E di Tres Biahe Mishonero

Echonan 18:24-28 ta registrá ku miéntras Pablo tabata ainda riba su kaminda pa Efeso, un kreyente Hudiu yamá Apolos a yega na e stat ei. E tabata un hòmber elokuente i bon vèrsá den e Skrituranan. Ku Apolos tabata un siguidó di Hesus ta evidente for di e manera ku Lukas ta deskribié: "E a ser instruí den e kaminda di Señor, i e tabata papia ku gran fervor i tabata siña ku eksaktitut tokante Hesus" (Echonan 18:25, NIV). Sinembargo, e tabata konosé solamente e boutismo di Juan. Siendo ku e a ser batisá dor di Juan Boutista, Apolos a bira konosí ku Hesus durante e bida terenal di Hesus, pero e lo mester a bai for di e área‒probablemente bai bèk na Alehandria‒promé ku e eventonan di Pashon/Pentekòste.

Esaki ta splika dikon Akila i Prisila lo a dun'é mas instrukshon. Ounke siendo kapas pa mustra for di e Skrituranan ku Hesus tabata e Mesias di Israel (Echonan 18:28), Apolos mester a ser aktualisá pa loke ta trata e desaroyonan di Kristianismo for di e ministerio di Hesus. Sinembargo, Akila i Prisila a hasi mas pa Apolos: huntu ku e otro kreyentenan na Efeso, nan a dun'é un karta di rekomendashon dirigí na e iglesianan na Akaya (Echonan 18:27), kua a pèrmitié di tin un ministerio efektivo na Korinto (1 Kor. 3:4-6, 1 Kor. 4:6, 1 Kor. 16:12).

Lesa Echonan 19:1-7. Kiko a pasa ku Pablo ora e a yega Efeso?

E historia di Apolos ta konektá ku e relato di e diesdos hòmbernan ku Pablo a topa na Efeso na su yegada den e stat ei, pasobra nan situashon tabata masha similar. Nan deskripshon komo "disipelnan" (Echonan 19:1) i e pregunta di Pablo na nan (Echonan 19:2) ta indiká klaramente ku ya nan tabata kreyentenan den Hesus. Na mes momentu, nan kontesta na Pablo ta mustra ku, similarmente na Apolos, nan tambe tabata disipelnan anterior di Juan Boutista ku a bira siguidónan di Hesus sin a eksperensiá Pentekòste. Nan mester tabatin un oportunidat pa gosa di un eksperensia mas profundo ku Señor.

"Na su yegada na Efeso, Pablo a haña diesdos ruman, ku, manera Apolos, tabata disipelnan di Juan Boutista, i meskos kuné a haña algun konosementu di e mishon di Kristu. Nan no tabatin e abilidat di Apolos, pero ku e mesun sinseridat i fe nan tabata purba plama e konosementu ku nan a risibí".—Ellen G. White, The Acts of the Apostles, p. 282.

Nos mester mira nan boutismo nobo den lus di e situashon úniko aki. Nan no tabata bin for di un otro denominashon Kristian, ni nan tabata eksperensiando kombershon. Solamente nan tabata ser integrá den Kristianismo tradishonal. Ku nan a risibí e Spiritu i tabata papia den lenga probablemente ta nifiká ku nan tabata mishoneronan Kristian, manera Apolos tabata, ku awor tabata ser outorisá kompletamente pa testifiká tokante Kristu unda sea ku nan bai.

Na Efeso, Pablo a sigui su práktika di prediká den e sinagoga promé. Ora ku oposishon a lanta, e i e kreyentenan nobo a move pa e sala di konferensia di un sierto Tirano, kaminda Pablo a prediká diariamente pa dos aña (Echonan 19: 8-10). E resúmen di Lukas di e ministerio di Pablo na Efeso ta ku henter e provinsia a ser intensamente evangelisá (Echonan 19:10, 26).

Den Echonan 19:11-20, Lukas ta añadí algun historia di milagernan ku ta deskribí e triunfo di e poder di Dios den un stat kaminda magia i otro práktikanan superstisioso tabata bastante komun. No tin niun duda ku Dios por kura atraves di Pablo, pero ku asta lensu i frèskòt ku e apòstel a mishi kuné tabatin poder kurativo (Echonan 19:12) por zona straño pa algun, ounke esaki tin similitut ku Hesus Su kuramentu di e muhé ku e derame di sanger (Lukas 8:44). E kreensianan superstisioso di Efeso por a hiba Dios na ehekutá milagernan "ekstraordinario", manera Lukas a bisa (Echonan 19:11). Esaki, kisas, ta un ehèmpel di ku Dios ta satisfasé e nesesidatnan di e pueblo na nan propio nivel di komprondementu.

Satisfecho ku e resultadonan di su mishon na Efeso, Pablo a disidí di bai Yerusalèm (Echonan 19:21). Lukas no ta duna un motibu pa e biahe aki, pero nos sa for di Pablo su propio eskritonan ku e tabata deseá di entrega e fondonan ku e a kolektá pa aliviá e pobresa di e iglesia di Yerusalèm (Rom. 15:25-27, 1 Kor. 16:1-3). E formashon di biennan di e promé añanan, i un hamber severo den e dianan di Claudio, a hasi e kreyentenan di Hudea pober, i Pablo a mira den nan apelashon pa yudansa (Gal. 2:10) un oportunidat pa fortalesé tantu nan konfiansa den su apostolado i e unidat di un iglesia ku awor tabata multikultural, apesar di sa e riesgonan na kua e lo a ser eksponé (Echonan 20:22, 23; Rom. 15:31).

Lesa Echonan 19:23-41. Kiko tabata e motibu real pa e oposishon na Pablo ku a lanta na Efeso na final di su estadia einan?

E oposishon tabatin di haber ku adorashon pagano, kua tabata ser menasá severamente pa e ministerio di Pablo. E motivashon real di Demetrio tabata klaramente finansiero, pero e tabata kapas pa konbertié den un asuntu religioso pasobra e tèmpel di Artemisa (òf Diana), konsiderá komo un di e shete maravianan di e mundu antiguo, tabata situá na Efeso.

Despues di e lantamentu (Echonan 19:23-41), Pablo a disidí di bandoná Efeso. Pero e a desviá i pasa atraves di Masedonia i Akaya na lugá di bai stret pa Yerusalèm (Echonan 20:1-3). Riba e biahe aki, representantenan di algun iglesia Pagano tabata huntu kuné (Echonan 20:4).

Lesa Echonan 20:7-12. Kiko tin robes ku e argumento komun ku e versíkulonan aki ta yuda komprobá ku e Sabat a ser kambia pa djadumingu?

E eskala di Pablo na Troas a terminá ku un reunion di iglesia "riba e promé dia di siman" (Echonan 20:7). Nan a reuní huntu "pa kibra pan", kua probablemente ta referí na e Sena di Señor, ku òf sin e kuminda di kompañerismo ku hopi biaha tabata ser kombiná kuné for di e promé dianan di e iglesia na Yerusalèm (Echonan 2:42, 46). Ku no tin menshon di un kopa ni di niun orashon no ta deskartá e posibilidat aki. E punto, sinembargo, ta ku e echo aki hopi biaha ta ser menshoná komo evidensia ku den tempu di Pablo, a lo ménos iglesianan Pagano ya a remplasá Sabat ku djadumingu komo un dia di adorashon.

Sinembargo, promé ku hasi un afirmashon asina, ta nesesario pa establesé e dia presis riba kua e reunion a tuma lugá, meskos tambe e naturalesa di e reunion. E referensia na e uso di lusnan (Echonan 20:8), huntu ku e echo ku e mensahe di Pablo a kontinuá te mei anochi (Echonan 20:7), i despues te ora dia a habri (Echonan 20:11), sin menshoná e soño profundo di Eutiko (Echonan 20: 9), ta hasi kla ku tabata un reunion di anochi.

E kuestion, sinembargo, ta si tabata e anochi promé ku djadumingu òf e anochi despues di djadumingu. E kontesta ta dependé di ki sistema di kálkulo di tempu Lukas ta usando, sea e sistema Hudiu di bahada di solo pa bahada di solo òf esun Romano di mei anochi pa mei anochi. Si ta esun promé, e ora ei e tabata djasabra anochi; den kaso di e último, tabata djadumingu anochi.

Di kualke manera, e konteksto di Echonan 20:7-12 ta indiká ku, asta si e reunion tabata riba un djadumingu anochi, e no tabata un reunion di iglesia regular pero unu spesial debí na e salida di Pablo e siguiente mainta. Ta difísil pa mira, anto, kon e echo isolá i eksepshonal aki ta permití sosten pa wardamentu di djadumingu. Echo ta, e no ta hasié.

Riba su kaminda pa Yerusalèm, Pablo a hasi un otro parada, e biaha aki na Mileto, kaminda e tabatin e oportunidat pa transmití su diskurso di despedida na e lidernan di e iglesia di Efeso.

Lesa Echonan 20:15-27. Kiko tabata e énfasis di Pablo den e parti introduktorio di su diskurso?

Komo ku ya e a traha plannan pa un biahe nobo, kua tabata inkluí Roma i Spaña (Rom. 15:22-29), Pablo tabata kere ku e lo no a regresá Asia nunka mas. Asina, el a kuminsá su diskurso ku un tipo di rindimentu di kuenta di e añanan ku e a pasa na Efeso. Un informe asina, sinembargo, tabata mustra no solamente na e pasado, es desir, e manera ku a a biba entre e Efesonan, pero tambe na futuro, pasobra e tabatin miedu di loke por a sosodé kuné na Yerusalèm.

E temor di Pablo no tabata infundá. E iglesia di Yerusalèm tabata mir'é ku algun duda, si no tabata hostilidat, debí na su pasado komo persiguidó i e evangelio liber di sirkumsishon ku e tabata prediká (Echonan 21:20-26). Pa e outoridatnan Hudiu, e tabata nada mas ku un traidor i apóstata di nan tradishonnan religioso (Echonan 23:1, 2). Pa meimei di siglo 1, spesialmente debí na mal gobièrnu Romano, Hudea tambe tabata presa di e idealnan revolushonario i nashonalista. E atmósfera aki a influensia tur segmento di sosiedat Hudiu, inkluyendo posiblemente e iglesia. Den un konteksto asina, e aktividatnan di e eks Fariseo ei entre e Paganonan mester a hasié un figura notorio (Echonan 21:27-36).

Pablo tambe tabatin mas preokupashonnan. Den Echonan 20:28-31, Pablo tabata enfoká riba kon e lidernan di iglesia na Efeso mester a manehá e tema di maestronan falsu, ken e a kompará ku lobonan brabu ku lo a trata na ekstraviá i pervertí e tou. Asina asta den e iglesia mes, i asta den e promé dianan di e iglesia, e peliger di maestronan falsu tabata real. Manera Salomon a bisa na otro momentu i den un otro konteksto: "No tin nada nobo bou di solo" (Ekl. 1:9). Un historia di e iglesia Kristian ta revelá e dañonan inkreibel ku maestronan falsu a trese na e iglesia. E problema lo eksistí te na fin (2 Tim. 4:3).

Sin duda, Pablo tabatin hopi kos na su mente, hopi preokupashon; i tòg, su fieldat i su diligensia nunka a tambaliá.

Despues di Mileto, Lukas ta registrá e biahe di Pablo den algun detaye. Ainda riba ruta pa Yerusalèm, e apòstel a pasa un siman na Tiro, ria e kosta di Fenisia kaminda e barku mester a ser deskargá (Echonan 21:1-6). Sinembargo, miéntras e tabata einan, e kreyentenan a urgié pa no bai Yerusalèm. Ku e kreyentenan a ser guiá dor di e Spiritu pa spièrta Pablo pa no bai Yerusalèm no ta nesesariamente den kontradikshon ku e guiansa anterior di e apòstel. E etheto en tó pneumatic Griego den Echonan 19:21 probablemente mester ser tradusí komo " resolvé den Spiritu" (ESV, NRSV, NKJV), mas bien ku komo si fuera Pablo a yega na e desishon aki riba su mes. E punto ta ku e Spiritu por a mustra e Kristiannan di Tiro e peligernan ku tabata bin riba Pablo; i asina, pa preokupashonnan humano, nan a rekomendá pa e no prosedé ku su intento. Pablo mes no tabata sigur tokante kiko lo a sosodé kuné na Yerusalèm (Echonan 20:22, 23). Guiansa divino no semper ta hasi tur kos kla, asta pa un hende manera Pablo.

Lesa Echonan 21:10-14. Ki insidente spesial a tuma lugá na Cesarea konserniente e biahe di Pablo pa Yerusalèm?

Agabo tabata un profeta di Yerusalèm ku ya a ser introdusí den e relato di e gran hamber den Echonan 11:27-30. Den un forma similar na algun profesianan di Tèstamènt Bieu (por ehèmpel, Isa. 20:1-6, Yer. 13:1-10), su mensahe tabata unu aktuá; e a funshoná komo un ilustrashon bibu di loke lo a sosodé ku Pablo ora e a yega Yerusalèm i kon su enemigunan lo a entreg'é na e Paganonan (e Romanonan).

Esnan ku tabata huntu ku Pablo aparentemente a tuma e mensahe di Agabo komo un spièrtamentu, no komo un profesia, i nan a trata di tur manera pa konvensé e apòstel ku e no mester a bai Yerusalèm. Ounke profundamente konmoví dor di nan reakshon, Pablo tabata determiná pa kumpli ku su mishon, asta a kosto di su propio bida. P'e, e integridat di e evangelio i e unidat di e iglesia tabata mas importante ku su propio siguridat òf interesnan personal.

"Nunka ántes e apòstel a aserká Yerusalèm ku un kurason asina tristu. E tabata sa ku e lo a haña poko amigunan i hopi enemigu. E tabata alkansando e stat kua a rechasá i mata e Yu di Dios i riba kua awor tabata kologá e menasanan di rabia divino."—Ellen G. White, The Acts of the Apostles, p. 397, 398.

"E éksito ku a kompañá e predikashon di e evangelio a spièrta di nobo e rabia di e Hudiunan. For di tur parti tabata bini relatonan di e plamamentu di e doktrina nobo dor di kua e Hudiunan a ser liberá di e opservansia di e ritonan di e lei seremonial i Paganonan tabata ser atmití ku privilegionan igual ku e Hudiunan komo yunan di Abraham. . . . Su [Pablo] deklarashon empátiko, ‘No tin Griego ni Hudiu, sirkumsishon ni insirkumsishon’ (Kolosensenan 3:11), a ser konsiderá dor di su enemigunan komo un blasfemia desafiante, i nan a determiná ku su bos mester a ser silensiá."—Ellen G. White, The Acts of the Apostles, p. 390.

"I e no por a konta riba e simpatia i sosten di asta su propio rumannan den fe. E Hudiunan no kombertí ku a sigui su pasonan asina djaserka, no tabata slo pa sirkulá e informenan di mas desfaborabel na Yerusalèm, tantu personalmente komo pa medio di karta, enkuanto di dje i su trabou; i algun, asta di e apòstelnan i ansianonan, a risibí e informenan aki komo bèrdat, sin hasi esfuerso pa kontradisí nan, ni manifestá deseo pa harmonisá ku n'e."—Página 398.