Kreashon i Kaida

Un mensahe kla ku ta sali for di e storia di Kreashon den Génesis 1 i 2 ta e harmonia total ku tabata eksistí na final di e siman di Kreashon. E último palabranan di Dios ku tur kos tabata “masha bon” (Gen. 1:31) ta referí no solamente na bunitesa estétiko ma tambe na e ousensia di kualke elemento di maldat òf diskordia ora Dios a kaba di traha e mundu aki i e hendenan ku mester a biba riba dje. E propósito original di Dios den Kreashon tabata inkluí e koeksistensia harmonioso i relashon interdependiente di tur forma di bida. E tabata un mundu bunita kreá pa e famia humano. Tur kos tabata perfekto i digno di su Kreador. E propósito ideal i original di Dios pa e mundu tabata unu di harmonia, unidat, i amor.

Lesa Génesis 1:26, 27. Kiko e versíkulonan aki ta siña tokante singularidat humano den kontraste ku e restu di e kreashon terenal manera deskribí den Génesis 1 i 2?

Génesis ta bisa ku Dios a krea humanidat den Su imágen, algu ku no ta ser bisá tokante kualke otro kos den e relato di kreashon di Génesis. “E ora ei Dios a bisa: ‘Laga Nos traha hende den Nos imágen, di akuerdo ku Nos semehansa. …’ Asina Dios a krea hende den Su mes imágen; den imágen di Dios E a kre’é; hòmber i muhé E a krea nan” (Gen. 1:26, 27, NKJV). Ounke teólogonan a debatí pa siglonan e naturalesa eksakto di e imágen aki, i e naturalesa di Dios Mes, hopi pasashi di Skritura ta presentá e naturalesa di Dios komo amor.

Lesa 1 Juan 4:7, 8, 16. Kon e versíkulonan aki por yuda nos komprondé kon nos a ser kreá originalmente i kon esaki por a impaktá e unidat original hañá na Kreashon?

Dios ta amor, i pasobra hende tambe por stima (i den formanan ku restu di e kreashon terenal no por), pa ser kreá den Su imágen mester inkluí e abilidat pa stima. Sinembargo, amor por eksistí solamente den relashon ku otronan. Pues, loke sea ser kreá den e imágen di Dios ta enserá, e mester enserá e kapasidat di stima, i di stima profundamente.

E konsekuensianan di e Kaida tabata enorme. E desobedensia di Adam i Eva a inisiá e kiebro di un interdependensia harmonioso entre tur forma di bida. Pió ainda, e a inisiá e desunion, diskordia, i divishonnan entre sernan humano ku ta eksistí te ku awe. E diskordia ta ser mirá inmediatamente den kon Adam i Eva a purba pone e kulpa pa e Kaida riba otronan (Gen. 3:12, 13). Kosnan a bira solamente pió for di e tempu ei.

Lesa Génesis 3:16-19 i Génesis 4:1-15. Kiko den e versíkulonan aki ta revelá e resultadonan di piká i su impakto riba e mundu harmonioso ku Dios a krea?

E desobedensia di Adam a bira e fuente di hopi evento i konsekuensianan ku despues di tempu a afektá henter e kreashon di Dios. E mundu natural mes a kuminsá sufri di e konsekuensianan di piká. Relashonnan humano tambe a ser afektá. Cain i Abel, dos ruman hòmber ku mester a stima i kuida otro, a distansiá for di otro pasobra un tabata deseá di sigui su propio inklinashonnan egoista na lugá di sigui e sistema di adorá preskribí dor di Dios. E distansiamentu aki a resultá den violensia i morto. E reakshon di Cain, sinembargo, tabata mas dirigí na Dios ku na Abel. E a sinti rabia pa ku Dios (Gen. 4:5), i e rabia aki a hiba na resentimentu pa ku Abel. Desobedensia a kibra relashonnan humano ainda mas.

“E ora ei Señor a mira ku e maldat di hende tabata grandi riba tera, i ku tur intenshon di e pensamentunan di su kurason tabata solamente maldat kontinuamente” (Gen. 6:5, NKJV). E maldat aki finalmente a hiba na e Diluvio i na e destrukshon inkreibel di e kreashon original di Dios ku a keda despues di e Diluvio. Pero asta e ora ei Dios no a renunsiá e rasa humano sino a laga un remanente, Noe i su famia, pa kuminsá atrobe.

Despues di e Diluvio, Dios a duna un promesa na Noe i su famia. E regenbog den shelu semper lo a kòrda nan riba Su kuido i promesanan, di Su bondat i miserikòrdia (Gen. 9:12-17, Isa. 54:7-10). Dios a instituí un pakto ku Noe i a restorá Su plan original di tin un famia humano uní ku ta fiel na djE i Su Palabra.

Lesa Génesis 11:1-9. Kiko a sosodé aki ku ta hasi e problema di separashon i desunion pió?

E siguiente eventonan dokumentá pa e Beibel despues di e Diluvio ta e konstrukshon di e Toren di Babel, e konfushon di idiomanan, i despues e plamamentu di hende, ku te asina leu a papia un idioma. Kisas atraé pa e bunitesa di e tera entre e riunan Eufrates i Tigris, i e fertilidat di e tera, algun di e desendientenan di Noe a disidí di konstruí un stat pa nan mes i un struktura di toren haltu den e tera di Shinar, sur Irak di awendia (Gen. 11:2).

Arkeologia a mustra ku Mesopotamia tabata un region hopi poblá for di tempunan históriko mas trempan. Entre e hendenan aki tabatin e Sumerianonan, ku ta ser akreditá ku nan a inventá e arte di skirbi riba tablanan di klei. Nan a traha kasnan bon konstruí i tabata maestronan den e produkshon di hoya, hèrmèntnan, i aparatonan di kas. Kobamentu tambe a deskubrí hopi toren ku parse tèmpel dediká na e adorashon di vários deidat.

E desendientenan di Noe ku a establesé den e tera di Shinar pronto a lubidá e Dios di Noe i e promesanan ku E a hasi pa nunka mas destruí mundu pa medio di un diluvio. Traha e Toren di Babel tabata un monumento na nan sabiduria i abilidatnan superior. Nan anhelo pa renombre i reputashon, pa “traha un nòmber pa nos mes” (Gen. 11:4), tabata un motibu pa e proyekto di konstrukshon aki. “Di akuerdo ku e propósito divino, hende mester a preservá unidat atraves di e laso di berdadero religion. Ora idolatria i politeismo a kibra e laso spiritual interior aki, nan a pèrdè no solamente unidat di religion ma tambe e spiritu di fraternidat. Un proyekto manera esun di e toren, pa preservá pa medio di medionan eksterior e unidat interior ku a ser pèrdí, nunka por tabatin éksito.” - The SDA Bible Commentary, tomo 1, p. 284, 285.

E kaida di Adam i Eva a destruí e unidat di e rasa humano i e plan original di Dios. E a resultá den konfushon enkuanto di adorashon; e distribushon di maldat i inmoralidat riba tera; i finalmente e separashon di humanidat den hopi diferente kultura, lenga, i rasa ku hopi biaha tabata den konflikto ku otro for di e dia ei.

E tres gran religionnan mundial monoteista, Hudaismo, Kristianismo, i Islam, ta wak Abraham komo nan tata. Pa Kristiannan, e asosashon aki ta un relashon spiritual. Ora e a ser yamá pa bandoná su pais na Mesopotamia, Abraham a ser bisá ku den dje “tur e famianan di tera lo ta bendishoná” (Gen. 12:3, NKJV; lesa tambe Gen. 18:18, 22:18). E bendishon a bin atraves di Hesus.

Lesa Hebreonan 11:8-19, Romanonan 4:1-3, i Galationan 3:29. Ki elementonan di e fe di Abraham e tèkstnan aki ta menshoná, i kon nan ta relatá na e idea di unidat Kristian? Es desir, kiko por ser hañá den e tèkstnan aki ku por yuda nos awe pa komprondé kiko un komponente krusial di unidat Kristian mester ta?

Komo tata di tur kreyente, Abraham ta duna nos algun di e elementonan básiko ku ta sentral na unidat Kristian.

• Di promé, e a praktiká obediensia. “Pa medio di fe Abraham a obedesé ora e a ser yamá pa sali bai na e lugá ku e lo a risibí komo un herensia. I e a sali bai, no sabiendo na unda e tabata bayendo” (Hebr. 11:8, NKJV).
• Di dos, e tabatin speransa den e promesanan di Dios. “Pa medio di fe e a biba den e tera di promesa manera den un pais strañero, bibando den tèntnan huntu ku Isaac i Jacob, e herederonan huntu kuné di e mesun promesa; pasobra e tabata warda e stat ku tin fundeshinan, kua su konstruktor i arkitekto ta Dios” (Hebr. 11:9, 10, NKJV).
• Di tres, e a kere ku Dios lo a dun’é un yu hòmber i ku un dia su desendientenan lo tabata mes numeroso ku e streanan. A base di e kontesta aki, Dios a hustifik’é pa medio di fe (Rom. 4:1-3).
• Di kuater, e a kere den e plan di salbashon di Dios. E tèst di mas grandi riba e fe di Abraham a bin ora Dios a pidié pa sakrifiká Isaac riba Seru Moriah (Gen. 22:1-19, Heb. 11:17-19).

Tèstamènt Bieu ta deskribí Abraham komo un amigu di Dios (2 Kron. 20:7, Isa. 41:8). Su bida di fe, su obediensia firme, i su konfiansa den e promesanan di Dios ta hasié un ehèmpel di kon nos bida Kristian mester ta awor.

Ora Dios a yama Abraham pa ta Su sirbidó, E a skohe pa Su mes un pueblo pa represent’E na e mundu. E yamada i elekshon aki tabata un akto di e amor i grasia di Dios. E yamada di Dios na Israel tabata sentral na Su plan pa restorashon di henter humanidat despues di e destrukshon i desunion kousá pa e Kaida. Historia sagrado ta e estudio di e obra di Dios pa ku e restorashon aki, i un komponente krusial di e plan ei tabata e nashon di pakto di Israel.

Di akuerdo ku Deuteronomio 7:6-11, dikon Dios a yama Israel Su pueblo? Dikon E a skohe e desendientenan di Abraham komo Su pueblo?

E amor di Dios pa humanidat ta e motibu prinsipal pa e elekshon di Israel komo Su pueblo. Dios a hasi un pakto ku Abraham i su desendientenan pa preservá e konosementu di Dios atraves di Su pueblo i pa kousa e redenshon di humanidat (Ps. 67:2). Sinembargo, ta un akto supremo di amor ku a pone Dios skohe Israel. E desendientenan di Abraham no tabatin nada pa gaba di dje pa reklamá e amor inmeresí di Dios. “Señor no a establesé Su amor riba boso ni skohe boso pasobra boso tabata mas den kantidat ku kualke otro pueblo, pasobra boso tabata esnan di mas ménos di tur pueblo” (Deut. 7:7, NKJV).

Ta un kambio straño di balornan ku Dios ta uza pa selektá Su pueblo. Miéntras hende ta wak poder, sabiduria, i konfiansa propio pa selektá lidernan, Dios no ta skohe esnan fuerte i poderoso pa sirbiE sino ta skohe esnan ku ta sinti i rekonosé nan debilidat, lokura, i insignifikansia, pa niun hende lo por Gloria Su dilanti (1 Cor. 1:26-31).

Sinembargo, wak e privilegio ku tabata di nan: “Dios tabata deseá pa hasi di Su pueblo Israel un alabansa i gloria. Tur bentaha spiritual a ser duná na nan. Dios no a tene atras nada faborabel pa e formashon di karakter ku lo a hasi nan representantenan di djE Mes.

“Nan obediensia na e lei di Dios lo a hasi nan maravianan di prosperidat dilanti di e nashonnan di mundu. E ku por a duna nan sabiduria i abilidat den tur obra di astusia lo a sigui ta nan maestro, i lo a distinguí i elevá nan pa medio di obediensia na Su leinan. Si nan tabata obediente, nan lo a ser preservá for di enfermedatnan ku tabata aflihí otro nashonnan, i lo a ser bendishoná ku vigor di intelekto. E gloria di Dios, Su mahestat i poder, mester a ser revelá den tur nan prosperidat. Nan mester tabata un reino di saserdotenan i prensnan. Dios a ekipá nan ku tur fasilidat pa bira e nashon di mas grandi riba tera.” - Ellen G. White, Christ’s Object Lessons, p. 288.

Ellen G. White, “The Creation”, p. 44-51, i “The Call of Abraham”, p. 125-131, den Patriarchs and Prophets.

E propósito original di Dios den kreashon di humanidat ta ser reflehá tambe den e institushonnan di famia (Gen. 2:21-24) i e Sabat. E Sabat tabata intenshoná pa henter humanidat, manera Hesus a indiká klaramente den Marko 2:27, 28. De echo, su naturalesa universal ta ser mirá den e relato di Génesis mes, ora Dios a apartá e di shete, no solamente promé ku e yamada pa Israel sali afó komo Su pueblo di pakto ma asta promé ku introdukshon di piká. Ki un forsa di unidat poderoso e Sabat por tabata si tur hende a ward’é. E tabata e dia di sosiegu ku Dios a intenshoná pa rekordá e desendientenan di Adam i Eva di nan laso komun kunE i un ku otro. “E Sabat i e famia a ser igualmente instituí den Eden, i den e propósito di Dios nan ta permanentemente konektá huntu. Riba e dia aki mas ku riba kualke otro, ta posibel pa nos biba e bida di Eden. Tabata e plan di Dios pa e miembronan di famia ta asosiá den trabou i estudio, den adorashon i rekreashon, e tata komo saserdote di e hogar, i tantu tata i mama komo maestronan i kompañeronan di nan yunan.” - Ellen G. White, Child Guidance, p. 535.