, Zak. 3:1–4.

E oponentenan di Pablo tabata sin duda strañá pa su palabranan yen di kurashi den Galationan 3:10. Siguramente nan no a pensa ku nan mes tabata bou di un maldishon; si tabatin algu, nan a spera ta ser bendishoná pa nan obediensia. Sinembargo, Pablo ta inekibokabel: “Pasobra tur esnan ku ta di e obranan di Lei ta bou di e maldishon; pasobra ta pará skirbí: ‘Maldishoná ta tur esnan ku no ta permanesé den tur e kosnan ku ta skirbí den e buki di Lei, pa hasi nan’ ” (NKJV).

Pablo ta kontrastá dos alternativa kompletamente diferente: salbashon pa medio di fe i salbashon pa medio di obra. E bendishonnan i maldishonnan di pakto deskribí den Deuteronomio 27 i 28 tabata direkto. Esnan ku tabata obedesé, tabata ser bendishoná, esnan ku tabata desobedesé tabata ser maldishoná. Esei ta nifiká ku si un persona ke dependé riba obediensia na e lei pa aseptashon ku Dios, e ora ei henter e lei mester ser wardá. Nos no tin e libertat pa piki i skohe kiko nos ke sigui; ni nos mester asumí ku Dios ta dispuesto pa no hasi kaso di un par di fayo aki i aya. Ta tur òf nada.

Esaki ta, naturalmente, mal notisia no solamente pa Paganonan ma pa e oponentenan legalístiko di Pablo tambe, pasobra nos “tur a peka, i ta falta e gloria di Dios” (Rom. 3:23). No importá kon duru nos purba pa ta bon, e lei por solamente kondená nos komo kibradónan di lei.

Kon Kon Kristu a libra nos for di e maldishon di e lei? Lesa Gal. 3:13, 2 Kor. 5:21.

Pablo ta introdusí un otro metáfora pa splika loke Dios a hasi pa nos den Kristu. E palabra redimí ta nifiká “kumpra bèk”. E tabata ser uzá komo e preis di reskate pagá pa liberá prezunan òf komo e preis pagá pa libra un esklabo. Pasobra pago di piká ta morto, e maldishon di faya di warda e lei tabata hopi biaha un sentensia di morto. E preis di reskate pagá pa nos salbashon no tabata insignifikante; e a kosta Dios e bida di Su propio Yu (Juan 3:16). Hesus a reskatá nos for di e maldishon dor di bira nos kargadó di piká (1 Kor. 6:20, 7:23). Boluntariamente E a tuma nos maldishon riba Su mes i a sufri na nos fabor e kastigu kompletu di piká (2 Kor. 5:21).

Pablo ta sita Deuteronomio 21:23 komo prueba skritural. Di akuerdo ku kustumber Hudiu, un persona tabata bou di maldishon di Dios si, despues di ehekushon, e kurpa a ser kologá riba un palu. E morto di Hesus a ser mirá komo un ehèmpel di e maldishon aki (Echonan 5:30, 1 Pe. 2:24).

Nada straño, anto, ku e krus tabata un piedra di trompeká pa algun Hudiu ku no por a komprondé e idea ku e Mesias a ser maldishoná dor di Dios. Pero esaki tabata eksaktamente e plan di Dios. Sí, e Mesias a karga un maldishon; pero no tabata di djE mes—tabata di nos!

“Riba Kristu komo nos supstituto i siguridat a ser poné e inikidat di nos tur. E a ser kontá komo un transgresor, pa E por a redimí nos for di kondenashon di e lei. E kulpa di tur desendiente di Adam tabata primi riba Su kurason. E rabia di Dios kontra piká, e teribel manifestashon di Su disgustu pa motibu di inikidat, a yena alma di Su Yu ku konsternashon. Henter su bida Kristu a bin ta publiká na un mundu kaí e bon nobo di e miserikòrdia di amor pordonadó di e Tata. Salbashon pa e pekadornan di mas grandi tabata Su tema. Pero awor ku e teribel peso di kulpa ku E ta karga, E no por mira e kara rekonsiliadó di e Tata. E retiro di e aparensia divino for di e Salbador den e ora aki di supremo angustia a bora Su kurason ku un tristesa ku nunka por ser komprondé kompletamente dor di hende. Asina grandi Su agonia tabata ku Su doló físiko apénas a ser sintí.”—Ellen G. White, The Desire of Ages, p. 753.

“Lutero awor a drenta yen di kurashi riba su trabou komo un kampion di e bèrdat. Su bos a ser tendé for di púlpito den spièrtamentu solèm i sinsero. E a pone dilanti di e pueblo e karakter ofensivo di piká, i a siña nan ku ta imposibel pa hende, pa medio di su propio obranan, pa mengua su kulpabilidat òf evitá su kastigu. Nada sino arepentimentu pa ku Dios i fe den Kristu por salba e pekador. E grasia di Kristu no por ser kumprá; e ta un don grátis. E a konsehá e pueblo pa no kumpra indulgensia, ma pa wak den fe na un Redentor krusifiká.”—Ellen G. White, The Great Controversy, p. 129.