ADAM I HESUS

Lesa Romanonan 5:1-5. Resumí den e siguiente liñanan e mensahe di Pablo. Kiko bo por saka for di esaki pa bo mes?

"Ser hustifiká" ta literalmente “siendo hustifiká." E verbo griego ta representá e akshon komo ser kompletá. Nos a ser deklará hustu òf ser konsiderá hustu, no pa medio di niun obranan di lei sino pa medio di e echo ku nos a aseptá Kristu. E bida perfekto ku Hesus a biba riba mundu, Su wardamentu di lei perfekto, a ser akreditá na nos.

Na mes momentu, tur nos pikánan a ser pone riba Hesus. Dios a konsiderá ku Hesus a kometé e pikánan ei, no nos i asina nos lo ta ser di spar di e kastigu ku nos meresé.

E kastigu ei a kai riba Kristu pa nos, na nos fabor, pa asina nunka nos mes mester enfrent'é. Kua notisia mas glorioso lo por tin pa un pekador?

E palabra griego tradusí komo "gloria" den Romanonan 5:3 ta esun tradusí komo "regosihá" den Romanonan 5:2. Si e ser tradusí "regosihá" den Romanonan 5:3 tambe (manera den algun vershon), e konekshon entre Romanonan 5:2 i Romanonan 5:3 ta ser mirá mas klaramente. Hendenan hustifiká por regosihá den tribulashon pa motibu ku nan a fiha nan fe i konfiansa den Hesukristu. Nan tin konfiansa ku Señor lo hasi tur kos obra pa bon. Nan lo konsider'é un honor pa sufri pa amor di Kristu. (Lesa 1 Pedro 4:13.)

Opservá e suseshon di Romanonan 5:3-5.

1. Pasenshi. E palabra griego tradusí komo hupomone ta nifiká "pasenshi firme." Esaki ta e tipo di pasenshi ku tribulashon ta desaroyá den esun ku ta mantené fe i kua no ta pèrdè for di bista e speransa ku e tin den Kristu, asta meimei di prueba i sufrimentu ku por hasi bida 'tin biaha asina miserabel.
2. Eksperensia. E palabra griego tradusí komo dokime ta nifiká literalmente "E kalidat di ser aprobá"; p'esei, "karakter”, òf mas spesífikamente, "karakter aprobá". Esun ku soportá pruebanan ku pasenshi por desaroyá un karakter aprobá.
3. Speransa. Pasenshi i aprobashon naturalmente ta duna lugá na speransa, e speransa ku ta ser hañá den Hesus i e promesa di salbashon den djE. Tanten ku nos pega na Hesus den fe, arepentimentu, i obediensia, nos tin tur kos pa spera p'e.

Lesa Romanonan 5:6-8. Kiko e pasashi aki ta bisa nos di e karakter di Dios, i dikon e ta yen di speransa pa nos?

Na momentu ku Adam i Eva a transgredí di un manera bergonsoso i inekskusable e rekerimentu divino, Dios a dal e promé paso pa ku rekonsiliashon. For di e momento ei, Dios a tuma inisiativa pa proveé un kaminda di salbashon i a invitá hòmber i muhé pa asept’é. "Na momentu ku plenitut di tempu a yega Dios a manda su Yu" (Gal. 4:4).

Romanonan 5:9 ta bisa ku nos por ser salbá di e rabia di Dios atraves di Kristu. Kon nos ta komprondé kiko esaki ta nifiká?

Na víspera di nan salida for di Egipto, sanger riba e kozeinnan di porta di e Israelitanan na Egipto a protehá e primogénito for di e rabia ku 'a bini pa baha riba e primogénito di Egipto. Na e mesun manera, e sanger di Hesus ta garantisá ku un hende ku a ser hustifiká i ta konservá e status ei lo ser protehá na momentu ku Dios Su rabia finalmente destruí piká na fin di e siglo.

Algun persona ta lucha ku e idea ku un Dios amoroso no tin rabia, pero ta presisamente pa motibu di Su amor ku e rabia aki ta eksistí. Kon Dios, ku stima mundu, lo no por tin rabia riba piká? Si E tabata indiferente na nos, lo no a import'E kiko ta pasa aki na mundu. Wak rònt mundu i mira kiko piká a hasi ku Su kreashon. Kon Dios lo no por tin rabia kontra tal maldat i ruina?

Kua otro rasonnan ta ser duná na nos pa ta alegre? Rom. 5:10, 11.

Tin algun komentarista ku a mira den Romanonan 5:10 un referensia na e bida ku Kristu a biba riba e tera aki, durante kua E a krea un karakter perfekto kua awor E ta ofresé na nos. Aunke esaki siguramente ta lokual ku e bida perfekto di Kristu a logra, parse ku Pablo ta enfatisá ku e echo ku ounke Kristu a muri, i E a resusitá atrobe i ta bibu pa semper (lesa Heb. 7:25). Pa motibu ku E ta biba nos ta salbá. Si E a permanesé den graf, nos speransanan lo a peresé huntu kunE. Romanonan 5:11 ta kontinuá ku e rasonnan ku nos tin pa regosihá den Señor, i esei ta pa pa motibu di loke Hesus a logra pa nos.

Morto ta un enemigu, esun final. Ora Dios a krea e famia humano, E a regla pa su miembronan biba pa semper. Ku un poko eksepshon di, hende no ke muri; i esnan ku ke hasi esei, ta hasié solamente despues di e angustia i sufrimentu personal di mas grandi. Morto ta bai en kontra di e parti di mas básiko di nos naturalesa. I esaki ta dor ku for di prinsipio nos a ser kreá pa biba pa semper. Morto mester tabata deskonosí pa nos.

Lesa Romanonan 5:12. Kiko Pablo ta deskribí aki? Kiko esaki ta splika?

Komentaristanan a argumentá mas enkuanto di e pasashi aki di Skritura ku mayoria otro. Kisas e rason ta, manera ta ser notá den The SDA Bible Commentary, tomo 6, p. 529, ku e komentaristanan aki "ta intentá na usa e pasashi pa propósitonan ku no tabata e intenshon di Pablo".

Un punto ku nan ta argumentá riba dje ta: Den ki forma Adam su piká a pasa na su futuro generashonnan? Adam su desendientenan a kompartí e kulpa di Adam su piká, òf nan ta kulpabel dilanti di Dios pa motibu di nan propio pikánan? Hende a purba haña un kontesta riba e pregunta ei for di den e versíkulo aki, pero esei no tabata e asuntu ku Pablo tabata atendiendo kuné. E tabata tin hinter un otro ophetivo den su mente. E a bolbe enfatisá loke ya e a alegá: "pasobra tur a peka" (Rom. 3:23). Nos mester rekonosé ku nos ta pekador, pasobra esei ta e úniko manera ku nos lo realisá ku nos tin mester di un Salbador. Aki Pablo tabata tratando di haña e lesadónan realisá kon malu piká ta i kiko e a trese kuné den e mundu aki atraves di Adam. I despues e ta mustra kiko Dios ta ofresé na nos den Hesus komo e úniko remedi pa e tragedia tresé riba e mundu atraves di Adam su piká.

Sinembargo, e versíkulo aki ta konta solamente di e problema, morto den Adam, no e solushon, bida den Kristu. Un di e aspektonan di mas glorioso di e evangelio ta ku morto a ser gulí den bida. Hesus a pasa dor di e portalnan di e graf i a kibra su lasonan. E ta bisa: "Ami ta Esun ku ta biba; i Mi tabata morto, i mira, Mi ta bibu pa semper, i Mi tin e yabinan di morto i di Hades" (Rev. 1:18). Pasombra Hesus tin e yabi, e enemigu no por tene su víktimanan mas den graf.

Lesa Romanonan 5:13, 14. Kiko Pablo ta siñando nos aki enkuanto di e Lei?

Tokante kiko Pablo ta papiando aki? E frase “promé ku e lei” ta paralelo na e deklarashon “for di Adam te na Moises”. E ta papiando tokante e tempu den mundu for di Kreashon te na Sinai, promé ku e introdukshon formal di e reglanan i leinan di e sistema Israelita, kua tabata inkluí, naturalmente, e Dies Mandamentunan.

"Promé ku e lei" ta nifiká promé ku e detayenan di Dios Su rekisitonan den e vários leinan duná na Israel na Sinai. Piká tabata eksistí promé ku Sinai. Kon e no por tabata? Akaso gañamentu, matamentu, adulterio i idolatria no tabata pekaminoso promé ku esei? Klaro ku nan tabata piká.

Ta bèrdat ku promé ku Sinai, rasa humano generalmente tabatin solamente un revelashon limitá di Dios, pero opviamente nan tabata sa sufisiente pa ser tené responsabel. Dios ta hustu i no ta bai kastigá niun hende di manera inhustu. Hendenan promé ku e tempu di Sinai a muri, manera Pablo ta trese dilanti. Morto a pasa riba tur. Aunke nan no a peka kontra un mandato eksplísitamente revelá, nan a peka sinembargo. Nan tabatin e revelashonnan di Dios den naturalesa, na kua nan no a respondé i p'esei nan tabata kulpabel. "Pasobra desde kreashon di mundu Su atributonan invisibel, Su poder eterno i naturalesa divino, a ser mirá klaramente . . .; asina ku nan no tin èksküs" (Rom. 1:20).

Ku kua propósito Dios a revelá su mes mas amplio den e "lei"? Rom. 5:20,21 .

E instrukshon duná na Sinai tabata inkluí e lei moral, aunke e tabata eksistí promé ku esei. Esaki tabata e promé biaha, sinembargo, di akuerdo ku Beibel, ku e lei aki a ser skirbí i proklamá ekstensivamente.

Ora e Israelitanan a kuminsá kompará nan mes ku e rekisitonan Divino, nan a diskubrí ku nan tabata faya hopi. Den otro palabra "e ofensa" tabata abundante. Diripiente nan a realisá e magnitut di nan transgreshonnan. E propósito di un revelashon asina tabata pa yuda nan mira nan nesesidat di un Salbador, i pa hiba nan na aseptá e grasia asina libremente ofresé dor di Dios. Manera a ser enfatisá anteriormente, e berdadero vershon di e fe di Tèstamènt Bieu no ta legalista.

"Asina anto; meskos ku un transgreshon a trese kondenashon pa tur hende, asina tambe un echo di hustisia a trese hustifikashon di bida pa tur hende. Pasobra meskos ku dor di desobedensia di esun hende hopi a ser hasí pekadó, asina tambe dor di obediensia di Esun hopi lo ser hasí hustu." (Rom. 5:18,19) Kua kontraste ta ser presentá na nos aki? Ki speransa ta ser ofresé na nos den Kristu?

Komo sernan humano, nos no a haña nada di Adam, ku no ta e sentensia na morto. Kristu, sinembargo, a drenta i pasa riba e suela kaminda Adam a kai, soportando tur prueba na fabor di humanidat. E a redimí Adam su fayo bergonsoso i su kaida, i, asina, komo nos Sustituto, E a pone nos riba tereno di bentaha serka Dios. P'esei, Hesus ta e "Segundo Adam".

"E Segundo Adam tabata un agente moral liber, tené responsabel pa Su propio kondukta. Rondoná pa influensianan intensamente sutil i engañoso. E tabata hopi mas desfavorabel situá ku e promé Adam, pa biba un bida sin piká. Sinembargo, meimei di pekadornan E a resistí tur tentashon pa peka, i a mantené Su inosensia. E tabata semper sin piká."--::-Ellen G. White Comments, The SDA Bible Commentary, tomo 6, p. 1074.

Kon Adam i Kristu su akshonnan ta ser kompará den Romanonan 5:15-19?

Tira un bista riba e ideanan opuesto aki: morto, bida; desobedensia, obediensia; kondenashon, hustifikashon; piká, hustisia. Hesus a bini i a revoká tur loke Adam a hasi!

Ta fasinante, tambe, ku e palabra "regalo" ta aparesé sinku biaha den Romanonan 5: 15-17. Sinku biaha! E punto ta simpel: Pablo ta enfatisá ku hustifikashon no por ser ganá, e ta ser duná komo regalo. Ta algu ku nos no meresé, ku nos no tin derecho riba dje. Meskos ku tur regalo, nos tin ku habri man i aseptá nan, i den e kaso aki, nos por reklamá e regalo aki pa medio di fe .

Lesa Ellen G. White, "Help in Daily Living," pp. 470-472, den The Ministry of Healing; "Christ the Center of the Message," pp, 383, 384, den Selected Messages, buki 1; "The Temptation and Fall," pp. 60-62, den Patriarchs and Prophets; "Justification," pp. 712-714, den The SDA Encyclopedia.

"Hopi ta ser gañá tokante di e kondishon di nan kurason. Nan no ta realisá ku e kurason di naturalesa ta engañoso riba tur kos, desesperadamente maligno. Nan ta kubri nan mes ku nan propio hustisia, i ta satisfasé nan mes den alkansá nan propio stándartnan humano di karakter," -Ellen G. White, Selected Messages, buki 1, p. 320.

"Tin gran nesesidat pa prediká Kristu komo e úniko speransa i salbashon. Ora e doktrina di hustifikashon pa medio di fe a ser presentá ... , e a yega manera awa ta yega na e biahero ku set. E pensamentu ku e hustisia di Kristu ta ser imputá na nos, no pa motibu di ningun mérito di nos parti, sino komo un regalo grátis di Dios, a parse un pensamentu presioso."-Pag. 360.

"Kende ta un figura di Esun ku mester a bin (5:14). Kon Adam ta un figura di Kristu? Manera Adam a bira kousa di morto pa su desendientenan, aunke nan no a kome di e palu prohibí, asina Kristu a bira e Dunadó di hustisia pa esnan ku ta di djE, aunke nan no a gana ningun hustisia; pasobra atraves di e Krus E a sigurá (hustisia) pa tur ser humano. E figura di Adam su transgreshon ta den nos, pasobra nos ta muri manera kos ku nos a peka meskos kune. E figura di Kristu ta den nos, pasobra nos ta biba manera kos ku nos a kumpli ku tur hustisia manera E a hasi," -Martin Luther, Commentary on Romans, pp. 96, 97.