E Kontroversia

Lesa Hebreonan 8:6. Kiko ta e mensahe akinan? Kon nos ta komprondé kiko e “mihó promesanan” aki ta?

Kisas e diferensia di mas grandi entre e religion di Tèstamènt Bieu i esun di esun Nobo ta e echo ku e era di Tèstamènt Nobo a ser introdusí ku binida di e Mesias, Hesus di Nazaret. E a ser mandá dor di Dios pa ta e Salbador. Hende no por a ignor’E i spera di ta salbá. Solamente pa medio di e ekspiashon ku E a proveé, nan pikánan por a ser pordoná. Solamente pa medio di e imputashon di Su bida perfekto nan por a para dilanti di Dios sin kondenashon. Ku otro palabra, salbashon tabata pa medio di e hustisia di Hesus, i nada mas.

E santunan di Tèstamènt Bieu tabata wak padilanti na e bendishonnan di e era Mesiániko i e promesa di salbashon. Den tempu di Tèstamènt Nobo e hendenan a ser konfrontá ku e pregunta: Nan lo a aseptá Hesus di Nazaret kende Dios a manda komo e Mesias, nan Salbador? Si nan a kere den djE, es desir, si nan a asept’E pa ken E tabata realmente i a komprometé nan mes na djE, nan lo a ser salbá pa e hustisia ku E a ofresé nan gratuitamente.

Mientrastantu, e rekerimentunan moral ta keda inkambiabel den Tèstamènt Nobo, pasobra esakinan a ser fundá den e karakter di Dios i di Kristu. Obediensia na e lei moral di Dios ta mesun tantu un parti di e Pakto Nobo komo di esun Bieu.

Lesa Mateo 19:17; Revelashon 12:17; 14:12; i Santiago 2:10, 11. Kiko e tèkstnan aki ta bisa nos tokante e lei moral den Tèstamènt Nobo?

Na mes momentu, henter e kuerpo di leinan ritual i seremonial ku tabata netamente israelita, i tabata klaramente konektá na e Pakto Bieu, i tur tabata mustra na Hesus i na Su morto i ministerio komo Sumosaserdote, a stòp, i un órden nobo a ser introdusí, unu basá riba “mihó promesanan”.

Yuda tantu Hudiu komo Pagano pa komprondé loke tabata enbolbí den e transishon aki for di Hudaismo na Kristianismo tabata un di e ophetivonan prinsipal di Pablo den e buki di Romanonan. Lo a tuma tempu pa hasi e transishon. Hopi Hudiu ku a aseptá Hesus no tabata kla ainda pa e gran kambionan ku tabata biniendo.

Si tempu permití, pasa dor di e buki di Levítiko. (Lesa por ehèmpel, Levítiko 12, 16, 23). Ki pensamentunan ta bin na bo mente segun ku bo ta lesa tur e reglamentunan i ritualnan aki? Dikon hopi di nan lo tabata kasi imposibel, den tempunan di Tèstamènt Nobo, pa sigui?

Ta kumbiniente pa nos klasifiká e leinan di Tèstamènt Bieu den vários kategoria:

1. lei moral,
2. lei seremonial,
3. lei sivil,
4. statutonan i huisionan, i
5. leinan di salú.

E klasifikashon aki ta parsialmente artifisial. En realidat algun di e kategorianan aki ta relashoná ku otro, i tin un kubrimentu parsial konsiderabel. Esnan di antigwedat no tabata mira nan komo separá i distinto.

E lei moral ta ser resumí den e Dies Mandamentunan (Eks. 20:1-17). E lei aki ta resumí e rekerimentunan moral di humanidat. E dies preseptonan aki ta ser ampliá i apliká den vários statutonan i huisionan atraves di e promé sinku bukinan di Beibel. E amplifikashonnan aki ta mustra loke tabata nifiká pa warda e lei di Dios den vários situashon. No distinto ta e leinan sivil. Esakinan, tambe, ta basá riba e lei moral. Esakinan ta definí e relashon di un siudadano ku outoridatnan sivil i ku kosiudadanonan. Nan ta nombra e kastigunan pa vários infrakshon.

E lei seremonial tabata regulá e ritual di e santuario, i tabata deskribí e vários ofrendanan i e responsabilidatnan individual di e siudadano. E dianan di fiesta ta ser spesifiká i nan opservamentu definí.

E leinan di salú ta kubri e otro leinan parsialmente. E vários leinan relashoná ku impuresa ta definí impuresa seremonial, i sinembargo nan ta bai tambe mas aya di esaki pa inkluí prinsipionan higiéniko i di salú. Leinan enkuanto di karni limpi i impuru ta basá riba konsiderashonnan físiko.

Miéntras e Hudiu probablemente tabata pensa riba tur e leinan aki komo un pakete, ya ku tur a bin for di Dios, e lo mester a hasi sierto distinshonnan mental. E Dies Mandamentunan a ser pronunsiá dor di Dios direktamente na e pueblo. Esaki lo a distinguí nan komo spesialmente importante. E otro leinan a ser transmití atraves di Moises. E ritual di santuario por a ser kumplí solamente miéntras un santuario tabata den operashon.

E leinan sivil, a lo ménos pa gran parti, ya no por a ser imponé despues ku e Hudiunan a pèrdè nan independensia i a bin bou di kontròl sivil di un otro nashon. Hopi di e preseptonan seremonial no por a ser opservá mas despues ku e tèmpel a ser destruí. Tambe, despues ku e Mesias a bin, hopi di e tiponan a topa nan antitiponan i no tabatin balides mas.

Lesa Echonan 15:1. Ki tema tabata kousando desakuerdo? Dikon algun hende lo tabata kere ku esaki no tabata solamente pa e nashon Hudiu? Lesa Gen. 17:10.

Miéntras e apòstelnan a uni ku e pastornan i e miembronan laiko na Antiokia den un esfuerso sinsero pa gana hopi alma pa Kristu, sierto kreyentenan Hudiu di Hudea “di e sekta di e Fariseonan” a logra introdusí un tema ku pronto a hiba na kontroversia ekstenso den e iglesia i a trese konsternashon na e Paganonan kreyente. Ku gran konfiansa e maestronan aki a afirmá ku pa ser salbá, un hende mester ta sirkumsidá i mester warda henter e lei seremonial. E Hudiunan, despues di tur kos, semper tabata orguyoso di nan sirbishinan estables’é divinamente, i hopi di esnan ku a ser kombertí na e fe di Kristu ainda tabata sinti ku, siendo ku Dios anteriormente a deliniá klaramente e forma di adorashon Hebreo, tabata improbabel ku hamas E lo a outorisá un kambio den kualke di su spesifikashonnan. Nan tabata insistí ku e leinan i seremonianan Hudiu mester a ser inkorporá den e ritonan di e religion Kristian. Nan tabata tarda pa diserní ku tur e ofrendanan di sakrifisio a prefigurá e morto di e Yu di Dios, den kua tipo a topa antitipo, i despues di kua e ritonan i seremonianan di e dispensashon Mosaiko ya no tabata obligatorio.

Lesa Echonan 15:2-12. Kon e disputa aki mester a ser resolvé?

“Miéntras Pablo tabata wak Dios pa guiansa direkto, e tabata semper kla pa rekonosé e outoridat impartí den e kurpa di kreyentenan uní den fraterdidat di iglesia. E tabata sinti e nesesidat di konseho, i ora asuntunan di importansia tabata surgi, e tabata kontentu pa pone esakinan dilanti di e iglesia i pa uni ku e rumannan den buska Dios pa sabiduria pa tuma desishonnan korekto.” - Ellen G. White, The Acts of the Apostles, p. 200.

Ta interesante ku Pablo, kende hopi biaha tabata papia tokante su yamada profétiko i kon Hesus a yam’é i a dun’é su mishon, tabata asina dispuesto pa traha ku e kurpa di iglesia mas grandi. Es desir, loke sea su yamada tabata, e a realisá ku e tabata parti di e iglesia komo un totalidat i ku e mester a traha huntu kuné mas tantu posibel.

Lesa Echonan 15:5-29. Ki desishon e konsilio a yega na dje, i kiko tabata nan rasonamentu?

E desishon tabata kontra e afirmashonnan di e Hudaisantenan. E hendenan aki tabata insistí pa e konversonan Pagano ser sirkumsidá i warda henter e lei seremonial, i ku “e leinan i seremonianan Pagano mester ser inkorporá den e ritonan di e religion Kristian.” - Ellen G. White, The Acts of the Apostles, p. 189.

Ta interesante pa nota den Echonan 15:10 e forma den kua Pedro a deskribí e leinan bieu aki komo un “yugo” ku nan tabata inkapas pa karga. Señor, kende a instituí e leinan ei, lo a hasi nan un yugo pa Su pueblo? Esei apénas ta parse asina. En kambio, ku añanan algun di e lidernan, pa medio di nan tradishonnan oral, a kambia hopi di e leinan di e bendishonnan ku nan mester tabata den karganan. E konsilio a purba spar e Paganonan for di e karganan aki.

Nota tambe ku no tabatin menshon òf kuestionamentu di e echo ku e Paganonan no mester a obedesé e Dies Mandamentunan. Despues di tur kos, nos lo por a imaginá nos mes e konsilio bisando nan pa no kome sanger ma ku tabata aseptabel pa ignorá e mandamentunan kontra adulterio òf asesinato i kosnan asina?

Ki reglanan tabata ser poné riba e kreyentenan Pagano (Echonan 15:20, 29), i pakiko e reglanan spesífiko aki?

Ounke kreyentenan Hudiu no mester a imponé nan reglanan i tradishon riba Paganonan, e konsilio kier a sigurá su mes ku e Paganonan no tabata hasi kosnan ku lo a ser konsiderá ofensivo pa e Hudiunan ku tabata uní ku nan den Hesus. E apòstelnan i ansianonan, pa e motibu ei, a bai di akuerdo pa instruí e Paganonan pa medio di karta pa apstené for di karni ofresé na ídolonan, for di fornikashon, for di kosnan strangulá, i for di sanger. Algun ta bisa ku, pa motibu ku wardamentu di Sabat no a ser menshoná spesífikamente, e lo no tabata pa e Paganonan (naturalmente, e mandamentunan kontra gañamentu i asesinato no tabata menshoná spesífikamente tampoko, pues e argumentu ei no ta nifiká nada).

Ounke kon kla e konsilio tabata, tabatin esnan ku tabata buska pa sigui nan mes kaminda i ku tabata sigui promové pa e Paganonan warda tradishonnan i leinan Hudiu. Pa Pablo esaki a bira un asuntu hopi serio; es desir, e no tabata trivial riba e puntonan sutil di fe. E a bira un nengamentu di e evangelio mes di Kristu.

Lesa Galationan 1:1-12. Kon serio Pablo ta mira e problema ku e ta konfrontando na Galatia? Kiko esei mester bisa nos tokante e importansia di e tema aki?

Manera deklará anteriormente, tabata e situashon di Galatia ku den gran grado a motivá e kontenido di e karta na Roma. Den e Epistel na e Romanonan, Pablo ta desaroyá mas aleu e tema di e epistel na e Galatianan. Algun kreyente Hudiu tabata argumentá ku e lei ku Dios a duna nan atraves di Moises tabata importante i mester a ser opservá dor di konversonan Pagano. Pablo tabata purbando pa mustra su lugá i funshon berdadero. E no tabata ke pa e hendenan aki haña base firme na Roma manera nan a hasi na Galatia.

Ta un simplifikashon eksesivo pa puntra si Pablo tabata papiando di leinan seremonial òf moral den Galationan i Romanonan. Histórikamente, e argumentu tabata si konversonan Pagano mester a ser rekerí pa ser sirkumsidá i warda e lei di Moises. E konsilio di Yerusalèm ya a pronunsiá riba e kuestion aki, pero algun a nenga di sigui su desishon.

Algun hende ta lesa den e kartanan di Pablo na e Galationan i e Romanonan evidensia ku e lei moral, e Dies Mandamentunan (òf, en realidat, solamente e di kuater mandamentu), no ta obligatorio mas pa Kristiannan. Sinembargo, nan no ta kapta e esensia di e kartanan, i ta pasa por alto e konteksto históriko i asuntunan ku Pablo tabata atendé. Pablo, manera nos lo mira, a enfatisá ku salbashon tabata pa medio di fe so i no dor di wardamentu di e lei, ni sikiera e lei moral. Sinembargo, esei no ta meskos ku bisa ku e lei moral no mester ser wardá. Obediensia na e Dies Mandamentunan nunka tabata un problema; esnan ku ta hasié un problema ta lesando bèk den e tèkstnan un asuntu kontemporáneo, unu ku Pablo no tabata tratando.

Lesa Ellen G. White, “Jew and Gentile,” p. 188-192, 194-197; “Apostasy in Galatia,” pp. 383-388, den The Acts of the Apostles; “The Law Given to Israel,” p. 310-312; “The Law and the Covenants,” p. 370-373, den Patriarchs and Prophets; “The Chosen People,” p. 27-30, den The Desire of Ages.

No tin duda, nos iglesia ta afrontá tempunan di kontroversia i diskordia. Pero esaki ta nada nobo. Satanas semper tabata den guera ku e iglesia. Asta den e promé dianan di Kristianismo, diskordia i kontroversia a surgi den e filanan di e kreyentenan. I tabatin un kontroversia ku, si e no a ser resolvé, lo por a destruí e iglesia den su infansia.

“Dor di e influensia di e maestronan falsu ku a lanta entre e kreyentenan na Yerusalèm, divishon, herehia, i sensualismo tabata ekstendé rápidamente entre e kreyentenan na Galatia. E maestronan falsu aki tabata meskla tradishonnan Hudiu ku e bèrdatnan di e evangelio. Ignorando e desishon di e konsilio general na Yerusalèm, nan tabata urgi e konversonan Pagano pa opservá e lei seremonial.” - Ellen G. White, The Acts of the Apostles, p. 383.