Babilonia i Armagedon

Lesa Revelashon 14:8; 16:19; 17:5; 18:2, 10, 21, e seis referensianan na Babilonia den e buki di Revelashon. Teniendo den mente e storia di Babilonia manera e ta aparesé den Tèstamènt Bieu, kiko e tèkstnan aki ta siña nos tokante Babilonia manera e ta aparesé den eventonan di último dianan?

Ta ser bisá ku Beibel ta un storia di dos siudat, Yerusalèm i Babilonia. Miéntras Yerusalèm a para pa e stat di Dios i Su pueblo di pakto den henter Beibel (Salmo 102:21, Isa. 52:9, 65:19, Rev. 3:12), Babilonia a para pa opreshon, violensia, religion falsu, i rebelion habrí kontra Dios.

Pensa, por ehèmpel, riba e toren di Babel (Gen. 11:9). E palabra Hebreo pa “Babel” ta e mesun palabra pa e reino di “Babilonia”. Den 1 Pedro 5:13, Pedro ta manda kumindamentu pa e iglesia na “Babilonia”, kua generalmente ta ser komprondé di ta nifiká, no komo e ruinanan di e reino antiguo, situá den Irak di awendia, sino komo Roma mes, ku pronto ta bira e opresor di e iglesia. Esaki ta un apelashon interesante den lus di e buki di Revelashon i e ròl di Roma manera e ta ser presentá den dje.

Lesa Revelashon 14:8 i 18:3. Kiko e tèkstnan aki ta revelá tokante e influensia maligno di Babilonia riba e mundu i riba e pueblo di Dios?

No tin duda ku e poder ku Babilonia ta representá, manera deskribí den e buki di Revelashon, ta grandemente korupto i ku e influensia koruptivo aki ta ekstendé riba henter mundu, te na algun grado òf otro. E frase “e biña di e rabia di su fornikashon” (Rev. 14:8) ta klaramente un referensia na doktrina falsu, siñansa falsu, i práktikanan korupto i e resultadonan final ku ta sali for di nan. Babilonia ta un forsa pa maldat ku a plama na “tur nashon” (Rev. 18:3). Por lo tantu, tur hende mester tene kuidou pa nan tambe no ser korumpí.

Ounke kon korupto i amplio e influensia di Babilonia tabata den mundu, e buki di Revelashon ta siña ku un dia tur kos lo terminá.

Lesa Revelashon 18:1-10. Kiko e versíkulonan aki ta bisa nos tokante “e gran Babilonia”?

E mensahe di e di dos angel (Rev. 14:8) tokante e kaida di Babilonia ta ser ripití aki, den Revelashon 18:2. E ta un ekspreshon di kon korupto e entidat aki a bira.

“Beibel ta deklará ku promé ku e binida di Señor, Satanas lo traha ‘ku tur poder i señalnan i maravianan mentiroso, i ku tur engaño di inhustisia;’ i esnan ku ‘no a risibí e amor pa e bèrdat, pa nan por a ser salbá’, lo ser lagá pa risibí ‘mal komprondementu fuerte, pa nan kere un mentira.’ 2 Tesalonisensenan 2:9-11. No te ora e kondishonnan aki ser alkansá, i e union di e iglesia ku e mundu ser kumplí kompletamente den henter Kristianismo, e kaida di Babilonia lo ta kompletu. E kambia ta unu progresivo, i e kumplimentu perfekto di Revelashon 14:8 ta den futuro ainda”. — Ellen G. White, The Great Controversy, p. 389, 390.

Si e “kumplimentu perfekto” ei a yega awor, solamente Dios sa. Pero loke sí nos sa ta ku, di akuerdo ku e tèkstnan aki, Babilonia spiritual un dia lo afrontá e huisio di Dios pa motibu di su gran maldat. “Pasobra su pikánan a alkansá te na shelu, i Dios a rekordá su inikidatnan” (Rev. 18:5). E ekspreshon aki ta reflehá lenguahe di Tèstamènt Bieu tokante Babilonia antiguo tambe (lesa Yer. 51:9), i ta nifiká ku un tempu di huisio lo yega sigur.

E huisio benidero aki, naturalmente, lo no mester ta sorprendente. Despues di tur kos, Babilonia di antaño a afrontá huisio (lesa Daniel 5). Skritura den hopi lugá ta hopi kla ku un dia tur hende lo tin ku kontestá pa nan echonan, inkluyendo Babilonia. Ki refreskante ta pa sa ku komo Kristiannan nos tin un Intersesor den e huisio ei ku lo para pa nos (1 Juan 2:1; Dan. 7:22). De otro manera, nos destino lo no por tabata hopi mihó ku esun di Babilonia.

Ounke mayoria hende, inkluyendo hopi Kristian, no sa hopi tokante e buki di revelashon, un imágen òf palabra di dje a alkansá kultura popular: Armagedon (lesa Rev. 16:16). Asta den kultura sekular e palabra a yega di para pa un lucha final den kua e destino di tera ta kologá na un hilu. Hollywood a produsí un pelíkula yamá Armagedon tokante un asteroide gigante ku ta balansá pa destruí e planeta. Te na algun grado, e idea di fin di mundu ta den mente di hende sekular tambe.

Hopi Kristian ku ta konosí ku e buki di Revelashon i ta kere den dje ta mira e bataya di Armagedon komo un konflikto militar literal den Medio Oriente serka di fin di mundu. Un vershon tin un ehérsito di dosshen mion hòmber for di Asia ku ta bari nort di Israel. Otronan ta fihá riba e vários konfliktonan militar i polítiko den e parti ei di mundu ku lo, den nan komprondementu, prepará e esenario pa e último bataya militar di Armagedon den e área di Megido.

Sinembargo, Beibel ta duna un kuadro totalmente diferente. Skritura ta presentá Armagedon komo e klímaks final, no entre nashonnan ku ta den guera, sino entre e dos bandanan di e konflikto kósmiko. E ta un lucha religioso, no ekonómiko òf polítiko, ounke kuantu faktor ekonómiko i polítiko lo por bin den wega.

Lesa Revelashon 16:12-16. For di e tèkstnan aki so, kiko nos por siña tokante Armagedon?

Di promé, nota kon simbóliko e lenguahe ta aki. Spiritunan manera sapu ku ta sali for di boka di e dragon, boka di e profeta falsu, i boka di e bestia (referensianan na e podernan di Revelashon 13; e “profeta falsu” akinan mester ta un referensia na e bestia ku ta sali for di tera di Revelashon 13:11). E gran konflikto ta ser mirá aki tambe ora e “spiritunan di demoñonan” (Rev. 16:14, NKJV) sali pa batayá riba e “gran dia di Dios Todopoderoso” (Rev. 16:14). Den loke sea e forma ku Armagedon lo desaroyá, lo ta un konflikto mundial entre e forsanan di Kristu i Satanas. E no ta un bataya lokal den e área di Megido manera tampoko Babilonia den Revelashon ta papia tokante eventonan den un skina di Irak moderno di awe.

Kiko, sinembargo, e gran bataya di Armagedon aki ta? Di promé, e nòmber parse ta nifiká “Seru di Megido”. Sinembargo, no tin niun seru den e área konosí komo Megido, pero Seru Karmelo tabata situá den e besindario, i eruditonan a mira e frase Seru di Megido komo un referensia na Seru Karmelo.

Mas presisamente, studiantenan di Beibel a mira e storia di Elias i profetanan falsu di Baal riba Seru Karmelo komo un símbolo, un tipo di loke ta bai sosodé den Revelashon 13.

Manera nos a mira ayera, Revelashon 16:13, ku su referensia na e dragon, e bestia, i e profeta falsu, ta mustrá bèk na eventonan den Revelashon 13, e trinidat falsu ku nos a mira den lès 9.

Asuntunan den Revelashon ta kuminsá yega na un klímaks den versíkulonan 13 i 14, ora e di dos bestia ta realisá aktonan sobrenatural, asta hasiendo “kandela baha for di shelu riba tera den bista di hende” (Rev.13:13). E eventonan aki despues ta hiba na e konfrontashon direkto entre Dios i Satanas, entre esnan ku ta adorá e Dios berdadero i esnan ku ta adorá e “imágen di e bestia” (Rev. 13:14).

Lesa 1 Reinan 18:1-18. Kiko ta sosodé den e storia aki ku ta reflehá algun di e temanan ku lo desaroyá den e eventonan final, manera ta ser mirá den e buki di Revelashon?

Den hopi forma, loke nos ta mira aki ta un deskripshon skèrpi di e gran konflikto. Elias ta eksponé e asuntu di forma hopi kla den versíkulo 18: hende a bandoná e lei di Dios i ta adorando i siguiendo diosnan falsu. Esaki no tabata semper e problema, apesar di e formanan i maneranan inkontabel den kua e maldat aki a ser manifestá a lo largu di historia? Nos ta sea adorá “Esun ku a traha shelu i tera, laman i fuentenan di awa” (Rev. 14:7, NKJV), òf nos ta adorando un otro hende òf algu otro. Den kaso di Revelashon 13 i e eventonan ku ta desaroyá aki, na lugá di adorá Señor, hende ta adorá e bestia i su imágen. No tin tereno meimei. Nos ta sea na banda di Dios òf na banda di Satanas. Ta asina importante e asuntunan ku ta den wega ta, awor i spesialmente den e bataya di Armagedon, kaminda, manera nos lo mira den e storia riba Seru Karmelo, e distinshon ta bira hopi kla.

Lesa 1 Reinan 18:18-40. Kiko ta sosodé, kon e storia ta terminá, i (sin pusha e paralelonan muchu leu) kon e storia aki ta reflehá loke lo sosodé, pero riba un eskala grandi, segun ku e gran konflikto ta kulminá na fin di tempu?

E bataya riba Seru Karmelo tabata entre Elias, profeta di Dios, i e sentenáres di saserdotenan di Baal. (Nota kon esnan malu tabata mas tantu ku esnan bon). E tabata un prueba pa demostrá ken ta e berdadero Dios, e Dios ku a krea e shelunan i tera, òf Baal, djis un otro manifestashon di “e dragon” i otro medionan pa medio di kua e ta purba gaña e mundu (Rev. 12:9).

E saserdotenan a hasi orashon na Baal pa manda kandela pa kima nan sakrifisio di toro. Nan a grita for di mainta te mèrdia. “Grita duru”, Elias tabata tenta nan. “Kisas e ta drumi” (1 Reinan 18:27, NKJV). E saserdotenan a aktua den lokura. Nan a kòrta nan mes ku spada te ora sanger a kore libremente. Kansá i abatí nan a entregá na momentu di e sakrifisio di atardi.

E sakrifisio di Elias a ser muhá tres biaha, i awa tabata basha over di e roinan. Elias a hasi un orashon simpel na Dios. Mesora Dios a kima tur kos, inkluyendo e altar di piedra i tera bou di dje. E poder di e Dios berdadero kontrali na Baal awor tabata inkonfundibel.

Lesa Revelashon 16:13; 19:20, 21, i kompará e tèkstnan aki ku e destino di e profetanan falsu di Baal. Kiko nos ta mira aki?

Loke sea ta keda deskonosí tokante Armagedon, a lo ménos pa awor, nos sa e resultado: destrukshon di e enemigunan di Dios i vindikashon pa Dios i Su santunan.

Lesa 1 Korintionan 15:1, 2.Ounke e konteksto inmediato ta diferente for di Armagedon, kiko ta e punto ku Pablo ta enfatisá, i dikon esei ta asina relevante pa nos kòrda, spesialmente den lus di loke futuro tin aden? Lesa tambe Revelashon 16:15, den kua e konteksto ta definitivamente Armagedon. Kiko, huntu, e tèkstnan aki ta bisa nos?

“Na vários lugá den relato di e bataya di Armagedon e kriaturanan abominabel i e eventonan mahos ta pasa tras di kortina pa un momentu i un bista chikitu di bèrdat mas personal ta aparesé. Manera nos a mira, un di nan ta Revelashon 16:15: ‘Ata, Mi ta bin manera un ladron! Bendishoná ta esun ku keda lantá i ta tene su pañanan huntu kuné, pa e no kana sunú i ser eksponé di forma bergonsoso’ (NIV). E tèkst aki, ku ta aparesé nèt meimei di esun lugá den Beibel ku efektivamente te menshoná Armagedon, ta eko hopi pasashi di Tèstamènt Nobo tokante preparashon personal pa e regreso di Hesus i e eventonan di fin.

“Un otro tèkst asina ta Revelashon 17:14: ‘Esakinan lo hasi guera ku e Lamchi, pero e Lamchi lo vense nan, pasobra E ta Señor di señornan i Rei di reinan, i esnan huntu kunE ta ser yamá i skohé i fiel’ (tradukshon di e outor). Aki e gran guera na fin ta involukrá un ehérsito di hende ken nan propósito prinsipal no ta pa destruí otronan ku arma, sino pa ta fiel na nan yamada i elekshon divino. Esaki ta un tipo di bataya hopi diferente for di esnan ku nashonnan i operashonnan revolushonario ainda ta bringa awe. Manera mi a bisa bes tras bes, e bataya di Armagedon ta un lucha pa e mente. E ta tambe un bataya pa e kurason, un yamada pa fieldat sinsero na e Lamchi ku a ser matá (Rev. 5:9, 10, 12; 13:8)”. — Jon Paulien, Armageddon at the Door (Hagerstown, Md.: Autumn House Publishing, un divishon di Review and Herald Publishing Association, 2008), p. 193.