E Dos Paktonan

Hopi ta konsiderá Pablo su interpretashon di e historia di Israel den Galationan 4:21-31 komo e pasashi di mas difísil den su karta. Esei ta pasobra e ta un argumento altamente kompliká ku ta rekerí un konosementu amplio di personanan i eventonan di Tèstamènt Bieu. E promé paso pa duna sentido na e pasashi aki ta di tin un komprondementu básiko di un konsepto di Tèstamènt Bieu ku ta sentral na e argumento di Pablo: e konsepto di e pakto.

E palabra Hebreo tradusí “pakto” ta berit. E ta aparesé kasi treshen biaha den Tèstamènt Bieu i ta referí na un kontrato, akuerdo òf tratado irevokabel. Pa míles di aña paktonan a hunga un papel integral ora ta definí e relashonnan entre pueblo i nashonnan dor di henter e Serkano Oriente antiguo. Paktonan hopi biaha tabata enbolbí e matamentu di animalnan komo parti di e proseso di traha (literalmente “kòrta”) un pakto. E matamentu di animalnan tabata simbolisá loke lo a sosodé ku un partido ku a faya di warda e promesa i obligashonnan di su pakto.

“For di Adam te na Hesus, Dios a trata ku humanidat pa medio di un serie di promesanan di pakto ku tabata sentrá riba un Redentor ku tabata bin i kua a kulminá den e pakto di David (Gen. 12:2, 3; 2 Sam. 7:12–17; Isa. 11). Na Israel den koutiverio Babilóniko Dios a primintí un ‘pakto nobo’ mas efektivo (Yer. 31:31–34) en konekshon ku e binida di e Mesias di linahe di David (Ezek. 36:26–28; 37:22–28).”—Hans K. LaRondelle, Our Creator Redeemer (Berrien Springs, Mich.: Andrews University Press, 2005), p. 4.

Kiko tabata e base di e pakto original di Dios ku Adam den e Hòfi di Eden promé ku piká? Gen. 1:28; 2:2, 3, 15–17.

Miéntras matrimonio, trabou físiko, i e Sabat tabata parti di e provishonnan general di e pakto di kreashon, su punto di enfoke prinsipal tabata e mandato di Dios pa no kome e fruta prohibí. E naturalesa básiko di e pakto tabata “obedesé i biba!” Ku un naturalesa kreá den harmonia ku Dios, Señor no tabata rekerí lo imposibel. Obediensia tabata inklinashon natural di humanidat; sinembargo, Adam i Eva a skohe pa hasi loke no tabata natural, i, den e akto ei, nan no a solamente kibra e pakto di kreashon, nan a hasi e tèrminonan inferior imposibel pa hende, awor korumpí pa piká. Dios Mes lo a restorá e relashon ku Adam i Eva a pèrdè. E a hasi esaki dor di establesé un akto di grasia basá riba e promesa eterno di un Salbador (Gen. 3:15).

Ki promesanan di pakto Dios a hasi ku Abram den Génesis 12:1-5? Kiko tabata Abram su reakshon?

E promé promesanan di Dios na Abram ta forma un di e pasashinan di mas poderoso den Tèstamènt Bieu. E versíkulonan aki tur ta tokante e grasia di Dios. Ta Dios, no Abram, kende ta hasi e promesanan. Abram no a hasi nada pa gana òf meresé fabor di Dios, ni tin niun indikashon ku ta sugerí ku Dios i Abram a traha huntu di un manera òf otro pa bin ku e akuerdo aki. Dios ta hasi tur e primintimentu. Abram, den kontraste, ta ser yamá pa tin fe den e siguransa di e promesa di Dios, no un asina yamá “fe” slap ma un fe ku ta ser manifestá dor di e echo ku e ta bandoná su famia ekstendé (na edat di setenta i sinku aña!) i bai direkshon pa e tera ku Dios a primintí.

“Ku e ‘bendishon’ pronunsiá riba Abraham i atraves di dje riba tur ser humano, e Kreador a renobá Su propósito redentivo. E a ‘bendishoná’ Adam i Eva den Paradeis (Gen. 1:28, 5:2) i despues ‘a bendishoná Noe i su yunan hòmber’ despues di e Diluvio (9:1). Di e forma aki Dios a klarifiká Su promesa anterior di un Redentor kende lo redimí humanidat, destruí maldat, i restorá Paradeis (Gen. 3:15). Dios a konfirmá Su promesa pa bendishoná ‘tur pueblo’ den Su alkanse universal.”—Hans K. LaRondelle, Our Creator Redeemer, p. 22, 23.

Despues di dies aña di warda riba e yu primintí ku mester a nase, ki preguntanan Abram tabatin tokante e promesa di Dios? Gen. 15:1-6.

Hopi biaha ta fásil pa glorifiká Abram komo e hòmber di fe ku nunka tabatin kualke pregunta òf duda. Skritura, sinembargo, ta pinta un kuadro diferente. Abram a kere, ma tambe e tabatin preguntanan a lo largu di e kaminda. Su fe tabata un fe ku ta krese. Meskos ku e tata den Marko 9:24, básikamente Abram a bisa Dios den Génesis 15:8, “Mi ta kere, yudami den mi inkredulidat.” Komo kontesta, Dios yen di grasia a sigurá Abram di e siguransa di Su promesa dor di formalmente drenta den un pakto kuné (Gen. 15:7-18). Loke ta hasi e pasashi asina sorprendente no ta e echo ku Dios ta drenta den un pakto ku Abraham pa e grado te na kua Dios tabata dispuesto pa baha pa hasi esei. Diferente for di otro gobernantenan den Serkano Oriente antiguo, ku tabata nenga e idea di hasi promesanan permanente ku nan sirbientenan, Dios no solamente a duna Su palabra, ma, dor di simbólikamente pasa dor di e pidanan di animalnan matá, E a hinka Su mes bida riba dje. Naturalmente, Hesus finalmente a duna Su bida riba Kalvario pa hasi Su promesa un realidat.

Dikon Pablo tin un punto di bista asina despektivo di e insidente ku Hagar? Gal. 4:21-31, Génesis 16. Ki punto krusial tokante salbashon Pablo ta splikando pa medio di su uzo di e storia di Tèstamènt Bieu aki?

E lugá di Hagar den e storia di Génesis ta direktamente relatá na e fayo di Abram pa kere e promesa di Dios. Komo un esklabo Egipsio den kas di Abram, Hagar probablemente a bin den poseshon di Abram komo un di e hopi regalonan ku Fárao a dun’é a kambio di Sarai, un evento asosiá ku Abram su promé akto di inkredulidat den e promesa di Dios (Gen. 12:11-16).

Despues di a warda dies aña pa e yu primintí nase, Abram i Sarai a keda sin yu. Konkluyendo ku Dios tabatin mester di nan ayudo, Sarai a duna Hagar na Abram komo konkubina. Ounke e ta straño pa nos awe, e plan di Sarai tabata bastante ingenioso. Di akuerdo ku kustumbernan antiguo, un esklabo muhé legalmente por a sirbi komo un mama sustituto pa su shon. Pues Sarai por a konta kualke yu ku a nase for di su esposo i Hagar komo di dje mes. Miéntras e plan a produsí un yu, no tabata e yu ku Dios a primintí.

Den e storia aki nos tin un ehèmpel poderoso di kon ora e a ser afrontá ku sirkunstansianan di desánimo, asta un gran hòmber di Dios tabatin un falta di fe. Den Génesis 17:18, 19 Abraham a roga na Dios pa aseptá Ishmael komo su heredero; Señor, naturalmente, a rechasá e oferta ei. E úniko elementu “milagroso” den e nasementu di Ishmael tabata e disponibilidat di Sara pa kompartí su esposo ku un otro muhé! No tabatin nada ekstraordinario tokante e nasementu di un yu na e muhé aki, un yu nasé “di akuerdo ku e karni”. Si Abraham a konfia den loke Dios a primintié enbes di laga e sirkunstansianan vense e konfiansa ei, nada di esaki lo a sosodé, i un kantidat di tristesa lo a ser evitá.

Kontrali na e nasementu di Ishmael, wak e sirkunstansianan ku ta rondoná e nasementu di Isaac. Gen. 17:15–19; 18:10–13; Hebr. 11:11, 12. Dikon e sirkunstansianan aki a rekerí asina tantu fe di Abraham i Sara?

Ki tipo di relashon di pakto Dios ke a establesé ku Su pueblo na Sinaí? Ki similaridatnan e ta kompartí ku e promesa di Dios na Abraham? Eks. 6:2–8, 19:3–6, Deut. 32:10–12.

Dios tabata deseá di kompartí e mesun relashon di pakto ku e yunan di Israel na Sinaí ku E a kompartí ku Abraham. De echo, ta eksistí similaridatnan entre e palabranan di Dios na Abraham den Génesis 12:1-3 i Su palabranan na Moises den Éksodo 19. Den ámbos kaso Dios ta enfatisá kiko E lo hasi pa Su pueblo. E no ta pidi e Israelitanan pa primintí di hasi nada pa gana Su bendishonnan; en kambio, nan mester obedesé komo reakshon riba Su bendishonnan. E palabra Hebreo tradusí “obedesé” den Eksodo 19:5 ta nifiká literalmente “tende”. E palabranan di Dios no ta impliká hustifikashon pa medio di obranan. Al kontrario, E tabata ke pa Israel tin e mesun fe ku tabata karakterisá e reakshon di Abraham riba Su promesanan (por lo ménos mayoria biaha!).

Si e relashon di pakto ku Dios a ofresé na Israel riba Sinaí ta similar na esun duná na Abraham, dikon Pablo ta identifiká Seru Sinaí ku e eksperensia negativo di Hagar? Eks. 19:7–25; Hebr. 8:6, 7.

Tabata e intenshon pa e pakto na Sinaí mustra e pekaminosidat di humanidat i e remedi di e grasia abundante di Dios, kua tabata ser tipifiká den e sirbishinan di santuario. E problema ku e pakto di Sinaí no tabata di parti di Dios sino mas bien ku e promesanan defektuoso di e pueblo (Hebr. 8:6). Na lugá di respondé riba e promesanan di Dios den humildat i fe, e Israelitanan a respondé ku konfiansa propio. “Tur loke Señor a bisa nos lo hasi” (Eks. 19:8). Despues di a biba komo esklabo na Egipto pa mas di kuatershen aña, nan no tabatin un konsepto berdadero di e mahestat di Dios ni e grado di nan propio pekaminosidat. Di mes manera ku Abraham i Sara a purba yuda Dios kumpli ku Su promesanan, e Israelitanan a purba kambia e pakto di grasia di Dios den un pakto di obranan. Hagar ta simbolisá Sinaí den forma ku tur dos ta revelá intentonan humano na salbashon pa medio di obra.

Pablo no ta bisando ku e lei duná na Sinaí tabata malu òf abolí. E ta preokupá ku e Galationan su mal komprondementu legalístiko di e lei. “Na lugá di sirbi pa konvensé nan di e imposibilidat apsoluto di agradá Dios dor di wardamentu di lei, e lei a krea den nan un determinashon profundamente establesé pa dependé riba rekursonan personal pa asina agradá Dios. Pues e lei no tabata sirbi e propósitonan di grasia dor di guia e Hudaisantenan na Kristu. Na lugá di esei, e tabata separá nan for di Kristu.”—O. Palmer Robertson, The Christ of the Covenants (Phillipsburg, N.J.: Presbyterian and Reformed Publishing Co., 1980), p. 181.

Pablo su skèts kòrtiku di e historia di Israel tabata designá pa kontrarestá e argumentunan hasí dor di e oponentenan ku tabata pretendé ku nan tabata e berdadero desendientenan di Abraham i ku Yerusalèm, e sentro di Kristianismo Hudiu i e lei, tabata nan mama. E Paganonan, nan tabata akusá, tabata ilegal; si nan tabata ke a bira berdadero siguidónan di Kristu, nan mester a bira yu di Abraham promé dor di someté na e lei di sirkumsishon.

E bèrdat, Pablo ta bisa, ta lo kontrali. E legalistanan aki no ta yunan di Abraham sino ta yunan ilegítimo, meskos ku Ishmael. Dor di pone nan konfiansa den sirkumsishon, nan tabata dependiendo riba “e karni”, manera Sara a hasi ku Hagar i manera e Israelitanan a hasi ku e lei di Dios na Sinaí. Kreyentenan Pagano, sinembargo, tabata yunan di Abraham no pa desendensia natural ma, meskos ku Isaac, dor di lo sobrenatural. “Meskos ku Isaac nan tabata un kumplimentu di e promesa hasí na Abraham . . . ; meskos ku Isaac, nan nasementu den libertat tabata efekto di grasia divino; meskos ku Isaac, nan ta pertenesé na e kolumna di e pakto di promesa.”—James D. G. Dunn, The Epistle to the Galatians (London: Hendrickson Publishers, 1993), p. 256.

Kiko e berdadero desendientenan di Abraham lo afrontá den e mundu aki? Gal. 4:28–31, Gen. 21:8–12.

Siendo e yu primintí a trese Isaac no solamente bendishon ma tambe oposishon i persekushon. Refiriendo na persekushon, Pablo tin den mente e seremonia den Génesis 21:8-10, kaminda Isaac ta ser honrá i Ishmael aparentemente ta hasi chèrchi di dje. E palabra Hebreo den Génesis 21:9 literalmente ta nifiká “hari”, pero e reakshon di Sara ta sugerí ku Ishmael tabata hasi bofon di òf ridikulisá Isaac. Miéntras e komportashon di Ishmael kisas lo no ta zona masha signifikante pa nos awe, e tabata revelá e hostilidatnan mas profundo enbolbí den un situashon ora e herensia familiar tabata den wega. Hopi gobernante den antigwedat a purba sigurá nan posishon dor di eliminá potensial rivalnan, inkluyendo muchanan chikitu (Huesnan 9:1-6). Ounke Isaac tabata afrontá oposishon, e tabata gosa tambe di tur e privilegionan di amor, protekshon, i fabor ku tabata bai huntu ku ser heredero di su tata.

Komo desendientenan spiritual di Isaac, nos no mester ta sorprendí ora nos ta sufri difikultat i oposishon, asta for di paden di e famia di iglesia mes.

Lesa Ellen G. White, “The Law and the Covenants,” p. 363–373, den Patriarchs and Prophets.

“Pero si e pakto Abrahámiko tabata kontené e promesa di redenshon, dikon un otro pakto a ser formá na Sinaí? Den nan sklabitut e pueblo, te na sierto grado, a pèrdè e konosementu di Dios i di e prinsipionan di e pakto Abrahámiko. . . .

“Dios a trese nan na Sinaí; E a manifestá Su gloria; E a duna nan Su lei, ku e promesa di gran bendishonnan riba kondishon di obediensia: ‘Si boso lo obedesé Mi bos di bèrdat, i warda Mi aliansa, e ora ei . . . boso lo ta pa Mi un reino di saserdotenan, i un nashon santu.’ Éksodo 19:5, 6. E hendenan no a realisá e pekaminosidat di nan mes kurason, i ku sin Kristu tabata imposibel pa nan warda e lei di Dios; i mesora nan a drenta den aliansa ku Dios. . . . Sinembargo solamente un par di siman a pasa promé ku nan a kibra nan pakto ku Dios; i awor, mirando nan pekaminosidat i nan nesesidat di pordon, nan a ser tresé pa sinti nan nesesidat di e Salbador revelá den e pakto Abrahámiko i sombrá den e ofrendanan di sakrifisio. Awor pa fe i amor nan tabata mará na Dios komo nan libertador for di e sklabitut di piká. Awor nan tabata prepará pa apresiá e bendishon di e pakto nobo.”—Ellen G. White, Patriarchs and Prophets, p. 371, 372.