Salbashon i e Tempu di Fin

No muchu tempu promé ku e krus, Hesus a papia ku Su sírkulo íntimo tokante kon hende por bin na e Tata atraves di djE. Tabata e ora ei ku Felipe a bisa: “Señor, mustrá nos e Tata, i esei ta basta pa nos” (Juan 14:8, NKJV).

Kon Hesus a kontestá Felipe? Juan 14:9. Kiko Su kontesta ta siña nos tokante e Tata? Ki konseptonan robes tokante Dios Su kontesta mester a aklará?

Algun hende ta bisa ku e Dios di Tèstamènt Bieu ta un Dios di hustisia en komparashon ku e Dios di Tèstamènt Nobo, kende ta yen di grasia i pordon. Nan ta hasi un distinshon entre e dos ku no ta bálido. Ta e mesun Dios, ku e mesun rasgonan, den tantu Tèstamènt Bieu komo esun Nobo.

Un rason pa kua Kristu a bin na e mundu aki tabata pa revelá e bèrdat tokante Dios e Tata. A lo largu di siglonan, ideanan robes tokante E i Su karakter a bira plamá tur kaminda, no solamente entre e paganonan sino tambe entre e nashon skohí di Dios. “Tera tabata skur dor di mal komprenshon di Dios. Pa e sombranan skur por a ser iluminá, pa e mundu por a ser tresé bèk serka Dios, e poder engañoso di Satanas mester a ser kibrá”. — Ellen G. White, The Desire of Ages, p. 22. Esakinan tabata algun di e motibunan ku Hesus a bin na e tera aki.

Dios no ta kambia. Si nos tabata konosé tur e echonan rondó di e eventonan den Tèstamènt Bieu, nos lo a deskubrí ku Dios ta mes miserikòrdioso den Tèstamènt Bieu ku e ta den esun Nobo. Skritura ta deklará: “Dios ta amor” (1 Juan 4:8), i Dios no ta kambia. “Hesukristu ta meskos ayera i awe i pa semper (Hebr. 13:8, NRSV).

Kòrda, tambe, tabata e Dios di Tèstamènt Bieu kende a kologá riba e krus.

E Dios aki ta tambe yen di grasia i kompashon, Kende no ta rabia lihé (Salmo 145:8). Dios tin amor ku no ta faya (Salmo 143:8) i ta hiba gustu den Su siguidónan (Salmo 147:11). Dios tin plan pa prosperá hende i duna nan speransa (Yer. 29:11). Den Su amor, E lo no reprendé mas sino ta regosihá den Su pueblo ku kantamentu (Sof. 3:17). Esaki, i asina tantu mas, ta loke Dios e Tata ta realmente.

Piká a separá e rasa humano for di Dios; un abismo hanchu a habrí entre nan, i a ménos ku e abismo ei sera, humanidat tabata kondená na destrukshon eterno. E golfo tabata hundu i peligroso. Tabata tuma algu totalmente inkreibel pa resolvé e problema di piká i pa reuní humanidat pekaminoso ku un Dios hustu i santu. A tuma Unu eterno manera Dios Mes, Unu mes divino manera Dios Mes, pa bira un ser humano i, den e humanidat ei, ofresé Su mes komo un sakrifisio pa nos pikánan.

Lesa Juan 1:1-3, 14 i Filipensenan 2:5-8. Kiko nan ta siña nos tokante ken Hesus ta?

Kristu tabata eterno i no dependiente riba ningun òf kualke hende pa Su eksistensia. E tabata Dios, no e mero aparensia eksterior di Dios sino Dios Mes. Su naturalesa esensial tabata divino i eterno. Hesus a retené e divinidat ei pero a bira un ser humano pa warda e lei den karni humano i pa muri komo un Sustituto pa tur esnan ku a kibra e lei, kua ta nos tur (Rom. 3:23).

Kristu a bira humano, sin ningun bentaha riba otro sernan humano. E a warda e lei di Dios, no pa medio di Su poder divino interno ma dor di dependé riba e mesun poder divino eksterno ku ta disponibel pa kualke ser humano.

Hesus tabata kompletamente Dios i kompletamente humano. Esaki ta nifiká ku Esun ku ta sostené “tur kos pa medio di e palabra di Su poder” (Hebr. 1:3) tabata e Mesun ku a ser hañá komo un “beibi ku tabata drumí den un pesebre” (Lukas 2:16). Esaki ta nifiká ku Esun ku “ta promé ku tur kos, i den djE tur kos ta konsistí” (Kol. 1:17, NKJV) ta e Mesun kende, komo un mucha humano, “a krese den sabiduria i estatura” (Lukas 2:52). Esaki ta nifiká ku Esun kende sin djE “nada di loke ta eksistí no a bin na eksistensia” (Juan 1:3, NKJV) tabata e Mesun ku a ser “matá kologá na un krus” (Echonan 5:30, NKJV).

Si tur esaki ta revelá nos e amor di Kristu pa nos, i e amor di Kristu pa nos ta djis un manifestashon di e amor di e tata pa nos, e ora ei no ta nada straño ku nos tin asina tantu motibu pa regosihá i ta gradesidu!

Lesa Romanonan 8:38, 39. Kon loke nos ta lesa den e studio di awe ta duna nos motibunan poderoso pa konfia den loke Pablo ta bisa nos aki?

Spiritu Santu a ser mal komprondé, kasi mes tantu ku e Tata. Algun teólogo a kere ku e Spiritu ta e amor entre e Tata i e Yu. Den otro palabra, e Spiritu ta djis afekshon entre e Tata i e Yu. Esaki ta nifiká ku E a ser redusí na un relashon entre dos miembro di e Deidat i E mes no ta un miembro.

Pero Skritura ta proba Su personalidat. Kristiannan ta ser batisá den Su nòmber huntu ku e Tata i e Yu (Mat. 28:19). E Spiritu ta glorifiká Kristu (Juan 16:14). E Spiritu ta konvensé hende (Juan 16:8). E por ser hasí tristu (Efe. 4:30). E ta un Konsolador (Juan 14:16), Yudadó (NKJV), Konsehero (RSV). E ta siña (Lukas 12:12), ta intersedé (Rom. 8:26), i ta santifiká (1 Pe. 1;2). Kristu a bisa ku e Spiritu ta guia hende den tur bèrdat (Juan 16:13).

Den poko palabra, Spiritu Santu ta Dios, meskos ku e Tata i e Yu ta. Huntu, nan ta Un Dios.

Tur kos ku e Spiritu ta hasi ta revelá amor divino. Kiko ta algun di e kosnan ku E ta hasi? Lukas 12:12, Juan 16:8-13, Echonan 13:2.

E evidensia di mas grandi ku Spiritu Santu ta Dios ta e enkarnashon di Kristu. Hesus a nase di Spiritu Santu (Mat. 1:20). Solamente Dios por a “krea” di e forma ei.

Spiritu Santu por a realisá dos milager kontrali pa Kristu. Di promé, E a trese e Kristu omnipresente den barika di Maria. Kristu a subi físikamente na shelu den kurpa humano, limitá den e kurpa ei. Di dos, e Spiritu ta trese Kristu limitá pa Su humanidat i, den un otro milager ineksplikabel, ta hasié presente na Kristiannan rònt mundu.

Pues, Spiritu Santu, huntu ku e Tata i e Yu, ta trahando na nos fabor. “E Divinidat tabata konmoví ku duele pa e rasa, i e Tata, e Yu, i Spiritu Santu a duna Nan mes na e obra di forma e plan di redenshon”. — Ellen G. White, Counsels on Health, p. 222.

E Tata, e Yu, i Spiritu Santu ta stima nos igualmente i ta trahando pa salba nos den e reino eterno di Dios. Kon, anto, nos por neglishá un salbashon asina grandi?

Algun Atventista di e di Shete Dia ta puntra nan mes si nan lo ser salbá. Nan ta falta siguridat i ta anhelá pa konosé nan futuro, den término di bida eterno. Nan ta traha duru pa ta sufisiente bon i sinembargo no ta alkansá. Nan ta wak nan paden i ta haña poko kos ku ta enkurashá nan den nan eksperensia di bida.

Ora nos mira e buraku inmenso entre e karakter di Hesus i nos mes òf ora nos lesa un tèkst manera “chikitu ta e porta i smal e kaminda ku ta hiba na bida, i poko ta esnan ku ta hañ'é” (Mat. 7:14), ken di nos no tin momentunan ora nos ta puntra nos mes si nos ta bai logr’é?

Pa ta prepará pa e tempu di fin, hende mester tin siguridat di salbashon den presente. Nan mester deleitá nan mes den e realidat di salbashon pa afrontá e futuro sin miedu. Sinembargo, manera nos a mira, tur e Personanan bibu di e Deidat ta traha pa salba nos. Por lo tantu, nos por i mester biba ku e siguridat di nos salbashon.

Lesa e siguiente tèkstnan. Ki speransa i garantianan ta sali for di nan enkuanto di salbashon i loke Dios a hasi pa nos i ta primintí di hasi?

Salmo 91:15, 16

Joel 2:31, 32

Juan 10:28

Rom. 10:9-13

1 Juan 5:11-13

Nos ta ser yamá, asta ordená, pa biba un bida santu, pero e bida aki ta resultado di a ser salbá dor di Kristu, no e medio pa logra e salbashon ei. Ounke nos mester ta fiel, asta te na morto, semper nos mester dependé riba e don komo nos úniko speransa di salbashon. E pueblo di Dios lo ser hañá fiel i obediente den e último dianan, un fieldat i obediensia ku ta surgi for di e siguridat di loke Kristu a hasi pa nan.

Lesa Revelashon 14:6, 7. Kiko ta e “evangelio eterno”?

E evangelio ta ser referí na dje aki komo “eterno”. Esaki ta mas evidensia ku Dios no ta kambia. Un Dios ku no ta kambia tin un evangelio ku no ta kambia. E evangelio eterno aki ta duna siguridat na tur ku ta dispuesto pa asept’é. E evangelio ta revelá e amor inkambiabel di Dios, i ta e mensahe aki ku ta esun ku mester bai na e mundu. Tur hende tin mester di un oportunidat pa skuch’é, pa kua motibu Dios a yama Su pueblo pa plam’é.

“Meskos ku E a skohe nos den djE promé ku fundashon di mundu, pa nos por ta santu i sin kulpa dilanti di djE den amor, E a predestiná nos pa ser adoptá komo Su yunan pa medio di Hesukristu, segun e bon intenshon di Su boluntat” (Efe. 1:4, 5, NKJV). Kiko esaki ta bisa ainda mas tokante kon “eterno” e evangelio ta realmente?

Skohé den djE “promé ku fundashon di mundu”. Papia di un evangelio “eterno”! Asta promé ku e Kreashon di e mundu aki, e plan di Dios tabata pa nos tin salbashon den djE.

Wak algun di e palabranan aki: “skohé”, “predestiná”, “bon boluntat”, “adopshon”. Wak kuantu e dos versíkulonan aki ta mustra na e deseo di Dios pa nos tin bida eterno “den djE”. I e echo ku Dios a hasi tur esaki den pasado di eternidat (lesa tambe 2 Tes. 2:13, 2 Tim. 1:9) ta mustra di forma asina kla na Su grasia, mustrando ku nos salbashon ta bin no for di nada ku nos por hasi ni for di mérito di ningun kriatura, sino totalmente komo un akto ku ta bin for di e karakter amoroso di Dios. Kon salbashon por a bin for di kualke kos ku nos por a hasi si nos a ser skohé pa tin salbashon den djE asta promé ku nos a eksistí? E eskoho ta pa nos aseptá òf rechas’é.

I kon e elekshon aki ta ser manifestá den bida di e skohínan? Dor di “ta santu i sin mancha Su dilanti den amor” (Efe. 1:4, NKJV). Ta pa esaki tambe nos a ser skohé.

Nos por tin siguridat di salbashon, pero nos no mester presumí al respekto. Ta eksistí algu manera un siguridat falsu di salbashon? Naturalmente. I Hesus a spièrta tokante esei tambe, bisando: “No ta tur hende ku bisaMi: ‘Señor, Señor,’ lo drenta e reino di shelu; ma esun ku hasi e boluntat di Mi Tata ku ta den shelu. Hopi lo bisaMi den e dia ei: ‘Señor, Señor, nos no a profetisá den Bo nòmber, i den Bo nòmber a saka demoño, i den Bo nòmber a hasi hopi milager?’ E ora ei lo Mi deklará na nan: ‘Nunka Mi no a konosé boso; bai for di Mi, boso ku ta hasi inikidat.’ ” (Mat. 7:22, 23, NKJV).

E hendenan aki a kometé dos eror fatal. Di promé, apesar di kualke kos grandi ku nan a hasi den nòmber di Señor, nan no tabata hasiendo e boluntat di Señor, kua tabata pa obedes’E Su lei. Hesus no a bisa: “Bai for di mi”, boso ku no tabata “sin piká” òf boso ku no tabata “sin kulpa” òf ku no tabata “perfekto”. En kambio, E a deskribí nan komo “hasidónan di maldat”, un tradukshon di anomian, òf “sin lei”. Di dos, nota nan énfasis riba nan mes i riba loke nan a logra: Nos no a hasi esaki den Bo nòmber? Òf Nos no a hasi esaya den Bo nòmber? Òf Nos no a hasi e otro kos aki, i tur kos den Bo nòmber? Por fabor! Kon leu for di Kristu nan mester tabata pa mustra riba nan mes obranan den un intento pa hustifiká nan mes dilanti di Dios? E úniko obranan ku lo salba nos ta esnan di Kristu, akreditá na nos pa medio di fe. Aki ta kaminda nos siguridat ta, no den nos mes òf den nos obranan ma solamente den loke Kristu a hasi pa nos. Bo ke siguridat? Obedesé e lei di Dios i deskansá solamente den e méritonan di e hustisia di Kristu, i lo bo tin e siguridat ku bo tin mester di dje.