E Kaminda na Fe

“E lei ta kontrali anto na e promesanan di Dios?” (Gal. 3:21, ESV).

Sintiendo ku su komentarionan lo por hiba su oponentenan na konkluí ku e tabatin un punto di bista di menospresio di e lei òf ku su komentarionan tokante e prioridat di Dios Su promesanan tabata djis un difamashon tapá di Moises i e Torah, Pablo ta hasi e mesun pregunta ku nan tabata pensando: “Boso ta bisando ku e lei ta kontradesí e promesanan di Dios?” Riba esaki Pablo ta respondé ku un enfátiko “Nò!” Un konklushon asina ta imposibel, pasobra Dios no ta kontra di Su mes. Dios a duna tantu e promesa komo e lei. E lei no ta den desakuerdo ku e promesa. Nan dos meramente tin diferente ròl i funshonnan den Dios Su plan general di salbashon.

Ki konseptonan robes e oponentenan di Pablo tabatin tokante e ròl di e lei? Kompará Gal. 3:21, Lev. 18:5, i Deut. 6:24.

E hendenan aki tabata kere ku e lei tabata kapas di duna nan bida spiritual. Nan puntonan di bista probablemente a surgi for di un interpretashon robes di pasashinan di Tèstamènt Bieu manera Levítiko 18:5 i Deuteronomio 6:24, kaminda e lei ta dirigí kon bida mester ser bibá dor di esnan ku ta keda den e pakto di Dios. E lei tabata regulá bida denter di e pakto, pero nan a konkluí ku e lei tabata e fuente di un persona su relashon ku Dios. Beibel ta kla, sinembargo, ku e abilidat pa “hasi bibu” ta un poder ehersé dor di Dios i Su Spiritu so (2 Reinan 5:7, Neh. 9:6, Juan 5:21, Rom. 4:17). E lei no por hasi ningun hende bibu spiritualmente. Esaki no ta nifiká, sinembargo, ku e lei ta kontrali na e promesa di Dios.

Buskando pa proba e inabilidat di e lei pa duna bida, Pablo ta skirbi den Galationan 3:22, “Skritura a enkarselá tur hende bou di piká” (ESV). Den Romanonan 3:9-19 Pablo ta hala for di un seri di versíkulonan saká for di Tèstamènt Bieu pa mustra presis kon malu nos ta. E pasashinan no a ser hilá huntu den un forma kon ku ta. E ta kuminsá ku e kurason di e problema di piká, e aktitut egoista ku ta pèsta kurasonnan humano, i despues ta move bai na e versíkulonan ku ta deskribí e popularidat di piká i finalmente su universalidat.

Su punto? Pa motibu di e ekstenshon di piká i e limitashonnan di e lei, e promesa di bida eterno ta yega serka nos solamente pa medio di e fieldat di Kristu na nos fabor. Aki, atrobe, tin e gran bèrdat ku a pone e Reforma Protestant den moveshon.

Den Galationan 3:23 Pablo ta skirbi ku “promé ku fe a bin, nos tabata wardá bou di lei.” Ku “nos” Pablo ta refiriendo na e kreyentenan Hudiu den e iglesianan Galatio. Nan ta esnan konosí ku e lei, i Pablo a bin ta papia ku nan en partikular for di Galationan 2:15. Esaki por ser mirá den e kontraste entre e “nos” den Galationan 2:23 i e “boso” den Galationan 3:26 (ESV).

Galationan 3:23 ta lesa: “Promé ku fe a bin”; pero den e Griego literal e ta bisa: “promé ku e fe” a bin. Pasobra Pablo ta kontrastando e lugá di e lei promé i despues di Kristu (Gal. 3:24), “e fe” ta mas probablemente un referensia na Hesus Mes i no un referensia na fe Kristian en general.

Pablo ta bisa ku e Hudiunan a ser wardá “bou di lei” promé ku binida di Kristu.

Kiko e ke men ku “bou di lei”? Kompará Gal. 3:22, 23 ku Rom. 6:14, 15; 1 Kor. 9:20; Gal. 4:4, 5, 21; 5:18.

Pablo ta uza e frase “bou di lei” diesdos biaha den su kartanan. Dependiendo riba su konteksto, e por tin un par di nifikashon diferente.

1. “Bou di lei” ta un forma alternativa di salbashon (Gal. 4:21). E oponentenan na Galatia tabata purba haña hustisia ku ta duna bida pa medio di obediensia. Sinembargo, manera Pablo a splika kaba, esaki ta imposibel (Gal. 3:21, 22). Despues Pablo ta asta mustra ku, dor di deseá di ta bou di lei, e Galationan realmente tabata rechasando Kristu (Gal. 5:2-4).
2. “Bou di lei” den sentido di ser bou di kondenashon (Rom. 6:14, 15). Pasobra e lei no por ekspiá pa piká, violashon di su demandanan finalmente ta resultá den kondenashon. Esaki ta e kondishon den kua tur ser humano ta haña nan mes. E lei ta aktua komo un guardia di prizon, serando tur ku a viol’é i a trese riba nan mes e sentensia di morto. Manera nos lo mira den e estudio di mayan, e uzo di e palabra guardia (Gal. 3:23, NKJV) ta indiká ku ta esaki ta loke Pablo ke men ku “bou di lei” den e pasashi aki.

Un palabra Griego ku ta relashoná kuné, ennomos, normalmente tradusí “bou di lei”, literalmente ta nifiká “denter di e lei” i ta referí na biba denter di e rekerimentunan di e lei pa medio di union ku Kristu (1 Kor. 9:21). Pa medio di “e obranan di lei”, es desir, dor di purba warda e lei separá for di Kristu, ta imposibel pa ser hustifiká, pasobra solamente esnan ku pa medio di fe ta hustu lo biba (Gal. 3:11). E bèrdat aki no ta anulá e lei; e ta mustra solamente ku e lei no por duna nos bida eterno. Ta demasiado lat pa esei

Pablo ta duna dos konklushon básiko tokante e lei:

1. e lei no ta anulá òf abolí e promesa d Dios hasí na Abraham (Gal. 3:15-10);
2. e lei no ta kontrali na e promesa (Gal. 3:21, 22).

Ki ròl e lei ta hunga anto en realidat? Pablo ta skirbi ku e a ser añadí “pa motibu di transgreshonnan” (Gal. 3:19), i e ta ekspandé riba e idea aki uzando tres diferente palabra òf frase en konekshon ku e lei: wardá (v. 23), será (v. 23), i tutor (v. 24).

Lesa ku hopi orashon i kuidadosamente Galationan 3:19-24. Kiko Pablo ta bisando tokante e lei?

Mayoria tradukshon moderno ta interpretá e komentarionan di Pablo tokante e lei den Galationan 3:19 den términonan kompletamente negativo. Pero e Griego original kasi no ta asina di un banda. E palabra Griego tradusí komo “wardá” (v. 23) literalmente ta nifiká “warda”. Ounke e por ser uzá den un sentido negativo, manera “tene den sumishon” òf “kuida” (2 Kor. 11:32), den Tèstamènt Nobo generalmente e tin un sentido mas positivo di “protehá” òf “warda” (Fil. 4:7, 1 Pe. 1:5). E mesun kos ta bèrdat di e palabra tradusí komo “sera” (Gal. 3:23). E por ser tradusí “sera” (Gen. 20:18; Eks. 14:3, Jos. 6:1, Yer. 13:19), “kohe” (Lukas 5:6), òf “limitá” (Rom. 11:32). Manera e ehèmpelnan aki ta indiká, dependiendo riba su konteksto, e palabra aki por tin sea nifikashonnan positivo òf negativo.

Ki benefishinan e lei (moral i seremonial) a proveé e yunan di Israel? Rom. 3:1, 2; Deut. 7:12–24; Lev. 18:20–30.

Miéntras Pablo por papia tokante e lei den términonan negativo (Rom. 7:6, Gal. 2:19), e tin tambe hopi kos positivo di bisa tokante esaki (lesa Rom. 7:12, 14; 8:3, 4; 13:8). E lei no tabata un maldishon ku Dios a pone riba Israel; al kontrario, e tabata intenshoná pa e ta un bendishon. Ounke su sistema di sakrifisio no por a kita piká finalmente, e tabata mustra na e Mesias primintí, kende tabata por, i su leinan, ku tabata guia komportashon humano, tabata protehá Israel for di hopi di e bisionan ku tabata pèsta otro sivilisashonnan antiguo. Den lus di e komentarionan positivo di Pablo tokante e lei otro kaminda, lo tabata un eror pa komprondé su komentarionan akinan den un forma kompletamente negativo

Den Galationan 3:23 Pablo ta deskribí e lei komo un forsa ku ta warda i protehá. Ku kiko e ta kompar’é den versíkulo 24, i kiko esei ta nifiká?

E palabra tradusí “tutor” (KJV) ta bin for di e palabra Griego paidagogos. Algun vershon ta tradusié komo “disiplinario” (NRSV), “vogt” (NKJV), òf asta “guardian” (ESV), pero niun solo palabra por enserá su nifikashon kompletamente. E paidagogos tabata un esklabo den sosiedat Romano ku a ser poné den un posishon di outoridat riba yunan hòmber di su shon for di tempu ku nan hasi seis òf shete aña te ora nan a alkansá madures. Ademas di proveé nan ku kuminda i paña, i protehá nan for di kualke peliger, e paidagogos tabata responsabel tambe pa sigurá ku e yunan hòmber di e shon tabata bai skol i hasi nan hùiswèrk. Ademas, tabata ser sperá di dje ku e no tabata solamente siña i praktiká birtutnan moral ma tambe pa sigurá ku e muchanan hòmber tabata siña i praktiká e birtutnan nan mes.

Ounke ku algun pedagogo siguramente mester tabata bondadoso komo tambe stimá dor di esnan ku nan mester a kuida, e deskripshon dominante di nan den literatura antiguo ta komo disiplinarionan estrikto. Nan tabata sigurá obediensia no solamente atraves di trato i reprendementu severo ma tambe pa medio di sutamentu ku bara i palu.

Pablo su deskripshon di e lei komo un pedagogo ta klarifiká mas aleu su komprondementu di e ròl di e lei. E lei a ser añadí pa mustra na piká i proveé instrukshon. E naturalesa mes di su tarea ta nifiká ku e lei tin tambe un aspekto negativo, i esei ta pasobra e ta reprendé i kondená nos komo pekadornan. Sinembargo, asta e aspekto “negativo” aki Dios ta uza pa nos benefisio, pasobra e kondenashon ku e lei ta trese ta loke ta hiba nos na Kristu. Pues, e lei i e evangelio no ta kontradiktorio. Dios a designá nan pa traha huntu pa nos salbashon.

“Den e Skritura aki [Gal. 3:24] Spiritu Santu atraves di e apòstel ta papiando spesialmente di e lei moral. E lei ta revelá piká na nos, i ta pone nos sinti nos nesesidat di Kristu i pa hui bai serka djE pa pordon i pas dor di ehersé arepentimentu pa ku Dios i fe pa ku nos Señor Hesukristu.”—Ellen G. White, Selected Messages, tomo 1, p. 234

Hopi a interpretá e komentario di Pablo den Galationan 3:25 komo un kitamentu kompletu di e lei. Esaki tin tiki sentido, sinembargo, den lus di e komentarionan positivo di Pablo tokante e lei na un otro parti den Beibel.

Kiko, anto, e ke men?

Di promé, nos no ta bou di kondenashon di e lei mas (Rom. 8:3). Komo kreyentenan, nos ta den Kristu i ta gosando di e privilegio di ta bou di grasia (Rom. 6:14, 15). Esei ta duna nos e libertat di sirbi Kristu di henter nos kurason, sin miedu di ser kondená pa erornan ku nos lo por a hasi den e proseso. Esaki ta loke berdadero libertat den e evangelio ta, kua ta algu radikalmente diferente for di no tin ku obedesé lei mas, kua ta loke algun hende ta bisa ku “libertat” den Kristu ta. Pero desobediensia na e lei, en kambio, ta piká, i piká no ta libertat ètòl (Juan 8:34).

Lesa Romanonan 8:1-3. Kiko ta nifiká di no ta kondená dor di e lei mas? Kon e bèrdat maravioso aki mester impaktá e manera kon nos ta biba?

Komo resultado di ser pordoná atraves di Kristu, nos relashon ku e lei ta diferente awor. Nos ta ser yamá awor pa biba un bida ku ta agradabel na djE (1 Tes. 4:1); Pablo ta referí na esaki komo kana den Spiritu (Gal. 5:18). Esaki no ta nifiká ku e lei moral no ta aplikabel mas, nunka esaki tabata e asuntu. Kon e por tabata ora nos a mira di forma asina kla ku e lei ta loke ta definí piká?

En kambio, pasobra e lei ta un kopia di e karakter di Dios, dor di obedesé e lei nos ta simplemente reflehá Su karakter. Pero mas ku esei, nos ta sigui no djis un sèt di regla ma e ehèmpel di Hesus, kende ta hasi pa nos loke e lei mes nunka por a hasi: E ta skirbi e lei riba nos kurason (Hebr. 8:10) i ta hasi posibel pa e rekerimentu hustu di e lei ser kumplí den nos (Rom. 8:4). Es desir, dor di nos relashon ku Hesus nos tin e poder pa obedesé e lei manera nunka promé.

Mi ta ser puntrá enkuanto di e lei den Galationan. Ki lei ta e tutor pa trese nos na Kristu? Mi ta kontestá: Tantu e kódigo seremonial i moral di e dies mandamentunan.

“Kristu tabata e fundeshi di henter e ekonomia Hudiu. E morto di Abel tabata en konsekuensia di e rechaso di Cain pa aseptá e plan di Dios den e skol di obediensia pa ser salbá pa medio di e sanger di Hesukristu. Tipifiká pa e ofrendanan di sakrifisio ku ta mustra na Kristu. Cain a nenga e dramamentu di sanger kua tabata simbolisá e sanger di Kristu pa ser dramá pa e mundu. Henter e seremonia aki a ser prepará dor di Dios, i Kristu a bira e fundeshi di henter e sistema. Esaki ta e prinsipio di su trabou komo e tutor pa trese agentenan humano pekaminoso na un konsiderashon di Kristu e Fundeshi di henter e ekonomia Hudiu.

“Tur ku a hasi servisio en konekshon ku e santuario tabata ser eduká konstantemente enkuanto di e intervenshon di Kristu na fabor di e rasa humano. E servisio aki tabata designá pa krea den tur kurason un amor pa e lei di Dios, kua ta e lei di Su reino.”—Ellen G. White, Selected Messages, tomo 1, p. 233.

“E lei di dies mandamentu no mester ser mirá tantu for di e banda di prohibishon, manera for di e banda di miserikòrdia. Su prohibishonnan ta e garantia sigur di felisidat den obediensia. Manera e ser risibí den Kristu, e ta obra den nos e puresa di karakter ku lo trese goso na nos atraves di siglonan eterno. Na esnan obedesidu e ta un muraya di protekshon.”—Ellen G. White, Selected Messages, tomo 1, p. 235.