Hesus i e Buki di Revelashon

Entre e hopi kosnan ku Daniel i Revelashon tin en komun tin nan dos divishonnan básiko: históriko i eskatológiko (eventonan di tempu di fin). Tur dos konsepto ta íntimamente konektá den kada buki. Nos por mira e eventonan históriko komo prekursornan, òf ehèmpelnan, ounke ta riba un eskala mas chikitu, di eventonan grandi i global den e último dianan. Es desir, dor di studia loke a sosodé den historia di Tèstamènt Bieu, nos por tin pistanan di loke lo sosodé den nos dianan i mas aya. E prinsipio aki, sinembargo, no ta limitá solamente na Daniel i Revelashon.

Lesa 1 Korintionan 10:1-11. Den e versíkulonan aki, kon nos ta mira e prinsipio ku ta ser papiá di dje akiriba?

Manera nos a mira siman pasá, algun di e storianan den Daniel (Dan. 3:6, 15, 27; i 6:6-9, 21, 22) tabata insidentenan históriko lokal ku ta reflehá, di algun manera, e eventonan di e tempu di fin deskribí den Revelashon. Dor di studia e storianan aki, nos por haña vislumbrenan den algun di e kosnan ku e pueblo di Dios lo afrontá riba un eskala mas amplio na final. Kisas, sinembargo, e punto di mas importante ta ku, no importá nos situashon inmediato aki, nos ta sigurá di liberashon final. Kualke otro kos ku Revelashon ta siña, e ta sigurá esnan fiel di viktoria.

Ounke tin algun eksepshon, e porshon históriko di Revelashon ta kapítulo 1-11, siguí pa e kapítulonan 13-22 tokante e tempu di fin.

Lesa Revelashon 12:1-17. Unda nos mester pone e kapítulo aki, den sekshon históriko òf di eventonan final, i dikon?

Manera nos por mira, e kapítulo aki ta pertenesé na tur dos segmento. Dikon? Pasobra e ta papia tokante konfliktonan históriko: e ekspulshon di Satanas for di shelu (Rev. 12:7-9), e atake di Satanas riba beibi Hesus (Rev. 12:4), i e persekushon di e iglesia despues, den historia di iglesia (Rev. 12:14-16), siguí pa un deskripshon e atake di diabel riba e remanente di e tempu di fin (Rev. 12:7).

Lesa e siguiente tèkstnan, kua tin vários nòmber pa Hesus den nan i den algun kaso deskripshonnan di djE i loke E a hasi, ta hasiendo, òf lo hasi. Kiko e tèkstnan ta bisa nos tokante Hesus?

Rev. 1:5

Rev. 1:18

Rev. 5:8

Rev. 19:11-15

Rev. 21:6

Esakinan ta solamente un par di e hopi tèkstnan den Revelashon ku ta deskribí Hesus den vários ròl i funshon. E ta e Lamchi, kua ta mustra na Su promé binida, den kua E a ofresé Su mes komo un sakrifisio pa nos pikánan. “P’esei, saka e zürdeg bieu afó, pa boso por bira un mansa nobo, sin zürdeg, manera boso ta di bèrdat. Pasobra Kristu, nos Pasku, tambe a ser sakrifiká” (1 Kor. 5:7). E tabata tambe Esun ku “tabata morto, i mira, Mi ta bibu pa semper” (Rev. 1:18), un referensia kla na Su morto i resurekshon for di morto. “Asina ta pará skirbí, ku e Kristu mester a sufri i lanta for di e mortonan riba e di tres dia” (Lukas 24:46, ASV). I den Revelashon 19:11-15 E ta ser deskribí den Su ròl na e Segundo Binida, ora E lo bin bèk na tera den poder i gloria i huisio. “Pasobra e Yu di Hende lo bin den e gloria di Su Tata, huntu ku Su angelnan; anto E lo rekompensá kada hende segun su obranan” (Mat. 16:27, NKJV).

Ademas di e dos divishonnan prinsipal, Revelashon tambe tin un otro nivel struktural, unu konstruí rondó di e santuario Hebreo. E tema aki di santuario no ta limitá na ningun di e dos divishonnan prinsipal, ma ta pasa dor di tur dos.

Den e santuario terenal bo ta kuminsá den e patio, na e altar di sakrifisio kimá, kaminda e animalnan tabata ser matá. Despues di morto di e animal, símbolo di e Krus, e saserdote tabata drenta den e promé apartamentu di e santuario, kua tabata un modelo di loke Hesus tabata hasi den e santuario selestial despues di Su asenshon. Esaki ta ser representá dor di Hesus kanando meimei di e kándelanan (Rev. 1:13).

Lesa Revelashon 4:1, 2. Kiko e porta habrí ta representá? Unda e esena aki ta lokalisá? Lesa tambe Echonan 2:33; 5:31; Efe. 1:20; Hebr. 10:12, 13; Salmo 110:1; Rev. 12:5.

Pronto despues di Su asenshon, Kristu a ser inougurá den e Lugá Santu di e tèmpel selestial, dor di e promé porta habrí aki. Ora Kristu aparesé pa promé biaha den e buki di Revelashon, E ta pará dilanti di e kándelanan di e promé apartamentu den e santuario selestial (lesa Rev. 1:10-18).

Lesa Revelashon 11:19. Kiko ta nifikashon di e echo ku ora e tèmpel selestial a ser habrí, Juan por a mira e arka di Su pakto aparesé, kua tabata situá den Segundo apartamentu di e santuario terenal (lesa Lev. 16:12-14)?

E imágen di e Arka di e Pakto den e santuario selestial ta un referensia indiskutibel na e Lugá Santísimo, òf Segundo apartamentu di esun selestial. Den e buki di Revelashon nos por mira no solamente e ministerio di Hesus den tur dos apartamentu, ma e echo krusial i konfortabel ku eventonan den shelu i tera ta konektá. Asta meimei di e pruebanan di historia i e último dianan manera nan ta ser deskribí den e buki di Revelashon, nos por tin e siguridat ku “henter shelu ta enbolbí den e obra di prepará un pueblo pa para den preparashon di e dia di Señor. E konekshon entre shelu ku tera ta parse hopi será”. — Ellen G. White, My Life Today, p. 307.

Tur kos den Revelashon, for di e struktura te na e kontenido, tin un propósito: pa revelá Hesukristu.

Ta p’esei e palabranan di apertura di e buki ta: “E revelashon di Hesukristu” (Apocalypsis Iesou Christou). Esaki generalmente ta ser komprondé komo (1) “e revelashon for di Hesukristu”; òf (2) “e revelashon tokante Hesukristu” (Rev. 1:2). E echo ku e ta un “revelashon” ta argumentá kontra esnan ku ta kere ku Revelashon ta muchu difísil pa komprondé. Dikon Señor lo a inkluí e buki den Beibel si E no tabatin intenshon pa e ser komprondé dor di esnan ku ta les’é?

Lesa Revelashon 1:1-8. Kiko e versíkulonan aki ta siña nos tokante Hesus?

Den Revelashon Kristu ta ser introdusí komo “e gobernante di e reinan di tera” (Rev. 1:5, NIV) i serka di final di e buki E ta ser deskribí komo “Rei di reinan” (Rev. 19:16). E gran notisia akinan ta ku meimei di tur e káos i konfushon riba tera, nos por tin e siguridat ku nos Señor i Salbador amoroso tin kontròl apsoluto.

Den Revelashon 1:5 nos ta ser duná un referensia kla na Kristu komo e Redentor. “Na E kende a stima nos i a laba nos for di nos pikánan den Su propio sanger” (NKJV) ta mustrá na Su morto ekspiatorio na e krus. E no a solamente hustifiká nos ma a santifiká nos tambe (1 Kor. 6:11). Den tèkstnan manera esaki nos por haña siguransa di salbashon, pasobra e ta mustrá nos ku Hesus ta Esun kende ta laba nos pikánan. Nos siguramente no por hasié nos mes. Lesa Revelashon 1:7. Kiko esaki ta siña nos tokante Hesus?

Sentral na henter e fe Kristian tin e promesa di e regreso di Kristu “den e nubianan”. Hesus lo bini atrobe, un regreso literal den un evento ku henter mundu lo testiguá, un evento ku, un bia i pa semper, ta terminá e sufrimentu, káos, i ruina di e mundu aki i ta duna komienso na tur e promesanan di eternidat.

Lesa Revelashon 1:10-18. Kiko Hesus ta bisa tokante E mes aki?

Ku Marta i awor ku Juan, Hesus ta mustra na e speransa di e resurekshon, e kulminashon i klímaks di e fe Kristian. Sin e speransa aki, ki speransa tin?

Lesa Revelashon 22:7, 12, 13. Kiko e versíkulonan aki tambe ta revelá tokante Hesus?

“Kristu ta e Alfa i e Omega, e Génesis di Tèstamènt Bieu, i e Revelashon di esun Nobo. Tur dos ta reuní den Kristu. Adam i Dios ta rekonsiliá pa e obediensia di e segundo Adam, Kende a kumpli ku e obra di vense e tentashonnan di Satanas i di redimí e frakaso bergonsoso i kaida di Adam”. — Ellen G. White Comments, The SDA Bible Commentary, tomo 6, p. 1092, 1093. Sí, Hesus ta e Prinsipio i e Fin. E a krea nos na prinsipio, i E lo rekreá nos na final.

For di prinsipio te na fin, segun ku e ta siña nos tokante no solamente historia ma tokante eventonan di tempu di fin, e buki di Revelashon ketu bai ta e Apocalypsis Iesou Christou, e Revelashon di Hesukristu. Atrobe, kualke otro kos ku nos por studia tokante eventonan final, Hesukristu mester ta e sentro di tur kos.

“Den Revelashon tin deskribí e kosnan profundo di Dios. E nòmber mes duná na su páginanan inspirá, ‘e Revelashon’, ta kontradesí e deklarashon ku esaki ta un buki seyá. Un revelashon ta algu revelá. Señor Mes a revelá na Su sirbidó e misterionan kontené den e buki aki, i ta Su propósito ku nan lo ser habrí pa estudio di tur hende. Su bèrdatnan ta dirigí na esnan ku ta biba den e último dianan di historia di e tera aki, i tambe na esnan ku tabata biba den e dianan di Juan. Algun di e esenanan deskribí den e profesia aki ta den pasado, algun ta tumando lugá aworakí; algun ta trese na bista e final di e gran konflikto entre e podernan di skuridat i e Prens di shelu, i algun ta revelá e triunfonan i gosonan di esnan redimí den e tera hasí nobo”. — Ellen G. White, The Acts of the Apostles, p. 584.

E tèkstnan ku nos a wak e siman aki, den tantu e komienso komo e final di e buki, ta mustra kuantu di Revelashon ta tokante Hesus. Asta ku tur e referensianan di Tèstamènt Bieu na eventonan históriko, e buki di Revelashon ta siña nos mas tokante nos Señor Hesus. Lesa tambe Revelashon 3:14; 5:5, 6; 7:14; 19:11-16 pa ainda mas tèkst den Revelashon tokante Hesus. Ora nos pone e tèkstnan aki huntu, nos por haña un representashon poderoso di Hesus i loke E mester nifiká pa nos komo esnan ku ta bisa di ta Su siguidónan.