E Impakto di Diesma

Hesus ta ordená nos pa "prediká e evangelio" (Marko 16:15) i pa "hasi disipel", "siñando nan pa kumpli ku tur kos" (Mat. 28:19, 20, NKJV). Pues, Dios ke pa nos ta embolbí den e trabou di mas importante riba tera: trese hende na Hesus. Finansiamentu di e mishon aki for di rekursonan konfiá na nos dor di Dios ta responsabilidat di e mayordomo. Partisipashon ta profundisá kompromiso personal di presentá Kristu na otronan. Kada disipel, mayordomo i obrero mester trese henter e diesmo pa e obra sagrado aki. Nos mester hasi orashon pa unidat pa ta fiel den finansiamentu di e mishon, meskos ku un mishon eksitoso ta fortalesé nos unidat di fe.

Kiko ta Dios Su plan finansiero aprobá pa kumpli ku e mishon aki? Kiko "henter e diesmo" kier men? (Mal. 3:10, NIV). Kiko e frase "pa por tin kuminda den mi kas" ta nifiká? (Mal. 3:10, NIV).

Manera nos a mira, hende a bin ta debolbé diesmo for di e dianan di Abraham i Jacob (Gen. 14:20, 28:22) i probablemente promé ku esei.

Diesmo ta parti di un sistema ku ta finansiá e iglesia di Dios. E ta e fuente di mas grandi di finansiamentu i e método ku ta pas mas mihó pa ehekutá Su mishon.

Den e kultura di awendia, mayoria Kristian ta duna relativamente tiki pa finansiá e mishon di Dios. Si kada Kristian lo tabata duna un diesmo honesto, e resultado lo tabata "kasi inimaginabel, simplemente asombroso, kasi mas aya di komprenshon."—Christian Smith and Michael O. Emerson, Passing the Plate (New York: Oxford University Press, 2008), p. 27.

Den tur siglo Dios tabatin hende ku tabata dispuesto pa finansiá Su mishon. Nos tur tin un responsabilidat di komprondé i traha huntu pa finansiá e tarea global aki. Nos no por pèrmití nos mes di ta desorganisá, deskuidá, òf poko sistemátiko tokante finansiamentu di e mishon. Nos desafio ta muchu mas grandi ku tempu ku e pueblo i e Levitanan a bisa Nehemias, "Nos lo no neglishá e kas di nos Dios' " (Neh. 10:39, NIV), i mas deskonsertá ku loke e kreyentenan a enfrentá den siglo 19. Awendia miembronan i klero mester ta uní spiritualmente i hala huntu finansieramente den un forma ku ta alkansá ophetivonan global i ta finansiá e mishon.

Manera nos a mira den Malakias 3:10, Dios a primintí un gran bendishon pa esnan ku ta fiel den nan diesmo. Sinembargo, e bendishon di Dios no ta di un dimenshon. Pa enfatisá, por ehèmpel, e akumulashon di biennan material komo un bendishon, a kosto di tur otro kos, ta un bista hopi smal di loke Dios Su bendishon ta realmente.

Bendishon den Malakias ta tantu spiritual komo temporal. E nifikashon di Dios Su bendishon ta duna evidensia pa medio di salbashon, felisidat, un pas mental, i Dios semper hasiendo loke ta mihó pa nos. Tambe, ora nos ser bendishoná dor di Dios, nos ta obligá na kompartí e bendishonnan ei ku esnan ménos fortuná. Nos a ser bendishoná pa bendishoná otronan. Enbèrdat, pa medio di nos Dios ta kapas na ekstendé Su bendishonnan tur otro kaminda.

Lesa 1 Pedro 3:8, 9. Kiko Pedro ta bisando nos tokante e relashon entre ser bendishoná i ser un bendishon pa otronan?

Tin dòbel bendishon den debolbé diesmo. Nos ta ser bendishoná, i nos ta un bendishon pa otronan. Nos por duna di loke a ser duná na nos. E bendishonnan di Dios pa ku nos ta alkansá nos di paden i otronan di pafó. "Duna, i lo ser duná na boso. . . . Pasobra ku e mesun midí ku boso midi kuné, lo ser midi bèk pa boso" (Lukas 6:38, NIV).

Lesa Echonan 20:35. Kon esaki ta apliká na debolbementu di diesmo tambe?

E bendishon di mas grandi ku debolbé diesmo ta siña nos ta pa konfia Dios (Yer. 17:7). "E sistema speshal di diesma a ser fundá riba un prinsipio ku ta mesun duradero ku e lei di Dios. E sistema aki di diesma tabata un bendishon pa e Hudiunan, sino Dios lo no a duna nan esaki. Asina tambe lo e ta un bendishon pa esnan ku ta praktik’é te na fin di tempu. Nos Tata selestial no a originá e plan di benevolensha sistemátiko pa enrikesé Su mes, sino pa ta un gran bendishon pa hende. E a mira ku e sistema aki di benefisensia tabata presis loke hende tabatin mester."—Ellen G. White, Testimonies for the Church, tomo 3, p. 404, 405.

Pablo ta skirbi na Timoteo: "No bisti buey bosal ora ku e ta trapa maishi,”i “E trahadó ta digno di su sueldo" (1 Tim. 5:18, NKJV). E ta sitando Moises den Deuteronomio 25:4 tokante e buey, i Hesus for di Lukas 10:7 enkuanto di e trahadó. E frase tokante e buey ta parse di tabata un proverbio, i e ta nifiká ku ta hustu pa e buey kome maishi miéntras e ta trahando. Di mes manera, e di dos proverbio ta nifiká ku trahadónan deboto ku ta prediká e evangelio mester ser rekompensá ku pago.

Dios ta krea i ta operá den sistema. El a diseñá sistema solar, eko-sistema, sistema digestivo, sistema nervioso, i hopi mas. E sistema di diesmo tabata ser usá dor di e Levitanan (Num. 18:26) pa kuida e tabernakel i pa nan sosten. E ekivalente den tempu moderno lo ta esnan ku ta dediká nan bida na prediká e evangelio. Dios Su sistema di diesma ta Su medio skohé pa sostené e ministerio, i tabata den uzo atraves di henter e historia di salbashon. Sosteniendo obreronan asina ku diesmo, anto, ta kardinal i fundamental pa e obra di Dios.

Kiko Pablo kier men i kiko ta e implikashon moral di e frase "Señor a ordená pa esnan ku ta prediká evangelio biba di evangelio" (1 Kor 9:14, NKJV)? Kiko 2 Korintionan 11:7-10 ta siña nos tokante e nesesidat pa sostené esnan ku ta plama e evangelio?

Ora Pablo a bisa, "Mi a horta otro iglesianan, tumando pago for di nan pa sirbi boso" (2 Kor 11:8, NKJV), e tabata papiando irónikamente di risibimentu di pago for di un iglesia pober na Masedonia miéntras e ta ministrá na un iglesia riku di Korinto. Su punto na e iglesia di Korinto tabata ku esnan ku ta prediká e evangelio meresé di ser pagá.

Diesmo mester ser usá pa un propósito partikular i mester keda asina. "E diesmo ta ser apartá pa un uso spesial. E no mester ser konsiderá komo un fondo pa pober. E mester ser dediká spesialmente pa sosten di esnan ku ta kargando e mensahe di Dios hiba na e mundu; i e no mester ser desviá for di e propósito aki."—Ellen G. White, Counsels on Stewardship, p. 103.

Dios tin un mangasina pa bientu (Yer 10:13), awa (Salmo 33:7), i sneu i hagel (Job 38:22), kua riba tur E tin kontròl total. Pero e mangasina di mas presioso di Dios ta esun ku ta enserá e diesmo. "Mi ta duna e Levitanan henter e diesmo den Israel komo nan erensia na lugá di e trabou ku nan ta hasi miéntras nan ta sirbi den e tènt di reunion" (Num. 18:21, NIV). E versíkulo aki ta e promé menshon di unda e diesmo ta ser wardá i e ta konosí awe komo "e prinsipio di mangasina." Mas aleu Dios a instruí e Israelitanan pa trese e diesmo na un lugá di Su eskoho (Deut. 12:5, 6). Durante e tempu di Salomon, diesmo tabata ser hibá na e tèmpel na Yerusalèm. E Israelitanan fásilmente a komprondé kiko i unda e "mangasina" tabata ora profeta Malakias a bisa nan: "Trese henter e diesmo den mangasina" (Mal. 3:10, NIV). E mangasina tabata representá e lokalidat kaminda servisionan religioso tabata tuma lugá i kaminda e Levitanan tabata ser sostené.

Ki otro nòmbernan ta ser usá den Skritura pa identifiká e mangasina? 1 Kron. 26:20, 2 Kron. 31:11-13, Neh. 10:38.

Tresiendo e diesmo sagrado na e mangasina ta e modelo presentá den Skritura. Den kada dispensashon, Dios tabatin un mangasina sentral pa manehá e diesmo. Atventistanan di e di Shete Dia ta konstituí un religion/iglesia mundial den kua e prinsipio di mangasina ta ser aseptá i praktiká. Miembronan ta ser enkurashá pa debolbé nan diesmo na e asosashon/mishon atraves di e iglesia lokal kaminda nan miembresia ta. E tesoreria di e asosashon/mishon ei ta kaminda e pastornan ta risibí nan salario.

"Segun ku e obra di Dios ta ekstendé, yamadanan pa yudansa lo bini mas i mas frekuentemente. Pa e yamadanan aki por ser kontestá, Kristiannan mester pone atenshon na e mandato, `Trese henter e diesmo den e mangasina, pa por tin kuminda den Mi kas.' Malakias 3:10. Si esnan ku ta profesá di ta Kristian lo tabata trese nan diesmo i ofrendanan fielmente serka Dios, Su tesoreria lo tabata yen. E ora ei lo no tabatin nodi di akudí na feria, loteria òf fiesta di plaser pa sigurá fondonan pa sosten di e evangelio."—Ellen G. White, The Acts of the Apostles, p. 338.

Lesa Romanonan 3:19-24. Ki bèrdat krusial, sentral na nos fe, ta ser siñá aki? Dikon nos mester mantené e siñansa aki semper fundamental na nos kreensianan?

E esensia di e mensahe bíbliko ta ku niun di nos meresé redenshon (Rom. 3:23). Si nos tabata meresé esaki, lo e tabata pa medio di mérito, òf pa medio di obranan, i e idea ei ta kontrali na Skritura.

Lesa Romanonan 4:1-5. Kiko e versíkulonan aki ta siña tokante grasia kontrali na mérito?

Pues, salbashon ta un regalo (Efe. 2:8, 9) duná na esnan ku no meresé. Salbashon ta bini pasobra e méritonan di Kristu Su propio sakrifisio perfekto ta ser akreditá na nos kuenta. Pa loke ta trata e asuntu di diesmo, no tin krédito optené di Dios dor di debolbé esaki. Despues di tur kos, si e diesmo ta di Dios na promé instante, ki mérito posiblemente lo por tabatin ora nos debolbé esaki na djE?

Debolbementu di diesmo no ta un akto ku ta salba nos, niun tiki mas ku ningun di e otro bon obranan ku nos a ser kreá pa hasi komo Kristiannan. "Pasobra nos ta e obra di Su man, kreá den Kristu Hesus pa bon obranan, kualnan Dios a prepará di antemano, pa nos kana den nan" (Efe. 2:10, NKJV).

Sinembargo, e debolbementu di e diesmo ta revelá un aktitut ku ta sea humilde i sumiso òf kabesura i desafiante enkuanto di loke Dios a pidi nos pa hasi. Si nos ta stima Dios, nos lo obedes'É. Diesmo ta un ekspreshon eksterno di nos realisashon ku nos, di bèrdat, ta simplemente mayordomonan akinan, i ku nos debe Dios tur kos. Meskos ku e Sabat ta un rekordatorio semanal di Dios komo e Kreador i Redentor, e debolbementu di diesmo por funshoná den un forma similar: e ta rekòrdá nos ku nos no ta di nos mes i ku nos bida i salbashon ta regalonan di Dios. Komo resultado, nos por rekonosé e realidat ei i biba un bida di fe, rekonosiendo ku e debolbementu di diesmo ta un ekspreshon masha tangibel di e fe ei.

Ta asina fásil pa lubidá ku kada rosea, kada sla di kurason, kada momentu di nos eksistensha ta bini solamente for di Señor. Den Echonan 17 Pablo ta papia ku e hendenan di Atenas tokante e bèrdadero Dios, Kende no ta solamente e Kreador (e "Dios ku a traha mundu i tur kos ku tin den dje" [Echonan 17:24]) sino tambe e Sostenedó ("Pasobra den djE nos ta biba i ta move i ta eksistí" [Echonan 17:28, NKJV]). E hendenan di Atenas no tabata sa tokante e bèrdadero Dios. Nos komo Kristiannan sí sa, i e realisashon aki mester ta sentral na e manera kon nos ta biba. Dios tin hopi eksigensia riba nos, i komo resultado, nos mester biba di akuerdo ku e eksigensia ei:

"Asina ta ku Dios Su eksigensianan riba nos. E ta pone Su tesoronan den man di hende, pero ta rekerí ku un désimo parti mester ser poné un banda fielmente pa Su obra. E ta rekerí pa e porshon aki ser poné den Su tesoreria. E mester ser duná na djE komo di djE mes; E ta sagrado i mester ser usá pa propósitonan sagrado, pa sosten di esnan ku ta hiba e mensahe di salbashon na tur parti di mundu. E ta reservá e porshon aki, pa medionan semper por kore den su mangasina i pa e lus di e bèrdat por ser hibá na esnan ku ta serka i esnan ku ta leu. Ora nos obedesé e rekerimentunan aki fielmente nos ta rekonosé ku tur kos ta pertenesé na Dios."—Ellen G. White, Testimonies for the Church, tomo 6, p. 3